Балезиноысь сэзь кылбурчиос, Ижысь йӧнтэм анай, Шарканысь гуртоослэн хоръёссы

Удмурт Дунне
By Удмурт Дунне 3 марта, 2017 13:37
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Глазов

 Зарни шыкыс

Куреггуртын ортчиз «Зарни шыкыс» фестиваль. Туэ отчы ёросысь 8 школаос люкаськизы.

Фестиваль трос пӧртэм ужпумъёсты быдэстэ: нылпиос калык культураен тодматско, эскерон уж нуыны но асьсэзыз сцена вылын возьыны дышетско. Кызьы вера Куреггурт школаысь дышетӥсь А. Иванова, нылпиос нырысь, коркась корка пыраса, этнографической материал люкало, собере быдэстэм ужзылэсь оглюкетсэ сцена вылын возьмато. Кылсярысь, Дондыкарысь пиналъёс возьматӥзы «Армие келян» удмурт йылолэз, Слудка школаын дышетскисьёс быдэстӥзы тусьты-пуньы сярысь вунэм ӟуч кырӟанэз.

Вуоно арын куреггуртъёслэн та фестивалез паськытатэмзы потэ, мукет ёросъёсысь но школаосты ӧтьыса.

Балезино

Сэзь кылбурчи

Анай кыллэн нуналэзлы сӥзьыса, Балезино каргуртын кылбур гожъясьёсын пумиськон ортчиз.

13 кылбурчиос пӧлысь тросэз литературалы сӥзем конкурсъёсын, ёросазы гинэ ӧвӧл, шаерамы но вормисе потылэмын ини. Кылсярысь, Пичи Юнда гуртысь 61 аресъем Надежда Биянова Ижысь Эшъяськон юртын, бесерман огазеяськонлы 25 ар тырмонлы сӥзем ужрадын, кылбуръёссэ лыдӟиз.

Ӝытын кылбурчиос куспын ортчиз ӟырдыт вожвылъяськон: вакчи дыр куспын гожтыны кулэ вал кылбур но залын пукисьёслэн юанъёссылы ӝогак гинэ валэктонъёс сётыны. Чебер кылбур гожтэменыз но юанъёслы чаляк валэктонъёс сётэменыз нырысетӥ радэ потӥз Люк гуртысь 16 аресъем Снежана  Макарова.

Ижевск

Сюлэмтэм анай

Кылем арын сентябрь толэзе Ижын улӥсь кышномурт вордскем нунызэ вииз.

32 аресъем кышномурт кӧто луэмез сярысь нокинлы ӧз иворты, нунызэ дораз лушкемен вордӥз. Луло пиналзэ, кагаз коробкае поныса, жуг-жаг куян доры поттӥз. Югдурез утён удысын ужасьёс куштэм нуныез со нуналэ ик шедьтӥзы ке но, больницаысен пинал кулӥз. Следствиея управленилэн Ижысь Ленин ёросысь ёзэз та нуналъёсы ивортэмъя, сюлэмтэм анаез суд ар но ӝынылы исправительной ужъёсы келяз.

Ува

Туп но куас

Кылем арняе Сурӟи гуртэ вуылӥзы Выль Мултанысь, Мушковайысь но Удугучинысь воргоронъёслэн но кышноослэн командаоссы.

Та пумиськонын соос спортъя шудонъёсын кужымзэс мертазы. Пиосмуртъёс «Свобода» хозяйстволэн кузьымъёсыз понна тупен хоккеен шудӥзы. Ӟырдыт ӵошатсконын ваньзылэсь кужмогес луизы мушковайёс.

Со вакытэ нылкышноос футболэн шудӥзы, татын тужгес шаплыосыз луизы сурӟиос. Берло вань командаос куас вылэ султӥзы. Нош ик ваньзэс азьпалтӥзы сурӟиос.

Шаркан

Гуртоослэн хоръёссы

3-тӥ мартэ ёросын пусъёзы пудо утисьёслэсь нуналзэс.

Туэ со ёросысь культурая юртын ортчоз, отчы 250 адями ӧтемын. Шарканъёслы вань маин данъяськыны. Кылем ар понна 45 сюрс 326 тонна йӧл кыскемын, чакламын вал 43 сюрс 800 тонна кыскыны. Котькинлы адӟем карымон тыршо «Ошмес», «Кипун», «Восход» но Н. Собин фермер хозяйство. Ужрадлэн нырысетӥ люкетаз пудо утисьёсты сӥлы карозы. Нош кыкетӥ люкетаз  гурт удысын ужасьёслэн 9 коллективъёссы хоръёслэн вожвылъяськоназы пыриськозы.

Дэбес

Лымы выжыкыл

Тыловай черкогуртын 2-тӥ арзэ «Лымыпог» фестиваль ортчиз.

Туэ отчы 100-лэсь трос адями пыриськиз. Дэбес ёросысь сяна, Эгра ёросысь Зураысь но Воткинск палась куноос вуылӥзы. Дэбесъёс ульчаосазы лымыпогъёс лэсьтӥллям, нош культура юрт вӧзын лымы оркестр сылӥз, вӧзаз оперной  кырӟасьсы но вал — Тыловайын Г. Корепанов-Камский крезьгурчи вордскемын. «Лымыпог» фестиваль дыръя дунъет сётӥзы кырӟась-верась коллективъёслы но. Тыловай муниципал кылдытэтэн кивалтӥсьлэсь Виктор Никитинлэсь нимысьтыз кузьымзэ — улэп атасэз — Воткаысь куноос утӥзы.

Дэри

Выль маршрут

20-тӥ февральысен ветлыны кутскиз «Первомайской каргурт — 21-тӥ гастроном» автобус.

281 номеро автобус ортче Октябрьской каргурт, Ижысь Ленин, Пушкин ульчаостӥ но отӥяз «Металлург» городоке мынэ. Ужан нуналъёсы 25 рейс  лэсьтэ, нош шутэтскон нуналъёсы — 10. Пусйыны кулэ, городэтӥ ветлӥсь мукет автобусъёсын сямен ик, та маршрутын но проезднойёсын ветлыны луэ, пӧртэм льготаос вань.

Можга

Армян пи — мистер

Кылем арня пумын городысь 14-17 аресъем пиос пӧлын «Мистер Этно» вожвылъяськон ортчиз.

Ужрадэ пыриськизы пӧртэм выжы калыкъёслэн пиоссы. Соос визьзэс сыназы пӧртэм эскеронъёс пыр. Возьматыны кулэ вал анай кылынызы кырӟаны-вераны быгатэмзэс, йылол-сямъёссэс утемзэс. Залын пукисьёс огдырлы вуылӥзы кадь Армение, пыр-поч тодматскизы чиганъёслэн костюмъёсынызы, шулдыръяськизы ӟуч, удмурт, бигер пиосын ӵош. Котькинлэсь трос балл люказ но «Мистер Этно» ним басьтӥз армян пияш Арам Ростамян.

 Кияса

Инкуазь сярысь кырӟазы

Киясаысь культура юртын, Инкуазез утён арлы сӥзьыса, «Асьмелэн дормы — музъем» ёрос фестиваль ортчиз.

Фестивальын быдэстӥзы гуртэн, шаерен, Россиен но инкуазен герӟаськем кырӟанъёсты. Кужымзэс эскеризы оген, кыкен но ансамблен кырӟасьёс.

— Ваньмыз ик фестивале пыриськемъёс рос-прос дасяськиллям. Сирень сярысь кырӟанэз синмаськымон быдэстӥз Эльдыбай культура юртын ужась Николай Никитин. Татьяна но Вероника Атееваослэн дуэтсы кыкетӥ инты басьтӥз. Куинетӥ инты шедиз Подгорной каргуртысь культура юртысь вокальной ансамбльлы, — вера Кияса ёросысь культурая управлениен кивалтӥсь Марина Митрошина.

Юкаменск

Тулыс вуиз

Ёросын тулыс бусы ужъёслы дасясько.

Кызьы ивортӥз ёрос администрациысь гурт хозяйствоя ёзэн кивалтӥсь Амир Бекмансуров, вань хозяйствоос тулыс бусы ужъёслы дасяськонзэс мытӥзы ни. Та ласянь азьпалан «Нива», «Луч», «Куркан», «Ежевский», «Родина» хозяйствоос, бере кыле «Урняк». Шуныт гаражъёссы ӧвӧл на «Ежевский», «Урняк», «Восход» но «Верх-Уни» хозяйствоосын. Быгатэмзыя техника но удалтытӥсь сылалъёс басьтыны выро. Сюлмаськытэ ужась киослэн тырмымтэзы. Соин валче гырон-кизён вакытэ шуг-секытъёс кылдозы, вылды.

Эгра

Шыръяны юрттӥсь тыл

Ёросысь куд-ог хозяйствоос фермаосазы светодиодной лампаос пуктылыны кутскизы.

Гурт удысъя управлениысь валтӥсь инженер Игорь Гришин верамъя, таӵе лампаос коньдонэз шыръяны юртто, кема ужало но яркыт пишто. Кылем арын светодиод лампаос ёросын нырысь пуктӥзы  «Чутырский»  совхозысь Чемошур фермаын. Та вакыт сыӵе тыл кыско Мазьги гуртысь «Рассвет» хозяйствоын. Озьы ик та уж борды итӥськыны дасяське «Зура агрокомплекс». Мукет хозяйствоосты но выль технологиос борды кыском, оскыто гурт удысъя управлениын.

 

 

Удмурт Дунне
By Удмурт Дунне 3 марта, 2017 13:37 Updated