Балезино ёросын — чорыган, Киясаын — гурт шудонъёс, Глазовын — чипы бырон

Удмурт Дунне
By Удмурт Дунне 10 марта, 2017 13:21
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Алнаш

 Данъязы пор пиез

Гондыргуртысь школаын буре вайизы Иван Ямаковез, та нуналъёсы солы 95 арес тырмысал.

Ужрадэ люкаськылӥзы артысь гуртъёсын улӥсьёс, Грак ёросысь Пор Вожой гуртысь, Ижысь но Татарстанысь Менделеевск ёросысь Ильнет гуртысь куноос. Нош радъязы сое школаын ужасьёс но шаерысьтымы поръёслэн огазеяськонзы. 2 час ӵоже кыстӥськем ӝытын трос шуныт кылъёс веразы Иван Ямаков сярысь. Быдӟым оже пыриськем мурт, Грак ёросысь Пор Вожой школаен 4 ар, Алнаш ёросысь Удмурт Гондыр школаен 27 ар кивалтэмын. Шаерысьтымы пор огазеяськонлэн ужаз мыло-кыдо пыриськылӥз, нош шутэтскыны потыса, кылбуръёс, веросъёс гожъяз, «Мариец я» книга поттӥз.

Ижевск

Бере эн кыле

Городысь 24 школаосын 1-тӥ классъёс тырмемын ни.

1-тӥ февральысен анай-атайёс 1-тӥ классэ мыныны дасяськись пиналъёссэс школае гожто. Туннэ нуналлы школаосы 5 сюрс 833 куриськон вуэмын ни. Берло арня куспын гинэ та лыдпус 229-лы йылӥз. Озьы, Ижысь 24 школаын 1-тӥ классъёс тырмемын ни. Куд-ог анай-атайёс малпало ке но, улон интызыя, корказы вӧзысь, школаосы пиналзэс одно кутозы шуыса, соос но интытэк кыльыны быгатозы. Пиналъёсты матысь школае куто, отын интыоссы вань ке.

Красногорск

Улэп кыл

28-тӥ феврале Дёбы гуртысь культурая юртын кылбур лыдӟонъя «Улэп кыл» фестиваль ортчиз.

Таӵе ужрад ёросын арлы быдэ луэ. Со сӥземын Анай кыллэн нуналэзлы но шаерысьтымы дано артистка Д. Поторочина нимо ёрос премиез сётонлы. Кылбур лыдӟонын вормисе потӥзы Красногорскысь пиналъёс Анастасия Поторочина но Евгений Веретенников. Д. Поторочина нимо премия арлы быдэ сётӥське, одӥг аре — коллективлы, мукетаз — нимаз адямилы. Туэ со шедиз удмуртъёслэн «Ошмес» огазеяськонзылэн ёзчиезлы Ольга Семёновалы.

Балезино

Вормисьлы — визнан

Ёросысь 80 пала чорыгасьёс 2 час ӵоже визнаса пукизы.

Чорыганы яратӥсьёслэсь эскеризы йӧ портыны быгатэмзэс но. Кылем арын сямен ик, туэ но арлыдоос пӧлын котькинлэсь ӝог вал Дмитрий Русских — 34,8 секунд куспын йӧэз портӥз. Егит пиос пӧлын та конкурсын вормиз Степан Васильев, йӧэз портӥз 32,5 секунд куспын. 2 час куспын котькинлэсь трос чорыг поттӥз Дмитрий Мартынов, тужгес бадӟым чорыг кутӥзы Владимир Иванов но Елена Веретенникова, нош Наговицынъёс тужгес чорыгась семьяен ялэмын. Вань вормисьёслы визнан кузьмазы, ужрад йылпумъяськиз ӝук сиёнэн.

Кез

Шулдыр ӵошатскон

Кылем арня пумын Кез каргуртысь спортъя нылпи школаын дышетон удысын ужасьёс понна шулдыр ӵошатскон ортчиз.

Бызьылыны-тэтчаны быгатэмзэс возь-матӥзы 20 нылкышно командаос: школаосын но нылпи садъёсын ужасьёс, ватсаса тодон-валан сётон удысын тыршисьёс. Пӧртэм ӵошатсконъёс пыр потыса, котькинлэсь трос очко люказы Чепца, Степанёнки но Кезысь 1 номеро шор ёзо школаосысь командаос. Вормисьёс грамотаосын пусъемын, нош вань пыриськисьёс — ческыт кузьымен.

Пичи Пурга

Семьяосты данъязы

Россиысь загсъёслы 100 ар тырмонзылы сӥзьыса, ёрос загсэ ӧтемын вал трос ныло-пиё семьяос.

Анай-атайёслы но нылпиослы шуныт кылъёс веразы ёрос администрациысь семья ужпумъёсъя отделэн кивалтӥсь Г. Пушкарёва но егитъёслэн «Каскад» центренызы кивалтӥсь С. Токарева.

Нылпиосты будэтон, курон-косонъёсын но тодэ ваёнъёсын «Анай-атайёслы 10 ӟечесь сӥзёнъёс» бичет кузьмаз Пичи Пурга загсэн кивалтӥсь Л. Коровина. Пичи Пурга черкогуртын улӥсь В. Лебедева мадиз 5 пиоссэ будэтэмез сярысь.

Вотка

 Куас вылэ султӥз

900 адями

Кылем шутэтскон нуналъёсы «Камские дали» шутэтскон базаын олимпийской чемпионкалэн Галина Кулаковалэн призэз понна куасэн бызьылонъёс ортчизы.

Таӵе бадӟым ужрад ёросын арлы быдэ ортчылэ. 4-тӥ южтолэзе куасъёс вылэ султӥзы 12 муниципал кылдытэтысь 500 пала пиналъёс, егитъёс но арлыдоос. Озьы ик ужрадэ мылысь-кыдысь пыриськизы ёросысь пӧртэм предприятиосын но учреждениосын ужасьёс. Куасэн бызьылыны мылкыд каризы бускель ёросъёсысь вуэм куноос но —  ваньмыз-ӧвӧлэз 900 адями куас вылэ султылӥз. Ужрадэ куное ӧтемын вал Галина Кулакова но куасэн бызьылонъя СССР-лэн чемпионкаез Нина Парамонова.

Кизнер

 72 час ӵоже

Кизнер ёрос администрациын удмурт кылъя курсъёс ужало.

Анай кылэз дышетыны 15 адями мылкыд кариз. Соосты люканы мыло-кыдо тыршиз ёрос администрацилэн тӧроезлэн воштӥсез Валентина Орехова. Нош курсъёсты нуэ Кизнер черкогуртысь удмурт кыллы но литературалы дышетӥсь, Удмуртиысь дано дышетӥсь Нина Крючкова.

— Урокъёс ортчо арняяз 2 пол, уж бере, талы огъя 72 час висъяськоз, — шуэ Нина Якимовна. — Нырысетӥ урокамы вераським удмурт кыллэн кулэлыкез сярысь но кӧня ке тодмо удмурт кырӟанъёсты быдэстӥм. Урокъёсмы сӥземын шаертодонлы, инты нимъёслы,  дӥськутлы, тӥрлыклы. Куинь толэзь кыстӥськись курсмы пыр потэм адямилы сертификат сётӥськоз.

Эгра

Шуг-секытъёс вормемын 

3 нунал ӵоже Эгра каргуртын ортчиз пиналъёслэн «Кышкытлыклэсь утиськонъя школа» тол ӵошатсконзы.

Туризмъя  ӵошатсконэ 14-16 аресъем пиналъёс люкаськизы: 12 ёросысь но 4 городысь  17 командаос. Соос 5 пӧртэм шуг-секытъёс пыр ортчизы. Котькинлэсь шаплы луизы Ува ёросысь пиналъёс, утчанъя-утёнъя конкурсын вормиз Вотка ёросысь команда, сётэм маршрутэтӥ котькинлэсь ӝог ортчизы но кырӟан-веранэн паймытӥзы эграос, суй кужымез эскеронын висъяськизы сюмси нылпиос. Огъя зачётын вормисе потӥзы Вотка, Ува но Эгра ёросъёсысь командаос.

Глазов

 17 сюрс чипыос быризы

2-тӥ мартэ Глазовын тылобурдо вордон гидын тылпу гомаз.

Россиысь МЧС-лэн Удмурт Республикая Валтӥсь управлениезлэн пресс-службаез ивортэмъя, тылобурдо вордон фабрикалэн бройлер чипы будэтонъя цехысьтыз 10 квадрат метр быдӟа интыез ӝуаны кутскиз вал. Гомась тылэз татын ужасьёс ас кужыменызы кысыны быгатӥзы ке но,  ӵынын усыкмизы 8 нуналъем 17 сюрс чипыос.

Кияса

Крестьян шудонъёс

3-тӥ феврале Уддяди гуртын нырысетӥ крестьян шудонъёс ортчизы.

Вожвылъяськонэ Кияса но Пичи Пурга ёросъёсысь 11 команда люкаськиз. Гурт удысын тыршисьёс но семьяос куасэн бызьылӥзы, гозы кысказы, кивалтӥсьёс ыбылӥськизы но дартсэн шудӥзы. Кивалтӥсьёс пӧлын ыбылӥськыса котькинлэсь трос очко люказ Игорь Кузнецов («Дубровск»), дартс шудонын — Александр Вахрушев («Киясово»). Семьяос пӧлын вормизы Ивановъёс («Аксакшур»), Саркисянъёс но Ивановъёс («Киясовский»). Огъя командаен вормизы «Киясовский» агрокомплекс, «Аксакшур» СПК но Мазитовъёслэн фермер хозяйствозы.

Юкаменск

Шулдыръяськизы ӵошатскыса

Ёросысь культура юртын ортчиз эктонъя но кырӟанъя вожвылъяськон.

Отчы пыриськизы муниципал кылдытэтъёсысь командаос, пӧртэм предприятиосын но организациосын ужасьёс. Ужрад сӥземын вал воргоронъёслэн но нылкышноослэн праздникъёссылы. Сцена вылэ бӧрсьысь бӧрсе, огезлэсь усто мукетыз, потазы эктӥсь но кырӟась коллективъёс. Жюрилы секыт ик йӧтӥз нырысетӥ инты сётыны — ӵошатсконлы ваньмыз тыро-пыдо дасяськиллям. 98 балл люкаса, нырысетӥ интые потӥз Юкаменск администрацилэн  командаез.

Удмурт Дунне
By Удмурт Дунне 10 марта, 2017 13:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<