Утялты жагдэ!

Удмурт Дунне
By Удмурт Дунне Февраль 7, 2017 16:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кызьы дышетсконо чылкыт улыны

Удмуртиысь Инкуазез утёнъя министерство ивортэмъя, шаерамы арлы быдэ 480 сюрс тонналэсь ятыр жуг-жаг люкаське, котькуд адямилы быдэ 319 килограмм пала. 17 процентэз гинэ выль арбери лэсьтонэ кутӥське, кылемез музъеме согиське. Ижысь но город котырысь жагез нимаз октон понна нюръяське «Зелёный паровоз» огазеяськон. Солэн ужамез сярысь вера одӥгез азьветлӥсь Андрей Безухов.

Пумен дышиськом ини жагез нимаз-нимаз люканы.

— Кызьы кылдӥз «Зелёный паровоз» огазеяськон?

— Инкуазез утён, чылкытлык понна сюлмаськись егитъёс кутскизы бумагазэс нимысьтыз пунктъёсы нуллыны. Та уж борды тросгес адямиосты кыскон понна соос ик малпазы коркаосы ялонъёс ошылыны, ку, кытчы луоз макулатураез вайыны. Берло макулатура бичан интыосты радъялляны кутскизы городысь администрациос котырын, адямиос отчы вайылыны быгатӥзы ини вуж батарейкаосты но ртуть лампочкаосты. Озьы пумен уж паськытаз но, «Зелёный паровоз» огазеяськон кылдӥз, жагез нимаз бичанъя «Разделяйка» ортчылыны кутскиз. Али та проект улсын толэзьлы быдэ ортчытӥськом бумагаез, полиэтилен бутылкаосты, пакетъёсты, пияла банкаосты но мукетсэ бичанъя акциос.

— «Разделяйкаын» октэм арбериосты кытчы кариськоды?

— Жаг кутӥське выль вуз лэсьтыны. Ми сое дунтэк сётӥськом жагез висъянэн вырись огазеяськонъёслы. Кылсярысь, вуж бумагалэсь выльзэ лэсьто асьме дорын но Татарстанысь Набережные Челныын. Пластик бутылкаосты векчи юдо но выльёссэ потто Ижысь, Можгаысь, Набережные Челныысь предприятиос. Полиэтилен пакетъёс кутӥсько бинялтон плёнка, полимерно-песчаной плитка, брусчатка, черепица поттонын. Пияла бутылкаослэсь выль пияла арбериос лэсьто.

— Жуг-жагез нимаз октэм сяна, мукет ужрадъёс но ортчытъяськоды.

— Зэм, ми пӧртэм удысъёсъя ужаськом. Нырысь ик жуг-жагез утялтонъя культураез ӝутон понна сюлмаськиськом. Радъялляськомы школаосын, вузъёсын, пӧртэм огазеяськонъёсын пумиськонъёс. Кенешиськом, малы кулэ жуг-жагез нимаз утялтыны.

Сюлмаськиськом городын вож интыосты йылэтон сярысь но. Тулыс яке сӥзьыл студентъёсын, дышетскисьёсын потӥськомы писпу мерттыны. Озьы Ижысь выль ӝутӥськись корка котыръёсты садъёсын шулдыртӥськом. Кылем аръёсы, асьмеос ик кидыс бичаса, тыпы мерттылӥм. Но алигес шедьтӥмы выль эш: Дэри ёросысь уд будэтонъя огазеяськон соглаш луиз вож будосъёссэ висъяны.

Тыршиськомы юрттыны питомникъёсын улӥсь коӵыш-пуныослы но. «Разделяйка» ужрадмес ортчытыкумы ик, «Кот и пёс», мукет огазеяськонъёсысь пӧйшуръёслы шуныт дӥсь октӥськомы. Берпуметӥзэ таӵе ужрадэз ортчытӥмы кылем ар пумын. Солэсь азьвыл гужем октӥмы вал вуж мискаосты. Сэрпалтэм интые, соосты ӟеч ужлы кутӥм — пуныослэн сиськон тусьтыоссы луизы.

Озьы ик ми дӥне адямиос ваё вуж книгаоссэс. Соосты нуиськомы арлыдоослэн юртъёсазы яке нылпи юртъёсы.

Кӧня ке ар талэсь азьло Ижысь мебель лэсьтӥсь компаниен валче «Бум-бокс» ужрад малпамы. Компания макулатура бичан коробкаосты дунтэк сётъяз. Соосты адямиослэн вазиськемзыя подъездъёсы, организациосы пуктылӥмы. Отысь бумагаез октыны жуг-жугез утялтонъя компания ачиз вуылӥз. Но вуж бумагалэн дуныз кулэсмиз но, компаниос тазьы ужамлэсь пайдазэ ӧз адӟе ни. Али нош ик малпаськомы та ужез улӟытыны.

— Кемалась ик ӧвӧл тӥ пумиськылӥды Иж городлэн йырыныз Ю. Тюринэн, вераськиды жуг-жагез утялтон сярысь.

— Ми тыршиськом кусып возьыны городысь кивалтон ёзъёсын. Юрий Александровичен вераськимы пӧртэм жуг-жаглы нимаз контейнеръёс пуктон пумысен. Со та ужлы дурбасьтӥз, калык пӧлын ӟеч сямез вӧлмытоно, шуиз.

Но туж потэ вылэм, ӟоз.

 

— Али городысь котькуд азбарын жуг-жаглы нимаз контейнеръёс пуктылэмын. Озьыен, «Разделяйкалэн» кулэлыкез сокем ӧвӧл ни.

— Жуг-жаг поттӥсь компаниос «Зелёный паровоз» дэмламъя ик пластик бутылкаосты нимаз октыны кутскизы. Нош али жуг-жагез висъясь МСК компания пуктылыны кутскиз пластик бутылкаослы, бумагалы нимаз контейнеръёс. «Зелёный паровоз» дэмламъя сыӵе арбериос кылдӥзы Центральной но Южной автовокзалъёсын, З. Космодемьянскаялэн урамаз 12-тӥ но 14-тӥ коркаос вискын, Кунгурцевлэн урамаз «Столичный» комплекс но 29-тӥ юрт котыръёсын, И. Закировлэн урамаз 9 номеро юрт дорын. Та уж азинтӥськоз шуыса, оскиськом.

— Кылем арын тӥ кичӧлтэм улсын жуг-жагез нимаз бичаны ӧдъязы Дэри черкогуртын но.

— Дэрие улыны выжеме бере сюлмаськыны кутски, малы татын жуг-жагез нимаз уг бичало шуыса. Озьы малпан кылдӥз дэриос понна но «Разделяйка» ортчытыны.  Ачим ик ветлӥ Дэри муниципал кылдытэтлэн йырыныз Роман Липинэн кенешыны. Та ӟеч уж, шуиз со. Ижын «Разделяйка» сярысь Интернет, газет-журналъёс, телевизор пыр ивор ӝог вӧлме ке, Дэриын та ласянь секытгес. Ёрос газетын вуоно ужрадмы сярысь ивор  печатласьком ке но, сое лыдӟисьёс сокем трос ӧвӧл. Азьланяз малпасько волонтёръёсты золгес ужатыны.

— Городын жагез нимаз утялтыны луонлык вань ке, ёрос центръёсын, гуртъёсын силёзэс поттыны курадӟо. Адӟиськоды-а та югдурез тупатыны луонлыкъёсты?

— Гуртын улӥсьёс ӧвӧл дышемын жаг понна дун тырыны. Тае адӟисько Дэри черкогурт вылын но. Адямиос силёзэс мешокъёсын нюлэскы сэрпалляло. Чагиськы вылэм лушкем ужась адями  вылэ, оло, тазьы ӧй йыртэмасал ни. Шуом, участковойлы вераны луысал, но тросэзлэн йырзэс висьытэмзы уг поты. Али адӟисько одӥг луонлык: муниципал кылдытэт калыкен вераськыны кулэ, жагед понна ачид ик кыл кутыны кулэ шуыса. Адямиос мед валасалзы: кӧня силё люкад, сомында ик тыроно луод.

Ангелина Снигирёва

Туспуктэм: vk.com

 

Удмурт Дунне
By Удмурт Дунне Февраль 7, 2017 16:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<