Туспуктэм интые верос!

Удмурт Дунне
By Удмурт Дунне Февраль 7, 2017 17:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Ар пумын малпамы поръялскыны удмурт «тусвотэслэн» висъетъёстӥз. Асьсэлэсь улонзэс верам сяна, маин милемыз тодмато удмурт егитъёс?

Кутском 26 ар талэсь азьло кутскем этнофутуризм бордысен (макем та кыл милемлы акыльтӥз ни), озьы ке но али но туж тунсыко учкыны вашкала арбериосты, йырдэ тӥяны удмурт мадиськонъёс но суредъёс бордын. «Трос ымныро» — кырӟась, кылбурчи, тодосчи — Богдан Анфиногенов [bogdananf] аслаз туспуктэмъёсыныз историе кельтэ совето вакытъёсы поттэм книгаосысь бамъёсты. Богдан историк сямен милемыз тодматэ кылем дауръёсысь кунгож сьӧрысь но ӟуч тодосчиослэн удмуртъёс сярысь гожъямъёсынызы, кылбурчи сямен — удмурт кылбурчиослэн ужъёсынызы, шедьтэ вашкала суредъёсты но туспуктэмъёсты, кытын, кылсярысь, Пичи Пурга ёросысь агитатор Зоя Титова колхозын ужасьёслы журнал лыдӟе. Тунсыко ук! Вашкала удмурт газет-журналъёс, книгаос кыкетӥзэ улњо. Но вашкалаеныз ӵош со «инстаграме» кельтэ удмурт культуралэсь туала пытьызэ но.

Алигес «ВКонтакте» вотэсбамын усьтӥськиз удмуртъёслэн куиськонзылы сӥзем бам [vk.com/udmweaving]. Радъясьёсыз пӧлысь огез — Татьяна Тихонова [tanitini]. Солэн «Инстаграмысьтыз» но шедьтыны луэ куэм пужыосты, пӧртэм дэраосты, дӥськут арбериосты, Т. Тихонова одно ик пусъе ужъёслэсь авторъёссэс. Дэра куон — со сыӵе ик искусство, суредаськон я кылбуран кадь.  Вераны кулэ: нылаш, Киужъёсъя элькун центрен радъям мастер-классъёсы ветлыса, куиськыны кутскиз. Али аслаз куиськон станокез но вань ни. Та 2 бамъёсы пыраса, тодматскыны луэ Удмуртиысь зарни киё кышномуртъёсын, соослэн ужъёсынызы, удмурт куиськонлэн историеныз. Удмуртиысь киужъёсъя центръёс — Россиысь устоосыз пӧлысь! Эшшо Таня керттӥське, вуриське, эктэ, кырӟа…

Пыром «Мугур» студилэн бамаз [mugurstudio]. Горд сюйлэсь лэсьтэм кружкаос, тусьтыос, шуланъёс, чыртывесьёс паймыто. Мынам, кылсярысь, сакырме туж потэ воземе гранат тусо посудын яке сиськеме чорыгъёсын чебермам тусьтыысь. Жаляса верано, «Мугур» милемлы уг иворты, кызьы со «шедевръёс» лэсьтӥсько но кыӵе горд сюй кутоно кружка лэсьтыны. Бакча берысь сюй уз яра, дыр, малпасько. Мед вылэм!

Нош табере вамыштомы гуртэ! Шаркан ёросысь Мувыр гуртын 90-тӥ аръёсы лэсьтӥзы удмурт кино — «Тень Алангасара». Нюлэс дурын юромо гурт — куала, пу лапасъёс, коркаос, капкаос — пуктылэмын вал. Кыӵеесь соос али? [alangasar18] бамысь туспуктэмъёс шоры учкыса, отчы мынэм потэ! Тӥни отын уло кадь вашкала удмуртъёслэн лулъёссы. Шаркан ӧте кадь — Удмуртиысь пичи Швейцариын сомында тунсыко гуртъёс! Быгы, Вортча, Мувыр… Бызе йӧнатӥсь ошмес, сикамы нюлэсбабаен ӵош трос пӧртэм макеос уло. Удмуртиысь улонэн пыр-почгес тодматскемды потэ ке, утчаське #ОткрываяУдмуртию, #Удмуртия хештэгъёсъя, асьтэос но соосты пуктылыны эн вунэтылэ.

Кызьы ортчо гуртысь творческой школьниклэн нуналъёсыз? Адӟиське, Дима Волков [purodima] яратэ гуртсэ, эшъёссэ, яратэ пастуканы но суредаськыны. «Адямиос пуныосты поръяны поттало, нош мон — скалэз», «9-тӥ Май туннэ карим», «Пыжем картошка» — валэкто суредъёссэ таџе кылъёс. Пуроысь пиналъёс арганэн, гитараен шудо, туп ӵыжало, «Италмас» ансамбльлэн концертаз вуыло… Шудо улон, мар шуод на.

Юлия Шахтиналэн [gabida] туспуктэмъёсыз — суредъёс выллем. Адӟиське, котькуд ужзэ со мертаса, малпаськыса лэсьтэ — та вакытэ, куке котькудӥз минутлы быдэ сю туспуктэм телефоназ лэсьтэ, чеберез адӟыны быгатон туж дуно. Нылашлэсь сюлэмзэ вырӟыто акшан вакыт, гурт инкуазь, сяськаос… Фотоосаз туж трос толэзьёс но ненег, пеймыталэс буёл пумиськыло.

Берло дыре «инстаграмын» туж трос егит анайёс кылдӥзы. Удмурт «инстаграмлэн» вордӥськон вакытаз кылдэм туспук-тылӥсьёслэсь табере, удмурт ужрадъёсы ветлэмзы, выль проектъёсты быдэстэмзы интые, лыдӟиськом: «Шудо декрет отпуск», «Пиосме кыкназэс кельтӥ», «Шудо анай» но мукет.

Вань на, малпасько, огназы улӥсь сюлэмъёс но, кин утча, но уг быгаты шедьтыны аслэсьтыз парзэ. Таӵеос понна пайдаё луоз селебрити Настя Петровалэн [pechenkaalnashy] бамыз. Со дырын-дырын гожъялля пиос но нылъёс сярысь соослы пар утчан вылысь. Маин соос тунсыкоесь но аспӧртэмлыкоесь? Кылсярысь, Кузёбайысь Александр сярысь со гожтэ: «Тыныд кулэ та лудкечпи: тон яратӥськод ке футболэз, яратӥськод ке тылскем дурын пукыны, кизилиос шоры учкыны, палаткаын уйдэ ортчытъяны…» Но тужгес но трос кузтэмъёс пӧлын  нылъёс! Озьы, озьы, пиос!

Оглом вераса, удмурт «инстаграм» тунсыколэсь но тунсыко. Туж возьмаськом выль тодон-валан сётӥсь, чебер туспуктэмъёсын, творчествоен герӟаськем бамъёсты. Уго селфиос мукет туспуктэмъёс пӧлын ышо, нош улон сярысь выль малпан сюлэме кыле.

Айно

 

Удмурт Дунне
By Удмурт Дунне Февраль 7, 2017 17:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<