Трокайёс будозы!

Удмурт Дунне
By Удмурт Дунне Февраль 4, 2017 15:05

Зинаида Рябинина, валтӥсь редактор

«Удмурт Кенешлэн» таяз арняе ортчем исполкомаз туж кулэ ужпум ӝутэмын вал — элькунмылы удмурт кадръёс дасян. 

Асьмеос ялан ӝожтӥсь-киськом, вылӥосын удмурт кадръёс ӧвӧл шуыса. Со зэмзэ но озьы — коть Кун Кенешез, коть Правительствоез басьты, асьме выжыысь потэм кивалтӥсьёс но специалистъёс туж ӧжыт. Со пумысен асьмеос нокинэ пыкылыны ум быгатӥське, асьмеды сяна, угось власте кыӵе выжыысь луэмъя кутон сярысь нокыӵе курон ӧвӧл, кивалтӥсьёслы кулэ ужзэ ӟеч тодӥсь адями. Нош мукетъёсын вожвылъяськыны быгатон понна асьмелы дышетсконо но пиналъёсмес, егитъёсмес дышетоно, шуиз исполкомлэн ёзчиез Александр Скобкарёв.

Нялтас вераса, Александр Скобкарёв трос аръёс ӵоже ачиз кивалтэмын Правительствоысь кадръёсын ужанъя управлениен. Али вуоно кивалтӥсьёсты дышетэ Кун службая академилэн Ижысь ёзаз.

— Уг ваты, таӵе сюлмаськонзэ «Удмурт Кенеш» азьло но вералляз, — шуэ Александр Николаевич, — но мон малы ке со ужпум дорозь ӧй вуы…

Но туннэ нуналлы «Удмурт Кенеш» лэсьтӥз ини Йӧскалык кадръёс дасянъя положенилы инъет. Отын пыр-поч валэктэмын, кызьы радъяськоз уж. Валтӥсез — резерв кылдытон, со луыны кулэ котькытын: политикаын, экономикаын, творческой удысын. Нимысьтыз резервъёс кылдытыны чакламын элькун но интыысь (муниципал) ёзъёсы. Собере ини ужрадъёс кутоно та адямиосты нимысьтыз дышетон яке ватсаса тодон-валан сётон пумысен. Оло нош, адямиез ӧжытак донгыны яке кудаз ке ӧсэ йыгаськыны гинэ юрттыны кулэ. Соин ик кин шӧдэ аслэсьтыз быгатонлыкъёссэ-луонлыкъёссэ — азьлань!

Валамон ини, «Удмурт Кенешлэн» «зарни списоказ» сюрон уг сӥзьы на вормон, но огазеяськон ӵектылоз отчы шедемъёсты Кадръёсын ужанъя элькун комиссие. Дурбасьтозы-а отын асьме адямилы, нокин меӵак уз вера, но оскон вань, лыдэ басьтытэк уз кельтэ шуыса. Угось та рад вераськон уг мыны «кураськон» сярысь (кутэ, малы ке шуоно ми удмуртъёс!), та рад асьмеос визьмынымы вормыны кулэ. Алексей Загребинмы кадь, кылсярысь.

 

Удмурт Дунне
By Удмурт Дунне Февраль 4, 2017 15:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<