Шайтан Берлин

Удмурт Дунне
By Удмурт Дунне 6 февраля, 2017 15:25
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

 Ижысь киноклубын ортчиз немец киноя фестиваль. Мынам мадеме потэ фестивалез усьтӥсь киносуред сярысь — со Себастьян Шипперлэн 2015-тӥ арын пуктэм «Виктория» фильмез.

 

 

Тодӥсько вал, та фильм лэсьтэмын одӥг бадӟым дублен. Та понна ик пыдъёсы монэ кинотеатре кыскизы. Син азяды пуктэ ай: быдэс кино, 138 минут, лэсьтэмын, камераез одӥг пол но киысь лэзьятэк! Озьыен, монтаж кулэ ӧй вал. Вань шуг-секытэз усиз оператор вылэ. Уйин кык час ӵоже со бызьылӥз валтӥсь геройёс сьӧры Берлин кузя…

Кино техно крезьгурен кутске. Виктория нимо ныл (Лайя Коста) эктэ уй клубын. Нырысетӥ кадръёсысен ик выйиськод Берлинлэн мурӝол дуннеяз. Юнме гинэ уг шуо критикъёс, киноын Берлин ачиз герой. Ми соин тодматскиськом уйин, нош люкиськиськом ӵукна. Куке вань ужъёс — йыружъёс но — лэсьтэмын ини. Виктория ачиз уг на тоды, мар сое вите та уйлэн пумаз. Со огшоры нылаш, вуиз Германилэн шоркараз пӧсь Мадридысь, со татын нокинэ уг тоды, немец кылын уг вераськы. Мар кыле на огназ нылашлы? Йыр поромытозь эктыны. Тани куинь час гинэ кыле на уж дураз мынытозь, пичи кафеез усьтон вакытозь: соин ик нылмурт, клуб пала кельтэм великез вылэ кечырскыса, дораз бертыны вырӟе. Ӵапак соку пумитаз сюро 4 етӥз пиос. «Сузэр, ойдо милемын!» шуыса, шоркар пиос нылмуртэ сьӧразы поръяны ӧтё-сьќлтало…

Уй Берлин — эрико но пӧртэм тусо кар: мурӝол-клубысь потыса, ми тубиськом ӝужыт коркалэн липет йылаз. Табере вылӥысен чакласьком ваньзэ: тани тон куалектэмын, героиняен ӵош улӥе тэтчыны дась, утыр лӧптӥськод, серекъяськод пиослэн гольтрес мадемъёссы бӧрсьы, собере сюлмыд нёркак луэ — тани та верамзы мыным но тупа (мыным но вӧсь вал: татуировка лэсьтыны малпай — медам ноку но вунэты со учыр сярысь). Учкиськод киноез сураськем йырсазё муртлэн синмыныз — камера ялан выре но отӥ-татӥ берга, ачид но сыӵе ик луиськод — аслыд инты уд шедьтӥськы. Нош самой жадьытӥсь интыын, пирсэкъян мылкыд люкаськем бере, зулён-тэтчан шуак воштӥське буйгатӥсь крезьгурен… Кылсярысь, куке Виктория огзэ пияшез ужано кафеяз куно каре, вань кырсь малпанъёс кошко фортепианолэн чылкытатӥсь крезьгуреныз ӵош, нылаш клавишаос борды йӧтскем бере. «Мар произведение вал та?» — «Мефисто-вальс». — «Мефисто, со сыӵе шайтан (дьявол) выллем?» — «Бен». — «Мыным кельше шайтан». — «Мыным но». Геройёс серекъяло.

Бен, та кино — шайтанъяськон. Чебер но пуштростэм суредъёс яке чильк-вальк, шоккетон гинэ ӧвӧл. «Артхаусъяськон» гинэ ӧвӧл. Та зэмлыко, гиперреализм амалэн возьматэм мадёс-суред монэ бугыртӥз, воштӥз. Ӵукна пал Виктория, шайтанлэн бергатэмез-вальсэз бере бушомыса, пушласянь тодмантэм воштӥськыса, шыпыт Берлин кузя кошке… Нош ик огназ. Та уй вал — яке та уйвӧт гинэ?

Берпуметӥ сцена — камера одӥг интыын сылэ. Виктория кошке — камера сьӧраз уг ни уйиськы.

Титръёсын нырысь ик операторлэн ужез пусъемын. Режиссёр — пумаз.

Дарали Лели

Удмурт Дунне
By Удмурт Дунне 6 февраля, 2017 15:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<