Шӧкыч: Горд Петя

Удмурт Дунне
By Удмурт Дунне 3 февраля, 2017 17:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

— Та пересьлэн кыдыз бертэм, лэся — тол куазен чоръя.
— Атаслэн арез озьы вуэ.

Мынам бускельёсы курег вордо, мон но соослэсь бере уг кылиськы. Нош курег уллёямы огмылэн но атасмы ӧвӧл. Соин-а, мар-а коткасьёсмы кытчы сюрем пузало. Орина Васялэн лавка вӧзысь жуг-жаг куян котыре, турын пӧлы карисько, кыдёке потонэз ӧвӧл уго, кенер гинэ висъя. Нош милямъёсыз Гондыр Ванькалэн пуны караз ветлыны дышиллям. Пуны, нокыӵе кариськытэк, ганяк кылле вӧзазы. Ванька шум гинэ потэ дармовой курегпузлы. Кызьы дышетод меда со макня йыръёсты, палэнэ медаз кожалэ шуыса?

Сӥзьылпал кышное шуиз:

— Курегъёсмылы кузё кулэ, сотэк нокыӵе улон радлыкез уз валалэ.

Мание зэм вера, котькуд уллёлэн аслаз азьветлӥсез луэ. Мемие но шуылоз вал: атас, пе, курегъёс пӧлын дисциплинаез юнматэ, соос кытчы шедем уг кошко, одӥг интые пузало. Атас ик кышноосызлы кышкытлык сярысь ивортэ, обидемлэсь но возьма, пе. Собере, китай календарья таиз ар Горд атаслэн, шуо. Сое но малпаса, городысь пудо вузанъя базаре мынӥ но яркыт ӟускиё, чилясь синмо но горд быжо атасэз бырйи.

12 курегъёсы гидэ пырем кузёзылэсь нырысь-валысь кышкатскизы. Ма, адӟылэмзы, шӧмъямзы ӧвӧл бере! Собере сьӧрысьтыз ӧз кыльылэ ни. Мурт азбаре кожан сямзы но ӝог тӧлӟиз. Шумпотӥськом ни Маниеным, выляз аре байлыко уломы шуыса.

Атаслэн арез кутскыса ӧз вутты на, милям Петькамы вазь ӵукна ик чоръяны ӧдъяз. Мание шуэ:

— Электротыл коть пырты курегъёс доры, Петькамылы коргидын пеймыт потэ, дыр.

Куазь шуныт, шулдыр тупаз Выль ар нуналъёсы. Гидысь ӧсэз усьтӥмы, мед, пӧй, тазалыксэс кыдатозы, югыт нуналлы кӧня ке шумпотозы. Милесьтым адӟем карыса, бускельёсмы но курегъёссэс коргидысьтызы поттылыны ӧдъязы. Одӥг нуналэ Мание корка кушетскыса пыриз, Петькамы, пе, нокытын уг адӟиськы. Кӧня ке дыр ортчиз но, атасмы, номыр луымтэ сямен, курегъёсмы пӧлын кокчаське ни. Мукет нуналаз чоръясьмы нош ик ышиз. Кытӥ-мар Орина Вася, ульча тыр кесяськыса, азбарамы кожиз:

— Атасэд кулэ ке, котырад возь, ато йырзэ ӵого! Тани учкы киме, со шайтанэд кокчалтӥз. Курегъёсы пӧлысь уллясько вал но, урдскиз ук мон шоры!

Орина Васялэсь ӵаш поттэмзэ кылыса, куспамы Гондыр Ванька но пыриськиз.

— Атасэд, бускель, ми дорын но кузёяське: пуные карысьтыз но потаны уг дӥсьты. Нош курегъёсмы, Горд Петькадэ адӟыса, гидысь лобӟыса ик пото пумитаз.  Берло пырыны уг валало ни, йыромем выллем кир-пазь ветло, шедьтыны ик уг луы. Туннэ ӧй ке уллясал атастэ, оло, вань курегъёсме сьӧраз ик нуыса, кошкысал. Ӧд ке окты-калты со озраньдэ, секир башка каро! Йырдэ кур эн кар, мон тыныд верай.

Ярам, кезьыт кариськемен, атас-курегъёсмес пытсано луиз. Бускельёсы но шорам кырыж учкемысь дугдӥзы. Табере асьсэос но малпасько ни атас басьтон сярысь, сотэк Горд Петькаед, пе, азьланяз вань курегъёсмес аслыз кароз.

Николай Трубачев

Суредаз Василий Пахомов

 

Удмурт Дунне
By Удмурт Дунне 3 февраля, 2017 17:20 Updated