Сергей Васильев. «Королевские войска» романысь люкетъёс

Удмурт Дунне
By Удмурт Дунне 23 февраля, 2017 16:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Сергей Васильев.

Эксэйлэн солдатъёсыз

— Ваньды дасяське! — кеськиз лейтенант. — Вуоноез остановка — асьмелэн.

Ваньмыз соку ик кунэрскизы. Поезд, куара сётыса, тып дугдӥз. Всё. Питранъёс гражданкалэсь берпуметӥ  иськемъёссэ  лыдъязы.

— N-ск! Вуим! — кеськиз лейтенант.

Призывникъёс  вагонысь оген-оген тэтчазы.

Пумитазы милемды ма-йор но кык сержантъёс. Кыкназы гондыр быдӟаесь, мыйыкен.

Колоннаен ми вамыш-тӥм часть пала.

— Вуим, — забор шоры возьматӥз лейтенант. — КПП, усьты!

Капка усьтӥськиз. Артэ сылэ пальпотӥсь солдат, тусызъя — прибалт. Но мон шумпотӥ, со очкиен шуыса.  Озьыен, мон но чидало, очкиме тупатыса, буйгатӥ асме.

Перекличка ортчытэм бере  келязы карантин казармае, интыяськеммы бере нош ик поттӥзы плаце. Та рад пумитаз майор, котькудмылэсь фамилимес вераса, кӧня ке юанъёс сётъяз.

— Вот, — шуиз со, — тӥ пӧлын вань вылӥ образованиен адямиос. Мон техникумез гинэ быдтэмын, а соос — институтэз, — Викторен ми шоры возьматыса, оло пыкылӥз, оло ушъяз майор.

Но сое нокин но ӧз кылзы, ваньмы жадемын.

Тодматскон кыстӥськиз кык час пала, собере строен  мынӥм нуназеяны.

Пуксим одӥг ӝӧк сьӧры быдэн дас кузя. Сётӥзы алюминь тусьтыен шыд. Со борды нокин ӧз йӧтскы. Вайизы второйзэ. Зынъязы, веръязы, но ӧз сие. Ӝӧк вылэ пуктӥзы киселен чайник.  Мон, нянь кутыса, киселен ке но кӧтме тырыны малпай. ӟузи гинэ но, ваньмыз берен потыны ӧдъяз — кӧё-вӧё кружка борды чай пырыос лякиськемын.

— Вот сёто ке сёто, номыре уг сиё! Булка гинэ но  уг яра соослы! — шорамы учкыса, шуиз нянь шормась.

Шумпотыса ӝӧк вылысь булка утчаны кутски но  валай: со озьы вужмем тӧдьы нянез  шуэ.

Мон лушкемен кисыям нянь тыри. Озьы ик каризы мукетъёсыз но.

— Султэ. Мунчое мынӥсь-ком!

Озьы кутскиз службамы. Кызьы но ми ӧм выре кемагес отчы сюронтэм вылысь, номыр ӧз пӧрмы, вазь-а, бер-а, но со милемды киултӥз. Озьы ми шуак луим кадь чылкак мукет катъёсъя улӥсь государстволэн адямиосыз. Азьвылэз кылиз забор сьӧры, вуоноез — тодмотэм, вань али дыр гинэ — пумтэм-йылтэм али дыр.

Ӵукназэ ми усьтыр-табыр султылӥм сержантъёслэн командазыя, синмес посыса, мынылӥм зарядкае, собере построение, перекличка, столовой… Собере — развод. Малы со кулэ, нокин ӧз валалля, угось кытчы уже мыноно, ваньмы тодылӥм. Зэм, комвзвод  нуналлы быдэ ораськылӥз янгышамъёс шоры, ялылӥз, кинэ кӧня нуналлы арест улэ пытсано, кышкатъяз «дембельзэс» ӝегатонэн но мукет.

Развод бере озьы ик строен — уже. Милесьтым взводмес келязы ЦМС-э. Ужан интымы Центральной материальной склад нимаськиз ке но, номыр дуноез, маке  лушкано, вузано-воштоно  кадез отын ӧй вал. Татын вал  бетон плитаос, блокъёс но кирпич гинэ. Котыр ваньмыз аналтэмын, гурезен-гурезен люкаськемын жуг-жаг.

— Всё, ужалэ, — шуиз комвзводлэн воштӥсез Мальков.

— А мар ужано?

— Складэз утялтоно.

— Жагзэ кытчы тыроно?

— Мар тӥ мон борды ериды, котькытчы тыре! — ачиз кор вылэ пуксиз но чильымзэ аратӥз.

Ми но, со шоры учкыса, тамаканы кутским.

Собере крановщик вуиз но, уж борды кутскытэк ӧйлась. Ӵужиськыса жагез нимысьтыз контейнере тырим.

— Тырмоз, пиос! — шуиз Мальков.

Берытскем уг поты вал, татын коть эркын.

Сиськыны, котьку сямен, кырӟатыса строен валтӥзы.

— Золгес, уг кылӥськы, — кесясько сержантъёс.

Казармаысен столовоёзь ог кызь метр, но ми отчы мынӥм ӝыны час. Сержантъёс горыса учко, кызьы ми солань-талань маршен ветлӥськом. Я, лэзизы ик столовое. Нош ик  кесяськон, керетон, йыггетон.

— Э, кечтака, вай мыным ӝоггес пуньы!

— Лэзья ини!

— Ымдэ пытса, мын…

Милям ротамы шыпак пуксиз. Вайизы шыд.

— Э,  малы ӝытазе но шыд сётӥськоды, кытын ӝук?

— Кеньыр ӧвӧл.

— Кечтакаос! — керето «дедъёс».

Дневальнойёс солань-талань бызьыло, тусьты-пуньы, нянь люкыло. Я, ӧжыт буйгазы кадь, кесяськемез воштӥз чапкетон. Но шуак кин ке туж  юзырес кеськиз.

Джура вылэм.

— Тӥ мар, …ёс! Мар та?! Аааа, виыло ваньдэс! — шимес кесяське со.

«Дедъёс» со доры бызьыса лыктӥзы но тусьтыяз учкизы. Вузыны кутскизы таосыз но. Джура сиён сётъян укно шоры дуры зӥргытӥз. Дуры бӧрсьы кухня шоры лобизы пуньыос, тэркыос, стаканъёс. Ваньмыз паймизы, сиськемысь дугдӥзы.

— Мар луиз? — юаз кин ке.

— Комак! Комакен сюдо! — шыдысьтыз комак йыркобыез, вылэ ӝутыса, возьматӥз Джура.

Солдатъёс урмизы. Дэмен султыса раздача доры мынӥзы, но, валамон ини,  поваръёс,  ма луонзэ валаса, ӝогак ӵогаськизы. Кӧняез ке «дедъёс» бызьыса ульчае потӥзы педласянь кухняе пырыса визь тырон вылысь, но кухняын ужасьёс отӥ но пытсаськыса вуттӥллям ни. Ӧйтӧд, мар кыльысал соослэсь, «дедъёслэн» пӧсь ки улазы сюрысалзы ке.  Угось  выж вылэ вуиз ни шыдэн бак, пилиськизы лампаос, укноос.

Куд-огез ӝќк сьӧрын ик ӧскыны кутскиз. Милям ротамы долкаса пуке. Куд-огез, ярам,  шыд ӟузьылыса ӧз вуттэ на вал, нош кин вуттӥз, кӧтсы борды кутскизы. Ульчаын кин кытын погылляське. Кин ке, кӧтыз борды кутскыса, ӝуштэ, кин ке шӧтэм ораське. Сьӧрос котырын  чылкыт инты ӧз кыльы ни.

Джура буйгаз, но кыш-катӥз: хозвзводлы секыт йӧтоз. Озьы ик луиз. Ӵуказеяз «дедъёс» соосты, тышкам сяна, косӥзы компенсация чот уксё бичаны но ящик вина пуктыны. Хозвзводын службазэс нуись казахъёс коньдон шедьтӥзы — ленинградъёсты качазы. «Дедъёс» зол эмъяськизы — ӵуказеяз, ваньзэс гольык ӵышкыса, «губае»  келязы.

Таӵе ЧП бере командование сюлмаськыны ӧдъ-яз. Москваын та сярысь тодӥзы-маразы ке, йќтоз. Но ваньмыз йылпумъяськиз вераськонэн гинэ. Ну, усизы комакъёс шыд чанэ, пӧзизы… Азьланяз чакласькысагес пӧраськоно,  шуизы. Зэм,   комиссия кылдытӥзы, ялӥзы, четверге сиёнэз веръяны лыктозы шуыса.

Комиссия вуиз, ӝӧк сьӧры пуксиз.

Шыд, кыкетӥез, кисель…

— Веръялэ, — ӵектӥзы фельдшерлы.

— Номыр ӧвӧл, сиёно кадь,  — шуиз кисырскыса фельдшер.

Со бӧрсьы пуньызы борды басьтӥськизы ротнойёс.

— Ну, мар? — юаз штаблэн кивалтӥсез Урсейнов, аслэсьтыз пуньызэ тусьтые веттылытэк. — Ческыт ке, малы солдатъёс ӝожтӥсько?

— Ӧйтќд, зумыт шыд,  сиёно кадь, — нош ик шуиз фельдшер, юрдэмзэ мырдэм кутыны вырыса.

Ваньмыз султӥзы но кошкизы.

— Мед чоньдоды вал! — мышказы шыпытак шуиз повар.

Сое валаны луэ. Маин со зумыт шыд пӧзьтыны кулэ, столовойысь сиёнэз качало ке ваньмыз: майоръёс, лейтенантъёс, прапорщикъёс,  эшшо ке кыӵе ке кышномурт  парсьёссэ сюдыны нянь нуллэ. Бӧрсязы вуо «дедъёс», таосызлы самой ческытсэ ватыса возёно луэ: сгущёнка, тушёнка, сакыр, тӧдьы нянь… Эх, ку меда ми «дедъёс» луом ни.

Нош комакен шыд ми  эшшо огпол сиим на. Со дырысен мон шыдэз ымам ик  ӧй ни тырылы, угось кӧты вияз водопроводысь ву васькем кадь…

 

* * *

Ӝоген  дорысь нырысетӥ переводъёс но посылкаос вуылыны кутскизы. Замполит шуд пуйылэсь нимтулзэ ивортэм бере «черепъёсын» ӵош  со гуртысь саламзэ басьтыны мынылӥз. Сое кияз сётъязы! Но… шумпотонэз кыстӥськылӥз чылкак  вить вамыш гинэ — ӧс кусыпе вуытозь. Отын сое возьмаллязы ни.

— Басьтӥд?

— Басьтӥ, — лулскылӥз салабон.

— Ну, давай, люкылы…

«Дедъёс» соку ик талаллязы ӝынызэ. Спортзал дорозь вуытозь, кыльылӥз на посылкалэн ӝыныезлэн ӝыныез, эшшо кӧня ке вамыштыса — ящик кыӵак бушалляз. Соин ик шуд пуйы тыршылӥз та кӧня ке вамыш ӵоже  кӧня быгатэ, сиёнзэ ымаз тулляны.

Коньдон  дорысь нырысь келяло вал конверт пушкын. Но почтальон ваньзэ эскерылӥз, сузямзы бере гинэ гожтэт вуылӥз салабон кие, ай сое но озьы гинэ ӧз сётъялэ: экты! Сюлэмез коӵышъёс ӵабъяло, нош тон экты… Дор. Отысь, дорысь, ивор гинэ герӟалляз на солдатъёсты зэмос улонэн, сётылӥз кыӵе ке коть оскон. Соин ик ми пуксьылӥм но гожъяллям:

«Ӟечбуресь, дуноосы!

Мон куинетӥ ротаын. Службае огсыр мынэ. Котькытчы строен ветлӥськом, возьмасько ни «дембелез», ар но ӝыны ортчыса, вуо.  Уг висиськы. Сюдо туж умой,  нуналлы быдэ сӥль, гречка, вӧй, чай, компот. Сюлмаськыны номыр понна…»

Июль пумысен мон ӵемгес вӧтаны ӧдъяй дорме. Пукиськом кадь кухняын, вераськыса яке книга лыдӟыса. Анай но, вынъёс но  пальпото, собере ваньмы ӵош телевизор учкиськом… Но со шуныт шыпытэз вандыса лэзе «Рота, подъём!» кеськем.

Пумен мон но дышыны ӧдъяй та валантэм, пайдатэм  улонлы. Ымныръёсмы лекгес луизы, мугоръёсмы — юнгес. Кӧйёсыз веськресмизы, чиедъёсызлы сӥльвир пыӵаз. Ми дышим,  пал кыл вератэк, приказъёсты быдэсъяны. Озьы кулэ. Кызьы  шуылӥзы воргоронъёс, макем ӧжыт малпаськиськод, сокем ӟечгес. Но мон нокызьы ӧй валалля татысь дырлэсь ортчемзэ. Ортче-а со яке весь интыяз-а сылэ?  Нунал воштылӥз уез, собере вуылӥз ӵукна, ортчыны кулэ кадь арня, толэзь, но йырын кыӵе ке ӝук — ваньмыз со ноку быронтэм одӥг нунал кадь яке одӥг пумтэм-йылтэм уй — улонэд но тазалыкед понна кышкаса ортчись уй.

Кышкаллязы ваньмыз, командир  бордысен кутскыса. Куалекъямзэс возьматыны кышкамысь ваньмыз куспазы, кыӵе ке сьӧсьёс музэн, ыргетыса вераськизы. Пумен ми ваньмы урмонэн висись пӧйшуръёслы тупаны кутским.

Шузимонлэсь утьылӥз складын ужан гинэ. Но ротае ветлонтэм вылысь маин ке татын кӧтэз тыроно вал. Соин ик лушкаськытэк ӧй-лась — кин кытысь быгатэ, магазинъёсысь но артысь  бакчаосысь.

Одӥг пол Артём ӟазегез  кутэ ни вал, но кузёосыз кызьы ке шӧдӥзы, черекъяны кутскизы ук! Тӥни соку мон валай, малы частьлэсь ог куинь иськемын  нокин пудо уг возьы. Сютэм кионъёс музэн ветлӥм ми, сиён утчаса. Но «дедъёс» милемды азьпалтӥллям ни, вань бакчаосысь заборъёс тӥямын, убоос лёгамын, теплицаос парчамын. Городын стройбатэз синазькыль карылӥзы. Но солы пумит  лушкаськонъёс, жугиськонъёс, эриктэманъёс уката трос луылӥзы. Милемыз дугдытыны ӧз быгаты нокин. Угось ми вал солдатъёс.

* * *

Туннэ кухняын ужам, картош сузям. Аслэсьтым нормаме уйшор бере кык часын быдэстыса, вамыштӥ казармае. Пырон азьын кык кузя сыло. Одӥгез узбек, мукетыз кавказец.

— Сыл!

Дугдӥ, сылӥсько, выр-ӟыны дӥсьтытэк. Мар луиз шуыса, юаны ымме усьтӥ гинэ, лапег мугоро узбек, вань кужмысьтыз гадям ӵыжиз. Со, дыр, кӧтам ӵыже вал, но мон палэнскыны турттэмысь, уката урод луиз — кирза сапег укшаз ӵап… «поддыхам». Шокчем ӧз лу ни, син азям ваньмыз уяны ӧдъяз. Ох, султоно вал, но  пыдъёс уг кылзӥсько… Бус пыр кадь адӟи — штакетник. Кытысь со? А,  тани музъем…. Всё… Шокчоно вал, одӥг ке но шапык омыр шокчоно вал… Но йырын ӵаш вазе, омыр уг тырмы, мон йырсазьме ыштыны кутски. Шуак пушкам, тыосме сутыса, пыриз одӥг ымтыр кезьыт омыр. Синъёсы усьтӥськизы, пельёсы  чиньгетэмысь дугдӥзы.

— Мар понна тон сое?

— А, уг тодкы, очкарик ук…

Декабре сётъязы парадной дӥсь. Мон борды ериз казах — вур мыным погонъёсме! Тодӥсько мон, одӥг пол сётски ке, мар отӥяз луоз. Одӥгезлы погонзэ вурод, мукетызлы мунчоын тыбырзэ зыралод, куинетӥез ул дӥсьсэ  миськыны косоз. Мон «уг» шуи. Кызьы ке ӧз мыжгы.

Ӝыны час ортчыса, дорам лыктӥз мукетыз казах, ойдо, пе, изьыосынымы воштӥськом. Мон нош ик пумит луи. Соку со шуак йырысьтым изьыме ишкалтӥз но аслазъёсыз пала пегӟиз. Ӵаш каро, шӧдске, ултӥяны  быгатэмзы понна шумпото. Озьыен, табере мон бордысь уз мозмытске. Тодоно вал, мар понна соос мон борды еризы.

Озьы ик вань, нош лякиськизы.  Куинь нунал ортчыса, мукетыз ини ойдо, пе, сапегъёсмес воштом.

— Малы? — визьтэм юан сётӥ мон.

— Мынамъёсыз пась по-тӥзы.

— Тынад кыӵе размер? — кышкамме ватыны турттыса, кужмысь пальпотыны вырисько.

— Ньыльдон кыкетӥ.

— Мынам ньыльдонэтӥ.

— П…

Кошкиз.

Уз, казахъёс табере мон бордысь уз москиське. Табере мон соослы курбон чот. Маке но малпано, кыӵе ке амал утчано. Луэ бен, висён утчаса, санчасте пегӟыны, но отын кема уз возе, нош ик ротае берытсконо луоз. Луэ, кавказецъёс сямен, пурт шедьтыны, но уллёен омырскизы ке, со но уз юртты.

Одӥг пол мон доры кожиз Ахметов:

— Тынад-а вылӥ образованиед?

— Бен. А мар?

— Тон-а газетэ гожтэт ыстӥд?

— Кыӵе газетэ? — чынзэ пайми мон.

— Ленинградъёс «Красное знамя» газетэ гожтӥллям, частьын улон вылэ ӝож-тӥськыса.

— Нош малы мон вылэ малпаськоды?

— Ну тон ук милям  вылӥ образованиен…

— Ну и мар. Грамотаез али ваньмыз тодо.

— Ярам, ӝоген тодом.

Э, тћни малы мон борды еро вылэм, валай мон.

Газетэ гожтэт зэмзэ но азьло но ысъяллям — «Красная звездае» но, «Правдае» но, но солэсь нокыӵе толыкез  ӧй вал. Гожтэт, олокӧня инстанциостӥ ортчыса, выльысь берытскылӥз частьлэн кивалтӥсез дӥне. Соиз  «прапоръёсты» косылӥз чагиськисез  коть музъем пыдсысь шедьтыны.

Шедьтӥзы «журналистэз» та рад но. Гожтэт ыстэм  мон кадь ик очкарик Марков. М-да, табере солы пумозяз чидано луоз. Нош мон борды тэбинемысь дуг-дӥзы. Огдырлы.

Ӝоген монэ отделенилы командире пуктӥзы. Таӵе «власть» мынэсьтым улонме номырин ӧз ӟечомыты, солы пумит, мон кыӵе ке шузи интые кыли. Угось табере кулэ вал вань йыртэманъёс понна кыл кутыны. Ротая дежурить карыны, арнянуналъёсы политзанятиосын пукыны. Арня но ӧз ортчы, монэ дежурное пуктӥзы. Удалтӥз ке удалтӥз — ӵап получка нуналэ.

Ӝытазе милям нарядмы понна штаблэн начальникез развод ортчытӥз. Нырысь дӥськутмес пыр-пыр учкиз, собере инструктаж ортчытыны кутскиз. Майор аслэсьтыз ужзэ ӟеч тодэ, ялан судэн кышкатъя: кин ке частьысь пегӟиз ке — суд, кин ке сӧсырмиз ке — суд, кин ке  кулӥз ке — суд…

Ми ваньзэ тае гань-гань кылзћм, но ас поннам малпаськи, мар каром, ӝытазе юон дыр кутскиз ке.

Дежурство нырысь-валысь огсыр мынћз — дневальнойёсын ӵош эскерим  умывальникъёсты, санузелэз — ваньмыз ужа. Номыр сыӵе-таӵеез ӧй вал ӝыт сиськонын но.  Зэм, ротаысь ышизы кӧня ке казахъёс, вань «дедъёс» но «черепъёс».

Укмыс час котырын казармаысь кошкизы прапорщикъёс но офицеръёс.

Берытскизы казахъёс. Дӥсь улазы маке донгамын. Вина, луоз, мар эшшо. Озьы ик вань — оло ящик мында, оло тросгес. Отбоёзь валессы котыре ватылӥзы.

Дас час котырын бускель казармаысь прапорщик перекличка ортчытӥз, отбой ялӥз.

Но со ӧс кусыптӥ потыса вуттӥз гинэ,  ӝыны рота пыд вылаз ни вал.

— Эй, дневальной! — кылћськиз казахлэн куараез.

— Мар?

— Ву вай!

Дневальной интыяз кошкиз гинэ, нош ик:

— Эй, лык татчы!

Сое дӥськутсэс миськыны косӥзы кадь. Табере весь вылаз ворттылозы.

— Дежурной! — табере ини монэ ӧтё.

— Мар? Малы уд изиське? — лек вазьыны турттӥ мон.

— Да, так, иворты, марысь мар ке…

Юон азинскиз. Кин ке нош ик ленинградъёсты  мыскылляны турттӥз, изись муртъёсты сайкатыса, ветлӥз.

Дневальноез нош ӧтизы.

Ахметов сое бордаз пук-тӥз. Мон, мырдэм асме кутыны вырыса,  матэктћ.

— Тыныд мар кулэ? —  синъёссэ быльк поттӥз Ахметов.

— Дневальнойлэн ужез трос, выж миськоно на.

— Мын! — донгыса сямен лэзиз со  мыжык сиыны дасяськем салабонэз.

Казармаын кӧшкемыт луиз: кудӟемъёс орасько, ӧско, жугисько… Дневальной выжез миськыса уг вутты, вылаз солы ик йӧтэ.

Одӥгез ленинград пи ӧз чида, вазёно кожаз. Казахъёслы шумпотон, соку ик урмизы:

— Султы!

Мукетъёсыз ленинградъёс оло зэм шќдылытэк изизы, оло юромо кылымтэ улсы кариськизы — кинлэн тыш сиемез потоз, эшсылы дур ӧз басьтэ.

— Тон, п…, кин?

— Мон — Бажов.

Вера, кызьы кулэ!

— Военной строитель рядовой Бажов.

— Кытын тон служить-тӥськод?

— Стройбатын.

— Уд! — Бажовлэн пель-дӥняз сётыса, нош ик юаз со.

— Эксэй войскоосын.

— Кызьы тынад нимыд?

— Мон верай ини.

— Эшшо вера.

— Рядовой Бажов.

— Раб тон, Бажов ӧвӧл. Кылӥськод-а, раб!

— Мон — Бажов, — кутскиз вал солдат аслэсьтыз данзэ утьыны, но казахъёс сое соку ик ӵыжаны кутскизы. Со усиз…

1993-2009

Ӟуч кылысь берыктӥз Зинаида Рябинина

 

 

Удмурт Дунне
By Удмурт Дунне 23 февраля, 2017 16:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<