Самолётъёсты бурдъясь

Удмурт Дунне
By Удмурт Дунне Февраль 10, 2017 13:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Михаил Корепанов

«Ижавиа» огазеяськонысь инженер Михаил  Корепанов туэ пыртэмын Удмурт Республикалэн Данъян пул вылаз. Россиысь ужысь ветеран пусъемын «За доблестный труд в Великой Отечественной войне 1941-1945гг» медален, Удмурт Элькунлэн Данъян грамотаеныз. 60 ар одӥг интыын тыршыса, 81 аресъем Михаил Захарович яратоно уженыз туэ октябре гинэ люкиськиз.

Тятяен адӟиськон

Документъёсъя Михаил Корепанов вордӥськемын Эгра ёросысь Мазьги (Лонки-Ворцы) гуртын, но вань пинал дырзэ со ортчытӥз Шербет гуртын (быремын ни).

1932-тӥ арын Мазьгиысь Корепановъёслэсь бадӟым семьязэс кулаке потто. Улыно-вылыно корказэс Зурае нуо но отын школа пукто. Пыд йылаз кылем семьяез гужем Вологдае тэль кораны келяло. Монтэк ӵыжы-выжыосме палэнэ уз нуэ шуыса, семьялэн кузёез Захар Михайлович пегӟем. Подводын вылэм солэн сюрмумиз, быдэ вуымтэ сузэръёсыз, кышноез пиеныз но Паша вынызлэн семьяез. Таосыз Вологдае вуо но, ужаны быгатӥсьсы одӥг гинэ. Мар, пе, соосты сюдыса улод, толалтэ куазен выльысь доразы бертыны косӥллям.

Захар Михайловичлэн но Анна Григорьевналэн Миша пизы — 4-тӥ пинал. Солэсь азьло вордӥськем 2 нылъёссы висьыса кулӥллям. Вологдае келяны шедем пизы но бертэмзы бере кема улымтэ ни. Миша вордӥськиз ини, бубызэ адӟытэк. Палэнэ келямзылэсь пегаса, Захар Михайлович ужаз Лынгаысь лесничествоын. Пыдйылчи кылем Аннаез ас бордазы улыны кутӥзы Шербетын улӥсь ӵыжы-выжыосыз. Кытӥ гинэ ӧз ветлы нылкышно, калык вылэ ужаса. 5 арес котыраз Миша мумизлэсь юаз: малы мукет пиналъёслэн тятязы вань, нош мынам ӧвӧл? Мамаез соку пизэ буйгатӥз: тынад но, пе, вань тятяед.

Мишалы 2 арзэ гинэ бубиз бордын улыны кылдӥз. 1940-тӥ арын, паспорт басьтыса, бубызы семьяез дӥне берытске. Корка пуктыны инты но висъяло соослы, отчыозь улыны карисько Шербет гуртысь ик дурисьлэн корказ — тазэ мукет гуртэ ужаны ӧтё.

Егит дыръяз. 1953-тӥ ар.

Семьялы выль юртэ пырыны ӧз кылды. 1941-тӥ арын декабре, дэйзэ шедьтыса, Захар Михайловичлы операция лэсьто. Йӧнаса уг вутты, 1900-тӥ арын вордӥськем воргоронэз войнае басьто, сюрес вылын бурмоз, пе. Михаил Захаровичлэн али но син азяз кадь со нуналъёс, бубиз сярысь тодаз вайыса, пушкыз тыре.

Гуртысьтызы пересь Герей тятяезлы шуба но, изьы но выль вурем, одӥгзэ гын сапегзэ кышъям, мукетсэ бубиз ачиз ик тупатъяса вуттэм. Мумиз сое Загребино гуртозь валэн келяса ветлэм. Отысь колхоз кивалтӥсен ӵош кошкиллям ни, кыксэс но Ленинград котыре ожмаськонэ келяллям. Захар Корепанов 3 гожтэт гинэ  дораз келяса вуттэм. Секыт шуыса, гожъям. Номырме но, пе, ӧз воштэ, гуртысь  дӥськутэным ик кельтӥзы. Собере быремез сярысь ивор вуиз. Загребиноысь воргорон войнаысь бертэм бере Мишалэн мумиз со доры юаськыны ветлэм. Вераз, пе, операция лэсьтэм бервылысьтыз вир потыса ик, снарядъёсын секыт ящикъёсты нуллэм, лазаретэ мыныны пумит луэм. Кызьы быремзэ вераны тодымтэ.

Арганэн шокан

Михаил Захарович 1899-тӥ арын вордӥськем мумызэ но туж жаля. Огназ кыльыса, вань пиосмурт ужез быдэсъяз. Война вакытэ котькуд гуртлы сик кораны задание сёто вал. Келяны нокинэ, кылемын пиналъёс, пересьёс но нылпиен нылкышноос. Мыноно луод, Анна, мукетъёсызлэн кык-куинь пичи пиналъёссы, вазиськиз председатель Мишалэн мумизлы. Пудодэ но, пидэ но бускельёсыд, пе, учкозы. Кытын, пе, учкозы. 8 аресъем пилы одӥг толзэ огназ сямен улоно луиз.  Огдырлы гуртаз бертылыкуз, мумиз пиезлы кӧня ке нуналлы картошка кельтылӥз. Миша картошказэ пӧзьтэ но, артысь коркан улӥсь пиос дораз лыкто ни сиськыны. Одӥг шобрет улын ик кӧламы соосын, тодаз вае Михаил Захарович, валесмы быдэсак кызь зын.

Картошказэс медаз воралэ шуыса, гулбеч ӧссэс мумиз оломакузьда кортӵогъёсын шуккыса кельтылэм. Со 15 иськем палэнын нюлэс кораса улэм. Толэзь пиштэм улсын, гурт палазы бертыса, тракт вылысен корказы шоры учке вылэм: сутскымтэ на меда? Интыяз ик шуыса адӟе но, гуртэ пыратэк, ужан интыяз кошке. Озьы кӧня ке пол. Отӥяз сик коранэ егитгес кышноосты ыстӥллям ни.

Мишалы аслыз но пиосмурт интыын ужано луиз. Усыяны вал кытконо, нош пияшлэн сиес но понэмез уг луы. Ярам, бадӟымъёсызгес пиос юрттылӥзы. Тол ӵоже сютэм улэм валъёс усыез мырдэм кыско, пиналъёслэн асьсэлэн но кужымзы мырдэм тырме соосты валтыны. Но Михаил Захарович ассэ уг жаля, мон гинэ озьы ӧй ужа, пе, со вакытысь ваньмызлы пиналъёслы кузьытсэ но, шӧгзэ но оскалтоно луиз. Со понна ӝутскем мылкыдын тодаз вае 3-тӥ классын дышетскыкуз, война бырыса ини, мумизлэсь арган басьтэмзэ.

Гуртазы нокин арганэн ӧз шудылы, пияшлэн кияз но кутылэмез ӧй вал сое. Трактэтӥ валъёсын шулдыръяськыса ортчисьёслэсь арганэн шудэмзэс кылыса, шокамысь ик дугдылӥз. Шудыны дышиз ас понназ. Кыӵе ке праздник яке сюан, сое одно сьӧразы нуо. Пичи малэн ке мынэмез уг поты, нош мумиз шуэ: мын, мар понна мон басьтӥ тыныд арган. Бадӟым классъёсы потэмез бере сюанын юыны косӥсьёсыз но луизы.

Егит арганчи. 1976-тӥ ар.

Инбамлэсь люкись липет

Гуртазы школазы ӧвӧлэн пичи классъёсын Миша Корепанов дышетскиз артысь Герейгуртын, 7-тӥ классэз йылпумъяз Шоргуртын, нош 10-тӥ классэз быдтӥз ни Эграын — 12 иськеме пыдын ветлоно луиз. Дышетскиз умой. Ӵош дышетскем эшеныз пырыны малпа вал Глазовысь сельхозтехникуме, но сочинениен кыкназы но «кык» басьтӥзы. Озьы, армие мынытозяз, Миша 1 арзэ ужаз Эграысь леспромхозын. Нош 1954-тӥ арын Удмуртиысь 11 пиосын ӵош сое келязы Дальний Востоке, авиационной полклэн учебкаяз. Дышетӥзы Ли-2 военно-транспортной самолётлы бортмеханике. Егит солдатлэн дышетскон мылкыдыз туж бадӟым вал. Одӥгез тужгес ӟечез курсант шуыса, службазэ ортчытыны келязы Москваысь правительственной аэродроме. Одӥг но ӝыны ар ӵоже Корепанов лобаз Ли-2 самолётэн. Восточной Европаысь странаосы интыяськем асьме войскоослы корреспонденция нуллӥз.

Инбаме нырысьсэ ӝутскемзэ Михаил Захарович али серекъяса тодаз вае. Нош соку сюлмыз пыдтышказ вуоно кадь луиз. Аэродром интыяськемын вал Москвалэн шораз, «Динамо» стадион вӧзын. Самолёт вылэ ӝутскиз но, бортмеханик Корепанов пилотлы кеськиз: «Чакласькы, липет борды йӧтод!» Соиз серекъя: эн кышка, пе, приборъёс шоры умойгес учкы. Со бӧрсьы инметӥ поръямез 100 час пала люкаськиз. Но армиысь бертыса, самолётэн кивалтыны ӧз кылды ни.

1956-тӥ арын Михаил Корепанов ужаны интыяськиз Ижысь огазеям авиаотрядэ. Татын вал ини мукет самолётъёс. Соосын лобан понна дышетскем кулэ, шуизы. Ужзэ вис карытэк, М. Корепанов граждан авиацияя Егорьевской авиационно-технической училищеез йылпумъяз. Но лобаны озьы ик ӧз кылды. Тазалыксэ эскеризы но, вирсэръёсыд уродэсь, шуизы. Йыр вадьсаз кылдӥз ке но инбамлэсь люкись липет, воргорон быдэс даурзэ самолётъёсты бурдъялляз, соослы инме ӝутскыны юрттылӥз. Бен, дыр ортчыса, соос вошъяськылӥзы, котыразы ужан понна авиатехник тодон-валанзэ будэтонъя курсъёсы ветлылӥз. Ужатозяз одћг шудттэм учыр но ќз луы чаклам-эскерем самолётъёсыныз.

1972-тӥ арын заочно амалэн быдтӥз Ижысь гурт хозяйствоя институтысь механизацияя факультетэз. Дипломзэ гожтон понна трос дырзэ ортчытоно луиз Дэриысь «Россия» колхозын. Сменаосын ужаз бере, дышетскыны дыр шедьтылӥз. Дипломзэ «витьлы» сётӥз. Михаил Захаровичлы ӵекто вал «Ижевский» совхозэн кивалтыны. Коммунистъёслэн радазы пырымтэ шуыса, кивалтон ужлэсь со палэнскиз. Серекъяса шуэ: Ленин верамъя,  коммунист луон понна дышетоно ваньзэ сое, мар пайдаёез усьтэмын дуннеысь калыкен. Шуэ, мон отчыозь ӧй буды, нош взносъёс тырон понна гинэ партилэсь кулэлыксэ ӧй адӟы.

Отын но, татын но дышетсконзэ азьланьтэмез понна Михаил Егорович тау каре Глазовысь пединститутэз йылпумъям кышноезлы Нина Демидовналы.

— Сельхозинститутын 6 аръёс дышетсконо шуыса, огвакытэ мылкыды куашказ ни вал. Хозяйкае шуиз: кызьы кулэ, озьы ик дышетскы, пӧрмытод. Мыным котыр ласянь юрттыны выриз.

Армиын. 1956-тӥ ар.

Киноысь — загсэ

Корепанов кузпалъёс, ог-огзэс валаса но яратыса, 55 ар ӵош улӥзы. Секыт висьыса, кышномурт 4 аръёс талэсь азьло улонысь кошкиз. Кышнозэ Михаил Захарович туж шунытэн тодаз вае. Нош курамзылэсь азьло со егит нылмуртлэсь ымнырзэ адӟыса ик ӧз вутты.

Ижысь авиаотрядын ужакуз, Михаил коляскатэк мотоцикл басьтэ но ужан нуналъёсыз вискын гуртаз бертылэ вал. Валамон ини, уйёссэ шудон пӧлын ортчытъя. Мотоциклэныд оломар но луод, нош кышноед бордысь нокытчы уд пегӟы шуыса, мумиз, кышнояськыны косыса, ёртӥз. Миша одӥгзэ нылмуртэз кенлы ӵектэ, кыкетӥзэ, куинетӥзэ… Мумизлы одӥгез но сюлэмызъя ӧз луы. Я корказы  асьсэлэн ӧвӧл, я куанересь, я бубиз жугиськись, пе. Анна Григорьевна артысь гуртъёстӥ ужаса ветлӥз бере, ваньзэ сямен семьяосты ӟеч тодэ вал. Соку шедьты кинэ ке но, мон кышноясько, шуиз Миша.

Эграе ветлыкуз, мумиз тодматскем кышномуртэн. Яша агаезлэн кышноезлэн, кенаксылэн, возем нылыз вылэм со. Ушъяськем, бызёно нылы вань, дышетсконзэ йылпумъяса, школаын ужа. Дораз бертыса, Мишалэн мумиз кенакез доры кожем, малы, пе, уд вераськы, возем нылыдлэн бызьыны вуэм нылыз вань шуыса. Кенаксы (Удмурт Элькунысь дано муртлэн Зинаида Боткиналэн мумиз), кема малпаськытэк, 27 иськемын палэнын сылӥсь Шыкмет (Нязь-Ворцы) гуртэ пыдын потэм. Кӧлӥсь Нинаез сайкатыса, юам, бызёд-а, пе, Мишамылы? Умзэ куспетӥ каремысьтыз, нылмурт мылкыдтэк шуэм: мыным ӝужытэз кулэ. Со ӝужыт, вазем кенак. Йырсиез сьӧд медло. Сьӧд, шуэм кенак. Арганчи-а? Арганчи. Соку мед, пе, лыктоз, учком.

Миша шутэтскон нуналэ гуртаз бертэм гинэ, мумиз сое кыл тупатыны ӧтем.  Мотоциклэ пуксиллям но, уй шоры учкытэк, палэнысь гуртэ ширтӥллям. Кенсын кӧлӥсь нылэз сайкатыса, вуоно субботаяз куран пумысен вераськиллям. Укноетӥ пиштӥсь югытэн Миша вуоно кышноезлэсь чебер пыдъёссэ гинэ синйылтыны вуттэм.

Уж дураз.

— Кураны ветлӥм августэ, нош сюан ортчытӥм сӥзьыл, — маде Михаил Захарович. — Нинаез ужысьтыз лэземзы уг поты вал, гожтӥськымтэ шуыса. Загсэ заявление сётыны срочно Иже мынӥмы. 2 нунал ортчыса, нуназе 1 часлы лыктэ, пе. Вераськем нуналэ городэ вуим. Дыр вань на шуыса, «Колос» театре кино учкыны пырим. Потӥськом но, 2 час луэм ни. Загсын ужась кошкыны дасяськем ни вылэм, э-э копаськыны кутскиз ук! Туж-туж кулэ, шуиськом. Ӝогак гожтӥз но бумагаез ныр уламы куштӥз, ӧз но ӟечкыла. Гуртэ бертӥм но, милемды тышкасько, кинъёс, пе, озьы асьсэ понна гожтӥсько. Кытысь ми тодӥськом вал, шуиськомы.

Выль кенлы уж шедьтон пумысен сюлмаськиз кылбурчи Семён Перевощиков, Ниналэн двоюродной братэз. Мишалы ивортӥз, Верховной Советлэн Президиумысьтыз протоколъёсын ужанъя отделэ ӟуч но удмурт кылэз тодӥсь секретарь, пе, кулэ. Нина Демидовна со вакытэ дышетӥз Яр ёросысь Возьпи (Бозино) школаын. Михаил Корепанов нош ик мотоциклаз пуксиз. Сюрес вылэ уйин потыса, 4 часын ӵукна Нинаез дорын вал ни. Соку ик Иже вырӟизы. Президиумлэн юртаз, йырысен пыдозязы тузонэсь луыса, вуизы. УАССР-ысь Верховной Советлэн Президиумезлэн секретарез Е. Докучаев егит нылмурт шоры учкиз но оскытэк шуиз, учком, кызьы заявление гожтоды. Мар, пе, отын учконэз, вае бумага, ӧз ыштӥськы нылмурт. Янгышъёстэк гожтэмзэ адӟыса, Докучаев сое ӵуказеяз ик уже потыны косӥз.

1 ар ужаса, Нина Демидовна сокращение шедиз, выжтӥзы Просвещениея министерствоысь кадръёсын ужанъя инспекторе. Но отћяз солэн сюлмыз школае ик кыскиз, пенсие потытозяз, покчиосты дышетӥз.

Улон азьланьтӥське

Тодмоосыз но эшъёсыз Михаил Захаровичез Будёный но, Чапаев но шуыло пуштырес мыйыкез понна. Бубиз сямен ик йӧн-йӧн воргорон кариськемез потӥз, 1962-тӥ арын солэн кадь ик мыйык будэтӥз. Шудыса сямен одӥг пол пиосызлы шуэм, мыйыкме мычо, пе. Соосыз бӧрдыны кутскиллям, ӧвӧл лэзиллям мычыны. Пиоссэ будэтонын аслаз амалэз вылэм. Уг ке кылзӥсько, куаретылэм: мон, пе, тӥледды веникен уг пырты.

Нылпиосыныз, кышноеныз, муминыз. 1966-тӥ ар.

Михаил Захарович ужын гинэ зэмос но оскымон воргорон ӧвӧл, дораз но солэн ваньмыз ки улаз ӝуа. Кышнояськемзы бере Ижысь Воткинской линия сьӧры корка пуктӥз. Сруб но, лэсьтӥськон материалъёс но Эгра ёросысь Чутыр черкогуртысь басьтӥзы. Мырдэм пыртӥмы, пе, ваньзэ сое нюр интые. 1959-тӥ арын мумызэ дӥняз вайиз, кыкетӥез пизы выль корказы вордскиз ни.

Аэропорт городысь туала интыяз выжем бере Корепановъёслы Крылатское посёлоке корка пуктыны музъем висъязы. Бадӟым пиеныз йыг-йыг корка ӝутӥзы, солэн семьяеныз ӵош ик улэ самолётъёсты бурдъясь. Кемалась ӧвӧл кыкетӥ пиез улонысь кошкиз. Но песятайзэс шумпотто внукъёсыз но туэ школае мынэм правнукез. Арлыдыз шоры учкытэк, Михаил Захарович пичиосызлы но, бадӟымъёсызлы но Корепанов выжыослы котыр ласянь адӟем карымон. Машина руль сьӧры но пуксёз. Кышноез улонысь кошкемен, арганэз гинэ чалмытгес улэ.

Михаил Корепанов улытозяз муш вордӥз. Огвакыт гужгетӥсьёсыз быризы. Кылем гужем бакчаязы 2 чурка пуктӥз. Кыказ но мушъёс каръяськиллям, чечы но сётӥзы ни. Улон азьланьтӥське.

Лия Малых

 

Удмурт Дунне
By Удмурт Дунне Февраль 10, 2017 13:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<