Ортчеменыз пумиськон

Удмурт Дунне
By Удмурт Дунне 9 февраля, 2017 14:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Владимир Вахрушев 24 арлы вунэтылӥз кин луэмзэ

Кылем арын пургаосты туж паймытӥз Владимир Вахрушевен луэм учыр — со сярысь Москваысь телевидение но передача дасяз.

Ышон но бертон

Владимир Вахрушев 24 ар ӵоже Россилэсь палэнын — Абхазиын — ышыса улӥз. Анаез но сузэръёсыз кытысь гинэ Володязэс ӧз утчалэ — пайдаез ӧйлась. 10 арзэ Владимир Владимирович кулэмен лыдъяськиз. Но улон аслэсьтыз паймымон сэрегъёссэ усьтэ: кылем арын тулыспал толэзе Владимир Вахрушев вордскем палъёсаз вуиз. Нош 9-тӥ толсуре со Россилэн гражданинэз луиз — паспорт бась-тӥз.

— Газетын гожъязы, мон, армиысь бертыкум, шудтэм учыре шеди, — шуэ Владимир Вахрушев. — Озьы ик ӧй вал со. Бен, мон зэмзэ но Латвиын службаме нуи, но доре бертэмелэсь азьло, уксё люканы малпаса, Грузие мыноно кариськи. Отӥяз мар вал, уг ни тодӥськы, оло жугизы, оло поездысь куштӥзы — йырсазьме ыштӥськем. Кызьы но малы Абхазиысь Сухуми ёросысь Нижняя Эшера гуртэ сюри, али ке но вераны шугъяськисько. Туж умой семьяын улӥ, пиос шорам «брат» шуыса вазиськылӥзы. Мон отын электричество бордын ужай, гуртоослы юрттӥськылӥ. Мынам нокыӵе документъёсы ӧй вал шуыса, ваньмыз тодо вал. Малы ке но ми, пиос, огмы но кышнояськемын ӧй вал, сузэр-апайёсмы но бызьымтэ. Ог-огенымы тупаса улӥмы.

Куинь ар талэсь азьло аварие сюри. Больницаын кыллёнъям йырам чилектэм кадь луиз: син азям кышномурт пуксиз. Со мыным сыӵе матын но мусо потӥз. Нош кин шуыны уг валаськы: оло анай, оло эшшо кин ке… Уйвӧтын кадь мукет ымныръёс но лыктылыны кутскизы. Бӧрысь, умойгес луэме бере, кема дыр ортчыса ини, шуак Удмуртиез тодам вайи. Соку ик, Абхазиысь семьяосылы вератэк, Интернетысь утчаськыны кутски, анаелэсь, Елизавета Ниловналэсь, телефонзэ шедьтӥ. Одӥг нуналэ дӥсьтонэ тырмиз, жингыртӥ мон солы. «Мама, мон та» шуи но, мугоры пӧсьвуаськем кадь луиз, бакоми, пал кыл но вераме ӧз луы ни. Анае но гуньдӥз, дыр, телефон трубкаез чалмиз. Берло тодӥ, монэ кулэмен лыдъяло ни вылэм. Ми анай-атайлэн куинь пиналъёссы: мон но кык сузэръёсы. Жингыртэме бере Валентина но Ирина монэ Абхазиысь утчаны кутскиллям. Собере Валентина Сергей  кузпалыныз ӵош асьсэ машинаенызы Абхазие вуизы. Озьы монэ Пичи Пурга черкогуртэ вайизы.

24 ар ӵоже ваньмыз воштӥськем, гурт но мукет луэм, адямиосты но уг тодмаськы. Бертэме бере ик миграционной службае вазиським. Монэ тодӥсь адямиосты судэ ӧтчазы, Абхазие но Россиысь Обороная министерствое запрос лэзизы. 9 толэзь ортчыса, Россилэсь гражданинэзлэсь паспортсэ  басьтӥ. Али ужбергатӥсь дорын автосервисын ужасько.

— Сомында ар мурт дуннеетӥ ветлэмды жаль уг поты-а? Табере пиналъёсты но быдэ вуысалзы ни, — юасько Владимир Владимировичлэсь.

— Адӟонлэсь уд пегӟы. Ортчем аръёсты нокызьы уд берыкты ни, Инмар мыным сыӵе улон сӥзиз, дыр.

Журналистъёслэн ёртэмысьтызы, кытӥяз берен кошконо кадь ик луисько. Кин тодэ, оло, кошко но ай. Мон сярысь али мар но уг гожъяло, кызьы но уг верало, адями пӧлтӥ ветлыны ик возьыт. Акыльтӥз ни. Рита гинэ возе, — возьматэ со яратоно кышномуртэз шоры.

Яратон уг пересьмы

— Егит дыръям Чайковский городысь художественной училищеын дышетски, 2-3 толэзьлы Пичи Пурга черкогуртэ практикае келязы, — тодаз вае Маргарита Пономарёва. — Ӵапак со вакытэ Володяен  (мон сое Вовка шуисько) тодматским, ог-огмылы синмаським. Со монэ вордӥськем гуртозям, Карашурозь, рейсовой автобусэн келяса ветлылӥз. Ӝытсэ клубе потӥськом. Шудон пӧлысь нош Володя монэ дорозям келяса мынэ. Соку со Можгаын дышетске вал. Кык ар озьы чылкыт-чебер яратонэн эшъяським. Собере сое армие басьтӥзы. Азьло уй куспын повестка сёто вал ук, кызьы мон келяськыны сокем кыдёке мыном? Келяськыны ӧй вуы шуыса, лэся, со куатаськиз, мыным гожтэтъёс ӧз келялля. Вити мон соосты, туж вити, армиысь бертэмзэ но возьмай. Дышетсконме йылпумъяса, ужаны Пичи Пурга черкогуртысь культурая юртэ художник-оформителе интыяськи. Отысен кылӥ, Володя, пе, ышемын, армиысь ик бертэмын ӧвӧл, сое семьяенызы олокытӥ но утчаса ветло.

Озьы ортчизы толэзьёс но аръёс. Мон бызи, кык пиосме вордӥ. Ильяелы 19 арес ини, нош Савелийлы 7 арес. Кузпалыным улыны ӧм быгатэ, люкиським. Кылем арын гуртысьтымы нылаш жингыртэ, тыныд, пе, Володя Вахрушев салам вераны косӥз, телефон номердэ куриз. Сыӵе иворез кылыса, йырсиосы ӵогыр-ӵогыр пештырскизы, гуньдэм кадь луи. Ма, Вахрушевез кемалась кулэмын ни шуизы ук, нош со ке салам, пе, вера. Нокин жингыртӥсь ӧз луы. Ачим возьмасько но кадь, сюлмы но дырекъя. Кӧня ке дыр ортчыса ини, телефон пыр тодмо куараез кылӥ. Ойдо, шуэ, пумиськом, дорам чай юыны куриськиз. Малпаськи, малпаськи но ӧти. Семьядэ медам сӧры шуыса, пе, туж кепыраса но кышкаса лыктӥ. Ми соин соку далай гинэ вераськыса пуким: бӧрдӥм но, серекъям но, егит дырмес тодамы вайим. Пиосыным тодматӥ, анай-атае но пумит ӧз луэ. Коркаме вынъёсы но тятяе ке лэсьтӥзы, мунчоме быдэсак Володя йылаз-пумаз вуттӥз ини. Ӵош кариськеммылы Илья пие туж шумпотэ, угось со адӟе, кыӵе умой Володялэн сямыз, киыз солэн зарни, котьмар лэсьтыны быгатэ.

Выльысь пумиськеммылы ми ӵемысь ум оскиське, куддыръя пырак уйвӧтын кадь потӥськом. Милям улонмы пырак киноын яке кыӵе ке романын кадь луиз.

Володя Абхазиысь гурезё интыосын улонлы дышемын ни бере, сюлэмыз отчы ик кыске, луоз. Шӧдӥсько, кыӵе со мӧзме, сюлэмыз кытчы ке куриське. Шуныт палъёсы кошкон сярысь со трос пол малпаськылэм. Татчы берытскемез бере адямиосын кызьы вераськыны кутскыны ик, пе, ӧй валалля. Документъёсыз ӧвӧл, ужаны нокытчы уг куто. Секыт, туж секыт вал солы, куректон зӥбыса возиз, шораз учкыны ик кышкыт вал. Уг тодӥськы, ог-огмес ӧм пумитасалмы ке, оло, со берен кошкысал ни татысь.

Володялэн мугораз маке быдӟа 8 муресь вурысъёсыз. Мар соин каремын? Кин озьы дауртэмын? Та пумысен со вераськыны уг яраты, оло, ачиз но ваньзэ уг тоды. Котьку ик шумпотыса, капчи мылкыдын тодаз вае Абхазиысь семьяез сярысь. Со туж умой адямиос доры сюрем. Больницаысь потэмез бере кема утялтыса возиллям, котьма ласянь юрттӥллям, бӧрысь уже интыяллям.

Москвае «Прямой эфир» передачае ветлыкумы, адӟи солэсь Абхазиысь агайёссэ. Соос пиналэсь ӧвӧл ни, 70 ареслэсь ортчемын. Володяез отын Виталик шуо вылэм. Юн-юн ӟыгырскизы, абхаз кылын вераськизы. Володялэн Абхазиысь агайёсыз милемыз туэ гужем доразы куное ӧтизы. Улыса адӟом ини…

Любовь Тихонова

 

Удмурт Дунне
By Удмурт Дунне 9 февраля, 2017 14:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<