Нянез воштэ сӥль

Удмурт Дунне
By Удмурт Дунне Февраль 1, 2017 15:29

Арысь аре сиён-юонлы дунъёс йыло но йыло. Макем зол та шӧдӥське калыклэн улон-вылоназ?

Лыдпусъёсты учконо ке, адямиослэн улон-вылонзы уг капчия. Кылсярысь, берло дыре адямиос ӧжытгес нянь но пыжиськем сиыны кутскизы.

1987-тӥ арысен Удмуртстат лыдъя-чота, шаерамы улӥсьёс араз шорлыдын кӧня сиё улыны тужгес кулэ луись 10 пумо вузъёсты. Таос пӧлын: картошка, нянь но пызьлэсь мукет сиёнъёс, бакча сиён, емыш, сӥль, йӧл но солэсь сиён-юон, курегпуз, чорыг, сакыр но коньыт сиён, вӧй. Улонлэсь ӟечлыксэ эскеронъя отделэн кивалтӥсь Людмила Сушкова верамъя, нуналлы быдэ 480 семьяез эскеро. Быръем семьяос пӧлысь 330-эз уло но ужало городын, кылемез — гуртъёсын. Котькуд нунал семья ар ӵоже нимысьтыз анкета нуэ, кӧня но мае сииз, кӧня тыр со усиз. Одно ик пусъё, кӧнязэ сиёнэз асьсэ бакчаязы я гидазы будэтӥзы, кӧнязэ магазинысь басьтӥзы. Со сяна, чотало, кӧня уксёзы кошке коммунальной тыриськонъёслы, мукет кулэяськонъёслы, шутэтсконлы. Котькуд толэзь Удмуртстатысь специалистъёс со анкетаосты люкало. Соосъя ик кылдэ огъя суред.

Лыдпусъёсты учконо ке, адямиослэн улон-вылонзы уг капчия. Кылсярысь, берло дыре  адямиос ӧжытгес нянь но пыжиськем сиыны кутскизы. 2005-тӥ арын 121,72 килограмм нянь кошке ке вал, али — 87. Сое воштыны кутскизы сӥлен но бакча сиёнэн. Уноез бакчаоссэс аналтӥзы, отчы турын кизизы ни ке вал, али выльысь гыро, мертто. Нош ик уногес будэтыны кутскизы кияр-помидор, мукет емыш. Озьы чарак дунтэмгес усе уго. Городын улӥсьёс гинэ но садъёссэс улӟытъяны кутскизы, куд-огез чипы-курег вордыны ӧдъяз. Гуртоос тросгес вордо ӵӧж, курка, ӟазег, парсь, скал.  Озьы 2005-тӥ арын котькуд адями шорлыдын 53 килограмм сӥль сие ке вал, али — 65. Ас вакытаз тросэз скал вордонлэсь но куштӥськизы ни вал. Котыраз берганэз трос, капчигес магазинысь йӧл басьтыны, шуылӥзы. Но туннэ йӧл литрез 61 манет сылэ ини бере, уноез выльысь гидъёсазы пудо пыртӥзы. Озьы 2000-тӥ арын гинэ араз 197 литр юиськом  вал, нош али 36 литрлы уногес сииськом йӧл но солэсь лэсьтэм сиён-юон — ваньмыз 233,4 литр.

Озьы ик адямиос ӧжытгес сиыны кутскизы картошка. 2000-тӥ арын 100,6 килограмм сииськомы ке вал, али — 49.  Картошка улэ висъям музъем кошке емышо писпуос улэ. Магазинысь басьтэм интые, улмо, груша, вишня асьмеос будэтӥськом. Озьы емыш азьло уно аръёс ӵоже арлы быдэ ог 30 килограмм сииськомы вал ке, али 72 килограмм котыр люкаське. Таин сэрен сакырез но, коньыт сиёнэз но воштыны кутскимы асьме лэсьтэм варенняен. Санкциосын сэрен дуно луэменыз, шыръяны кутскимы чорыг вылын. Араз 19 килограммозь сое сииськомы ни вал, али 15-ёзь усиз.

Нуналлы быдэ ӝутӥськись дунъёс калыкез выль сямен улыны дышетӥзы. Дунъёс, зэмен ик, син шорын тэтчало. Кылсярысь, парсь сӥль январь шорын гинэ 247 манет сылэ ке вал,  23-тӥ январе ог 3 манетлы будӥз. Зэм, со дыре ик пӧзьтэм колбасалы но сосискалы дунъёс сомындалы ик усизы, килограммез али 282-284 манет сылэ.  Чабей пызьлэсь лэсьтэм макаронъёс килограммез 49 манет возисько вал, али 50 манетлэсь ортчизы ни. Кубиста дун гинэ но ялан ӝутӥське, туннэ со 14,87 манет луиз ни. Со вие ик ог 30-40 копейкалы дунтэмазы нянь но булкаос — килограммез али сылэ 40-42 манет. Калык ичигес басьямысь, лэся, манетэн-манетэн усё кампетлы но сакырлы дунъёс.

— Кӧтмес тырон понна гинэ ужаськомы, шуо гуртоос, — вера Кун Кенешысь депутат, Эгра ёросысь «Зура» агрокомплексэн кивалтӥсь Елена Чиркова. — Уждунэз будэтӥськом ке но, магазинъёсын дунъёс трослы ӝоггес йыло. Али порозпиосмес сӥльлы келямы. 1 килоез 220 манетэн кошкиз. Нош магазинын кунян сӥль 300 манет вылын. Хозяйствоослэсь йӧлзэс заводъёс 1 литрзэ 25 манетэн бичало, нош магазинэ со вуэ 50-эн. Тае кун кызьы ке радъяны кулэ. Калык, кызьы улыны паймыса, векчи живот вордон борды басьтӥське. Зураын одӥг-кык семья гинэ азьло немыч вордэ вал, али — котькуд кыкетӥез. Индоуткаосты адӟылэм ик ӧй вал, али азбар тыр вордо. Хозяйствое фуражлы лыктӥсьёс уг бырыло, азьло тазьы ӧй вал. Нош кроликъёс кӧня! Зэм, зураос бакчаоссэс ӧз паськытатэ. Туала вакытэ уго олокыӵе но пумо картошка вань, урожай ӟеч сётэ. Азьло сое уно мерттылӥзы, скаллы сюдыны шуыса. Но со интые табере кушман мертто ни, пайдаёгес шуыса.

Людмила Сушкова верамъя, сиён-юон дуноямен, адямиослэн уксёзы шутэтскыны, эмъяськыны уг кыльы ни.

Елена Сараматова

Удмурт Дунне
By Удмурт Дунне Февраль 1, 2017 15:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<