Мон удмурт, мон туж шудо!

Удмурт Дунне
By Удмурт Дунне 18 февраля, 2017 10:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Озьы шуылӥз асьмелэн югдытӥсьмы

20 ар ӵоже ини, быдӟым удмурт югдытӥсьмес К. Гердэз буре вайыса, республикаямы ортчыло «Герд лыдӟонъёс». Туэ  конференция «Кузебай Гердлэн дуннеосыз: Гурт — Кар — Кыл — Революция» нимаськиз.

Пургаос тодматӥзы К. Гердлэн творчествоеныз.

 Асьмелэн зарнимы

Пичи Пургалась культура юртэ люкаськем калык огдырлы выйиз К. Гердлэн сюлэмез вырӟытӥсь пыдэстэм творчествояз. Кылбуръёсыз пыр учкисьёс вуизы ортчем даурлэн кутсконаз: курадӟыса улӥсь удмурт гуртъёс, революция, выль улонэз лэсьтон, сайкытэзлы но чеберезлы оскон… «Шуд! Кытын-о тон? Милемыз та пеймыт дуннее тэль шоры куштод-а?.. Шунты, лыкты!» «Мон удмурт, мон туж шудо!», «Ми гыриськом, кизиськом, араны егитъёс вуозы…»

К. Герд вакытысь возьматэм яркыт суредъёс мылкыдэз бугырто: макем секыт вакытэ улӥз югдытӥсь, макем юн шӧдӥз со ас вакытэзлэсь вӧсьсэ но макем оскиз, ӵуказе нунал сайкытгес но чебергес луоз шуыса.

Конференциез усьтыса, Пичи Пурга ёрослэн йырыз Светлана Колодкина мадиз ёрослэн вормонъёсыз сярысь. Пусйиз, ньылез школазы республикаысь усто-осыз пӧлы пыро, пиналъёс удмурт кылъя олимпиадаосын вормонъёс басьто, районын пӧртэм удмурт фестивальёс радъяськыло.

— Быдэс дунне паймемын вал Брангуртысь песянайёсмылы, — шуэ Светлана Колодкина. — Соосты сӥлы карыса, Удмуртиын Песянайёслэн нуналзы юнматэмын. Паймымон мукетыз но: милям Тыло гуртысьтымы одӥг выжыысь гинэ вить бадӟым писательёс потӥзы. Россиын нокытын но сыӵеез ӧвӧл…

— К. Гердлэн кылбуръёсыз сюлэммес туннэ но бугырто. Угось туала вакытэ но ми шуиськом: сайкалэ, удмуртъёс! Та ласянь «Удмурт Кенеш» огазеяськонлэн ужез огшоры ӧвӧл, — калыклы вазиськиз ассоциацилэн кивалтӥсез Татьяна Ишматова. — Тау ваньмызлы, кин ас ужезлы сюлэмзэ сётэ, кин тырше зэмос удмурт нылпиосты будэтыны, визьманы. Татын пумиськонмы медаз луы вераськон гинэ. Котькудӥз ас удысаз анай кылмес азинтон понна маке лэсьтыны мед быгатоз.

— Туж шумпотӥсько, «Герд лыдӟонъёс» сямамы пыӵазы ни шуыса, — пусйиз нациосын ужан политикая министрлэн воштӥсез Павел Орлов. — Котькуд ёрослэн, республикалэн вань аслаз зарни фондэз. Со фонд ик возьматэ калыклэсь аспӧртэмлыксэ. Асьмелэн зарни фондамы пыре

К. Герд — туж бадӟым талантэн адями. Паймымон, но 12-14 ар ӵоже гинэ со гожтыса вуттэм 400-лэсь трос кылбуръёс, наукая 100-лэсь трос статьяос. Нош кӧня ужъёсыз эскерымтэ на, кӧняез пыраклы ышемын-быремын! Мон туж оскисько, Гердлэн «Мон удмурт, мон туж шудо!» чуръёсыз улонын ӵемгес чузъяськозы. Чузъяськем гинэ ӧвӧл, шӧдӥськозы но…

 Адямиосты огазеясь

Пусйыны кулэ, таяз конференциын докладъёс туж пӧртэмесь вал. Пичи Пурга ёрос библиотекалэн кивалтӥсез Людмила Шумилова, кылсярысь, тодматӥз «Воршуд шур кузя» проектэн. Воршудъёсъя тунсыко эскеронъёс ортчытӥллям Пичи Пурга ёросысь Эдэйгуртысь нылпиос но. Конференцие люкаськемъёсты со ужъёсын тодматӥзы дышетӥсь Анна Галактионова но 7-тӥ классын дышетскись Анастасия Николаева.

— К. Герд вордӥськемын Вавож ёросысь Бадӟым Докъя гуртын. Со Докъя выжыысь луэ, — пусъе Анастасия. — Та воршудлэн «быжыз» вуэ Пичи Пурга ёросэ но, Яган-Докъя гуртэ. 1918-тӥ аре К. Герд

Яган-Докъяе вуылэм. Татысь со гондыръёс сярысь верамез кылэм но «Гондыръёс» поэма гожтэм…

Анастасия Николаева Гердлэн творчествоеныз али гинэ рос-прос тодматске ай, нош филология наукаосъя кандидат Александр Шкляев югдытӥсьлэсь улон но ужан сюрессэ кӧня ке дасо аръёс ӵоже эскере ни. Конференциын со тодаз вайиз 1978-тӥ арез.

— Соку нырысьсэ журналистъёслэн клубазы Флор Васильев люказ Гердлы сӥзем ӝыт, — шуиз Александр Григорьевич. — Мон блокнотам гожтыса кельтӥ куд-ог верамъёсты. Тани Даниил Яшин шуэм:  «У Герда яростно-активное отношение к действительности…» Зэм но, Герд зэмос публицист вал. Солэн кылбуръёсыз но — публицистика. 1918-тӥ арын «Гудыри» газетлэн нырысетӥ номерез потӥз. Сое усьтэ Гердлэн кылбурез. Нош поэтлы соку 20 арес гинэ вал ай. Со дырысен Трокай Борисов но Кузебай Герд — эшъёс…

Москвае кошкемез бере но «Гудыриын» печатлало Гердлэсь гожъямъёссэ. Солэн кылбуръёсыз тужгес зол чепыльтӥсь, тужгес зол ӝутӥсь, тужгес зол куректытӥсь,  тужгес зол бӧрӟытӥсь чуръёс вал. Со ялан тыршиз калыксэ сайкатыны, удмурт калык весь изе шуыса, юриськиз-тышкаськиз но…

— Герд трос адямиосты огазеяны быгатӥз, — аслаз докладаз пусйиз филология наукаосъя доктор Алексей Арзамазов. — Соин ик солэн творчествоез котьку тунсыко луоз. Аслаз кылбуръёсаз со карез но гуртэз ваче пуктэ. Ачиз но гурт но город вискын сылэ. Сыӵе ваче вуон шӧдӥське тросэзлэн удмурт кылбурчиослэн, писательёслэн творчествоязы. Тани

Г. Красильников но каре улыны выжемез бере зарни четлыкын выллем улӥз, уйёсы кӧланы ӧз быгатылы. Оло, соин но улонысь вазь кошкиз. М. Федотов аслаз творчествояз валаны тыршиз: малы сое сокем кыско нюлэсъёс? Малы городын солы урод?

Бигер, пор, башкир литератураосын кар но гурт вискын сыӵе пӧртэмлык уг шӧдӥськы. Бигеръёс понна Казань — зэмос шоркар, отын бигеръёс асьсэды кужмоен шӧдо, пӧртэм быгатонлыкъёссы усьтӥсько. Ижкарлэн но тусаз, пуштросаз тросгес удмурт шӧм пыӵатоно. Соку, оло, югдур воштӥськоз, — шуэ Алексей Арзамазов.

Глобализация вакытэ удмурт кылъя политика пумысен малпанъёссэ шараяз филология наукаосъя кандидат Александр Егоров. Со нимысьтыз пусйиз выль кылъёсты кылдытон ужпумез.

— Ас вакытаз венгеръёс 10 сюрс пала выль кыл малпазы, 5 сюрсэз улонэ пыӵаз, — пусйиз тодосчи. — Огъя удмурт литературной кыл кылдӥз 1920-тӥ арын.

К. Герд 300 пала выль кыл малпаз. Оглюкетэз вераськонын кутӥське. Выль кылъёс малпаллязы мукет гожъясьёс но. Кыл мед азинскоз шуыса, со туж кулэ.

Но туннэ нуналлы асьмеос ваньзэ но вунэтӥськом ай. Та ужпумез ӝутӥз история наукаосъя кандидат Игорь Поздеев. Со мадиз Удмурт шаерамы анай кылъя законлэн быдэсъяськемез сярысь, удмуртъёслэн асьсэды удмуртэн шӧдонзы пумысен. Глазовын, пе, ӝыныезлэн гинэ удмуртъёслэн нылпиоссы асьсэды удмурт шуо. Нош Можгалан — 79 процентэзлэн. Удмурт кылэз дышетӥсь школаослэн лыдзы кулэсме. Шуом, Ижын 1990-тӥ аръёсы удмурт классъёс вал 33 школаын, нош 2015-тӥ арын — 7-аз. Оглом учконо ке, шоркарамы удмурт кылэз дышето, пе, 0,6 процентэз нылпиос, нош бигерзэ — 0,8 процентэз.

   Шокало удмуртлыкен

Конференцилэн кыкетӥ люкетаз «Удмурт Кенеш» огазеяськон но Пичи Пурга ёрос вискын ӵош ужан сярысь огкыл кутэмын. Нялтас вераса, таӵе огкылъёс нырысьсэ юнматэмын вал «Удмурт Кенеш» но Можга кар но ёрос вискын.

«Герд лыдӟонъёс» бурдъяськем мылкыдын йылпумъяськизы. Но ёросъ-ёсысь делегациос бертыны ӧз дыртэ. Соос Пичи Пургалась школаослэн, культура юртлэн, библиотекалэн ужаменызы, пургаослэн удмуртлыкез ӝутон бордын тыршеменызы, киужъёсынызы матысьгес тодматскизы на.

«Удмурт Кенеш» огазеяськонлэн кивалтӥсез Татьяна Ишматова тодэ вайытӥз: вуоно арын К. Герд вордӥськем дырысен 120 ар тырме. Соин ик «Герд лыдӟонъёс» ортчозы югдытӥсьлэн вордӥськем музъемаз, Вавож ёросын. Вавожъёс солы али ик дасясько ни.

Елена Панфилова

Туспуктӥз А. Горбунов

 

Удмурт Дунне
By Удмурт Дунне 18 февраля, 2017 10:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<