Мария Ишматова трос кужымзэ сётӥз удмуртлыкез ӝутон понна

Удмурт Дунне
By Удмурт Дунне Февраль 1, 2017 13:31
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Мария Дмитриевна — Трокай Борисов нимо премилэн лауреатэз.

Ӟардонэз сайкатӥсь

15-тӥ январе 80 арессэ тырмытӥз «Удмурт Кенеш» огазеяськонлэн Данъян книгаяз пыртэм мурт Мария Ишматова.

Калыкен ӵош

Мария Дмитриевна — Трокай Борисов нимо премилэн лауреатэз, калыкез дышетон удысысь отличник, пусъемын «За доблестный труд. В ознаменование 100-летия со дня рождения В. И. Ленина», «За трудовое отличие» медальёсын, Дэри ёрослэн Дано адямиез.

Мария Дмитриевнаез мон нырысьсэ адӟи, школаын дышетскыкум. Соку ми, пинал комсомолецъёс, туж сак кылзӥм партилэн Дэри райкомезлэн секретарезлэсь ӟырдыт вераськемзэ. Ноку ӧй малпалля, кӧня ке аръёс ортчыса, ужан удысэ М. Ишматоваен юн герӟаськоз  шуыса.

Райкомын «Знание» огазеяськонлэн ёзаз ужакум, валэктӥсе но дышетӥсе нырысь ик луиз идеологияя секретарь М. Ишматова. Мыным, школаысь лыктэм дышетӥсьлы, со вал чик тодмотэм уж. Мария Дмитриевналэн ӵектэмезъя ик берло выжи ёрос радиое, со кивалтэм улсын пыриськи удмурт движение, соин ӵош ужамы ёросысь историкъёсын но архивистъёсын, озьы ик мукет общественной огазеяськонъёсын. Мария Дмитриевна сярысь вераса, мон нырысь ик пусйысал: со  ужез яратӥсь адями, котьку но чурыт куронъёс пуктэ ас азяз но ӵош ужась эшъёсыз азе. Кепыратэк вазиське вылӥ кивалтӥсьёслы, чик вылтӥяськытэк вераське огшоры калыкен, соосыныз но, таосыныз но капчиен огкыл шедьтыны быгатэ.

Трос пол кылэме вань верамзэ, мон, пе, кепырась адями. Озьы ик ассэ ӵемысь пурысь адями шуэ. Ӧйтӧд, кепырась но пурысь мурт быгатысал-а быдэс элькунлы тодмо луыны, быгатысал-а трос аръёс ӵоже кивалтӥсь но азьветлӥсь луыны? Алнашын улыкуз, комсомолэн, ёрос газетлэн редакциеныз кивалтӥз. Дэри ёросын 17 ар ӵоже партилэн райкомаз идеологияя секретарь вал, кема ужаз «Ленинец» — «Пригородные вести» газетлэн редакцияз. Партилэн Дэри райкомаз ужакуз, котькуд ар ортчытылӥз удмурт литературалы но искусстволы сӥзем пумиськонъёс. Пичи гуртъёсы, фермаосы, пӧртэм коллективъёсы вуыло вал тодмо писательёс, кылбурчиос, артистъёс но суредасьёс. Сыӵе тунсыко пумиськонъёс кемалы кылизы огшоры ужасьёслэн сюлэмъёсазы. Ӵуказеяз куд-ог фермаосын йӧл но тросгес, пе, кыскылӥзы.

Нош кыӵе юн огазеяло вал калыкез Первомай демонстрациос, Тол келян, спортлы сӥзем но мукет праздникъёс. Подшивал гуртын арысь аре ортчылӥзы Совето Союзлэн Героезлы Василий Зайцевлы сӥзем куасэн бызьылонъя ӵошатсконъёс. Быдэс ёросысь огшоры спортсменъёс люкасько вал отчы, ӵошатскылӥзы кивалтӥсьёс но.

Идеологияя секретарь азьын сылӥсь валтӥсь ужпум — калыкен ужан. Кыӵе гинэ юанъёс  но куронъёс ӧз кылдылэ! Мария Дмитриевна тодаз вае:

— Мон туж зол дасяй асме идеолог луон понна, К. Марксэз, В. Ленинэз котьку йырвизьмам вози. Малпай, огдыре луоно философ но, социолог но, психолог но, педагог но. Со понна трос лыдӟиськи, лекциосы ветлӥ. Дышетскеме юнме ӧз ортчы, тодон-валанме будэтэм сяна, лулпуш дуннеме но узырмытӥ. Ваньмыз со юрттӥз калыкен ужаны, сое бурдъяны но ушъяны, пӧртэм юанъёслы валэктонъёс сётыны, умоезлы оскон пыӵатыны.

Идеологъёслэн ужзы ӵем дыръя уг адскы, сое килограммен уд мерта. Куддыръя солэн емышъёсыз, аръёс ортчыса гинэ, шӧдӥсько. Со дыре ик та уж сомында кужымез но ӟигарез быдтэ, сутэ.

— Мон вылэ трос ӝож-тӥськонъёс гожъязы, малпало вал, дыр, монэ ворттӥсь вал вылысь уськытыны, погыртыны — ӧз пӧрмы, — шуэ Мария Дмитриевна. — Мон ялан мынӥ азьлань ас быръем сюрестӥм. Капчи ӧй вал ке но калыкен ужаны, ваньзэ чидай.

Удмуртлыкен висён

Ижевскысь пединститутысь филология факультетын дышетскыкуз, Мария Дмитриевнаез студентъёслэн хоразы старостае бырйизы. Пусйыны кулэ,  шумпотыкуз но, мӧзмыкуз но  со кырӟанэн сюлэмзэ буйгатэ. Дышетскемзэ йылпумъяса, со хор кылдытӥз Алнашын но, отын валтӥсь кырӟась луиз. Люба кенэз верамъя, котькыӵе учырез со кырӟанысь кылъёсын герӟаны быгатэ. Нош кырӟанъёсты, удмуртсэ но, ӟучсэ но, со туж трос тодэ.

М. Ишматовалэн сюлэмыз котьку висьылӥз удмуртлык понна. Трос саклык висъялляз удмурт кылъя но литературая дышетӥсьёслы, библиотекаын, клубын ужасьёслы. 1990-тӥ аръёсы трос валантэмъёс но ченгешонъёс потылӥзы. Мария Дмитриевна гижысь-пиньысь басьтӥськиз удмурт калыкез огазеян, солэсь асваланзэ ӝутон борды: Дэриын удмурт культурая «Чагыр дыдык» огазеяськон кылдытӥз, бӧрысь со «Удмурт Кенеш» огазеяськонэ пыриз. Мария Дмитриевналэн кичӧлтэмез улсын ортчылӥзы пукон ӝытъёс, тунсыко улосчиосынымы пумиськонъёс, пӧртэм гуртъёсысь но ёросъёсысь куно пумитанъёс. Дорамы ӵем вуылӥзы Эстониысь, Венгриысь, Финляндиысь, Франциысь, Швециысь но мукет кунъёсысь куноос.

Та аръёсы ик Мария Дмитриевна трос кужымзэ сётӥз удмурт газет кылдытонлы, соку со ёрос газетлэн редакцияз ужаз. Тани 25 ар ӵоже ини ёросын улӥсь удмуртъёс понна «Ӟардон» газет печатлаське.

Мария Дмитриевна йылпумъямын Москваысь Вылӥ партшколаысь журналистикая факультетэз. Сое кияз ручкатэк-блокноттэк шер адӟод вал. Малпанъёсыз статьяосы ӧръяськылӥзы. Вань тодон-валанъёсыз, калыкен кусыпъёсыз юрттӥзы ёросысь ветеранъёсын ӵош «Край мой Завьяловский» но «Село Завьялово… так сердцу дорогое» книгаос гожтыны. Мария Дмитриевна удмуртлыклы сӥзем пӧртэм сценарийёс, проектъёс дасян бордын но ужаз. Солэн тыршемезъя Дэриын усьтӥськиз шаертодонъя ёрос музей.

Ужамысь дугдэмез бере Мария Дмитриевна Дэри школаысь покчи пиналъёс понна кылдытӥз но нуиз «Зарни бугор» кружок. Р.  Моторинаен но Л. Тепинаен ӵош Дэри черкогуртысь ветеранъёсты огазеязы «Мӧзмон» клубе. 10 арлэсь кема ини та клуб дораз ёросысьтымы но шаерысьтымы тунсыко адямиосын пумиськонъёс ортчытъя. Удмуртлыкез азинтыны но калыкез огазеяны быгатэмзы понна М. Ишматова, Р. Моторина но Л. Тепина пусъемын Эрик Батуев нимо ёрос премиен.

 Юн пушъетлэн нылпиез

Райкомын ужакуз «За трудовое отличие» медален пусъемзэс тодаз вайыса, Мария Дмитриевна шуэ:

— УАССР-ысь Верховной Советлэн Президиумезлэн тӧроез А. Тубылов ӟечкыласа гуртам жингыртӥз но шуэ: «Мария Дмитриевна, карттэ юн-юн чупа, ӝыныез медалед солэн. Картэд ке умой ӧй луысал, тон ноку но та удысын ужаны ӧй быгатысалыд. Тау шу солы». Конечно, туж бадӟым тау карисько Виталиелы. Со монэ котьку бурд улаз возиз, урод кылъёссэ чик кылэме ӧвӧл.

М. Ишматова данъяськыса вера семьяез сярысь. Син азяз яратоно анай-атаез, агаез — тодмо удмурт писатель Геннадий Красильников, солэн Алексей Красильников пиез (филология наукаосъя кандидат, философия наукаосъя доктор), журналистын ужам Анатолий Красильников выныз.

— Сыӵе визьмо, улыны быгатӥсь адямиос пӧлын мон туж шудо вал. Сюлэмы туж вӧсь луэ но бӧрдэ соослэн улонысь вазь кошкеменызы валче, — шуэ Мария Дмитриевна. — Улонэз валаны, калыкен тупаса улыны нырысь ик анай-атаелэсь адӟем кари. Анае небыт, каньыл сямо, кырӟаны яратӥсь кышномурт вал. Дышетскыны ӧз ке но кылды, туж визьмо вал, ӟеч тодӥз удмурт, ӟуч но бигер кылъёсты, яратӥз кырӟаны. Атае — туж кибашлы воргорон. Ужан тӥрлык сяна, милемлы, нылпиосызлы, шудон но пӧрмытыны быгатэ вал. Азямы чурыт куронъёс пуктылӥз, одӥг пол верам кылыз — закон. Анае верамъя, атае зэмлык понна зол вырем. Семьязэс кулакъёс пӧлы пыртэмзэс тодыса, со Москвае мынэм, отысь бумага ваем, ми середнякъёс шуыса. Куд-ог ваньбурмес талаллям ик, но семьямес Алнашысь нокытчы келяллямтэ.

Та дыре Мария Дмитриевнаен артэ кузпалыз Виталий Савинович, Дима пиез, Люба кенэз но соослэн Мария но Анастасия нылъёссы. Ишматовъёслэн бадӟымез Саша пизы улонзэ черкен герӟаз.

— Нырысь со понна туж куректӥ, — шуэ Мария Дмитриевна. — Аръёс ортчыса, валай: черке кошкыса, пие улонын ас интызэ шедьтӥз. Табере со Даниил игумен, улэ Черногориын. Дорамы ӵем вуылэ солэн Ваня пиез семьяеныз.

Вера Богданова

 

Удмурт Дунне
By Удмурт Дунне Февраль 1, 2017 13:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<