Калининград — кык тусо город

Удмурт Дунне
By Удмурт Дунне 3 февраля, 2017 15:28
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Иммануил Кантлэн музъемез

Россилэн шундыпуксён палаз интыяськемын Калининград  улос. Та музъем кесэг асьмелы выжиз Быдӟым ож бере немецъёслэсь. Али но солэн тусыз Европаысь пичи городъёслэн выллем.

Дер-Донлэн башняяз янтарьлы сӥзем музей.

Немецкой но советской

Немецъёс городзэс Кёнигсберг нимазы. Но 1946-тӥ арын Совето Союзысь кивалтӥсьёс городлы революционерлэсь Михаил Калининлэсь нимзэ понӥзы. Немецъёсты татысь пумен доразы — Германие — келязы, татчы Россиысь адямиос улыны выжизы. Асьме кивалтӥсьёс городлэсь нимзэ гинэ ӧвӧл, туссэ но воштыны, сое советской карыны тыршизы. Али город шоры учкиськод ке, зэм но, черепицаен шобыртэм липетъёсын горд кирпичлэсь лапег юртъёс вӧзын сыло огшоры пурысь коркаос. Озьы ке но немецъёслэн бервылзы татын быдтэмын ӧвӧл. Берло дыре, городлэсь аспӧртэмлыксэ чакласа, выль юртъёсты, вуз карон центръёсты вашкала тусъем пуктыны тыршо.

Кёнигсберглэн историез 1255-тӥ арысен кутске. Соку Прегель шур котырлэн вырйылаз Пруссиысь тевтон орденлэн рыцарьёсыз чех король Пржемысл Отакар II юрттэмъя Кёнигсберг замок ӝутӥзы. Берло со котырысь городъёс — Лёбенихт, Кнайпхоф, Альтштадт — тушмонъёслэсь утиськон вылысь огазеяськизы но огъя Кёнигсберг город нимаськыны кутскизы.

Музей — корабль.

Кнайпхоф город интыез Кантлэн шормуӵез шуо. Сое Прегель шур котыртэ. Купецъёслэн пичигес каразы 14 урам, 2 площадь но 2 пролка вылэм. 1944-тӥ арын Кёнигсберге английской самолётъёс бомба куям бере Кнайпхоф тодмантэм воштӥськиз. Городлэн бервылаз Кафедральной собор гинэ утиськиз, шуыны луоз. Горд кирпичлэсь, йылсо шпилен готика амалъя пуктэм ӝужыт юрт кыдёкысен ик адӟиське. Али татын Иммануил Кантлэн музеез. Та тодмо немец философ Кёнигсбергын вордӥськемын. Ӵапак та соборын сое пылатӥллям, нош егит дыръяз И. Кант татысь библиотекаын тодон-валан люкам. Дано философез сӥлы карыса собор вӧзы ик ватӥллям но. Солэсь шайгузэ утьыса, совето вакытысь кивалтӥсьёс соборез ӧз куашкатэ, туж гажало вал уго асьмелэнъёс И. Кантэз. Музейын тодматскыны луэ Кнайпхоф городлэн историеныз,     И. Кантлэн улэм-вылэменыз. Озьы ик татын орган зал ужа. Городын улӥсьёс но туристъёс отын паймымон инструментлэсь чузъяськемзэ кылзыны быгато.

Озьы ик Калининградын утиськемын данак вашкала капкаос — Королевские, Бранденбургские, Росгартенские, Аусфальские но мукетъёсыз. Та улос узыр дуно изэн — янтарен. Солы сӥзем музейын адӟытэмын тужгес бадӟымез янтарь, солэсь чеберъяськонъёс, суредъёс но мукет. Вашкала Кёнигсберглэсь туссэ син азе пуктыны юрттэ Чорыгасьёслэн посёлоксы нимаськись инты но. Отысь 3 юрт но башня туала вакытэ пуктэмын ни, отын интыяськемын ресторанъёс.

Эктӥсь нюлэс.

Кашалот но Миклухо-Маклай

Калининград портовой городэн лыдъяське. Солы сӥзьыса, татын усьтэмын Мировой океанлэн музеез. Отын тодматскыны луэ пӧртэм корабльёсын, мурдалаез эскерись арбериосын, ву пӧйшуръёсын.

«Витязь» научно-исследовательской корабль ас вакытаз дуннеысь океанэз эскеронын бадӟым уж лэсьтӥз. Ӵапак та корабльысен лыдъямын вал Марианской впадиналэн мурдалаез. «Витязен» Россиысь тодмо этнограф, путешественник Николай Миклухо-Маклай Новая Гвинея шормуӵъёс доры вуылӥз но отысь калыклэн улэм-вылэменыз тодматскиз. Табере корабль музей сямен ужа. Отын тодмато, кыӵе арбериосъя корабльёс азьвыл сюрес шедьтылӥзы, кызьы улӥзы матросъёс, кыӵе эскеронъёсы пыриськизы вал «Витязь» кораблен уясь тодосчиос.

Кылдӥз луонлык подводной лодкае но пыраны. «Б-413» корабль али зарезе уг пота ни ке но, отын ваньмыз зэмос. Татысь экскурсоводъёс тодмато ву улын уясь нырысетӥ лодкаослэн вылтусынызы. Паймоно подводной лодкалэн пуш ваньбурезлы — отын сомында бергатон, зӥбылон арбериосыз, пыран-потан ӧсъёс сюбегесь-лазегесь.

Нош «Глубина» адӟы-тонын тодматскыны луэ ву улын эскеронъёс ортчытӥсь арбериосын, корабльёсын. Татын возьматэмын кашалотлэн зэмос лысьӧмъёсыз, солэн сюлмыз. Татын ик пиналъёс но бадӟымъёс быгато корабльлэн штурвалэз сьӧры пуксьыны но асьсэдыз зэмос капитанэн шӧдыны.

Эктӥсь нюлэс

Куршская коса нимаськись инкуазь синпелет Калининград улосысь Зеленоградск дорысен Литвалэн Клайпеда городэз дорозь 98 иськем кыстӥське. Россилэн лыдъяське 49 иськемез, мукет 49 иськемез — Литвалэн. Та музъем кесэглэн тужгес сюбег интыез 400 метр, тужгес паськытэз — 4 километр. Солэсь огпалзэ Куршский залив, мукетсэ Балтийской зарезь пылато. Та интылэн кылдэмез пумысен калык веранъёс вань. Шуо: зарезь дурын вордскем паймымон нылаш Неринга. Со мукет адямиослэсь ӝужытгес будэм. Неринга зарезьысь сильтӧлэ сюрем чорыгасьёсты музъем вылэ потталляз. Берло соослэсь улонзэс капчиятон понна зарезь шоры сюрес лэсьтыны кутскиз. Но малпанзэ йылпумъяса ӧз вутты — солы люкетӥз та интыосын улӥсь кӧшкемыт дракон.

Эфа вырйылысен усьтӥськись суред.

Нош тодосчиос верало, ву шорын сюй кылдӥз, Музъем вырӟылэмысь. Берло татчы тӧлъёс будосъёс вайизы, пӧйшуръёс но вашкала адямиос — куршъёс — улыны лыктӥзы. Соослы луыса ик та интыез Куршская коса ниманы кутскизы. Со быдэсак песоклэсь пӧрмемын. Зарезьысь пельтӥсь тӧлъёс луоез палэнэ нуо. Соин Калининградын улӥсьёс татчы писпу мерттыны вуыло, тӧллэсь утиськон арбериос пуктыло.

Куршская косаын трос паймымон интыосыз. Одӥгез нимаське Эктӥсь нюлэс. Зэм но, пичигес музъем юдэсын пужымъёс куасалляськыса сямен будо. Та дырозь тодосчиос валэктыны уг быгато, малы писпуос кырыж-конгылесь. Та сикын векчи будосъёс уг ӝужало, бурдоос уг чирдо, пӧйшуръёс татчы уг кожало.

Эфа вырйылын песок гурезьлэн ӝуждалаез 55 метр. Со дорозь ӝутӥськыны яра нимысьтыз чаклам сюрес вылтӥ гинэ. Угось адямилэн котькуд вамышезлэсь песок вырӟе но куашка. Но асьме адямиос уг валало утьыны инкуазен сётэм чеберлыкез — я одӥгез, я мукетыз сюрес вылысь коже… Вырйылысен Куршской залив, песок вырйылъёс чебер адӟисько. Кыдёкын чильпыра Морской нимаськись гурт. Со сьӧрын Литва кутске.

Ангелина Снигирёва

 

 

Удмурт Дунне
By Удмурт Дунне 3 февраля, 2017 15:28 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<