Кузпалъяськизы… 61-тӥ декабре

Удмурт Дунне
By Удмурт Дунне 9 февраля, 2017 11:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Можга ёросысь Пычас черкогуртысь Ирина но Фёдор Богдановъёслэн кузпалъяськон сярысь документазы гожтэмын: семья кылдытӥзы 1961-тӥ арын 61-тӥ декабре.

Можга ёросысь Пычас черкогуртысь Богданов кузпалъёс.

— Ма, документ сётӥсьёслэсь озьы янгышамзэс асьмеос но кема аръёс ортчем бере гинэ адӟим ни, — серекъя Ирина Михайловна. — Загсын шуизы: кызьы вань, озьы ик мед кылёз ни, документэз воштыны уг луы. Я, малпам: эшшо кема-кема улыны мед кылдоз…  56 ар улӥськом ни!

Кузпалъяськиллям Богдановъёс вашкала манеръя — дэмласа. Ирина Михайловналы соку 18 арес но вылымтэ на, Фёдор Николаевичлы 19 арес но шуккымтэ… Можга ёросысь ик артэ Бакагуртын но Мунчогуртын вордскемын соос.

— Мон Пычасын сиён пӧрасьын ужасько вал, ӵужапае дорам пыриз но шуэ: нылы, ми тонэ, картлы сётыса, сииськом-юиськом ук! — тодаз вае Ирина Михайловна. — Мон ӧй оскы, серектӥ гинэ: юэмды сокем потэ ке, юоды-а, мар-а ни.

Фёдорлэн ӵыжы-выжыосыз, зэмзэ но, кенлы ветлӥллям. Иринаез кураллям пӧсь гужем шорын, турнан вакытэ. Гожтӥськытэк ар пала улӥллям на, пизы вордскем бере  гинэ вуоно сӥзьылаз, 7-тӥ ноябре,  сюан шудӥллям, нош 7-тӥ декабре гожтӥськиллям. Озьы Богдановъёс числоен тодо куран, сюан шудон, гожтӥськон нуналъёссэс.

Фёдор Николаевич, пенсие потытозяз, тыршем водительын. Котькыӵе машина руль сьӧры пуксьылоно луиз, шуэ. Кран сьӧры гинэ но. Ирина Михайловна пӧрасьын ужамын.

— Кузпалылэн анаеныз 28 ар ӵоже ӵош улӥм, одӥг пол но ваче вуылэммы ӧвӧл,  — азинтэ веранзэ Ирина Михайловна. — Бызьыкум со лябӟемын ни вал. Шуэм вылэм: кулэмелэсь азьло кенме адӟеме потэ на. Соин ик Фёдорез кышнояны дыртӥллям. Но анаймы выльысь катьяськиз, соин ик монэ семьяязы шуд вайись но шуылӥзы. Но дорамы кузё котьку вал Педор, со вылын юрт возиське ук!

Фёдор Николаевич корка котырзэс котьку ӝикыт возе, Ирина Михайловна киужен выре. Удмурт дэремен ветлоно вал ук ай, шуэ. Соин ик аслыз гинэ ӧвӧл, тодмоосызлы но трос дӥсь вурылэм. Нылзы но пизы кемалась ни ас семьяоссэс кылдытӥзы, правнукъёссы гинэ 3 кузя ни.  Но песянай-песятайёссы доры ӵемысь бертыло, уг вунэто.

Ваньмон дырзы кылдэ ке, Богдановъёс соку ик киязы «Удмурт дунне» газетэз куто. Туж кемаласен, пе, басьто сое, «Советской Удмуртия» дыръяз но лыдӟылӥллям ни.

— Газетысь быдэс республикамылэсь улэм-вылэмзэ адӟыны луэ, — вера Ирина Михайловна. — Кӧня асьмелэн йӧно, быгатӥсь адямиосмы — тае «Тӧр шорын» возьматэ.  Кыӵе но тунсыко гуртъёсмы ӧвӧл — «Сю сюрес» рубрика улысь материалъёсъя адӟиське. Ма, газетысь вань бамъёсты учкиськом, котькудӥсьтыз маке выльзэ тодыны луэ!

Элина Кумачёва

Удмурт Дунне
By Удмурт Дунне 9 февраля, 2017 11:55 Updated