Кужым — зэмлык бордын

Удмурт Дунне
By Удмурт Дунне 24 февраля, 2017 10:22
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Отставкаысь подполковник Алексей Ныров.

Алексей Владимирович Ныров, Москваын вордӥськыса, дуннеысь пӧртэм кунъёсты котыръяса, улонзэ герӟаз Удмурт шаерен — сюлэмзэ кыске удмурт вирыз, удмурт выжыез. Туннэ отставкаысь подполковник элькунысьтымы быдэ вуымтэ пиосты армилы дасянъя центрен кивалтэ.

— Алексей Владимирович, ожгар удысэз быръемдылы паймонэз ӧвӧл. Шаерамы атайдылэн Владимир Алексеевичлэн нимыз тодмо. Военной полковник, кема аръёс ӵоже кивалтӥз «Удмурт Кенеш» огазеяськонлэн Ижысь Ленин ёросысь ёзэныз. Анайды Екатерина Ивановна ожгар удысысь секретной частьын ужамын.

— Вордӥськи мон Москваын. Атае военной вал бере, кытчы сое ысто, отчы ик анаеным мынӥськомы вал. Атаелэсь адӟем карыса, пичи дырысеным ик аслым ачим ӝот-ӝот шуи: луо ожгарчи! Мукет удысъёс йырам ӧз ик лыктылэ. Соин лыдӟиськонлэсь-гожъяськонлэсь вазьгес ыбылӥськыны дыши. Атае, нылпи садысь кутыса, монэ стрельбищеосы ӵем нуллӥз. Воспитательёс нырысь-валысь кышкало но вал, отын сонгро кылё шуыса. Ыбылӥськыку угось дымбыр-йыг куара кыдёке шуккиське, пельёсты ик вандэ. Мон талэсь чик ӧй кышкалля. Асме солдат интые пуктылӥ, йӧно возиськыны тырши.

Огпол атайме Африкаысь Мозамбик кунэ келязы. Соку мыным 8 арес вал. Анайме сьӧраз кутӥз, нош монэ — ӧз. Угось нылпиен отчы кошкыны кышкыт вал: калык но, инкуазь но чылкак мукет. Озьы мон Ульяновск улосысь нылпи юртэ шеди. Малы отчы? Анае та палъёсын вордӥськемын но будэмын вал.

Нылпи юртын 2 ар улӥ. Та дыр мыным туж секытэн сётӥськиз. Угось семьяямы мон огнам нылпи, дышемын вал анай-атаелэн бурд улаз гань-гань улыны: сиён пӧрало, дӥсь дасяло, шудон басьто, нуныяса-вешаса изьтыны выдто… Ульяновскын ваньмыз йырин-чукин луиз. Ялан сием потон маза ӧз сётылы. Собере дыши: ӝыт кӧт медаз колтырты шуыса, нуназеяку кисые 2-3 вандэт ке но нянь шорем лушкемак понылӥ. Озьы мон ӝытъёссэ валесам сютэм ӧй выдылы ини. Татын ик асме ачим эскерыны, утьыны дыши. Валай: шуг-секытъёслы сётскид ке, тонэ лёгалозы, быдтозы.

Армилы дасянъя центрын. 

Улонам пӧртэм школаосын дышетскыны кылдӥз. 14 аресам военной лётчик луэме потыны ӧдъяз. Самолётъёс котырын берганы туж яратӥсько вал угось. Но ӵапак соку синъёсы ляб адӟыны кутскизы. Таин сэрен эмъясьёс  мыным ӵогем кадь веразы:  лобаны уд быгаты! Талы ачим янгыш вал, дыр. Лыдӟиськыны яратылӥ. Уйёсы, анае-атае медаз шӧдэ шуыса, шобырет улын фонарикен книгаосты бугыръялляй. Лыдӟиськон сямы туннэ но ӧз сылмы. Книгатэк улыны уг быгатӥськы.

— Эстониын ортчытэм аръёсты  сюлэмады тужгес кылемын, луоз. Ӵапак отын бадӟым малпанды быдэсмиз — ожгарчилы дышетскиды.

— Зэм, Эстония улон сюресам бадӟым пытьы кельтӥз. Туннэ но машинаям, эстон кырӟанъёсты кылзыса, ворттылӥсько. Жаль, кылзэс дышетыса ӧй вутты. Ожгарчиослэн нылпиоссы та урокъёслэсь мозмытэмын вал угось.

Озьы ке но мон валаса вуттӥ: фин-угор выжыысь луэммы шӧдӥське — эстон кылын удмуртлы матын кылъёс трос. Соин но, оло, шаплыгес кариськысал ке, эстон сямен вераськыны дышысал. Тани Алнаш ёросын улэм песянае удмурт, ӟуч но бигер кылъёсын капчиен лабыртылэм. Ма, атаелэн но кыл шӧдонэз зол вылэм. Португалие келязы — соослэсь кылзэс дышетӥз, Малайзие мынӥз — таослэсь но кылзэс йыраз кельтӥз…

Школа бере пыри Таллинысь вылӥ военно-политической училищее. Отысь лейтенант луыса потӥ. Валай: улонам удысме шонер бырйиськем. Службаме азьланьтон вылысь монэ Ижысь 43003-тӥ военной часте ыстӥзы. Татысен ини кошки Югдурез утёнъя министерствое. Йылпумъяй МВД-лэсь Нижний Новгородысь академизэ.

— Азьвыл аръёсы Удмуртиын та академилэн ёзэз ужалляз. Отын егитъёсты философилы дышетӥз атайды. Бӧрысь тӥ но татын ик тыршоно кариськиды. Нош ик Владимир Алексеевичлэсь удыссэ азинтэмды потӥз?

Атаеныз.

— Милицилэн школаяз — куспамы сое «антоновка» шуылӥмы кивалтӥсезлэн нимызъя — мон кадръёсъя отделысь воспитаниея ёзысь инспектор вал. Та сяна, студентъёсты конституционной, международной правоослы дышетылӥ. Уже туж сюлэмыя вал. Та школаын шаерысьтымы гинэ нылъёс-пиос тодон-валан ӧз люкалэ. Огпол Чечняысь пиналъёсты вайизы. Соку отын ожмаськон мынӥз. Али гинэ дор палъёсысьтызы ишкалтэм нылъёс-пиос шоры учкыны юзырес вал. Синъёссы —  кионъёслэн выллем. Сямзы — керӟег, лек. Ярам, ӧжыт улыса, соос дышизы но небытгес кариськизы. Тросэныз туннэ умой кусып возиськомы, ог-огмылы ӵем жингыръяськомы.

2011-тӥ арын та школаез ворсазы. Уж утчаса, кема ӧй курадӟы. Шаерысьтымы сюресъёс вылысь югдурез чакланъя учреждение инты шедьтӥ. Отысь огеныз ёзэн кивалтӥ. Татын но уже правоосты утёнэн герӟаськемын вал, пӧртэм учыръёсъя трос судъёстӥ бызьылӥ, сюрес вылын бадӟым груз нуись-вайись машинаосты чаклалляй, куронъёсты тӥясьёслэсь кылзэс юалляй.

Кин тодэ, оло, туннэ но отын ужасал. Но 2013-тӥ арын Дэри ёросысь Пероггуртын усьтӥськиз пиосты армилы дасянъя элькун центр. Мыным ӵектӥзы сое валтыны. Егитъёсын ужаны дышемын вал бере, ӧй пумитъяськы. Озьы школамы 4-тӥ арзэ ини гижысь-пиньысь ужа.

— Центрен кивалтонын тӥледлы  маиз тужгес секытэн сётӥське?

— Ужме сыӵе зол яратӥсько — котькыӵе шуг-секыт капчи кадь потэ. Оло, эшъёсын удалтӥз — вӧзам ас удыссэс рос-прос радъяны быгатӥсь дышетӥсьёс, азьвыл военнойёс тыршо.

Та вакытэ центрмы азьын трос ужпумъёс сыло. Кылсярысь, пиослэсь ыбылӥськон тӥрлыксэс выльдоно вылэм. Соос зэмос автоматъёс ӧвӧл, соин шаплы тӥясько.

Собере, центрмы вӧзын ик вань вашкала котельнойлэн юртэз. Туж потэ сое спортзаллы  пӧрмытэммы, но талы али коньдон ӧвӧл. Ярам, тренажёр зал лэсьтыны шаермы кылем арын уксё шедьтӥз.

Жаляса верано, дорамы туж ляб пиос вуо. Ми тыршиськомы соос азе армиын выллем куронъёс пуктыны. Тросэз уг чидало: я кузь иськемъёсты бызьыны ӟигарзы быре, я дор палъёссылэсь мӧзмон сюлэмзэс зӥбе. Таин сэрен куд-огез зар-зар бӧрдылэ но. Сыӵе дыръя соослы гань-гань валэктӥськомы: та шуг-секытъёс юнме малпамын ӧвӧл, соос пыр одно ик потоно, угось ваньмыз та пайдаен гинэ берыктӥськоз. Котькуд ар центрмы пыр 5 сюрс котыр пиос пото. 5 нунал куспын куд-огезлэн улон шоры учконзы воштӥське — мылкыд каро ожгарчилы дышетскыны.

Шӧдӥмы ини сое но: городъёсын ӵошатыса, гуртъёсысь пиос тросгес тамак пурккето. Ми та урод сямен нюръяськиськомы. Центрамы кыскыны, курытсэ юыны, палэнэ потаны, Интернетын пукыны ум лэзиське. Кин та куронъёсты тӥялоз — быдэс взводлы йӧтоз. Но таӵеез ӧй вал на. Пиос верам кылъёсмес пелязы поно.

— Берло дыре тросэз шуо: туала егитъёслы оскон ӧвӧл, вордӥськем шаерзэс гажась, сэзь пиос ӧжыт…

— Мон та веранэн чик но соглаш ӧвӧл. Чечняез тодэ ваёно ке, кинъёс отын ожмаськизы? Егит пиос. Соос туннэ ульчаетӥ шудыса-бызьылыса ветлӥзы, нош ӵуказеяз войнае кошкизы. Талы пиос дасесь вал яке ӧй — нокин ӧз малпаськылы. Пуктэмын ужпум тушмонэз пазьгыны, кунмес утьыны — озьыен, быдэстоно! Номыр шоры учкытэк, йыр вандӥсьёсты соос пазьгизы.

Мыным потэ, Россиын улӥсь котькуд воргоронлэн сюлэмаз кунмес яратон улэ. Нуналысь нуналэ сое асьмеос ум шӧдӥське. Адӟомы, тушмонэн синмысь синме пумиськыку. Та яратонэз номырин ӵушыны уг луы. Со генъёсамы пыӵамын.

 

Тае эшшо но мургес валасько, ӵыжы-выжыосме тодам вайисько ке. Кыкез но песятайёсы адӟем карымонэсь вылӥллям. Огез Ижысь механикая заводын ож тӥрлык лэсьтэм, мукетыз 1941-тӥ арын 23-тӥ июне Быдӟым оже кошкем, пленэ сюрылэм, отысь 1947-тӥ арын гинэ ай берытскем. Анаелэн кыкез но вынъёсыз Афганистанын ожмаськемын. Огезлы Совето Союзысь Герой ним сётэмын. Мукетыз ожмаськемын аспӧртэмлыко частьын. Со тырмытэмын вылэм истребительёсты но вертолётъёсты пазьгыны юрттӥсь кышкыт ож тӥрлыкен. Афганистанын сыӵе часть одӥг гинэ вылэм.

Тодам лыктэ Сергей Бодров режиссёрлэн «Брат-2» киноез. Отысь валтӥсь герой юа: «Мар бордын кужым?» Кужым ӵапак зэмлык бордын. Россия юнме шорысь ожмаськон ноку но уз ӝуты. Жаляса верано, куд-ог кунъёс та сярысь валало берло. Афганистанысь обороная министр, полевой командир Ахмад Шах Масуд отын война йылпумъяськем бере гинэ валаз но ӧпкелиз: Совето Союзэн, пе, юнме нюръяськиськеммы, отысь калык милемыз адӟемпотостэм уг кары вал…

Инкуазьын шутэтскыкуз.

— Тӥ чакламъя туннэ Россиысь армилы мар уг тырмы, нош маиз мукет кунъёслы синмаськымон?

— Туннэ асьмелэн мукетъёслы гочамон ож тӥрлыкмы. Тани ӵукна гинэ телевизор пыр Сирия сярысь иворъёсты учки. Сюлэм шумпотэ, Россиысь солдатъёсты адӟыса. Дӥсьсы но, техниказы но туала, ӟеч. Соку ик шӧдӥське: туннэ кунмы ожгарчиослы бадӟым саклык висъя, котькудзэс дунъяны быгатэ.

Вератэк кельтоно ӧвӧл созэ но: мар ватонэз, азьло аръёсы армиын ӵемысь луо вал  учыръёс — солдатъёс я бусые картош утялтыны пото, я кыӵе ке командирлы корка я мунчо лэсьто… Туала арын таӵе учыръёсты уд пумита ини. Солдатъёслэн дырзы ортче, бызьылыса, ыбылӥськыса, техникаез дышетыса.

Таин валче шӧдӥськод: армиын 1 ар — со туж ичи. Усто луысал, та дырез выльысен кузёмытысалзы ке. Угось егит мурт ар куспын тыро-пыдо тодон-валан басьтэ, нош уж вылын сое эскерыса уг вутты — бертон дырыз вуэ.

Уг кельшо на солдатъёслы чаклам туала пыдвылъёс. Соос шаплы пасясько, пыдкук пушкын позырско. Бинялтэтлэсь — портянкалэсь — усто номыр но ӧвӧл. Пыд соин уг кынмы, уг пӧся, вупульыосын уг шобырскы, куасалскем интыосаз бактериос уг люкасько. Котмыны шедиз? Нюр интызэ пыдес котырад бинялты но, со ветлэмъя  шаплы куасьмоз.

Туала армие выльысен берыктысал утялскон, пӧраськон ужъёсты. Азьвыл солдатъёс асьсэос ӵошен сиён дасяло, улон котырзэс утялто вал. Али та ужъёс борды чиньызэс но уг йӧттыло. Мон малпамъя, туала солдат ваньзэ лэсьтыны быгатыны кулэ: пӧраськыны но, вуриськыны но, мисьтаськыны но, утялскыны но… Угось азьлань улондэ, кытчы сюрондэ уд тодӥськы. Егитысен дышетсконо амало луыны. Одӥг мадёс тодам лыктэ. Россиысь но Америкаысь солдатъёс куспын учениос мыно. Сётэмын задание: зӧк корлэсь шорзэ шедьтоно. Мар каризы кунгож сьӧрысь солдатъёс? Автоматъёссэс кор вылэ тырыса, дыг-мог лыдъяны выризы шорзэ. Асьме солдатъёс пыдкукъёсысьтызы шнурокъёссэс шаплы пертчылӥзы но ог-огзы борды керттылӥзы. Озьы капчиен шорзэ шедьтӥзы…

— Алексей Владимирович, кызьы пусъёды Атыкай музъеммес утисьёслэсь праздниксэс?

— Праздникъёсты яратӥсько семьяеным ӵош пусйыны. 20-тӥ феврале бадӟымезлэсь нылылэсь вордӥськем нуналзэ каримы. Солы 20 арес тырмиз. Тодон-валан люка Ижысь техникая кун университетын. Пичиез нылмы нылпи садэ ветлэ.

23-тӥ февралез пусъё кузпалыным Марина Викторовнаен ӵош. Малы ке шуоно ӵапак та нунал котырын вордӥськиз милям семьямы. Тодматскеммы бере 1 толэзь но ортчыса вуттӥз вал меда, туэ ӵош улэммылы 20 ар тырмоз ини.

Маринаен нырысьсэ пумиськимы Ижысь 7 номеро больницаын. Соку ожлы сӥзем киноын выллем учыр тупаз. Огез солдатэ учениос дыръя пыдзэ вӧсь карыны шедьтӥз. Сое мон та больницае вайи. Марина отын медсестра луыса ужаз. Озьы мынэсьтым солдатме со шаплы пыд вылаз ӝутыны быгатӥз, нош мынэсьтым сюлэмме весяклы ас палаз кариз.

Тодмоосмы, эшъёсмы нырысь-валысь малпало вал, мон воргорон, ожгарчи бере, семьяям но мон ик кивалтӥсько шуыса. Нош ожгарчиослэн семьяязы ваньмыз мукет сямен радъяське. Монэ пӧртэм сильтӧлъёслэсь, шуг-секытъёслэсь уте кузпалы. Ку гинэ эн берты, солэн сиён пӧрамын, корка утялтэмын, нылпиос сюдэмын. Озьы луэ ини: вӧзад макем чидась кышномурт, сокем тон кужмо ожгарчи.

Ольга Корепанова

Удмурт Дунне
By Удмурт Дунне 24 февраля, 2017 10:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<