Кужым сётӥсь кузьым

Удмурт Дунне
By Удмурт Дунне 2 февраля, 2017 14:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

2011-тӥ арысен Удмуртиысь журналистъёс пӧлын сётъяны кутскизы Э. Батуев нимо премиез. Со дырысен арлы быдэ та премиен пусъё шаерысьтымы удмурт журналистикаез азинтӥсь, удмурт кылэз но культураез вӧлмытӥсь, сюлмаськытӥсь ужпумъёсты ӝутӥсь, удмуртъёслэн улонзы сярысь пӧртэм ужрадъёсты паськыт возьматӥсь журналистъёсты.

Туэ сое басьтӥзы «Удмурт дунне» газетлэн валтӥсь редакторезлэн воштӥсез Елена Миннигараева, «Мынам Удмуртие» телерадиокомпаниын ужасьёс Светлана Пикулева но Светлана Белых, нош егит журналистъёс пӧлын висъяськиз Удмурт кун университетын дышетскись Юлия Ильмурзина.

Елена Миннигараева:

— Журналист та улонын трос лэсьтыны быгатэ. Угось солэн ужан амалыз — кыл. Та ласянь «Удмурт дунне» газетлэн кужымез быдэс даур ӵоже кыдамын ни.

Огвакытэ малпаськонэ уси: луысал ке удмурт журналистикаын нимысьтыз премия, удмурт калыклэн ужпумъёсыз сярысь эшшо тунсыкогес статьяос, передачаос кылдысалзы. Та мылкыдме верай «Удмурт Кенеш» огазеяськонлэн исполкомаз. Шумпотӥсько, малпанлы соку ик дурбасьтӥзы, положениез дасян борды кутским. Со вакытъёсы ӧй но малпалля, ачим но та премиен пусъемын луо шуыса.

Тау карыны кулэ «Удмурт Кенеш» огазеяськонлы, Улосэз азинтон стратегияя институтлы но Удмуртиысь Журналистъёслэн огазеяськонзылы. Соос Эрик Батуев премиез сётъянъя ужез рос-прос радъяло.  Кӧня йӧно, яркыт журналистъёс пусъемын ни!   Мон понна Эрик Батуевлэсь премизэ басьтон — со азьвыл ужъёсылы но дунъет сётон. Но Россиысь, кунгож сьӧрысь пӧртэм вормонъёсын ӵошатыса, таиз трослы матынгес но дуногес. Тау карисько визьмо, сабырлы геройёсылы. Соос — калыклэн туннэ нуналлы осконэз.

Светлана Пикулева:

— Вожвылъяськонэ «Пинал дыр» программаен пыриськи. Удмурт кылын вераськись нылпиос понна телевидениын «Шудон корка» возьматӥське, нош радио кылзӥсьёсмы ӝоже уськытэмын кадь потӥз. Озьы 2015-тӥ арын «Пинал дыр» программа кылдытӥмы.

Сое Маши нылыным нуиськомы. Солы 10 арес, тодон-валан люка Ижысь 69 номеро школаысь хореографияя классын. Удмурт кылэз школаын уг дышеты, семья куспамы гинэ вераськиськомы. Та передачалы луыса кылыз эшшо но воляз. Тау кареме потэ анай-атайёслы. Передача лэсьтон капчиен уг сётскы, удмурт кылын вераськись нылпиосты городысь шуг шедьтыны, нош мумы-бубыос асьсэос вазисько, юрттэт сётыны мылкыд каро.

Премиен Машилы мунё басьтӥмы. Юрттӥськемез понна котькуд толэзе пичильтык уждун  сётӥсько. Машие котыр ласянь юрттӥськисе луэ.

Светлана Белых:

— Та вожвылъяськонэ мон «Кыл дунне» программаен пыриськи. Нырысь ик со «Кылсярысь» программа вал. Кыллэн кылдэмез, солэн пуштросэз, ортчемез но туалаез сярысь тодон-валанъёсме калык доры вуттэме потэ. Со юан-веранъёсылы валэктон шедьтыны юртто научной ужасьёс. Анай кылэз азинтон — вань выжы калыкъёслэн сюлмаськонзы. Азям ужпум пуктӥсько: кыллэсь узырлыксэ возьматоно, егитъёслэсь кылэз тодон мылкыдзэс пуромытоно.

Конкурсэ кылем аръёсы но пыриськылӥ, нош данъянлэн дырыз туэ вуиз. Соин ик мукет журналистъёслы но верасал, ӟечезлы осконзэс медаз ыштэ. Ужам уж токма уг луы.

Э. Батуев нимо премия басьтэме бере ас азям эшшо но бадӟымгес куронъёс пуктӥсько.

Юлия Ильмурзина:

— Таиз кузьым чылкак малпамтэ шорысь вуиз кадь мон доры. Паймемын но шумпотэмын. Али мон Удмурт кун университетысь Удмурт филологияя, финно-угроведениея но журналистикая институтысь 3-тӥ курсын дышетскисько. Нош вордски Татарстанысь Балтаси ёросысь Вуж Кушкет гуртын.

Школаын дышетскыкум ик, выжыкылъёс, кылбуръёс гожъян борды басьтӥськи. Туж кельше лыдӟиськыны. Школаын ужась дышетӥсьёс бурдъямъя ёросын но Удмуртиын ортчылэм пӧртэм конкурсъёсы пыриськылыса, вормонъёс басьтылӥ, школаме зарни медален йылпумъяй.

Гуртысь дышетӥсьёсмы ик кылъёсты яратон мылкыд пыӵатӥзы. Удмуртэн но ӟучен сяна, бигер сямен вераськисько, англи кылэз гажасько, нош университетэ вуыса, венгер кылэн тодматски.

Егит журналистъёслэн вожвылъяськоназы пыриськи «Инвожо» журналын печатлам материалъёсыным. Ас вакытаз Владимир Романовлэсь «Ваёбыж кар» кылбурзэ ӟуче берыктыса, Удмуртиын ортчем конкурсын вормись луи вал, мукет ужъёсме но конкурсэ ыстӥ. Премия басьтэме бере аслым шуи: озьыен, шонер сюрестӥ вамыштӥсько.

Валентина Емельянова

 

Удмурт Дунне
By Удмурт Дунне 2 февраля, 2017 14:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<