Куара но буёл. Маин тодэ кылиз Леонид Прозоров художник

Удмурт Дунне
By Удмурт Дунне 20 февраля, 2017 16:39
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Удмурт дунне» газетлэн редакцияз усьтӥськиз ужъёсыныз адӟытон. Сое усьтонэ лыктӥзы тодмоосыз, эшъёсыз, Удмуртиысь нимо-дано художникъёс, журналистъёс.

16-тӥ тулыспалэ 70 арес тырмысал  Удмуртиысь искусство удысысь дано ужасьлы (1995), Удмурт Элькунлэн Кун премиезлэн лауреатэзлы (1996) художниклы-графиклы Леонид Прозоровлы.

Жаляса верано, со кемалась асьме пӧлын ӧвӧл ни — улонысь кошкиз 1999-тӥ арын. Леонид Алексеевич 26 ар ӵоже газетын суредась луыса ужаз, номерлы быдэ сямен потазы солэн суредъёсыз, «Шӧкыч» бамез уката лэчыт карыны юрттылӥзы  карикатураосыз. Юбилеезлы сӥзьыса, «Удмурт дунне» газетлэн редакцияз усьтӥськиз ужъёсыныз адӟытон. Сое усьтонэ лыктӥзы тодмоосыз, эшъёсыз, Удмуртиысь нимо-дано художникъёс, журналистъёс.  Леонид Прозоров ас бӧрсяз ӟеч суредъёс но  шуныт тодэ ваёнъёс кельтӥз — куноос вожмаськыса кадь мадизы ӵош ужам вакытъёссы сярысь,  Леонид Алексеевичлэсь огдыре туж кужмо но туж ненег сюлэмо луэмзэ пусйизы. Буре ваён ӝыт котрес ӝӧк сьӧрын вераськонлы пӧрмиз, шуыны луоз.

Валентина Соколова, Леонид Прозоровлэн дышетӥсез:

— Лёня дышетскиз Сьӧлталан, но со вакытэ отын 11 ар дышетсконо вал, нош Копкиын — 10 ар, соин со эшъёсыныз ӵош школазэс ӝоггес быдтон вылысь берпуметӥ арзэ дышетскыны  сьӧр гуртэ выжизы. Мыным, егит дышетӥсьлы, туж удалтӥз сьӧлта пиосын — соос туж тыршисесь, кылзӥськисесь вал,  котькыӵе конкурсэ мыло-кыдо пыриськылӥзы. Нош классмылэн бордгазетъёсыз котьку 1-тӥ инты басьтылӥзы: Лёня Прозоров но Володя Зворыгин соку ик синмаськымон суредаськизы. Бӧрысь кыкназы тодмо художникъёс луизы, жаль, одӥгзы но улэп ӧвӧл ни. Но мон али ке но асме тышкаськисько, кызьы синйылтытэк кельтӥ Лёнялэсь  мукет быгатонлыксэ — кырӟаны устолыксэ, угось бӧрысь аслэсьтыз но, эшъёсызлэсь но кылылӥ, солэн туж кырӟась луэмез потэ вылэм шуыса.  Со кырӟаз бен, Удмурт радиолэн хораз но ужаз, но пушказ малпаськылӥз бадӟым сцена сярысь…

Леонид Алексеевич 26 ар ӵоже газетын суредась луыса ужаз, номерлы быдэ сямен потазы солэн суредъёсыз, «Шӧкыч» бамез уката лэчыт карыны юрттылӥзы карикатураосыз.

Пётр Ёлкин, Удмуртиысь калык художник:

— Леонид Алексеевичен УдГУ-ын ми одӥг группаын дышетским, соин сое туж ӟеч тодӥсько. Туж талантливой адями вал, но меӵак вераны кулэ: со ӧз быгаты вань  быгатонлыкъёссэ асьмелы возьматыны. Маке но ӧз тырмы: дыр-а, юрттэт-а, аслыз ачиз оскон-а, но мон тодӥсько, солэн  луонлыкъёсыз ӝыныё кылизы.  Куке но мон сое ас интыям «Советской Удмуртия» газетын ужаны ӵектӥ. Солы со огдыре шум но потылӥз, куатаськылӥз но. Огласянь, ужез (уждунэз) кылдӥз кадь — нуналмысь коньдон поттон сярысь  йыр висёнэз быриз, нош мукет ласянь — газет   быдэсак ньылылӥз солэсь дырзэ но суредаськон дартсэ… Нош суредасьлы кулэ эрик, заказ быдтэ солэсь лулзэ.

Александр  Фертиков, суредась, Удмурт кун университетысь Искусствоосъя но дизайнъя институтысь дышетӥсь:

— Лулпушыныз Леонид Прозоров тужгес матын вал  Менсадык Гариповлы. Менсадык  шӧдылӥз Лёнялэсь  удмурт дуннеен тунсыкъяськемзэ, лӧпкытъяны выриз. Шуо, газетысь но кошкыны косэ вылэм — азинскемед ке потэ, темаяд выйыны кулэ шуыса.  Лёнялэн  та удысын одно пӧрмысал. Конечно, Менсадыкез кинлы ке ортчыны туж шуг, но Прозоровлэн суредъёсыз луысалзы мукетэсь — лэчытэсь но аспӧртэмесь. Угось Прозоров — карикатурист, соос югдур шоры мукет сяменгес учко.

Леонид Прозоровлэн автопортретэз.

Вячеслав Михайлов, суредась, Удмуртиысь искусство удысысь дано ужась:

— Тодӥсько на, кызьы Лёня Москва котырысь  творчествоя юртысь бертӥз — суредаськон мылкыдыз дурыныз  уртчыса!  Отын  со офорт амаллы дышем. Малпанъёсыз лачак вал, но маке но люкетӥз соосты быдэстыны. Туж дунъялляй солэсь  дӥсьтон сямзэ. Туж шерез кылзэс вераллязы Художникъёслэн огазеяськоназы, со нокинлэсь ӧз кӧбералля, быгатӥз ассэ но гажаны, мукетъёсызлы но дурбасьтыны. Художникъёс ваньмыз ас вактазы уло, мар соосты сюлэмшугъяськытэ — нокинлэн ужез ӧвӧл…

Валентин Белых, Удмуртиысь калык художник:

— Тодӥськоды-а, мар паймымон: адямиос синмаськылӥзы Лёнялэн дӥсьтӥсь сямызлы, со ӧй вал востэм, быгатылӥз  ас понназ но, мукетъёс понна  но кылзэ вераны, дурбасьтыны, боец — огкылын вераса. Со ноку ӧсэ ӧз йыгаськылы — куалак усьтоз но,  зӧк куараен кырӟаса, пыроз вал!  Нош пушказ тӥни кыӵе ненег вылэм — кин малпасал, со ас мылкыдызъя улонысь кошкоз шуыса, угось ваче пукылыкумы  ноку ӧз поттылы аслаз сюлэмвисёнэз сярысь.  Прозоров кадьёс  улэп луысалзы ке, кин ке дӥсьтысал шат туннэ удмурт художникъёсты союзысь (Суредасьёслэн огазеяськонысьтызы)  улляны?

Семен Виноградов, Удмуртиысь калык художник: 

— Мастерское лыктыкум, мон, пагӟатъёстӥ  тубыкум ик, тодылӥ ни, интыяз-а туннэ Лёня, ӧвӧл-а, малы ке шуоно со весь кырӟалляз. Туж вераськись вал, котькуд малпанзэ шараялляз, суредъёссэ возьматылӥз. Мадьылӥз кӧтӝожзэ но: туж, пе, потэ вал консерваторие мынэме, операын кырӟаме, со пумысен вазиськем Г. Корепанов-Камский крезьгурчилы, нош соиз алэм: диапазонэд, пе, сюбег… Отӥяз Лёнялэн аслыз ачиз осконэз бырем. Жаль. Нокинэ кылзоно ӧвӧл, ас сюлэмдэ гинэ. Кытчы со кыске, отчы мыноно.

Геннадий Романов, Удмуртиысь дано журналист:

— Леонид Прозоровен, одӥг газетын ужаса, быдэс Удмуртиез кӧня ке пол ортчим, дыр. Азьвыл  котькуд командировкаысь суред куро вал: мон  кин ке сярысь гожтӥсько, со  суреда. Кӧня портрет лэсьтӥз со озьы. Туж ӝог суреда вал, мон вераськыса но уг вуттӥськы на, нош геройлэн тусбуйыз дась ни. Туж трос «Шӧкыче» суредаськиз.

Ульфат Бадретдинов, журналист, писатель:

— Леонид Алексеевич «Кизили» журналлэсь нырысетӥ номеръёссэ суредалляз. Туж курадӟиськом вал нырысетӥ бамен, угось сое эскерылӥзы обкомын. Тодӥсько на, Прозоров вайиз суред: шепаськись бусы, зангарисяськаос… Редколлегиын шуо: кивалтӥсьёслы уз яра, зангари — со жаг  ук. Но Леонид Алексеевич ваменскиз, суредзэ ӧз вошты. Обкомын но ӧз визьтэмъяське, обложкаез ушъязы.

Анна Зуева-Измайлова, тодосчи, филология наукаосъя доктор:

— Леонид Алексеевичен ми одӥг гуртын — Сьӧлта ёросысь Иткулын — вордӥськемын. Соослэн корказы туж чебер вал, али пу зодчествоя синпелет карысалзы ни. Но Леонид Алексеевичен ми матысь тодматским ай УдГУ-ын. Солэн вал пӧртэм талантъёсыз, соин паймылӥз, дыр, кыӵе сюресэтӥ вамыштыны. Кылсярысь, мыным со мадьылӥз, УдГУ бере аспирантурае  искусствоведэ дышетскыны ӵектӥзы вал шуыса, но со вакытэ солэн семьяез вал ни, соин ӝоггес уже интыяськиз. Шумпотымон, Прозоровлэсь творчествозэ  Москваысь меценат Николай Витрук дунъяз шуыса. Со статья но гожтӥз, суредъёссэ но басьтӥз — али соос утисько Эгралась галереяын.   Жаль, Сьӧлталан инты ӧз шедьы бӧляксылэсь ужъёссэ интыяны…

Василий Пахомов, суредась-карикатурист:

— Леонид Алексеевич мынам дышетӥсе вал, монэ ас интыяз кельтӥз, шуыны луоз. Ялан тема сётъялляз.  Карикатура жанр кулэезъя дунъямын ӧвӧл, нош со — зэмос публицистика. Тӥни сое гажаны но дышетӥз. Эн дырты, суредысьтыд  котькуд ымныр улэп мед луоз, шуылӥз.

Леонид Прозоровлэн суредъёсыз

Лилия Прозорова, кузпалыз:

— Мон ӧй но малпа вал, сомында ар ортчыса, Лёняез тазьы шуныт буре ваёзы на шуыса. Но ӟеч адями уг вуны. Монэ котьку  паймытылӥзы  школаын ӵош дышетскем эшъёсыз, соослы быдэн 70 арес ни, нош соос ялан  семьяосынызы ваче пумиськыло, улонысь кошкем эшъёссэс дэмен буре ваё, тани туннэ но лыктӥзы. Шумпотӥсько такем бадӟым художникъёслэн ӟеч дунъет сётэмзылы. Лёня  туж яратылӥз удмурт калыксэ, удмурт ымныръёсты суредакуз, солэн мылкыдыз ик мукет луэ вал — суредэз котыртӥ бергаса, кырӟалляз.

Лёня мыным ту-уж! чебер потэ вал. Шораз «римлянин» шуыса ӵемысь вазиськылӥ. Баблес нап йырсиез ӧжытак будэ ке, син шорам пуктӥсько ни вал: дӥся талы кузь тога, кутча сандали но кымесаз повязка кертты — маин римлянинлы уг кельшы?

Зэм, вань воргоронъёс сямен ик, Лёня но ӧз яратылы чебер дӥсяськыны. Ачим солы дӥсь но, пыдкук  но бырйисько вал. Нош со, вань суредасьёс сямен ик, я зонтиксэ, я пӧзьызэ  кытчы ке вунэтыса, ыштыса кельтоз.

Но туж визьмо, интеллигентной адями вал. Трос лыдӟиськиз, уката кельшытылӥз Бунинэз но Платоновез, Чеховез но Тургеневез. Книгаосысь унозэ фразаосты йыраз кельтылӥз. Соосын мыным но вазиськылӥз, кылсярысь: «Свет мой, голубушка!»

Лёня котькуд ӵукна 6 часын сайкалляз,  стадионэ потаз: зарядка лэсьтӥз, бызьылӥз. Собере вылтӥз кык ведра кезьыт ву кисьтылӥз. Коркамы вань улӥсьёс тазьы выремзэ учкылӥзы. Зэм, солэн туж потэ вал, мон но соин ӵош стадионэ мед поталом шуыса. Нош мон егит на вал, вазь ӵукна султылэме ӧз потылы. Куд-ог дыръя гинэ асме кужмысь сямен карылӥ. Сьӧдэн тӧдьыен спорт костюме вал. Сое дӥсяса потыкум, Лёня небытак шуылӥз: лобе мынам коӵое! Бӧрысьгес суредзэ адӟи: тэлетӥ бызе сьӧд-тӧдьы дӥсен пӧрмем нылаш, нош со вылын котыръя коӵо…

Лёня яратылӥз серекъяны. Серемес гожтэмъёсты, анекдотъёсты со котьку синйылтылӥз, йыраз кельтылӥз. Соосты выльысь но выльысь тодаз вайылӥз — ӵошен серекъяса пукиськом вал.

Солэн туж ненег сюлэмыз вал. Ялан кырӟалляз небыт кырӟанъёсты. Солэсь зэмос артист пӧрмысал — куараез туж чебер вал. Трос классика кырӟанъёсты, романсъёсты тодылӥз.

Лёня туж яратылӥз гурт калыкез суреданы. Вазен мон ӧй валалля, ӵемысь юалляй: малы удмуртъёсты ялан суредаськод? Со валэктылӥз: киосы асьсэос суредало. Иське, со туж яратылӥз ужась, шуг-секытъёслы сётскисьтэм, номыр шоры учкытэк шулдыръяськыны быгатӥсь калыксэ. Малпасько, Лёнялэн суредъёсызъя куке но дышетозы ай удмуртъёслэсь историзэс.

Зэм, вань творческой адямиос сямен ик, Лёня но троссэ сюлэмаз басьтылӥз…

Зинаида Рябинина

Туспуктӥз А. Горбунов

 

Удмурт Дунне
By Удмурт Дунне 20 февраля, 2017 16:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<