Ёросъёсысь иворъёс: Воткаын — урмон, Кезын -выль школа, Киясаын — мунё сюан

Удмурт Дунне
By Удмурт Дунне 7 февраля, 2017 14:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Сюмси

Кыл кутоз

Сюмси ёросысь одӥгаз гуртын улӥсь воргоронэз быдэ вуымтэ нылашез сантэмамез понна 8 но ӝыны арлы пытсэт сьӧры келязы.

24-тӥ толшоре уйин соос ӵош шулдыръяськыны малпаллям — курытсэ юоно кариськиллям. Воргоронлэн вирыз шудыны кутскем — нылаш вылэ омырскем. Сазьтӥськемез бере воргорон танӥськымтэ — кызьы вал, ваньзэ мадем.

Кияса

«Мунё сюан», «Кунян вордскон» но пӧртмаськон

Кияса культура юртын «Преданья старины глубокой…» нылпи фестиваль ортчиз.

Ужрадэ пыриськизы ёросысь 11 нылпи коллективъёс. Соос эктӥзы, шудӥзы, такмак кырӟазы, сценкаос возьматӥзы, ёросысьтызы сям-йылолъёс сярысь мадизы. Нылпиослэсь быгатэмзэс дунъяз жюри. Вожодырез яркыт возьматэмзы понна гран-при басьтӥзы Подгорнойысь «Маска» клубе ветлӥсь нылпиос. 1-тӥ интыез утӥзы юрмалайёс — соос возьматӥзы тунаськонэз. Эшъёссылэсь ӧжыт гинэ бере кылизы Кияса культура юртысь «Непоседы» но «Романтик» ансамбльын кырӟасьёс. Соос «Мунё сюан» сям-йылолэз возьматӥзы. 3-тӥ интыез басьтӥзы нош ик юрмалайёс —  «Родничок» драмкружокын шудӥсьёс дасяллям «Кунян вордскон» сям-йылолэз.

Пичи Пурга

 Кезьыт ке но, пӧсь

Пичи Пурга черкогуртын, Россиысь ДОСААФ-лы 90 ар тырмонлы сӥзьыса, ӵошатскон ортчиз.

Ужрадэ  пыриськизы 8-тӥ классын дышетскись нылпиос бордысен кутскыса 65 аресозь нылкышноос но воргоронъёс, муниципал кылдытэтъёсысь но хозяйствоосысь специалистъёс, школаосын кивалтӥсьёс. Соос асьсэлэсь кужмо но задор луэмзэс возьматӥзы, куасэн бызьылыса, ыбылӥськыса, турникын ӝуткаськыса, дартсэн шудыса,  суй-кужымзэс мертаса.

1-тӥ, 2-тӥ но 3-тӥ инты басьтэмъёслы медальёс, дипломъёс но синпель кузьымъёс сётъямын. Куазь кезьыт ке но вал, ӵошатсконъёс пӧсь но ӟырдыт ортчизы.

Кизнер

Выль вормонъёс шумпотто

Туэ арез ӟеч мылкыдын пумитало «Зори Кизнера» культура дворецысь нылпиослэн но егитъёслэн 5 коллективъёссы. Соослы шуд усиз асьсэлэсь быгатонлыкъёссэс возьматыны Россиысь творческой коллективъёслэн олимпиадаязы.

Ньылез коллективъёс 2-тӥ степенё лауреатъёс луизы: эктонлы сӥзем номинациын «Степ», «Арабеск» ансамбльёс, кырӟанъя номинациын уӵы кадь чебер куараеныз паймытӥз Софья Юкина. Софья кырӟа «Мечта» ансамбльын. Арганчиос пӧлын шаплы луэмзэс но быгатыса шудэмзэс возьматӥз  «Кармыжысь уӵыос» ансамбль. Нош театръёс пӧлын 1-тӥ степенё лауреат луиз «Егит театралъёс» коллектив.

Балезино

Гуртэ лыкто егитъёс

Балезино ёрос больницае «Гуртысь эмчи» программая педиатр но стоматолог-ортопед вуизы.

Медакадемиын дышетсконзэ йылпумъяса, нырысь Евгений Куршев дораз бертӥз, стоматолог-ортопед луыса тырше. Ар ортчыса, Марина кузпалыз но ёрос больницае ик куриськиз — таиз нылпиосты эмъялоз. Гуртэ ужаны бертэмзы понна кузпалъёс быдэн миллион манет басьтозы. Со коньдонэн ми Балезино посёлоке улон инты басьтыны чакласьком, шуо егитъёс.

Вавож

 Мед улоз на

Бадӟым Можгаысь 9 классъем школалы 130 ар тырмонэн валче трос куноос люкаськылӥзы.

Школаямы тамында адями — ог 150 пала — кемалась ӧз вуылыны ни вал, шуо дышетӥсьёс. Вуж школазэс кесяса, выльзэ 1969-тӥ арын пуктӥллям. Туннэ нуналлы отын 37 нылпи тодон-валан люка. Соосты визьнодало 13 дышетӥсьёс.

Нылпиос но дышетӥсьёс кунооссылы бадӟым концерт возьматӥзы, викторина ортчытӥзы. Нош куноос асьсэ вакытысь кырӟанъёсты кырӟазы. Пумиськон  шулдыр, шуныт но кемалы вунонтэм кылиз. Ваньзы ик сӥзизы: медаз ворсалэ вал школаез. Угось колхоз куашкамен валче егитъёс гуртысь кошко, пиналъёс пумен ичи но ичи кылё.

Вотка

 

Урмон вӧлме

Воткинск ёросысь Осиновка гурт дорын урмон висёнлэсь кулӥз пуны.

Чер паласькем ӟичылэсь. Эмчиос, толэзь ортчыса гинэ, валазы, малы кулӥз пуны. Нырысь эскерыкузы, номыр аламазэ ӧз шедьтэ вал. Пудо эмъясьёс гуртысь вань животъёслы  вакцина пуктылӥзы, гидъёсты чылкытатӥзы. Матысь нюлэсъёсы, пӧйшуръёс мед шедьтозы шуыса, вакцинаен сурам сиён тыризы. Удмуртиын туэ урмонэн висись 9 пӧйшур шедиз ини.

Кез

Выль школа лэсьтозы

Кез каргуртэ чакламын 500 нылпилы выль школа пуктыны. Со понна висъямын ни инты, дасямын проект.

Школа лэсьтон усёз 286 миллион манет тыр. Лэсьтӥськисьёс уж борды ӝоген кутскозы ни, выль юрт ӧсъёссэ кайта усьтоз.

Кезысь 1 номеро шор ёзо школа пуктэмын 1972-тӥ арын, чакламын ог 700 пиналлы, нош ветлэ отчы 1 сюрс 298 нылпи. Интызы ӟоскытэн соос 2 сменаен дышетсконо луо.

Можга

Армие интые — пытсэт сьӧры

Можга карысь 19 аресъем пияш армилэсь пегамез понна 2 арлы пытсэт сьӧры шедьыны быгатоз.

Егит пилы, армие мыноно шуыса, трос пол повестка вуылӥз. Но со одӥг пол но военкоматэ ӧз кожа, адӟымтэ улсы кариськылӥз. Удмуртиысь Следственной комитетлэн пресс-службаез ивортэмъя, пияш вылэ ӝутэмын уголовной уж.

Якшур-Бӧдья

Газет огазея

Якшур-Бӧдья ёросысь «Рассвет» газетлэн призэз понна куасэн бызьылонъя 57-тӥез ӵошатскон ортчиз. Ужрадэ пыриськизы ёросысь вань муниципал кылдытэтъёс, ужась коллективъёс, егитъёс, нылпиос, арлыдоос.

Арлы быдэ куас вылэ султо Мукши гуртысь спортсменъёс — 80 аресъем Серафима Вахрушева но 79 аресъем Михаил Шкляев. Соос туэ но усто бызьылэменызы паймытӥзы.

Азьвыл ӵошатсконын вормисьёс синпель кузьымъёс басьтыло вал ке, туэ соос понна нимысьтыз медаль дасяллям. Тужгес покчиосызлы бызьылӥсьёслы ужбергатӥсь Александр Щепин арлы быдэ кузьым сётъя. Гурт удысын азьветлӥсьёслэсь Валентин Комлевлэсь но Тамара Колодкиналэсь нимъёссэс буре вайыса, арлыдоос нимысьтыз приз басьтӥзы.

УД

 

 

Удмурт Дунне
By Удмурт Дунне 7 февраля, 2017 14:00 Updated