Ёросъёс: Удмурт корка, выль гид но 61 мурт

Удмурт Дунне
By Удмурт Дунне 2 февраля, 2017 13:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Балезино

Ӟеч юрттэт

Пӧбъя гуртысь арлыдоос юрттэт басьтӥзы.

Ёросысь калыклы юрттэт сётонъя центрын ужась специалистъёс гуртъёсы потало. Кылем арын ноябрь толэзе соос Ушур гуртэ вуылӥзы, таяз радэ — Пӧбъяе. Ёросысь специалистъёс 2 арня ӵоже гуртоослэн сюлмаськонъёсынызы улӥзы: йырси ӵышкизы, кинлы ке массаж лэсьтӥзы, куинетӥосызлы лекция лыдӟизы. Гуртоос азьын вераськизы психологъёс, полициын но тылпу кысон удысын, банкын ужасьёс, ёрос черкысь баӵко но мукетъёсыз. Гуртысь арлыдоослы юрттэт дунтэм дунын яке, пенсизы ичи ке, воксё дунтэк сётӥське.

Вавож

Азьветлӥсьёс

Ёросысь пудо утисьёс 2016-тӥ арын 53 сюрс 596 тонна йӧл кыскизы.

2015-тӥ арен ӵошатыса, со 10 процентлы уногес луэ. йӧл кысконзэс будэтыны быгатӥзы вань хозяйствоос. Та дырлы вавожъёс шаерамы азьветлӥсьёс луо. Котькинлы адӟем карымон тыршо «Колос» хозяйствоын, соос ар ӵоже 19 сюрс 131 тонна йӧл люказы, валля арен ӵошатыса, та лыдпус 15 процентлы тросгес. 2-тӥ но 3-тӥ интыын вамышъяло «Горд Октябрь» но «Удмуртия» хозяйствоос. Ёрослы азинскыны юртто на Геннадий Копысовлэн но Сагадат Ждаббаровлэн фермер хозяйствооссы.

Глазов

 Кунян кылиз гидэ

3-тӥ арзэ «Коммунар» хозяйствоын «Поле чудес» шудон ортчыто.

Азьвыл аръёсы отчы пыриськизы ёросысь мукет хозяйствоосын ужасьёс, таяз учыре — асьсэ хозяйствоысьтызы егитъёс гинэ. Пӧлазы вал пудо утисьёс, механизаторъёс но специалистъёс. Ваньмыз зэмос шудонын выллем: ужрадэз нуиз «Леонид Якубович» — Вадим Ульянов, люкаськемъёслы капчи мылкыд кузьмазы «Гыдыке» ансамбле ветлӥсьёс. 9 мурт пӧлысь вормиз будосъёсъя бригадаысь учётчица Анастасия Дьяконова. Люкам баллъёсыныз час но посуда набор басьтӥз, нош супер-шудонэ ӧз пыриськы. Озьы кузьымзы — кунян — колхоз гидэ ик кылиз.

Сьӧлта

Огшоры суредъёс

Черкогуртысь шаертодонъя музейын кыкетӥ арнязэ ужа Борис Ложкинлэн «Огшоры суредъёс» адӟытонэз.

Борис Климентьевич вордскемын 1960-тӥ арын. Сьӧлта черкогуртысь шор ёзо школаез йылпумъяса, Ленинградысь киноинженеръёслэн институтысьтызы механикая факультетэз горд дипломен быдтэмын. Студент дыръяз ик фотоаппаратэн тодматскемын. Солэн туспуктэмъёсыз Совето Союзын но дуннеысь адӟытонъёсын, вожвылъяськонъёсын вылӥ интыос басьтылэмын. Улэ Сьӧлтаын. Адӟытонэз усьтонэ фотохудожниклэн ӵош дышетскем эшъёсыз но матысь тодмоосыз люкаськылӥзы.

Ува

Удмурт корка

Та толэзь шорын ёрос центрын удмуртъёслэн клубзы ужаны кутскиз.

Удмуртъёсты огазеян сярысь вераськонъёс кемалась ветло ни вал. Уж борды басьтӥськиз ёросысь «Удмурт нылкышно кенешен» кивалтӥсь Валентина Яковлева. Клубзылы «Эсэп» ним сётыны малпало, та дыре сое усьтыны вань документъёс дасяло. Клублэсь кыкетӥ пумиськонзэ февраль толэзе ортчытыны чакламын. Уваысь кибашлыослэн юртысьтызы специалист Надежда Сидорова удмурт дэремъёс, пужыос сярысь пыр-поч мадёз. Нош апрель толэзе радъяны малпало «Сяськаяськытом шаермес» семинар.

Яр

Кезьытъёслы пумит

Каргуртысь ӵыпет вылын куасэн бызьылонъя «Йӧвылэсултон кезьытъёс» ӵошатскон ортчиз.

Вожвылъяськонэ ёросысь 70 пала спортсменъёс пыриськизы: школаын дышетскисьёс, студентъёс но ваньмыз спортэз гажасьёс. Берло группае пырисьёс  пӧлын кужмо нюръяськон пуромиз. Вормисе потӥзы Юлия Рудина но Леонид Семакин. Куас вылын бызьылыны быгатэмзэс возьматӥзы гурт хозяйствоослэн но муниципал кылдытэтъёслэн кивалтӥсьёссы но. Таяз учыре вормись луизы Биграгурт муниципал кылдытэтлэн йырыз Алёна Поздеева но Биграгурт школалэн директорез Юрий Шандыбин.

Красногорск

 Корка пырон

Кокман гуртысь 2 семья выль корка потӥз.

Куашкан калэ вуэм юртын улӥсьёслы выль корка висъянъя программа азьланьтӥське. Кокман гуртэ кылем арын кык квартираем выль юрт пуктӥзы. Нимысьтыз комиссия быдэстэм ужлэсь ӟечлыксэ эскериз но, 2 семья Выль арез выль юртын пумитаз. Азьвыл коркаенызы тазэ уд ӵошаты. Выж вылэ вӧлдэмын ламинат но линолеум, борддоръёс кык полэс утеплителен шобыртэмын. Юртэз пуэн эстоно ке но, шуныт кема возиське. 65,5 квадрат метръем юртэз пуктон 1 миллион 757 сюрс манет тыр усиз.

Кез

Ӧссэ усьтӥз выль гид

«Дружба» хозяйствоын 17-тӥ январе выль гид усьтӥськиз.

Лэсьтӥськон ужъёс 23 миллион манет тыр усизы, гидэз ӝыны ар куспын пуктӥзы. Отын 5 дояркаос ужалозы. Соос понна шутэтскон инты, душ лэсьтэмын. Зӧк Олып гуртысь 200 йырлы чаклам гидэ пудоез декабрь толэзь пумын ик выжтӥзы. 2 арня куспын выль интылы пудоос дышизы. Кылем арня пумын та хозяйствоысь пудо утисьёс пуж-пуж йӧл кыскизы ни — котькуд скаллэсь 16 килограмм. Та дыре лыдпус 14 килограмм но 500 грамм котырын возиське. Пусйыны кулэ, олыпъёс ёросын азьветлӥсьёс луо.

Каракулино

 90 но 95

80 арес но солэсь бадӟым юбилейёссэс пусйисьёсты быдэс ёросэн ӟечкылало.

Кылем арын ёросын 90 но 95 арессэс тырмытӥсьёс 11 кузя вал. Декабрь толэзе 90 арес тырмиз ожысь но ужысь ветеранлы Леонид Кулировлы, нош январе 95 арессэ пусйиз Быргында гуртысь Анастасия Дмитриева. Нылкышно вань улонзэ гурт удысын тыршемын. Арлыдыз бадӟым ке но, улонлы уг ӝожтӥськы. Сэзь вераське, корка пуштӥ ачиз ветлыны быгатэ, Инмарлэсь тупаса улон куре.

Дэбес

Выль кивалтӥсь

Ёросысь «Нылкышно кенешлэн» выль кузёез кылдӥз.

Кылем ар пумын ёросысь нылкышноослэн бадӟым кенешсы ортчиз. Арлы йылпумъянъёс лэсьтӥзы но огазеяськонлы выль правление но кивалтӥсь бырйизы. Таяз учыре бадӟым ныпъетэз нуыны оскизы ёрос администрациын ужасьлы Галина Владыкиналы. Ужрад дыръя ик тужгес адӟем карымон нылкышноосты пусйизы. Дэбес черкогуртысь библиотекарьлы Ирина Поздеевалы сётӥзы Россиысь «Нылкышно кенешлэсь» Данъян грамотазэ, нош Зар-Медло гуртысь пенсионеркалы Надежда Русскихлы — Удмуртиысь «Нылкышно кенешлэсь» грамотазэ.

Можга

Тылобурдоос эскеремын

Пычасысь егит куркаосты ветеринаръёс эскеризы.

Толэзьем 38 сюрс 754 куркаосты быдэс толэзь ӵоже карантинын возизы. Соосты декабре Германиысь машинаосын вайизы. Кузь сюрес чипыослы секытэн сётскиз — 800-эз бырыны шедизы. Жаляса верано, карантин дыръя но 2 сюрс 500 пала бурдоос быризы на. Та дыре кыдёкысь ваем бурдоослэн тазалыксы умой ини.

Алнаш

 Кулэсмизы 61 муртлы

Кылем ар ӵоже ёросын 233 пиналъёс вордскизы: 116 пиос но 117 нылъёс.

2015-тӥ арен ӵошатыса, со 50-лы ӧжытгес. Шумпоттэ, азьвыл аръёсын ӵошатыса, оген нылпи будэтӥсь анайёслэн лыдзы кулэсмемын шуыса. Гурт поселениос сярысь ке верано, Вуж Утчан муниципал кылдытэтын гинэ улӥсьёслэн лыдзы 1 муртлы тросгес луиз, Блатгуртын одӥг мында возиськиз, нош вань кылемъёсаз калыклэн лыдыз кулэсмиз. Кылем ар куспын 294 мурт сопал дуннее кошкиз, со пӧлысь 8-эз ассэ ачиз быдтӥз.

Дэбес

Выль кивалтӥсь

Ёросысь «Нылкышно кенешлэн» выль кузёез кылдӥз.

Кылем ар пумын ёросысь нылкышноослэн бадӟым кенешсы ортчиз. Арлы йылпумъянъёс лэсьтӥзы но огазеяськонлы выль правление но кивалтӥсь бырйизы. Таяз учыре бадӟым ныпъетэз нуыны оскизы ёрос администрациын ужасьлы Галина Владыкиналы. Ужрад дыръя ик тужгес адӟем карымон нылкышноосты пусйизы. Дэбес черкогуртысь библиотекарьлы Ирина Поздеевалы сётӥзы Россиысь «Нылкышно кенешлэсь» Данъян грамотазэ, нош Зар-Медло гуртысь пенсионеркалы Надежда Русскихлы — Удмуртиысь «Нылкышно кенешлэсь» грамотазэ.

Удмурт Дунне
By Удмурт Дунне 2 февраля, 2017 13:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<