Ижысь егит удмурт анайёслэн пумиськонзы ортчиз

Удмурт Дунне
By Удмурт Дунне 8 февраля, 2017 11:31
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

6-тӥ тулыспалэ Ижкарысь проектъёсъя «Лифт» штабын ортчиз удмурт анай-атайёслэн «Пельысь пеле, ымысь ыме» пумиськонзы.

Ижын удмурт кылын вераськыны нокытын, мукет сямен вераса, уг тырмо удмурт интыос, удмурт омыр. Нылкышноос та пумысен малпанъёссэс шараязы.

Ижын улӥсь егит анайёсты люказ сурдопедагог, билингвизмен вырись Оксана Крылова. Анайёс нырысь ик кенешизы, кыӵе тусын-пуштросэн ортчыны кулэ таӵе пумиськонъёс. Луэ-а соослэсь семинар выллем дышетон люкетсэс огазеяны пиналъёсын дэмен шудонэн? Вань анайёслэн сюлмаськонзы огкадь: Ижын удмурт кылын вераськыны нокытын, мукет сямен вераса, уг тырмо удмурт интыос, удмурт омыр.  Нылкышноос та пумысен малпанъёссэс шараязы.

Лена Ильина:

— Мон керттӥськись, кык пиналме будэтӥсько. Котькуд пуксёнэ ветлӥсько анайъёслэн клубазы, со нимаське «Завтраки для мам», ортчылэ со ӵук часъёсы пиццериын. Ми, анайёс, ӝӧк сьӧрын пукон-кенешон вакытэ пиналъёсмы нимаз шудо (соос пияла ӧс сьӧрын – мар каремзы адӟиське). Дорамы вуыло тунсыко куноос: косметолог, эмчи, психолог… Туж пайдаё маке! Куддыр куалекъяса ик потӥськод: мае ке лэсьтэм, воштэм потэ. Котькудӥз таӵе пумиськон сӥземын нимаз темалы яке ужлы.

Оля Бикузина:

— Куддыр нылпиез мукет пиналъёс пӧлы кельтоно кадь луиськод – мед нимаз шудоз. Таӵе ӧтчамъёсы но кыӵе ке «дежурной анай» висъяно, дыр. Ачид гань-гань шокчод, мукет анайёсын вераськод. Яке ваньды ӵош шугъяськытӥсь юанлы валэктон утчалоды – «мозговая атака» медло! Вераськонъёс медам гинэ весь одӥг тема котыр бергалэ: малы кулэ удмурт кыл…

Елена Ильина малпамъя, тае пумиськонъёсын нылпиос одно ик киужен вырыны кулэ.

Наташа Дмитриева:

— Та выллем пумиськонъёс берло «Шудон корка» проект чотын радъяськизы. Нош солэн радыз мукетгес. Пиналъёс шудыку (кырӟаку, эктыку) анай-атайёс огшоры пуко. Кӧня ке ар талэсь азьло, «Шудон коркаез» Кузебай Герд нимо нылпи садын ортчытылыкумы, таӵе но учыръёс вал: анай-атайёс пиналъёссэс дышетӥсьёс вылэ кельтылӥзы: «тӥ пиналыным шудэ, нош мон берлогес вуо, ужрадды быриз ке, сое басьто». Огазе шудонлэн пуштросэз  воксё быре.

Татьяна Волкова:

— Малпасько, таӵе пумиськонъёслэн одно ик луыны кулэ дышетон-визьнодан люкетэз но, шудон люкетэз но. Соосты нимаз висъяны быгатоно. Лекция практикаен мед герӟаськоз.

Вера Степанова:

— Семьяямы картэ ӟуч сямен вераське. Мон малпасько вал, пиеным но нылыным удмурт кылын гинэ вераськи ке, соос удмурт кыллы дышозы. Та утопия вылэм. Соос понна ӟуч кыл — капчи кыл: ӟучъёс котькытын. Удмуртсэ нош шедьтыны шуг. Шудонъёсты но книгаосты утчаны кулэ. Али ми библиотекае ветлыны дышим. Милемлы отын туж шумпото (ми гинэ ветлӥськом кадь). Мыным уг тырмы котырам удмурт кыл дунне. Пие азьлогес англи кылъя кружоке ветлӥз, капчиен дышетскиз, угось занятиосазы пиналъёс вераськизы но, кырӟазы но, киужен но выризы. Удмурт пумиськонъёсты но озьы ик лэсьтоно, дыр: киуж мед кылёз.

Ижын улӥсь егит анайёсты люказ сурдопедагог, билингвизмен вырись Оксана Крылова.

Оля Бикузина:

— Лиза нылы пичиысен удмуртэн гинэ вераськиз. Ӟуч кыл со понна иностранной порма вал. К. Герд нимо нылпи садэ ветлыса, со пумен удмурт сямен вераськемысь дугдӥз. Али Лиза классаз огназ удмурт сямен вераське.

Валамон, анай-атайёслэн сюлмаськонъёссы чотантэм. Нош таӵе пичи пумиськонэ но кызь адями пала люкаськиз бере, озьыен, та ужпум котыраз кужым люка. Карын улӥсь семьяос но ёросъёсысь ӟучомыны шотасьёс анай клублэсь ужзэ «Билингва» вотэсбам пыр чакланы быгато. Та проектлэн кивалтӥсез, дышетӥсь Татьяна Волкова оскытӥз: сайтэ люканы тыршозы анайёслы кулэ луись шыкыс — шудонъёсты, лыдъяськонъёсты… Та уж борды итӥськемды потӥз ке, тӥ но «ВКонтакте» вотэсын «Пельысь пеле, ымысь ыме» бамен яке Крылова Оксаналы вазиськыны быгатоды.

 Крылова Оксана анайёслы шуэ: городын но удмурт пиналъёслы одно ик инты но, вакыт но сюроз. Таяз гужем, кылсярысь, ӧсъёссэ выльысь усьтоз «Яратоно удмурт кыл» лагерь. Анайёс, атайёс но пичи пиналъёссы быгатозы быдэс арнялы удмурт кылэ зымыны, огазьын шудыны, тунсыко удмурт азьветлӥсьёсын тодматскыны. Смена ортчоз 26-тӥ инвожоысен «Мумыдор» азбарын. Шутэтскон вакыттэс кызьы радъялоды, али ик малпаськыны муг вань ини: мед со пайдаен, удмурт кылэн артэ ортчоз.

Дарали Лели

Туспуктӥз Наталья Дмитриева но Алексей Шкляев

Удмурт Дунне
By Удмурт Дунне 8 февраля, 2017 11:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<