Dаrt газетлэн редколлегиез кылдоз

Удмурт Дунне
By Удмурт Дунне 3 февраля, 2017 13:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Гажаса ӧтиськом

Кылем арняе котырес ӝӧк сьӧры люкаськылӥзы «Дарт» газет бордын ужамъёс но ужасьёс — Дарали Лели, Лариса Дмитриева, Алексей Шкляев, Мария Векшина, Вера Штыкова, сое лыдӟисьёс, «Удмурт дунне» газетлэн валтӥсь редакторез Зинаида Рябинина.  Кыӵе сюрестӥ вамыштоз «Дарт» газет?

Лыдӟись но автор К. Ворончихина: нош мыным газет яра!

 Зинаида Рябинина:

— «Дарт» газетэз кылдытыку ик, ужпум пуктэмын вал, газетэз егитъёс асьсэлы асьсэос лэсьтозы, редакциысь ужасьёс отчы уз пыриське шуыса. Осконъёс бадӟымесь вал, но ваньзы соос ӧз быдэсме. Берло дыре егитъёс гожъяськемысь дугдо, материалъёссы понна гонорар басьто ке но. Тӥляд югдурды умой ай, шуо «Ӟечбур!» газетысь журналистъёс. Ми доры, пе, заметкаос гинэ но ӟуч кылын вуо ни. Со сяна, 6 ар куспын ӧз буды лыдӟисьёслэн но лыдзы. Газетлы нимысьтыз гожтӥськыны луэ ке но, тросэз шуо: Интернетысь учкиськом.

Дарали Лели:

— Мыным нырысь ик аслым тунсыко, мае мон лэсьтӥсько. «Дартэз» поттыкум, ялан утчаськисько, тунсыкозэ шедьтӥсько вал. Тырши лэсьтылыны огшоры калык понна но материалъёс: кин мае дӥся, кинлэн кин туганэз… Али сыӵе материалъёс газетын уг тырмо. Кулэ провокация, лыдӟисез исано, шудоно соин. Валамон, соку газет герӟаськемын вал огъя  мылкыдэн, кудӥз егитъёс пӧлын улӥз. «Дарт» соку гинэ кылдӥз, паймытћзы выль дизайн, пӧртэм субкультураос, бугырес улон. Егитъёс газет пыр асьсэ сярысь вераны но ужзэс возьматыны турттылӥзы. Нош али, адӟиськом, ваньмыз буйгазы. Ми вакытысь егитъёс будӥзы. Нош мукетъёссэ ми бордамы ӧм кыске. Яке со озьы ик луыны кулэ: культураын но яркыт вакытэз воштэ бездыт дыр. Мон понна али газет луиз, одӥг ласянь, элитарной, мукет ласянь, мӧзмытгес.

Мария Векшина:

— Али шӧдӥське, макем егитъёс творчество борды  кыстӥськемысь дугдо. Со сярысь кылем номерын вераським культреггерен Павел Поздеевен. Ӧвӧл ни блогеръёс, ужрадъёсы но калык ӧжыт люкаське. Валамон, ваньмыз улонамы герӟаськемын: туала удмурт культураын шыпыт, газетлы но удмурт улонысь возьматыны номыре. Вань авторъёс, кудъёсыз асьсэлэсь рубрикаоссэс нуо. Со мода, спорт, кино, книга но мукет. Материалъёссэс газет бамъёсысь адӟыны соос шумпото, но калык пӧлы вӧлмытыны уг дырто. Озьыен, газетэз мед лыдӟозы, мед адӟозы, авторъёс бордаз мед кыстӥськозы шуыса, кулэ PR, репостъёс. Азьланяз «Дарт» газет бордысь адӟеммы потэ вылэм быгатӥсь егитъёсты. Газетэз гожъяськись авторъёс гинэ уг тырмыто ук, сое лэсьто фотографъёс но, суредасьёс но, дизайнеръёс но мукетъёсыз.

Алексей Шкляев:

— Вераськиськом ке «Дарт» газет котырын огин кылдытон сярысь, авторъёсты огазе люканы, газетлэсь пичи редакцизэ кылдытыны кулэ, кытын авторъёс котькуд номерез малпалозы, темаосты куспазы люкылозы. Со егитъёс ужалозы газетэз тодмо карон понна, проектъёсыз бордын. Таослэсь адӟем карыса, бордазы мукетъёсыз но егитъёс кыстӥськозы, удмурт культураын выль проектъёс малпаны кутскозы.

Радъяно удмурт егит журналистъёслэсь школазэс. Отчы дун тырыса мед ветлозы — кызьы возьматэ улон, адямиос али дунтэк курсъёсы уг мыно, нош дун тырыса, котькуд занятие ветло.

 Зинаида Рябинина:

— Удмурт кылосбуръя, финно-угроведениея но журналистикая институтэ, директорезлэн верамезъя, туэ дышетскон аре одӥг адями но удмурт журналистикае ӧз лыкты. Озьы туэ институтын ужаны кутскиз удмурт журналистикая заочной школа, кытчы ветло ёросъёсысь ог 20 пиналъёс. Со сяна, али удмуртаз гинэ ӧвӧл, ӟуч журналистикаын но умой авторъёс ӧвӧл. Кылем арын университетын котырес ӝӧк ортчиз, отчы люкаськизы дышетӥсьёс, элькунысь вань газетъёслэн валтӥсь редакторъёссы. Юаськом дышетӥсьёслэсь: «Малы тӥ студентъёстылы 3 заметка понна зачёт пуктӥськоды? Кыӵе соос журналистъёс луозы!» Преподавательёс шуо: студентъёс азе чурытгес куронъёс пуктыны ми ум быгатӥське.

Университетын дышетско ке зачёт понна, егит авторъёсты, вуоно журналистъёсты люкано «Дарт» семинаре, татын соос мед тодон-валанъёс сьӧры уйиськозы.  Но мукет ласянь, кылем арын ортчытӥм вал егит гожъяськисьёслы «Ингож» семинар. Кӧняез соос пӧлысь али литератураез азинто?

 Мария Векшина:

— Соин ик мытэм ужез, семинарез, азинтыны кулэ мукет литературной пумиськонъёсын, ужрадъёсын. Озьы ик удмурт журналистикая школаын но ялан мастер-классъёс ортчытъяно, ӧтчано дано адямиосты.

Алексей Шкляев: 

— Та ужпумез системаез кадь эскероно. Кулэ кылдытыны удмурт журналистикалы заказ, кылсярысь, «Удмурт дунне» газет мед вазиськоз институтэ. Азьвыл удмурт журналистикая отделение пырон льгота интыын ке вал, али со дан луыны кулэ. Удмурт журналистика — со вань жанръёсты, ӟеч журналистикаез утись маке. Огшоры студентъёсын ӵошатыса, та ӧръя дышетскисьёс газетын ялан практика ортчыны кулэ, шӧдыны, соос тросгес но ӟечгес тодон-валанъёс басьто шуыса.

Лариса Дмитриева:

— Гуртысь егитъёсын ужано — университет вылэ чӧлсконо ӧвӧл. Тунсыко егитъёс, азьветлӥсьёс вань, соосты шедьтыны гинэ кулэ. Ум юалляськиське, соин ик ум тодӥське, мар кулэ туала егитъёслы. Туж кельше бигеръёслэн «Инде» вотэсбамзы. Со пќртэм адямиослы матын луэ, темаосыныз но, кылыныз но. Кылсярысь, кӧня бызьымтэ кышноос басьясько таяз магазинын, кыџе профессиос басьто студентъёс, кыӵе тунсыко адямиос уло Казаньын. Кулэ экспериментировать карыны, материалъёсы егитъёслэсь вераськон кылзэс — сленгез — келляны, кылдытыны выль стилистика. Тодмо егитъёслы, блогеръёслы колонкаос нуыны сётоно. Собере, егитъёслы кулэ ог-огенызы кусып возьыны, валаны, татын азинскыны луэ шуыса. Ачим но ялан, лекциосты учкылыса, вотэсын пукисько.

Алексей Шкляев:

— «Дарт» — будон инты. Татысь авторъёс быгато «Удмурт дуннее», солэн сайтаз гожъяськыны. Умой журналистъёс мед кылдозы шуыса, толэзьлы огпол ӧвӧл, нуналлы быдэ гожъяськыны кулэ. Адямиос троссэ дунтэк лэсьто, мылкыд гинэ медло.

Дарали Лели:

— Зэм, дышетсконъёс ортчытъяно. Уг тырмы куспамы вераськон, тусовка. Озьы газетлэн имиджез но кылдоз.

* * *

Вераськонэ пыриськизы газетлэн мукет авторъёсыз но. Кызьы вераз Ксения Ворончихина, солы тунсыко лыдӟыны гуртысь потэм но улонын асьсэзыз утчась яке шедьтэм адямиос сярысь. Тунсыко, пе, кин кыӵе книга лыдӟе, кино учке.

— Ужам мон ӵемысь огнам  пукисько. Мыным куддыр уг окмы творчествоен вырись калыкен вераськон, — мылкыдзэ вераз Ксюша.

Егит дизайнерлы Сергей Максимовлы уг кельшы газетлэн тусыз, бадӟым материалъёсты, пе, тросгес туспуктэмъёсын люкылоно, бамъёсы тросгес омыр пыртоно.

Озьыен, котырес ӝӧклы йылпумъянъёс лэсьтыса, вераськом: матысь дыре радъямын луозы удмурт журналистикая школа улсын пӧртэм пумиськонъёс, кылдоз авторъёслэн редколлегизы. Озьы егитъёс валче малпалозы выль номерлэсь пуштроссэ но проектъёссэ. Гажаса ӧтиськом милям командаямы!

 

Удмурт Дунне
By Удмурт Дунне 3 февраля, 2017 13:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<