Бурдо муртъёс

Удмурт Дунне
By Удмурт Дунне 23 февраля, 2017 12:26
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шумпотымон, туэ Анай кыллы сӥзем нуналэз шаерамы туж паськыт пусйизы.

Егитъёслэн «Шунды» огазеяськонзы ортчытӥз «Мафия» шудон, отын соос тодматскизы коми мадёсъёсын но культураен. Ёросъёсын тросэз уж дуразы, удмурт дэрем дӥсяса, лыктӥзы. Йӧскалык политикая министерство Интернетын удмурт кылэз дышетонъя онлайн-курсъёс усьтӥз… Оглом, ужрадъёс туж-туж трос вал. Озьыен, шыпыт удмурт ульча жингрес куараосын тырмиз.

Милям но та сузьетэ асьмелэсь инӟымес понэммы потэ.  Вотэсын али туж трос тунсыко акциос ялэмын. Тросэз соос пӧлысь видеоен герӟаськемын. Кылсярысь, егит анайёс видеое гожто удмурт кылын выжыкыл мадемзэс, вань мылкыд карисьёс — анай кылын кылбур лыдӟемзэс. Мукетъёсыз видео пыр верало,  малы соослы дуно анай кылзы, тодмато асьсэ калыксылэн культураеныз, фольклореныз, мадёсъёсыныз. Кылзӥськыны туж тунсыко. Озьыен, тӥ но быгатӥськоды видео гожтыны но сое вотэсэ куштыны, #анайкыл хештеген гинэ пусъе. Яке «Тусвотэсын» («Инстаграм» кылэз удмуртэ берыктӥзы кылем арын анай кыллы сӥзем нуналэ, табере ми сое вераськонамы кутӥськом) видеоблог усьтэ, уго соос удмуртъёслэн воксё но ӧвӧл. Нош ми шедьтом, учком  но дунъялом.

Та нуналъёсы егитъёслэн удмурт кылын радиозы чузъяськыны кутскоз… Казаньысь кун университетын (Удмурт кун университетын ӧвӧл). Та бордын ужа Татарстанысь удмуртъёслэн автономизы, проектсэс нимазы «Бурдо мурт». Кызьы вера Бавлы ёросысь Павел Александров, Казаньысь удмурт егитъёслэн малпанъёссы трос. Матысь дыре, пе, усьтӥськоз нылпиос понна удмурт кылэз дышетонъя школа. Со арнянуналъёсы ужалоз. Али егитъёс потало Татарстанысь пӧртэм ёросъёсы, концерт пукто, творческой пумиськон ортчыто. Матысь дыре, пе, мыномы Балтаси, Агрыз, Кукмор ёросъёсы, возьматомы «Пузкар» киноез. Ваньзы вотэсын пуко ке но, та кино сярысь тросэз, пе, уг тодо.

Озьыен, улон пӧзьыны кутскиз. Малпасько, ми котырын уно бурдо муртъёс. Мылкыдзы ӝутскиз ке, лобӟозы. Синъёс ӝуаны кутско, пӧртэм тунсыко ужрадъёсы пыриськиськод ке.

Мария Векшина

Удмурт Дунне
By Удмурт Дунне 23 февраля, 2017 12:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<