Кызьы ортчоз Пельняньлы сӥзем фестиваль?

Удмурт Дунне
By Удмурт Дунне 10 февраля, 2017 12:28
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пельняньлэн нуналэзлы сӥзем фестиваль шаерамы туэ 3-тӥзэ радъяське. Бадӟым ужрадэ мукет улосъёсысь куноос но пыриськыны мылкыд каремзэс ивортӥзы.

Ӵошен пельнянь кутыны тунсыко.

 

Ужрадлы кутскон сётӥзы 1-тӥ феврале «Бобровая долина» кафеын, пресс-лепка ортчытыса. Отчы пыриськизы Удмуртиысь нациосын ужан политикая министр Лариса Буранова, Кун Думаысь депутат Алексей Загребин, Печатья но ивор вӧлмытонъя агентствоен кивалтӥсьлэн воштӥсез Сергей Васильев, Эгра ёрослэн йырыз Татьяна Чуракова, Удмуртиысь дано артистка Надежда Уткина но мукетъёсыз.

Быдэс ӝыт сӥземын вал удмурт сиёнлы. Кивалтон удысын ужасьёс пельнянь кутыны быгатэмзэс но возьматӥзы. Рекордъёсъя Гиннеслэн книгаяз пусъемын, пе, 10 пельнянь 47 секунд куспын кутэмын шуыса. Милямаз ужрадын ӵошатскон ялэмын ӧй вал. Со понна котькудӥз пӧраськись трос тунсыкозэ вераз. История наукаосъя доктор Алексей Загребин вашкалазэ тодамы вайытӥз. Со вераз, кызьы удмуртъёс пельнянь кылдытӥзы. Со дырысен та пӧраськем тросэзлэн калыкъёслэн яратоно сиёнзы луиз. Кырӟась Надежда Уткина кунгожсьӧр воргоронлэсь сюлэмзэ берыктыны быгатэм удмурт пӧраськемъёс пыр. Сергей Васильев котькуд Выль арлы 450 пельнянь кутыса дася.

Кызьы ивортӥз Татьяна Чуракова, ёросысьтызы 4 фирма но 11 нимаз ужбергатӥсьёс пельнянь лэсьтонэн выро. Соин ик Эгра каргуртын Пельняньлы сӥзем резиденция усьтӥллям.

Ижысь мукет кафеосын, ресторанъёсын но пельнянь кутонъя мастер-классъёс ортчизы. Сӥлен сяна, сое пӧрало на кубистаен, кушманэн, губиен, турын-куарен но трос пӧртэм пушкесъёсын.

Фестивальлэн тужгес бадӟым ужрадэз луыны кулэ 11-тӥ феврале Ижысь Шор площадьын.

— Шулдыръяськон дыръя выль рекорд пуктыны чакламын, — шуэ нациосын ужан политикая министр Лариса Буранова. — Со понна Ижевске нимысьтыз ӧтемын рекордъёсъя Гиннес книгалэн судьяосыз, соос лыдъялозы, кӧня пельнянь сиемын одӥг нуналэ одӥг интыын. Пельнянь сиёнлы кутскон сётозы 11 часын. Озьы ик нимысьтыз кылдытэмын луоз фестивальлэн рекордъёсъя книгаез. Отчы шедьыны быгатоз котькуд мылкыд карись.

Ижевске лыктыны дасясько Пермь, Киров но Самара улосъёсысь, Башкортостан, Татарстан, Коми но Марий Эл республикаосысь, Санкт-Петербург, Саратов, Норильск но мукет городъёсысь куноос. Шор площадьын шулдыръяськонъёс но ӵошатсконъёс радъяськозы. Калык веръяны быгатоз (тужгес кельшымонзэ басьтыны но) дуннеысь пӧртэм выжы калыкъёслэсь пельняньлы укшась сиёнъёссэс.

Фестивалез радъясьёс оскыто, 11-тӥ феврале Ижысь Шор площадьын пӧзьтэм пельнянь ваньмызлы тырмоз. Кызьы вераз Лариса Буранова, нырысетӥ араз, пе, шуг-секытэ шедимы вал: ужрадэ люкаськем калык 2 час куспын вань пельнянез «ньылӥз». Та рад ужбергатӥсьёс нунал гинэ ӧвӧл, кыксэ но пельнянь пӧсьтыны дась. Шуо, калык гинэ мед люкаськоз.

Азьвыл аръёсы сямен ик, тунсыко луозы пельняньтон (бадминтон), пельнянькей (тупен хоккей), бампербол (бадӟым шаръёсын вожвылъяськон)  но мукет шудонъёс. Учкисьёс бырйыны быгатозы усто лэсьтэм талисманэз, тужгес ӟеч пӧрасьёслы «Зарни пельнянь» кузьым сётозы. Учкисьёс понна но кузьым чакламын — тужгес шудоез 25 килограмм пельнянен узырмоз.

Пельняньлы сӥзем фестиваль 11-тӥ феврале Ижын йылпумъяськоз ке, ёросъёсын со азинтӥськоз. Радтӥз 2 ар ӵоже Эгра ёросысь Годекшурын ортчылӥз «Пельняньысен Китаёзь» фестиваль. Туэ сое ёрос центрын март толэзе радъялозы. Май толэзе Кез ёросын ортчоз «Пест-Фест» фестиваль, нош сентябре та ужрад борды итӥськоз Дэбес ёрос. Отын луоз удмурт сиёнъёсъя «Зарни-Ё» фестиваль.

 

Валентина Емельянова

Туспуктӥз А. Горбунов

 

Удмурт Дунне
By Удмурт Дунне 10 февраля, 2017 12:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<