Ӵӧжы сиён

Удмурт Дунне
By Удмурт Дунне 10 февраля, 2017 17:28
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Шудӥсь муртъёс:

Митрей — корка кузё

Олён — кузёлэн кузпалыз

Вани, Мани — пиналъёссы

Дуня кенак — бускель кышно

Пиналъёссылэн эшъёссы

 Нырысетӥ суред

Корка пушкын.

Митрей (корка пырыса). Олён, маке асьмелэн скалмы бӧксэ кадь. Эскерыны потад-а, ӧд-а?

Олён. Ма, ужаны кошкемед бере ик куняназ ук. Тани, выль ӵӧжыез кыскыса, маке-маке пӧрай ини.

Митрей. Я, туж умой. Соку, пиналъёсты ӧтьыса, ӵӧжы сиён лэсьтомы.

Олён.  Али ик черекто соосты. (Ӧс доры мынэ.) Вани, Мани, Яна, ойдо пыре ини, ӵӧжыен табань  сиыны пуксёмы.

Пиналъёс бызьыса пыро.

Вани. Мон татчы пуксё!

Мани. Нош мон тани татчы!

Яна. Мон ӵӧжы селянка доры матэгес карисько.

Митрей. Сылэ ай, уралиос, султэ. Нырысь кирос пононо. Олён, чечы, вӧй ӝӧк вылэ ваёно на.

Олён. Тани, ваньмыз дасямын мынам. (Ӝӧк вылэ чечы, вӧй пуктэ но, мудор шоры кариськыса,  вӧсяськыны кутске.) Осто, Инмаре-Кылчинэ, мед азьпал но пудомы ӟеч будоз, кунянмы чырткем, чупырес мед луоз. Пересьёс но мед юрттозы пудомес утьыны-вордыны. (Кирос каре.) Я, табере пуксе ӝӧк сьӧры.

Ваньзы пуксё, ӵӧжыез нырысь ик оскалтэ Митрей агай.

Митрей. Эк, ӵӧжымы ческыт далтэм!

Ӵӧжыез мукетъёсыз но оскалто. Митрей пу пуньыен Ванилы кымысаз шукке.

Вани. Ма понна  мыным нош ик вуиз?!

Митрей. Со пичи порозпимы озьы ӵыжаське.

Пиналъёс серекъяло, собере Манилы но, Яналы но кымысазы пуньыен вуэ.

Мани. Кымысамы кунян ӵыжиз.

Пыре  Дуня кенак.

Дуня кенак. Чырткемесь, бускельёс.

Олён. Умой, умой, Дуня кенак. Пуксьы татӥе.

Дуня кенак. Ай пуксьылыса уг ни улы. Курлой (солонина) сылалтыны кутски вал но, сылалэ ӧжыт ӧз окмы. Тӥляд ӧжытак ӧй-а шедьысал?

Митрей. Сылалмы шедёз, нош туннэ ум сётэ ай, ява, скалмы туннэ гинэ куняназ.

Олён. Бен, мӧйыос кунян вордскем нуналэ пунэмен сётъяськыны уг лэзё вал. Нош сокем тыныд сылал кулэ ке, булавкидэ коть кельты, ява, собере сылалме сёто.

Митрей. Ойдо, Дуня кенак, пуксьы, оскалты выль ӵӧжымес. (Дуня кенак ӝӧк сьӧры пуксе, ӵӧжы оскалтэ).

Дуня кенак. Тани, Олён, булавкиме басьты, кунянды чебер мед будоз.

Олён. Озьы мед луоз. Митрей, мын ай кунянмылы но потты вӧсям выль ӵӧжымес, мед нюлыштоз коть, тазалыко мед луоз. (Сётэ ӵӧжыен пыжиськемлэсь — запеканкалэсь — юдэссэ).

Митрей. Ярам, али ик потто. (Кошке).

Олён. Нош али ойдолэ шулдыръяськомы, азбаре потыса. Дуня кенак, мын пиналъёстэ но черекты. (Ваньзы пото).

Кыкетӥ суред                  

Вань шудӥсьёс люкасько азбаре, кырӟало «Корка берад кеносэд» кырӟанэз,  пумен экто, пу   пуньыосын шудо.        

Корка берад кеносэд,

Корка берад кеносэд.

Эх, шу, жингыр, шу,

Корка берад кеносэд.      

 

Кенос берад бакчаед,

Кенос берад бакчаед.

Эх, шу, жингыр, шу,

Кенос берад бакчаед.

 

Бакча берад кенеред,

Бакча берад кенеред.

Эх, шу, жингыр, шу,

Бакча берад кенеред.

 

Кенер берад бусыед,

Кенер берад бусыед,

Эх, шу, жингыр, шу,

Кенер берад бусыед.

 

Бусы берад гажанэд,

Бусы берад гажанэд.

Эх, шу, жингыр, шу,

Бусы берад гажанэд.

Эктэм-кырӟамзы бере куноос доразы берто.

Галина Бойкова,

 Дэбес ёросысь   Тольён школаысь дышетӥсь

 

Удмурт Дунне
By Удмурт Дунне 10 февраля, 2017 17:28 Updated