Зарни сюанъёс, выль почта ёз но гожтӥськем понна — улэп атас

Удмурт Дунне
By Удмурт Дунне Январь 16, 2017 11:37

Дэри

Зарни, зарни сюанъёс…

Кылем ар пумын 10 кузпалъёсты ёросысь загсэ люказы.

Соос пӧлысь 5-ез зарни сюанзэс пусйизы: Дэри черкогуртысь Людмила но Леонтий Вологжанинъёс, Гольян черкогуртысь Марина но Виктор Бабинъёс, Первомайской черкогуртысь Алевтина но Михаил Тасмаевъёс, Вараксиноысь Надежда но Виталий Касьяненкоос, Люкысь Антонида но Иван Петровъёс. 55 ар ӵош улэмзэс пусйизы Ожмосысь Июлия но Леонид Альмакеевъёс, Тямаысь Нина но Александр Беловъёс, Алевтина но Алексей Журавлевъёс, Дэри черкогуртысь Екатерина но Степан Ниязовъёс. Нош вань егитъёслы адӟем карымон луо Якшурысь Апполинария но Вениамин Чувашевъёс. Та кузпалъёс валче уло ни 60 ар!

Балезино

Шуныт луоз

Кылем ар пумын йылпумъямын Балезино каргуртын котельной пуктон.

Нош та нуналъёсы ужзэс йылпумъяны дасясько Маркогуртын но Исакын. Котельнойёсты ужатыса эскерозы кезьытъёс кошкем бере. Таин валче Балезино ёрос Ростехнадзорлэсь вань куронъёссэ быдэстӥз. Бӧрысь ёросын басьтӥськозы чылкыт ву борды — со али уг тырмы. Февраль толэзе татчы вуттыны кулэ мур вуын ужась насос. Со луиз ке, Балезино каргуртын улӥсьёс доры дугдылытэк Чупчи шурысь чылкыт ву вуоз.

Яр

Улосчиоссэс данъязы

Выль ар азьын «Яр музъем вылысь дано адямиос» ёрос конференция ортчиз.

Со быдэсак сӥземын вал ёросысь тодмо но данэ потэм адямиослы. Люкаськем калыклы шунытэсь кылъёсын вазиськиз Яр ёрослэн йырыз Тамара Уткина. Ёросысь Депутатъёслэн Кенешенызы кивалтӥсь Александр Старцев тодматӥз литература, культура но наука удысын данэ потэм улосчиосынызы.

Бигра, Яр но Пудем муниципал кылдытэтъёсысь кивалтӥсьёс но тодматӥзы асьсэ палась данэ потэм адямиосынызы.

Ярысь 1-тӥ но 2-тӥ шор ёзо школаосысь дышетӥсьёс дасяллям сӥё-дано дышетӥсьёссы сярысь ужъёссэс.

Люкаськем калыклы бадӟым концерт сётӥзы Ярысь искусствоя школае ветлӥсь нылпиос.

Каракулино

 Купец кышно но луизы…

Каракулиноысь арлыдоослэн «Фронтовых годов голоса» ансамблязы кырӟасьёс но ёросысь мылкыд карись песянайёс но песятайёс Сарапул каре — Павел Башенинлэн дачаяз — экскурсие потазы.

Отын соос мар но ӧз дауртэ! Башенин но солэн кузпалыз кариськыса, нимысьтыз костюмъёс дӥсяса, дача пушкытӥ но азбаретӥ экскурсиен ортчизы. Кышно пала (гур азь пала) пырыса,  Башенинъёслэн рецептсыя парем чаен но ческыт напитокен кунояськизы, зэмос купец кышнолы пӧрмытскылӥзы.  Музейын ужасьёс кунооссэс пыр-поч тодматӥзы Башенинлэн но солэн семьяезлэн улэм-вылэменыз. Каракулиноысь вуэм куноосты музейын ужасьёс пӧсь чаен но пыжиськемъёсын утялтӥзы.

Глазов

Выль арез выль гидэн

«Чиргино» СПК-ын кылем ар пумын выль гид усьтӥзы.

Гидын эркын, югыт, пудолы сиён люкылоз кормораздатчик, ву юонэз радъялозы автоматъёс. 100 йырлы чаклам гидэз усьтӥзы ке но, кысконо скалъёсты отчы уз пыртэ на. Та вакытэ отчы огдырлы интыямын ветыл-кунянъёс. Нош апрель толэзе выль гидэ йӧл гумыос кыскозы но йӧлэз кынтон танк пуктозы. Соку ик ферма вань кужыменыз ужаны кутскоз.

Кияса

Шаплы бызьыло, секытэз вормо

Киясаысь тылпу кысӥсьёс ёросысь егитъёсын бадӟым ужрад — «Тылпу кысӥсьёслэн эстафетазы  — 2017» ӵошатскон  — ортчытӥзы.

Отчы пыриськизы Лутоха, Первомайский, Ильдибаево, Уддяди, Кияса муниципал кылдытэтысь егитъёс но Кияса шор ёзо школаын дышетскись пиналъёслэн 16  командазы. Ӵошатскон ӟырдыт но пӧсь ортчиз: тылпу кысӥсьёслэсь дӥськутъёссэс дӥсяса, пӧртэм ужрадъёсты быдэсъяно луиз. Кылсярысь, ӝужыт кенер вамен ӝог тэтчыса, пельпум яке тыбыр вылэ секыт поглянъёсты яке гумыосты ӝутыса, кӧня ке иськеме бызёно вал.

Ӵошатсконын тужгес но шаплы луэмзэс возьматӥзы Ильдибаевоысь но Кияса шор ёзо школаысь нылъёс но пиос. Соослэсь трослы ик бере ӧз кыльы Кияса черкогуртысь огъям команда.

Юкаменск

 Больницае — ческыт салам

Ёрос муниципал кылдытэтлэн йырыз Борис Востриков но ёросысь Депутатъёслэн Кенешенызы кивалтӥсь Булат Абашев Выль ар каникулъёсты больницаын ортчытӥсь нылпиослэсь мылкыдзэс ӝутӥзы ческыт кузьымъёсын.

— Нылпиос тужгес витёно праздниксэс — Выль арез — анай-атайзы вӧзын, семьяенызы валче пумитаны уг быгато бере, соослы нимысьтыз саклык кулэ. Пичиослэн та нуналэн бадӟым осконъёссы герӟаськемын, — пусйиз Б. Востриков.

Ёрос кивалтӥсьёслэсь кузьымъёс басьтӥзы 550 нылпиос. Черланы сюремъёсты сяна, ческыт саламъёсын шумпоттӥзы Юкаменск черкогуртысь нылпи садысь тэшкылиосты но.

Саламъёс пиналъёс дӥне вуизы «Огъя Россия» партилэн сюлмаськемезъя.

Дэбес

 Улэп кузьым

Газетлы гожтӥськисьлы — улэп кузьым.

Ёросын потӥсь газетлы гожтӥськемъёс пӧлын лотерея ортчытэмын. Шудо лыдӟись луизы Бадӟым Ӟӧтым гуртын улӥсь Григорьевъёс. Соослы сётӥзы туэ арлэсь пуссэ — улэп атас. Кузьымзылы Григорьевъёс нырысь ӧз оске, Людмила Валерьяновналэн кияз атас сётэмзы бере гинэ валазы кадь. Григорьевъёслэн гидазы 2 атассы вылэм ни. Газетын ужасьёслэсь кузьымзэс асьсэлы кельтӥзы, нош мукетъёссэ — тодмооссылы кузьмазы.

Шаркан

Пудо йыр будэ, йӧл йылэ

Шарканысь пудо утисьёс Выль арез капчи мылкыдын пумитазы.

Кылем ар ӵоже соос 43 сюрс 868 тонна йӧл люканы быгатӥзы, чакламлэсь со 2 процентлы тросгес. Тужгес трос йӧл кыскизы «Ошмес» (10 сюрс 260 тонна), «Восход» (8 сюрс 856 тонна) но Собин фермерлэн (5 сюрс 168 тонна) хозяйствооссы.

Ёросъя котькуд скаллэсь шорлыдын 5 сюрс 793 килограмм йӧл люкаськиз. 14 хозяйство пӧлысь 7-аз та лыдпус 6 сюрс котырын возиське. Гурт кузёос сюлмасько сюро таза пудолэсь лыдзэ будэтон ласянь но. Туннэ нуналлы кысконо скалъёслэн лыдзы 7 сюрс 539 йыр, кылем арен ӵошатыса,  со 126 йырлы тросгес.

Можга

 Ваньмыз лэсьтэмын адями понна

Россиысь Почталэн Удмуртиысь филиалэзлэн Можга карын 427793 почтовой отделениез усьтӥськиз.

Ӟоскыт почтаез бадӟыматыны юрттӥз – одӥгзэ выль юртсэ сётӥз — автомобильёсты тупатъянъя «Можгинский» завод. Ужрадэ вуылӥзы Можга ёрослэн йырыз Алексей Шишов, Россиысь Почталэн Удмуртиысь филиалэныз кивалтӥсь Андрей Сивцов, Автомобильёсты тупатъянъя «Можгинский» заводэн кивалтӥсь Альберт Загумёнов но Можгаысь почтамтэн кивалтӥсь Анатолий Молодых.

Та почта отделение городысь 9 сюрс адями пыра-пота. Калык понна табере бадӟым но югыт залын журнал-газетъёсын но пӧртэм арбериосын вуз карозы. Почтаын синъёсты мальдыто туала амалъя лэсьтэм мебель но техника. Посылкаосты тырыны нимысьтыз инты висъямын.

Алнаш

Ӟуч толэзь

Ёросын та вакытэ ӟуч толэзь мынэ.

Та ужрадлы кутскон сётэмын вал кылем ар пумын. Ёросысь культурая юртын калыккуспо ёлка ортчиз. Отчы люкаськылӥзы удмуртъёс, поръёс, ӟучъёс но бигеръёс — дэмен вуизы Варали, Чумолё, Бакыр гуртъёсын улӥсьёс. Ымусьтонлы сӥзем концертэ но трос калык люкаськылӥз. Бадӟым праздникен соосты ӟечкылазы Алнашысь но Котнырпочинкаысь черкъёсын ужасьёс, ёросысь «Ӟуч самовар» клублэн кивалтӥсез Надежда Уразбахтина. Толэзь ӵоже ёросын пӧртэм ужрадъёс луозы на, нош ужрад йылпумъяськоз Асан совхоз-техникумын ӟуч калык кырӟанъёслы сӥзем вожвылъяськонэн.

УД

Удмурт Дунне
By Удмурт Дунне Январь 16, 2017 11:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<