Юнмамзэс возьматэ гид

Удмурт Дунне
By Удмурт Дунне Январь 25, 2017 13:45

Выль арез выль сямен мытӥз Можга ёросысь «Держава» хозяйство: татын 6-тӥ январе сӥё-дано усьтӥзы 404 йырлы ферма. Шаерамы та нырысетӥез туэ усьтэм выль гид.

Можга ёросысь Бад ӟым Сибы гуртысь выль фермаын выль оборудование.

Вӧл-вӧл, шуныт, югыт гид ӝужамлы Бадӟым Сибы гуртын улӥсьёс шумпотӥзы. Арлыдоос лулӟылӥзы но: неужто умой улонэз адӟыны кылдӥз на? 2013-тӥ арын гужем фундамент лэсьтыкузы, куд-огез ас синъёсызлы ик ӧз оскылы. 2004-тӥ арын уго хозяйство шуг-секытэ вуиз вал, со куашканы ӧдъяз, уждун тыремысь дугдӥзы, отӥяз банкротэн ялӥзы. Кылем-мылем бервылъёсы ик выль хозяйство  кылдӥз, нимазы сое «Держава».  Соин кивалтыны оскизы Сергей Сорокинлы. Гуртоос нырысь-валысь туж чакласькыса учкылӥзы шораз, таид маке пӧрмытоз-а шуыса. Туннэ кузёенызы данъясько, хозяйстволы бырыны сётымтэез понна тау каро.

Сергей Сорокин верамъя, ӟеч ужаны мылкыдъёссы бадӟымесь. Матысь дыре татын ӝутыны ӧдъяло 200 йырлы кунян гид, 400 йырлы скал гид. Гидъёссы уго 1970-тӥ арысен сыло ни: липетсы вия, борддоръёс пыр тӧл шула, пыд улын кот. Сыӵе интыосын адямиосты но ужатыны, пудоез но вордыны туж жаль. Соин но выль комплексэ ӝыныяз ветылъёсты пыртӥзы, ӝыныяз — кысконо скалъёсты.

— Выль гидын пудо ик гань-гань шокчиз. Йӧл кыскон вылын но та шӧдӥське ни, — шуэ «Державаысь» валтӥсь зоотехник Галина Николаева. — Миым котькуд скаллэсь шорлыдын 6 сюрс килограммлэсь уно йӧл кыскимы. 20 ар талэсь азьло хозяйствоын ужам дояркаос таӵе лыдпусъёслы воксё абдрало. Нош эшъёссы понна кыӵе зол шумпото, тӥ ке но шуныт интыын ужалоды, шуо. Вуж гидъёсын специалистъёслэн кабинетсы но ӧй вал. Кезьыт интыын отчётъёсмес киын гожъяллямы. Нош табере шутэтскон сэреге компьютер но басьтэмын. Пудо утялтӥсьёслэн, скал кыскисьёслэн асьсэлэн дӥсь воштон сэрегзы. Мисьтаськон машина но отчы пуктэмын. Азьвыл ваньзэ асьсэ киын миськоно луо вал. Кызьы выльдӥськонъёслы уд лӧпты? Таӵе югдурын уногес егитъёс но, оло, кыстӥськозы хозяйствое. Висьыны усён вакытъёсы уго дояркаослы ёрмиськом. Кылсярысь, ог кык ар талэсь азьло уже вуисько но — 200 скал кыскымтэ. Ужасьёс больничнойын. Хозяйствоысь вань нылкышно специалистъёсты черодэн поттаськиз.

Нялтас вераса, хозяйствоын туннэ шоро-куспо уждун 12-13 сюрс манет ке, скал кыскисьёслэн 15 сюрс манет люкаське. Нош скал кыско 12 кузя. Хозяйстволэсь котькыӵе вакытъёссэ адӟиз ини Любовь Николаева.

— Хозяйствое лыктэме дырысен 30 арлэсь трос ортчиз ни, — шуэ Любовь Леонидовна. — Сарапул ёросысь Сигаевоысь училищеез йылпумъяме бере Бадӟым Сибы гуртэ агрономе ыстӥзы вал. Нылпиосы вордскем бере сюлэмы фермае кыстӥськиз. Школа бере одӥг арзэ дояркаын ужай вал уго. Зэм, нырысь-валысь скалъёслэсь курдалляй. Лекъяськон дырзы луылэ, вогъяськись скаллэн огпол ымнырам но ӵыжемез вань. 17 ар ӵоже котькуд ӵукна 4 час котырын фермаын луисько ни. Али уката ик шумпотыса гидэ дыртӥсько. Шуныт азьын табере ужаськомы. Ужамъя ужам потэ. Группаям 50 скал. Нуналаз 800 литр йӧл кыскисько. Нош кыӵе мон скалъёсылэн выль гидэ пыремзы понна шумпотӥсько! Сиськон тусьёссы гинэ но табере каньыл луизы уго. Нырысьсэ гидэ пыртэммы бере котькудзэ вешай, ӟечкылай. Ас поннам созэ но малпай: ог 3 ар ужало на тӥледын, отӥяз пенсие пото. Скалъёсме ӟеч кие кельтэме потэ. Интыям егитъёсты дышетоно вал.

Умой хозяйствое берло дыре куриськисьёс кылдӥзы. Татын али 133 ужась ке, пӧлазы егитъёс но адӟисько ни. Улон сэрег «Державаын» уг висъяло ке но, лыктӥсез ачиз корка басьтэ я нунал пӧрат татчы уже ветлэ. Валтӥсь бухгалтер Татьяна Спиридонова верамъя, ёросын уждун талэсь бадӟым шер шедьтод бере, егитъёс хозяйствоын ужанлэсь уг кышкало. Берло дыре уж трослы капчияз, чылкытгес луиз. Пыд улын напра ӧвӧл, техникаез пумен выльдо. Кылем арын выль склад ӝутӥзы, мукетъёссэ кышъязы. 3 сюрс 525 гектар музъем пӧлысь ваньмыз гыриське. Тулыс кизён понна али хозяйство удобрение утча. Юнмаммы ужаны юрттэ, усеммы уг поты ни, шуэ Татьяна Спиридонова.

Елена Сараматова

Удмурт Дунне
By Удмурт Дунне Январь 25, 2017 13:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<