Вормонэз — «Победа». Кызьы вырӟытоно куашкам эштосэз

Удмурт Дунне
By Удмурт Дунне 31 января, 2017 15:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Геннадий Пчельников

Геннадий Пчельников сюлмаськемъя Ува ёросысь Мушковай черкогуртысь «Победа» колхоз улӟиз, гуртын асфальт сюресъёс кылдӥзы, пинь эмъян кабинет усьтӥськиз.

Гуысь поттон

Туннэ элькунамы гурт удысын адӟем карымон тыршо Вавож ёросысь Калинин нимо но «Колос» эштосъёс. Нош 1980-тӥ аръёсы та эштосъёс  Ува ёросысь «Луч» колхозлэн вормонъёсыз дорозь сузьтӥсько гинэ вал ай.  Со вакытъёсы «Лучен» кивалтӥз А. Дедюхин, бордаз вал оскымон адямиез — валтӥсь зоотехник Г. Пчельников.  Ёрос кивалтӥсьёс Геннадий Пчельниковлэсь быгатонлыкъёссэ синйылтӥзы но ӵектӥзы солы Увалэсь 30 иськемын нюлэсъёс пушкы ышем но куашкан калэ вуэм Мушковай гуртысь «Победа» эштосэн кивалтыны. Валамон, Г. Пчельниковлы таӵе ивор шундыё куазен гудыртэм-чилектэм кадь йӧтӥз.  Зэм, Мушковайын со вакыт улон туж секыт вал: школазы но, сюресъёссы но ӧвӧл, гидъёс, амбаръёс куашкан калэ вуэмын, калыклэн мылкыдыз куашкамын. Кивалтӥсьёс татысь, 1-2 ар ортчыса, пегӟылӥзы. Нош берпуметӥез татчы пуктэм мурт мушковайёсын тодматскемез бере ӵуказеяз ик ёрос кивалтӥсьёс дӥне вуиз — пиджакезлэн саесыз ишкалтэмын. Гуртын ужасьёс возьматӥллям егит адямилы, кин татын кузё но кыӵе дисциплиназы! Но Геннадий Константинович аслыз оскиз. Озьы со 1989-тӥ арын «Победа» колхозэн кивалтыны кутскиз.

— Дас вить ар куспын отын мон укмысэтӥез кивалтӥсь луи, — тодаз вае Г. Пчельников. — Мушковайысь но Пужмезь-Тукля палъёсысь калыклэн мылкыдыз вераны луонтэм секыт вал. Трос аръёс ӵоже адямиос понна отын номыр ӧз лэсьтылэ. Али ачим но паймисько, кызьы быгатӥ гурт улонэз сайкатыны.

Геннадий Константиновичлэн сюлмаськеменыз шальтрам уробо вырӟиз — Мушковай, Пужмезь-Тукля гуртъёсын ужгур куара чузъяськыны кутскиз. Вакчи дыр куспын татын школа, гидъёс, цехъёс, ву кыскон башняос ӝутӥськизы. 2 тымет ӵыпемын,  Мушковайын асфальт сюрес кылдӥз, нош Пужмезь-Тукля дорозь сюрес ӝутэмын но кӧльыен шобыртэмын вал. Вань лэсьтэм ужзэ вераса но уд быдты. Эштосын дисциплина ӝутӥськиз. Озьы вакчи дыр куспын Г. Пчельниковлэн быгатыса ужамез сярысь ивор калыке вӧлмиз. Со доры дышетскыны быдэс делегациосын ветлыны ӧдъязы.

Ужгур пӧзе

Но таӵе азинсконъёс капчиен ӧз сётӥське. Кылсярысь, выль техника басьтон понна Г. Пчельников  Москваын РСФСР-ысь гурт удысъя министрен  Г. Куликен пумиськылӥз.  Со министрлы пыр-поч валэктыны быгатӥз «Победаын»  кылдэм югдурез. Нош Каркалай гурт дорысен Мушковай черкогуртозь асфальт сюрес кылдӥз тэк пукыны валасьтэм воргорон шаерысьтымы кивалтӥсьёсын огкыл шедьтэм бере. Туннэ Ува ёрослэн уйпал сэрегъёсаз, Чекан но Мушковай палъёсын, улӥсьёс тау карыса йыбыртто Геннадий Константиновичлы ӟеч сюрес понна. Сое усьтӥзы 1993-тӥ арын коньывуонэ. Та сӥё-дано ужрад возьматэмын вал Россиысь но шаерысьтымы телевидение пыр.

Озьы 5 ар куспын гондыр гуысь калыклэн улон-вылонэз умояз. Гуртоос огъя мылкыдзэс вераны ӧдъязы, Г. Пчельников сельсоветэн но кивалтыны мед кутскоз вылэм шуыса. Ёросысь депутатъёс ӵектонэз умоен лыдъязы но Геннадий Константиновичлы эшшо одӥг уж нуыны оскизы. Кемалась аръёсы татын школа ӝутыны кутскизы вал. Аналтэм лэсьтӥськонзэс йылаз-пумаз вуттӥзы. Туннэ но та школа йыг-йыг сылэ. Ёрос больницазы 30 иськемын, врачъёс доры черодъёсын сэрен сюрыны шугомоно. Доразы пинь эмъянъя кабинет усьтоно, малпаз кивалтӥсь. Та пумысен тазалыкез утёнъя министрен вераськиз. Врач шедьтӥз, солы гуртын улон инты висъяз. Отӥяз гуртоос, черк ӝутыны курыса, Г. Пчельников доры вазиськизы. Табере Мушковайын, зарнивуам киросъёсыныз шунды шорын чильк-вальк кисьтаськыса, чебер черк сылэ. Гуртысь улон вожъяськымон луиз: урамъёс нылпи куараосын, ужлэн гуреныз тырмизы.

Но одӥг вакытэ Г. Пчельниковез ёрос кивалтӥсьёс выльысь кысканы ӧдъязы, табере Ува каргуртысь нянь пыжонъя заводэз пыд йылаз султытыны курыса. Гуртоослэн утисьсэс лэземзы уг поты ке но вал, Геннадий Константинович заводлэсь ужъёссэ тупатон борды  басьтӥськиз. Но Мушковай черкогуртлэсь ӧз люкиськы, 6 ар ортчыса, выльысь берыктӥськиз гуртэ но, пенсие потытозяз, муниципал кылдытэтэн кивалтӥз.

Лякыт но, чурыт но

Геннадий Константинович вань калыкен — кивалтӥсь-а со, огшоры ужась-а — огкадь гажаса вераськыны быгатэ, котькудӥныз огкыл шедьтэ.  Ужасьёсызлы со чурыт куронъёс пуктыны быгатылӥз, туж яратылӥз дисциплинаез. Озьы ке но сюлэмыз лякыт вал. Кин гинэ дораз уг вазиськы, ваньзэ кылзыны дыр шедьтэ, юрттӥськыны тыршиз. Мынам но семьяелы  бадӟым юрттэт сётӥз. Покчиез пимы Грозныйын службазэ ортче вал. Одӥг вакытэ гожтэтъёсыз вуэмысь дугдӥзы. Берло тодӥмы, со сӧсырмыны шедем шуыса. Г. Пчельников юрттӥськемъя быгатӥ Кавказ котыре вуылыны но пимес Иже вуттӥ.

Туннэ Геннадий Константинович Юлия Николаевна кузпалыныз пенсиын ини ке но, тыршись сямзы тэк пукыны уг сёты. Улыно-вылыно юг-юг юртсы тузӥ сяськаос пӧлы выемын. Бакчаязы емышъёс пушъё, мушъёссы лобало, гидъёссы пудо-животэн тырмемын. Г. Пчельников котькуд ӵукна тазалыксэ кыдатэ — кезьыт вуэн пылаське. Ӵемысь сое адӟыны луэ куас вылын — бакча бераз лёгем куас сюрес кузя ворттылэ. Пчельников кузпалъёс шудо песятай-песянайёс ни — 3 нылпиоссылэн 5 пиналъёссы будо.

Евгений Эжбаев

Удмурт Дунне
By Удмурт Дунне 31 января, 2017 15:20 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<