Турын дэрем вурысал

Удмурт Дунне
By Удмурт Дунне 30 января, 2017 13:15

Вашкала сямъёс туала улонын иназ луо

Эгралась дизайнерен Надежда Касаткинаен мон тодматски Венгриын удмурт культуралы сӥзем нуналъёс дыръя. Эгра пал удмурт дэремъёсъя вурем но бохо стильлы матын дӥсьёссэ отын огнуналскын басьтӥзы. Вуриськем сяна, Эгралан пӧртэм фестивальёс ортчытъя, малпаназ — усьтыны модая юрт.

Эгралась Н. Касаткина яратэ удмурт дӥськутлы тупась бохо стилез.

— Вуриськонэз яратон пичи дырысеныды ик пыӵаз, луоз?

— Мон вордӥськи Казахстанын, мамае-папае, колхозысь пегӟыса, отчы целинае шуыса кошкизы. Но 5 арес дыръям ми берен лыктӥм вордӥськем палъёсамы. Песянае Мужберын улэ вал, гужемъёссэ лапак отын ортчытӥ. Дӥськут ӧй вал, песянае, вань дэра басмаоссэ шыкысысьтыз поттыса, милемлы дӥсь вурылӥз. Али сое вандылыны ӧй лэзьысал! Песянаелэн «Зингер» машинаез вал, гуртысь вань калыкез дӥсялляз — 9 пиналъёсты сюдоно ук. Кулаке поттон вакытэ но вуриськон машинаез со утьыны быгатӥз. Мама но лапак вуриське вал. Мон нош аслым нырысьсэ дэремме пӧрмытӥ выпускнойлы 10-тӥ классын. Басмаез кыӵе уродмытӥ!

Мужике но киужлы усто. Али гитараен шудыны выре. Пиналъёсмы дышетскыны Иже кошкизы но, кыкнамы кылим, маин ке выроно ук. Ужысь бертӥськом но, со гитаразэ кутэ, мон вуриськыны пуксисько.

— Семьядэс гинэ уд, уж дурады нылъёстэс но дӥсяськоды.

— Калык ӧдъя ини ас вурем дӥсь нуллыны, азьло лапак магазинысь дэрем басьяло вал. Кылем арын гинэ ай Эгралан ик шуылӥзы, малы тӥ ульча кузя удмурт костюмен ветлӥськоды. Ми шуиськом, со костюм ӧвӧл, со удмурт платья. Нош али асьсэос удмурт дэрем куро ни. Туж яра бохо стиль, удмурт дӥсь но со выллемгес ик, вылысьтыз вылаз дӥсяны луэ, эркын. Нылъёс но чисто соин ветлыны кутскизы. Милям мугормы веськрес ӧвӧл ни, нош удмурт яке бохо дэрем дӥсяськод но — чебер.

Эгралась Эшъяськон юртын ужаны кутскыкум (со вал ог 4 ар талэсь азьло), «Жингырак» фестиваль ортчиз. Модая номинацие вурыны косӥзы коллекция. Огзэ-кыксэ дэрем вури, собере ужысьтым нылъёс шуо: «Милемлы но вур, ми но сцена вылэ потом». Ӧй ик вала, кызьы коллекция пӧрмиз. Со бордысь потӥз модая «Питыран» театрмы. Мыным яра малпаны кыӵе ке легенда, нош соя — дӥсь. Алигес училищеысь нылъёсты бордам басьтӥ, соосты вуриськыны дышетӥсько. Соос но дӥськут магазинысь басьяло, кышкало вал вылазы мукетсэ, ас вуремзэ, дӥсяны. Нош али синъёссы чиляны кутскизы, дэремзы пыр ас пуш дуннезэс усьтэмзы потэ.

— Син азямы пуктӥськом Пурга, Алнаш пал дэремъёсты, нош эгра дэрем туж ик тодмо ӧвӧл.

—  Милям Эгралан трос коллективъёсмы, вуриськисьёсмы но вань — тросэз ас валамзыя вурисько, Интернетысь видео учкыса. Но шонер-а, ӧвӧл-а, уг валало. Модая юртын ортчытъясалмы мастер-классъёс, урокъёс. Удмурт мода пумысен материалъёс Интернетын ӧвӧл, Эгралась Иже семинаръёсы лапак ветлыны уг луы, кыдёкын улӥськом. Дизайнеръёслы но куспазы вераськыны, ог-огзылэсь дышетскыны кулэ. Кылем арын «Палэзян» фестивальын удмурт модая котырес ӝӧк ортчиз. Отчы вайи йыре пононъёсме. Дизайнер Т. Москвина шуэ, та выллем изьыосты Брангуртысь З. Лебедева лэсьтӥз ни вал. Нош мон со дизайнерез уг но тодӥськы, ужъёссэ ик адӟылэме ӧй вал. Нош ужрадысен синмаськи солэн киын вурем дэремъёсызлы.

Мастер луэме потэ, но дышетскыны луонлыке уз луы ни, дыр. Соин ик книгаос, журналъёс басьясько. Нылылэсь планшетсэ аслым кари ни, Интернетысь лекциосты учкылӥсько, модалэсь воштӥськемзэ чакласько.

Туж потэ вуриськонъя кружок кылдытэме, эграослы удмурт модаез усьтэме. Зураысь модельерен Ольга Стрелковаен малпамы Эгралан модая юрт кылдытыны, татын Эгра пал дэремъёсты вурысалмы. Ольга проект гожтӥз ини, Культурая но туризмъя министерствое келяз.

— Вуриськыны, огласянь, секыт. Калыклэсь мылкыдзэ лыдэ басьтыны кулэ, со дыре ик аслэсьтыдзэ но вунэтоно ӧвӧл.

— Вуриськон мыным туж яра. Инмар-а, мар-а юрттэ. Мыным яра, куке суредаськод одӥг дэрем, нош вурем бере со воксё мукет платьялы пӧрме. Яратӥсько вуж дӥсен вырыны, солэсь выльзэ пӧрмытыны. Семьяямы дӥськут басьятэк тыршиськом, кылсярысь, али вылысьтым дӥськутэ вуж дӥсьёслэсь вуремын.

Адямиосын бен секыт ужаны: мыным таиз ӧз яра, соиз ӧз яра, шуо — мукет сямен вуроно луэ. Соин ик мон нырысь адямилы валэктӥсько, тӥледлы тазьы умойгес луоз шуыса. Огласянь, озьы  ас малпанъёсме соослы пыӵатӥсько. Адямиос верало ни: ми, пе, тӥ доры лыктӥськом, тӥ ваньзэ валэктӥськоды шуыса. Мон ӵем синмаськисько ас вурем дӥселы. Огпол мыным вайизы чильтэр но чайы ку. Кофта вуронъям сокем синмаськи, сётэме ик уг поты вал ни. Но со мынам ӧвӧл ук.

— Та дыр куспын асьтэ коллекциосыныды уно фестивальёсы пыриськылӥды ни.

— 7 коллекция вури ни, но тросэз соос пӧлысь — сценической. Тужгес бадӟымез вормонэ мон понна — 2014-тӥ арын модая «Воршуд» фестивальын лауреат луэме. Отчы сомында коллективъёс люкаськизы, мынам «Палэзь» коллекцие тужгес устоез луиз. Платьяосы куд-огез куэмын, куд-огез лякиё амалэн вуремын вал. Интернетысь 19-тӥ даурысь ӟуч сюан дэремъёсты учкыса, удмуртъёсыныз огазеяй. Алигес ёросамы ортчытӥм сумкалы сӥзем «Ныпъет» фестиваль. Модая фестивальёс трос кадь, но малы ке сумкалы сӥземъёсыз ӧвӧл. Нош удмуртъёс понна ныпъет — пайдаё, со дыре ик сакральной маке.

Кылем арын Сарапулэ модая фестивале чортӥзы. Шуизы: «Тӥ дэремъёстэс возьматыны эн, вузаны гинэ вае. Тӥляд нимды вань ини». Пайми, конечно.  Пиосмуртъёслы удмурт дэрем, штань, дукес, пичи пиналъёслы дэремъёс вурыса нуи, ваньзэ вузай. Шумпотӥсько, уго азьло троссэ коллекциосме ас коньдонэным вурылӥ, мужике пумит ӧз луылы.  Культураын ялан коньдон уг тырмы ук. Нош табере нылы, пие дышетско, сыӵе луонлыке ӧвӧл ни.

Вужзэ улӟытэме, вуж пытьыез берыктэме, вашкала дыръёсы кадь лэсьтэме потэ: нырысь турынэз будэтыны, собере сое октыны, дэра куыны, буяны но вурыны. Та пумысен трос материал но учки ни. Ки улам шедиз вал профессор В. Туганаевлэн «Исчезнувшие растения» книгаез. Мынам отысь будосъёсъя коллекция лэсьтэме потӥз, нош коньдонэ ӧвӧл. Дэмлазы вазиськыны Кун Кенешысь депутатлы  Софья Широбоковалы. Кӧня, пе, куриськоды? Мон, трос курисько шуыса, керпотӥ, 25 сюрс, пӧй. Вордӥськем нуналам кузьым вуиз.  Малпасько: тулыслы, удмурт модая фестивальлы, выль дӥськут вурыса вутто.

— Адӟисько, макем тӥледыз бордаз кыске инкуазь, вашкалаез.

— Мужикеным туж яратӥськом  дуннеез котыръяны, Удмуртия кузя, чебер интыосты, куштэм гуртъёсты учкыса, ветлӥськом, отысь вуж посуда, вуж арбериосты шедьтыса чисто гуртэ вайиськом. Алигес шедьтӥ вашкала дукес.

Толалтэ мон витисько ни, ку гужем вуоз — возь вылэ выдыны, чылкыт омырен шоканы.

Вордскем местаям, Шорниын, али юри корка басьтӥмы, выжыосы мед кылёзы шуыса. Гужем гинэ отчы ветлӥськом ай, но пенсие потӥ ке, отчы берто, сике. Ми улӥськом вуж коркаямы, газмы ӧвӧл, корка шорын гурмы сылэ, кема аръёс ӵоже вумы но пыртэмын ӧй вал, киын мисьтаськылӥ. Кызьы мон шуисько: та музъеме адями гольык лыктӥз, гольык ик кошкоз.

Мария Векшина

Удмурт Дунне
By Удмурт Дунне 30 января, 2017 13:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<