Туала журналистика лултэм…

Удмурт Дунне
By Удмурт Дунне Январь 18, 2017 11:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ольга Николаевна Чиркова — Удмуртиысь дано журналист.

Ольга Николаевна Чиркова — Удмуртиысь дано журналист.  Школаын дышетскисьёслы но студентъёслы журналистикая «Журавейник» центрлэн анаез луэ, трос аръёс ӵоже Удмурт кун университетысь вуоно журналистъёслы тодон-валанъёс сётъяз. Печатьлэн нуналыз азьын мон пумиськылӥ аслам дышетӥсеным.

— Мынам вал туж огшоры семьяе, анаен атае — лэсьтӥськисьёс. Туж умой тодӥсько на, кызьы гужемзэ ортчытъяй песянайёсы дорын Балезиноын. Соос уло вал лесобазаын удмуртъёсын, бигеръёсын, ӟучъёсын валче. Улӥзы куанер но секыт, со понна ваньзы туж зол эшъяськизы. Паймисько вал клублы: солэн ӧсъёсыз котьку вӧлак усьтэмын вал. Нуназе ми сцена вылын шузияськылӥм, нош ӝытазе ветлылӥм индийской кино учкыны. Гуртын мыным кельше вал. Нырысь ик, мон вал городысь, лесобазаысь тужгес чеберез ныл, эктӥсь, соин ик вань горд йырсиё пиос мон котырын бергазы. Монэ ваньзы отын яратӥзы. Гуртын ик  мон нырысетӥ уксё поттӥ. Ог 12 арескам гуртысь пиналъёсын ӵош Кожиль черкогуртэ картошка урыны ветлӥ. Поттэм уксёеным малы ке но 39 размеро лыз босоножки басьтӥ.

Школаысен дышетӥсе шуиз: «Оля, тон пӧрмытӥськод гожъяськыны, гожъяськы!» Озьы печатласькыны кутски «Комсомолец Удмуртии» газетын. Мынам вал визьмо дышетӥсьёсы, со вакытэ газетын ужазы тодмо журналистъёс, прозаикъёс, кылбурчиос Лёва Роднов, Сергей Гулин, Серёжа Жилин. Соосты лыдӟылӥзы, со нимъёс понна ик газетэз но басьтылӥзы.

Валамон, пичи дырысеным мон вал туж творческой нылаш, нылпи садын весь ужрадъёсы пыриськылӥ, эктылӥ, металлофонэн шудӥ, малы ке ӧй яратылы  визез сынась урокъёсты, кельше вал пиосын шудыны, кылсярысь, командирлэн кышноез луыны. Мукет нылпиослэсь мон пӧртэм луылӥ — анае дышетскиз Москваын но отысь вайылӥз тузӥ дэремъёс, лакен шобыртэм пыдкукъёс, тузӥ бантикъёс. Тодӥсько на, огпол милемыз, садикысь нылпиосты, телевидение снимать карыны Иж тымет дуре нуизы. Гудырикошкон. Ӝокыт. Мон шудӥсько металлофонэн, азямы кырӟа тодмо артистка Маргарита Суворова — собере со Москвае кошкиз. Мынам пыдъёсам — лакированной туфлиос, соос пыдъёсме вирпульыозь нярӟытӥзы, гольфъёсы бордам лякиськизы. Эшшо операторъёс туж кема ужазы на, техникаез кема тупатъяно луиз.  Мыным вӧсь вал, туж зол бӧрдӥ. Соку малпай: уг поты журналист луэме, телевидение курадњытэ.

Нырысетӥ школаме воштэме бере (отын мынам вал яратонтэм дышетӥсе, али валасько: шудтэм дышетӥсьёслы пиналъёсын ужаны уг яра), мынам улонам кылдӥз кужмо, азьветлӥсь сямо, нылпиосты яратӥсь Мария Константиновна Райченко, ӟуч кылъя но литературая дышетӥсь. Мон солы вань сюлмыным синмаськи!

Пичи дыръяз лётчик дӥсен.

— Со ик кылэз яратон пыӵатӥз?

— Кылэз гинэ ӧз! Макем яратыса со вералляз писательёс сярысь. Муса Джалильлэсь кылбуръёссэ лыдӟе — синкылиосыз пото, Тарас Шевченколэсь — бӧрдэ. Огласянь, со туж чурыт адями вал, кулэ дыръя йыртышке но сётоз. Но ми понна со бадӟым авторитет луиз. Озьы мынам ӟуч кылъя но литературая дышетӥсь луэме потыны кутскиз, нош эшшо — библиотекарь. Милям школаямы эшшо тыршиз Мира Александровна Байметова. Мон весяк тодылӥ, со доры котьку чай юыны лыктыны луоз шуыса. Нош со вераса пукоз книгаос сярысь. Шуоз вал: «Оля, учкы, кыӵе вуж книга». Макем паймымон солэн кияз кылле вал та арбери!

Сыӵе шумпотыса мон мынӥ Глазовысь пединститутэ. Малпалляй, зэмос дышетӥсез отын гинэ дасяны быгато шуыса. Со сяна, Глазов — сыӵе пичи, мусо, интеллигентной город, яратӥсько пичи шуныт интыосты, каръёсты. Соку монэ огъяулонниысь урбоос но ӧз кышкатэ. Но экзаменъёс сётъякум, мон доры шуак вуо анае-атае: тон егит журналистъёс куспын элькун конкурсын вормид! Табере быгатӥськод пырыны Москваысь, Ленинградысь яке Свердловскысь университетъёсысь журналистикая факультетъёсы. Анае бырйиз Свердловскез, малы ке шуоно со тужгес матысез. Но ми ог-огмес та городэн соку ик ӧм яратэ!

— Нош журналистикаез?

— Та дыр куспын котькытын ужаса вуттӥ: газетын но, телевидениын но, радиоын но. Монэ тодмаллязы, уже пӧрме вал. Но журналистика кӧтме ӧз веськатылы, та уж сюлмылы матын ӧз потылы. Со сяна, тазалыкеным йырин мыным туж секыт йӧтылӥз. Со вакытэ улонам кышкыт адӟон вуиз уго. Милемыз, студентъёсты, колхоз бусые картошка октыны нуизы, нош со ядохимикатъёсын пазямын вылэм. Соку ваньмыз йырин-чукин берытскиз кадь. Тон али гинэ бызьылӥсь, котькытчы пыриськись, эктӥсь нылаш вал, нош 30 нунал ортчыса, шӧдӥськод, мугорыд, пыдъёсыд тынэсьтыд кылзӥськемысь дугдо шуыса. Огкылын вераса, егит арлыдам инвалид луи… Ми 80 кузя вал — котькудӥзлэн улонэз пӧртэм сямен радъяськиз: кин ке быгатӥз шуг-секытэз вормыны, кин ке ӧз.

Бугыръяськись, ялан пӧзись лулы мыным гань-гань улыны ӧз сёты. Университетын мон факультетлэн комсомол активаз вал, озьы огпол милемыз лэзизы военной училищее курсантъёс доры газет лэсьтыны. Пиосын эшъяським, куд-ог нылъёсмы бӧрысь семья но кылдытӥзы. Огез мыным но гожъяз: «Олечка, тон урод мылкыдлы сётскыны кулэ ӧвӧл, тон луыны кулэ кужмо, визьмо,  тодад вай Зоя Космодемьянскаяез». Соку ик мынам улонам телевидение но вуиз: та ивор вӧлмытӥсь ёз тонэ ялан вень вылын кадь возе — камера азьын астэ чебер возьыны кулэ, буяськыны, чебер дӥсяськыны. Чебер луыны кулэ курсантъёс дорын но, уго офицеръёс вӧзын котьку вӧлэм кадь нылъёс сыло. Али но мон котырын военной удысысь адямиос бергало. Соин ик улонам ваньмыз радызъя.  Мон кема аръёс ӵоже кусып возьылӥ ожгарчиосын, пӧсь интыос пыр потэмъёсын. Соос пӧлын вал пӧртэмъёсыз: кин ке Афганистан бере ассэ ыштӥз, кин ке валаз, улонын котьмар луэ, но азьлань вамыштӥз. Соос тросэзлы монэ дышетӥзы. Кылсярысь, мар со кӧбертэм но кескич луон. Мон тодӥсько адямиосты, кин гадяз бырттылэ мурт орденъёсты, аслыз карьера лэсьтэ, но возьдаськытэк учке дунне шоры. Со сяна, мон ортчемын совето вакытысь кужмо но адямиез жалясьтэм школа пыр.

Анаелэн но, дыше-тӥсьёсылэн но потэ вал, мон Москваын мед ужалом шуыса. Нош али  ачим малпасько: потэ-а вал меда мынам тыршеме Нырысетӥ каналын? Туалаяз — уг! Лулэз валасьтэм журналистикаын пӧземе уг поты.

Озьы мон университетын заочной ёзэ выжи но Иже бертӥ. Тодосчи Александр Григорьевич Шкляев чортӥз журналистикая факультетэ, мон нырысетӥ лекция ортчытӥ но соку ик валай: тани со — шуд. Туж шумпотӥсько, аслэсьтым улонын интыме егитысен валай шуыса — мон понна журналист луонлэсь тунсыкогес… журналистъёсты дышетон.

Вуоно журналистъёсты дасян куспын.

— Озьы ик-а кылдӥз  школаын дышетскисьёс но студентъёс понна журналистикая «Журавейник» центр?

— Кирилл пиеным кӧто дыръям уйвӧт адӟи. Комнатаын солань-талань нылпиос бызьыло. Сайкай, ас поннам малпай: журналистъёслэн кузьыли муӵсы, «журавейник». Кыӵе чебер ним! Озьы мынам одӥг аре вордӥськизы улонысьтым 2 валтӥсь малпанъёсы — «Журавейник» но Кирилл пие.

— «Журавейниклы» луыса, пиналъёс китӥзы кутылӥзы ни тодмо журналистъёсты А. Максимовез, Д. Губерниевез, А. Самолётовез но мукетъёссэ. Секыт-а бадӟым адямиосын кусып шедьтыны?

— Ми ваньмы артэ улӥськом. Ку «Журавейник» кылдӥз, нылпиос монэ «фея» шуыса ниманы кутскизы, Ольга Николаевна котьмар быдэстыны быгатэ, шуылӥзы. Нырысь ик, соослэн потӥз, ми доры пумиськонэ тодмо биатлонистъёс И. Черезов но М. Максимов мед вуылозы шуыса. Нош мон соослэн кышноосынызы тодмо вал. Ортчытӥм пумиськон. Соку мон синмаськи биатлонэн вырись пиослы: соос тӧл кадь, бордысьтызы тазалык, шунды, зэмос воргорон кужым потэ.

Д. Губерниев — со усьтэм сюлмо адями. Д. Губерниев мыным котьку кельше вал. Нылпиос шуизы, мед ми доры та тодмо комментатор вуоз но милям киноямы сниматься кариськоз.  Ну и куронъёссы, малпасько ас поннам. Озьы мон жингыртӥ Москваысь тодмо журналистъёслы, соос мыным телефон номерзэ вуттӥзы, жингыртӥсько, трубказэ уг басьты. Малпасько: кытын мон, нош кытын Д. Губерниев.

Но со вакытэ мыным вайизы Дун-чылкыт Матронушкалэсь оброссэ. Мон со доры вазиськи: «Вот, Матронушка, мыным секыт, мон уг быгатӥськы султыны но Д. Губерниев доры мыныны, мыным пичи ке но юрттэт кулэ». Сылӥсько табере гур азь палан, картошка паласа, телевизор учкисько. Шуак телефонэ жингыртэ.

— Алё, — шуисько.

— Алё, — вазе куара. — Тӥ мыным жингыръяды вал. Та Губерниев.

— Зэмос Губерниев? — ачим ик пайми. — Мон дышетӥсь, туж яратӥсько биатлонэз. Мынам туж потэ вал, тӥ ми доры мед лыктоды шуыса…

— Конечно, вуо, — шуиз со.

Тани журналистикая факультетын ортчытӥськом Д. Губерниевен мастер-класс. Одӥг нылаш мыным вазиське: коридорын, пе, Валерий Викторович Бузилов (али Кун Думаысь депутат) ветлэ. Кӧня ке ортчыса, вӧзам одӥг палаз пуке Д. Губериев, мукет палаз — В. Бузилов, нош пыд улам сумкае, отын кылле Матроналэн обросэз. Мон пукисько но валасько: тани со — паймымон улон.

«Журавейникам» али ваньмыз умой шуыса, тау шуыны кулэ Валерий Викторовичлы. Калыккуспо «Подсолнух» фестивальмы но арлы быдэ солэн Нечкиноысь базаяз ортчылэ. Со мынам утисе. Шер ке но луылэ, йыромисько, уг валаськы ни, мар карыны. Жингыртӥсько, нош со шуэ: кызьы тыныд возьыт ӧвӧл, мон али мынӥсько крестной ходэн но тон сярысь малпаськисько, вӧсяськисько тон понна. Мыным соку ик капчи луэ.

Журналистикая факультетын ортче Д. Губерниевен мастер-класс.

— Тӥ шуиды вал: туала журналистикаын талант валтӥсь интыын ӧвӧл. Туала вакытэ СМИ-ос ивор гинэ вӧлмыто на, калыкез уг дышето, уг визьнодало.

— Жаляса верано, со озьы Ижысь журналистикаын но, Москваысяз но. Вера мыным «Центр», «АиФ» газетъёсысь одӥг коть нимез. Йыре уг лыкты. Но уг луы чутрак уретыны, журналистикаын дано нимъёс воксё ӧвӧл шуыса. Дано гожъяськисьёс ӵемысь кошко ас журналистикаязы, нуыны кутско колонкаоссэс, блогъёссэс.

Мон сылӥсько совето вакытысь дано журналистика но туала егитъёс куспын. Валасько, золгес кыске совето вакытэ ужаны кутскем журналистъёс борды. Уго соос, нырысь ик, валало, кытын уродэз, кытын умоез, журналистикаын соос умойзэ гинэ лэсьтыны туртто. Туала журналистика — номыре жалясьтэм, азьтэм маке, журналистъёс ӵемысь юанъёссэс но Интернет пыр гинэ лэзьяло на.

Мон котьку верасько нылпиосылы: материал лэсьтон понна султы пукон вылысь но мын адями доры! Занятиосын ми вераськиськом умой уж лэсьтӥсь журналистика сярысь. «Журавейникын» вань сыӵе нылпиос, кудъёсызлэн потэ тодмо луэмзы, кылсярысь, али «Россия 2» каналын ужась Ижын вордскем Анастасия Чернобровина выллем. Татын номыр уродэз ӧвӧл. Но та вие «кизили»  но «тодмо» луонъёсты сурано ӧвӧл. Табере Анастасия быдэс кунлы тодмо, озьы ке но солэн сюлмыз сыӵе ик чебер, чылкыт кылемын. Жингырты гинэ, телефонзэ кутоз. Сыӵе ик адямиос вуо «Журавейникысь» пумиськонъёсы но. Нылпиос доры вайыны тыршисько Россиысь историе яркыт пытьы кельтэм адямиосты. Озьы вуылӥз тодмо космонавт Георгий Гречко. «Спокойной ночи, малыши» передачаез учкыкум, синмаськисько вал Татьяна Судецлы, со мыным тужгес чебер телеведущий потэ вал. Жингыртӥсько солы но юасько: тӥляд ӧй луысал-а ми доры Степашкаез но Хрюшаез ваемды. Со шуэ: быгатысал. Собере ватса: нима монэ огшоры — тётя Таня. Нош кызьы сое мукет сямен нималод на?

90-тӥ аръёсы кельше вал  журналист Алексей Самолётов. Мынам малпанъёсам но ӧй вал, со воргоронэн эшъясько шуыса. Лёша мон понна — дышетӥсь, батыр, военной корреспондент, кудӥз пуляос улын Чечняысь репортажъёс лэсьтылӥз. Мон понна со авторитет. Со доры вазиськи мерлыко бамъёс пыр. Со но лыктыны пумит ӧз кариськы. Лёша вуэм бере, пукисько журналистикая факультетын, учкисько со шоры но паймисько: улонын ваньмыз артэ, ваньмы ог-огмылы юрттӥськиськом.

«Особая красота» проектын инвалид нылъёс быгато асьсэлэсь быгатонлыкъёссэс возьматыны, чебер буяськыса-дӥсяськыса фотосессие но мукет ужрадъёсы пыриськыны.

— «Журавейниклы»  коньдон бюджетысь уг висъяськы. Озьы ке но, тӥ азьлань вамышъяськоды, радъяськоды пӧртэм проектъёстэс.

— Эн кеся бурмымтэ яраме. Коньдонэн югдур туж урод. Мон уг тодӥськы, малы. Соин ик ачим уксё поттӥсько, «Журавейнике» мынам мед улоз шуыса. Ваньмон дыры мынам ӧвӧл, ӵукназэ, кылсярысь, султӥсько ни 3 часын. Мынам вань пӧртэм проектъёсы мукет городъёсын но. Отысь уж вуэ ке, сое чаляк быдэстӥсько. Озьыен, мон нылпиосы доры — центре ог 50 кузя пиналъёс ветло — выльысен кинэ ке но чортыны быгато. Таӵе вакытэ, ку Ижын уг сузяло сюресъёсты, туж секыт. Тани али но учкисько укно сьӧры, адӟисько: лымы усе. малпасько: ӵуказе мон быгато-а коркась потыны?

«Журавейникын» али уно проектъёс. Соос пӧлын висъяське «Особая красота», кытын инвалид нылъёс быгато асьсэлэсь быгатонлыкъёссэс возьматыны, чебер буяськыса-дӥсяськыса фотосессие но мукет ужрадъёсы пыриськыны. Туэ арысен ми малпаськом кусып тупатыны гурт школаосын. Кылем арын туж кельшиз, кызьы ми потам Алнашысь нылпи юртэ. Секыт югдуре шедем нылпиос ноку ӧз малпалэ, гожъяськыны быгато шуыса. Нош соос пӧрмытӥзы. Со сяна, мон усьтӥ соослы мукет дуннеез. Ныллы, чебер луон понна, сюрес дуре султоно ӧвӧл, кулэ кылдытыны аслыз тунсыко образ но вурыны чебер дэрем. Со нылпи юртысь нылъёс соку ик асьсэлы дэремъёс вуризы, соос понна фотосессия радъям, лимузинэн ворттылтӥм. Али «Вконтакте» бамын Алнашысь гожъяло: «Ми мӧзмим, ку тӥ вуоды ни?»

— Озьыен, Ижын «йӧспӧртэм» адямиослы гань-гань улыны луонлыкъёс шуген кылдытӥсько?

— Ми кадь инвалид адямиослэсь улонзэс капчиятон программаос Ижын вань, соос улонэ но пыӵатӥсько, но туж каллен, жаляса верано. Кылсярысь, коркасьтымы пандусэз кылем арын ми асьмеос тупатъям-выльдӥм.

— Но вормонтэмез та дунне вылын ӧвӧл?

— Ӧвӧл, конечно! Мар мынам потэ вал та улонын, мон лэсьтӥ! Азьланяз но озьы ик луоз. Валаны гинэ кулэ, кызьы сое шонер быдэстоно. Паймисько, кызьы вӧсяськем бере, улонын паймымон учыръёс луыны кутско. Мон кужмо кышномурт, дыши ни, ваньзэ быгатӥсько шуыса. Кулэ интые, кулэ адямиослы жингыртоно гинэ, кылсярысь, уж дуре вуытозь, парковка сузямын луоз ни…

Кирилл пиеныз.

— Пиез будэтыку но, кужмо сямтэк уг луы.

— Мынам туж потэ вал нылпи ваеме. 35 арескам вордӥськиз Кирилл. «Журавейникысь» нылпиос монэ «фея» шуыса нимало ке но, урод сямме но поттаны быгатӥсько. Пие кылзэ вераны, эрекчаны монэ кутскиз ке, офицер кадетэ но келяны быгато. Мыным потэ, нылпилы, тужгес но пияшлы, кулэ дисциплина. Кирилл — со пичи воргорон, со ассэ возьыны кулэ воргорон кадь. Вераны быгатӥсько: 12 аресказ, со ас ёзъёсызлэсь трослы бадӟымгес ни — выросъёсызъя но, сямызъя но. Со трос мар карыны быгатэ. Озьы ке но, со анайлэн пиез, куддыр синкылизэ но лэзьыны быгатоз. Марлэсь ке кышканы кутске ке, кык коӵышъёсмес кияз кутэ но «мама-а-а» шуыса дорам лыктэ.

— Нош, Ахиллеслэн пыдпыдэсэз кадь, ляб интыды вань-а?

— Канфет яраӥсько. Воргоронъёс монэ весь канфетэн утялто. Валлян аслым кыл сётӥ: уж дурын одӥг канфет гинэ сиё на, собере уг ни. Нош гуртэ бертыку, шуак кисыысьтым шоколад шедьтӥсько…

Мария Векшина

Туспуктэмъёсыз геройлэн

 

Удмурт Дунне
By Удмурт Дунне Январь 18, 2017 11:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<