Тодэ лыктӥзы клубъёс

Удмурт Дунне
By Удмурт Дунне 25 января, 2017 08:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Матысь аръёсы ватсаса коньдон висъяськоз ог дасо пала приоритетной проектъёсъя, пӧлазы вань тазалыкез утёнэн, ЖКХ-ен, моногородъёсын, пичи ужбергатонэн герӟаськемъёсыз.

Москваын ужамзы бере Удмуртие нош ик огдырлы берытскизы Кун Думалэн депутатъёсыз Андрей Исаев, Валерий Бузилов но Алексей Загребин. Журналистъёсын пумиськылӥзы, веразы Россилэн бюджетэз бордын ужамзы сярысь.

Улӟозы театръёс

2017-тӥ но 2018-тӥ-2019-тӥ аръёслы Россилэн бюджетэз нырысетӥ лыдӟемен кутэмын 18-тӥ ноябре. Соя валаське: вуоно арын шыръяно луом, но уждунтэк, пенсиостэк, пособиостэк ум пуке.

— Калыкез, ваньмыз умой шуыса, пӧяны уг яра, — одӥг ымысь сямен веразы депутатъёс. — Зэмзэ но, коньдон мултэс ӧвӧл. Кызьы тодӥськом, казнае ӝыныез коньдон люкаське мувӧй поттонлэсь. Чакламъя солэн дуныз 42 манет котыр возиськоз — та вылэ пыкъяськыса ик, кутӥське бюджет но. Солэн дуныз будӥз ке — туж умой. Но ќз ке но, вань социальной программаос быдэсъяськозы.
Та сяна, «Огъя Россия» партилэн Кун Думаысь фракциезлэн берлояз ортчем кенешоназ огкылэ вуэмын: пенсиосты арлы быдэ 1-тӥ феврале, инфляцилэсь йылэмзэ лыдэ басьтыса, будэтоно. Нош 2017-тӥ арын январе вань пенсионеръёс ватсаса 5 сюрс манет басьтозы. Озьы ик 2016-тӥ арынлэсь ичигес коньдон уз висъяськы инвалидъёслы, секыт висисьёслы, паласькись черъёслы пумит прививка пуктылонлы но мукет.

Матысь аръёсы ватсаса коньдон висъяськоз ог дасо пала приоритетной проектъёсъя, пӧлазы вань тазалыкез утёнэн, ЖКХ-ен, моногородъёсын, пичи ужбергатонэн герӟаськемъёсыз. Ужаны ӧдъялоз чылкак выль 3 проект но: клубъёсты выльдонъя, пичи городъёсысь театръёсты улӟытонъя но пичи городъёсын ик шутэтскон интыос кылдытонъя.

— Жаляса верано, берло аръёсы тросгес саклык висъяськылӥз бадӟым театръёсты, паркъёсты возёнлы, нош пичи городъёсысь трос калык шутэтскон интыос вунысагес кылизы, — шуэ Андрей Исаев. — Мар веранэз на гуртъёсысь клубъёс сярысь. Быръён кампания дыръя депутатъёс со клубъёсы вуылӥзы, адӟизы, кыӵе югдуре вуэмын соос. Паркъёсты выльдыны, театръёсты улӟытыны курыса, вазисько тросэз бырйисьёс. Та программаос кӧня ке арлы чакламын.

Мерттоно улмо садъёс

Удмуртилэсь экономиказэ али валто оборона но гурт удысъёс. Депутат Валерий Бузилов верамъя, Россиын ӵапак та удысъёслы нимысьтыз саклык висъяськоз. Обороналы тыршись предприятиос пумен басьтӥськыны кулэ огшоры улон-вылонын кулэ луись тӥрлык поттон борды — Россия таӵеослы юрттӥськоз.

Нош гурт удыс сюдыны кулэ странамес, кунгож сьӧрысь сиён-юон пумен ӧжытгес ваёно. Таин валче асьме производительёслы 5 процентъем кредитъёс сётӥськозы. Сиён-юон поттонлы кошкем котькуд манетысь 30 процентэз производительлы берен берыктӥськоз.

— Кылсярысь, республикамы бадӟым ужпум пуктӥз: 2020-тӥ арысен 1 миллион тонна йӧл кыскыны кутсконо, — пусйиз В. Бузилов. — Соин ик хозяйствоос али чырмыт басьтӥськизы фермаос пуктон борды. Талы висъям котькуд 1 миллион манетысьтызы 300 сюрсэз табере асьсэлы ик кылёз.
Озьы ик бадӟым саклык висъяськоз, пе, виноград, улмо но мукет емышъёсты будэтонлы. Валерий Бузилов малпамъя, таяз программае но элькунмы пыриськыны быгатоз. Асьме палан улмо кисьма ук — малы яблокпу садъёс будэтонтэм? Огкылын вераса, элькунэ коньдон кыскон понна асьмеос, пе, пӧртэм кун программаосы пыриськыны кулэ. Нош соос ӧжыт ӧвӧл. Кылсярысь, азбаръёсты волятонлы-шулдыртонлы Россия 20 миллиард манет висъяны чакла.

— «Огъя Россия» фракцилэн одӥгаз кенешоназ ужпум ӝутӥ: малы банкъёс уг юрттӥсько кунлы? Улосъёс соослэсь бадӟым процентэн кредит басьтоно луо, — азинтӥз веранзэ Валерий Бузилов. — Москва кылэ котькуд депутатэз. Озьы та нуналъёсы Россиысь Коньдон ужпумъёсъя министерство вераз ни: банкъёсын ужано.

Огъя кыткетын

Депутат Алексей Загребин шуэ:

— Историысь тодӥсько: страна пӧртэм удысъёсты уката чырмыт азинтыны, выльдыны кутске секыт югдуре сюрон вакытъёсаз. Малпасько, али ӵапак сыӵе дыръёс вуэмын. Кун Думаысь депутатъёс субботае но, арнянуналэ но бер ӝытозь ужало. Бюджетэз юнматон — со коньдон люкылон гинэ ӧвӧл, нырысь ик казнае ватсаса коньдон пыртыны амалъёс утчан.

Туж пусйымон, пӧртэм ужпумъёсты депутатъёс асьсэ коже гинэ уг эскеро шуыса. Ӧтчало министръёсты но, пӧртэм учреждениослэсь, организациослэсь кивалтӥсьёссэс но. Котькуд комиссиын кылдытэмын экспертъёслэн кенешсы.

Чакламъя вуоно арын бюджетлэн доход люкетэз туэлэсь ӧжытгес уз луы. Вытъёс уз йылэ, но тыроно луозы соос но, кин татчыозь талэсь пегаз. Инфляция ог 4 процент гинэ луыны кулэ, пе. Озьы калленэн ваньмыз ас ӧраз пырыны кулэ. Нош вуоно арын кутэмын луоз Бюджетъя выль кодекс. Улосъёслы со кельшыны кулэ, пе.

Элина Кумачёва

Удмурт Дунне
By Удмурт Дунне 25 января, 2017 08:10 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<