Тӧр шорын: Эмъюмды медло серекъян!

Удмурт Дунне
By Удмурт Дунне Январь 23, 2017 13:56

Татьяна Кайсина но Елена Тронина

Татьяна Кайсина но Елена Тронина — Якшур-Бӧдья ёросысь Мукши культура юртын ужасьёс. Татьяна Александровна — лулчеберетъя кивалтӥсь, Елена Яковлевна — режиссёр. Соос ик маскарчиос. «Ури-бери» дуэт кӧня ке аръёс ӵоже ини пыриськылэ элькунамы ортчылӥсь пӧртэм конкурсъёсы, концертъёсы, капчи мылкыд кузьма шаерамы улӥсьёслы. Серекъян нуналлы сӥзьыса, «Удмурт дунне» газетэн радъям «Маскара» куара сётонын туэ «ури-бериос» вормисе потӥзы.

— Выль ар вуэмен валче вераськонмес но кутском  та нуналъёс бордысен. Мар тӥ понна Выль ар?

Е. Тронина:

— Выль ар мон понна пичи дырысеным чеберъям кызэн герӟаськемын. Апайёсы, мамалэн сестраосыз, котькуд ар кыӵе ке но дӥськут вуро вал. Мон вордӥськемын пичи гинэ Чекер починкаын. 1-тӥ классысен дышетски Мукши школаын, гуртмылэсь 8 иськемын. улӥмы интернатын, гуртэ шутэтскон нуналъёсы гинэ бертылӥмы. Выль ар али но — бадӟым шумпотон, но трос-трос уж.

Т. Кайсина:

— Мар борды кутскыны ик паймоно — ваньзэ вуттыны кулэ, уродэ усем уг поты. Арлы отчётъёс лэсьтоно, туристъёсты пумитано, клубез чеберъяно, нылпи садын ёлка ортчытоно. Пичиос пӧлын ми Обыда но Леший, миллиард пол, дыр, шудӥмы ни соосты, одӥгаз аре мон Обыда, мукетаз — Лена.

Е. Тронина:

— Республикаетӥ гастрольёсын ветлӥськом, корпоративъёс ортчытъяськом. Таня нылпиослэн «Арлекин», арлыдоослэн «Горизонт» театральной студиосынызы кивалтэ на, нош мон песянайёслэн «Бабушки-веселушки» но инвалидъёслэн «Вера, надежда, любовь» клубъёсынызы кивалтӥсько. Культура юртмылэн кутлы сӥзем проектаз но пыриськиськом, туристъёсты пумитаськомы. Таня отын Тэлькузё, нош мон Лӧпшо Педуньлэн Орина кышноез.

Егит дыръя.

— Кызьы кылдӥз дуэтты, «Ури-бери»  ним?

Т. Кайсина:

— Ним пумысен туж кема малпаськимы. Сямъёсмылы тупа шуыса, та ним вылэ дугдӥмы: мон чупыресгес, Ленаен ӵошатыса. Мон — Ури, Лена — Бери. Котькыӵе учыръёсысь капчиен потыны быгатӥськомы шуыса но та ним милемлы матын. Собере малпам образъёсмылы но со туж тупа. Малпакумы ӧм тодэ, Ури-бери Орина вань шуыса. Огдыре, ниммес воштыны турттыса, быдэс лист тыр кылъёс гожъямы, словарьысь утчаськыса. Нокудӥз уг тупа. Одӥгаз концертын Ури-бери Оринаен ӵош кемдӥмы, со шуиз, малы, пе, воштыны кулэ нимдэс? Буйгатскимы: кӧня «Купанчаосмы», «Инвожоосмы», ог-огзы пӧлы уг йыромо ук!

Е. Тронина:

— Мӧйыослэн одӥгаз праздниказы сценарий гожтӥмы. Таня ӵектӥз пересьёс кариськыны, со вал Оги, мон — Клаша, концерт нуисьёс. Парсь утчаськомы шуыса, шудӥм-серекъям.

— Эграын «Лӧпшо Педунь серекъя» элькун фестивальын но зол серекъятӥды учкисьёсты парсьпи утчаны выременыды.

Т. Кайсина:

— Калыклы яраз, милемлы асьмелы но, озьы со пыӵаз репертуарамы. Но нимъёсмес воштӥмы, мон луи Зина, Лена — Лиза, туалагес луэммы потӥз. Удмурт кун филармониысь «Маскара» фестивале но, пересьёс кариськыса, мынӥмы вал. Кастинг дыръя Наталья Ушакова ӵектӥз геройёсмес пӧртэм сямо карыны. Мон чупыресгес бере, кильтро, етӥз, узыр нылкышно, Зина, луи.

Е. Тронина:

— Нош Лиза — мӧйыгес кышномурт, куанер, губрес, пельыз умой уг кылы, синмыз умой уг адӟы, визьмыз но ӧвӧлгес.

Т. Кайсина:

— Дуэтмы вордӥськем бере 2-3 арзэ палэнэ ӧм поталэ, Эграын ортчем «Лӧпшо Педунь серекъя» фестиваль сюрес усьтӥз ни пӧртэм концертъёсы пыриськыны. «Маскара» фестивале сяна, Глазовысь Штанигуртын ортчылӥсь «Штат-базар» фестивале пыриськиськом. Киясаын юморлы сӥзем «Анчане» («Анекдоты, частушки, нескладушки») фестивале 4 пол вуылӥм ни. 2015-тӥ арын сентябре ветлӥмы Мордовие фин-угор юморлы сӥзем «Кулдор-Калдор» фестивале. Туж трос эшъёс шедьтӥм. Котькуд ужрадысь сямен  дипломъёсын бертӥськом.

Люконтэм эшъёс.

— Кытысь шедьтӥськоды серемес веранъёс, сценарийёс?

Т. Кайсина:

— Кытысь мар кылӥсь-комы, ваньзэ сое нырысь блокнотъёсамы гожъяськомы. Мар ке туж интересноез кылдэ ке, со бордысь потэ ни вань мукетыз веранмы. Репертуармес арлы быдэ выльдӥськом, одӥг ке но выль юмореска гожтӥськом.

Алигес Выль арлы сӥзем «Куинь Светӥос» ӝытэ ветлӥмы. Бертыкумы гаишник дугдытӥз. Ми мышказ пукиськом, думиськемын ӧвӧл. Еэз кыскем кари но киыным возисько. Ӧсэз усьтӥз но шуэ: ӝутэ, пе, паллян кидэс. Ӝутӥ, бурыныз еэз возисько. Табере бурзэ ӝутэ, шуэ. Леналы удмурт сямен верасько, еэз возь шуыса, нош со ачиз ёрмемын кытчы думиськыны, монэ уг ик кылы. Нош возем вырисько ни паллянэныз. Потэлэ, пе, машинаысь, вазиське мыным гаишник. Еме пертчем кари но потӥ. Шуэ, эштылы удмурт сямен верады, еэз возьыны косыса. Мынам азям коньдон пуйые кылле вал, шуисько, медаз усьы шуыса, сое кутыны косӥ озьы. Штраф ӧз тырыты, но мукет дыръя чакласькыса ветлэ, пе. Та учыр но, оло, веранамы пыроз ай.

Е. Тронина:

— Милемды тодыса, куд-ог адямиос асьсэос вазисько, серемес учыръёссэс верало. Собере ми сое асьмея тупатӥськомы. Милям туж бадӟым фанаткамы вань Ижын, со вань концертъёсы ветлэ, кудаз ми пыриськиськом. Со, учыръёс дасяса, лыктэ концертэ. Серекъянмес ми «ниже пояса» васькытыны ум турттӥське. Юонэз но трос вераммы уг поты. Концертъёсты радъясь Геннадий Корепанов кызьы ке шуиз, тӥ, пе, нылъёс, туж ӝикыт ужаськоды.

Т. Кайсина:

— Ӟуч анекдотъёсты но кутӥськом, но соосты озьы ик асьмелы тупамон кариськом. Тани Лизалэн одӥгаз пыдаз колоша, мукетаз гын сапег понэмын. Мон солэсь юасько, малы, пӧй, сыӵе шоголь дӥсяськемын. Со шуэ, ӧд-а, пе, кылзы «Мынам Удмуртиез», интыен-интыен зороз, интыен-интыен лымыялоз, шуизы.

— Асьтэос кыӵе прогноз возьмаськоды тол куазьлэсь?

Е. Тронина:

— Милемлы кыкнамылы но таӵе ӟырт тол куазь яра (пумиськылћмы 30 градуслэсь кезьыт нуналэ — Л. Малых). Кезьыт но, шунды но пиштэ, писпуос гӧртэмын. Инкуазьлэн чеберез шоры ялан учкысал.

Т. Кайсина:

— О-о, урод сюресъёс шоры учкеммы уг поты. Инкуазьлэсь мукет вакытъёссэ но яратӥськом бен, сӥзьыллэн но, тулыслэн но асьсэлэн чеберзы.

Е. Тронина:

— Нош кызьы гужемез уд яраты! Вордскемын ми кыкнамы но 1972-тӥ арын июль толэзе, Таня мынэсьтым 9 нуналлы бадӟымгес.

Т. Кайсина:

— Эшъяськиськом ми 1-тӥ классысен, одӥг парта сьӧрын пуким 8 ар ӵоже. Мон вордскемын Шаркан районысь Зар-Вишур гуртын, но пичи дыръям семьямы выжем Мукшие.

—  Шаянъяськон сямды пичи дыръяды но вал-а?

Т. Кайсина:

— Школаын дышетскыкумы, пӧртэм ужрадъёсы пыриськылӥм, сценкаос возьматъямы. Лякыттэм сяммы но вал. Школаын дышетскыкумы, колхозэ картофка октыны ысъяло вал. Олокытысь тодыса, эскероно кариським: автобуслэсь глушительзэ картофкаен пытсад ке, мар меда луоз? Водитель туж кема бергаз автобус котырын, марзэ гинэ ӧз эскеры. Куке-соку валатскиз глушительзэ эскерыны. Юа, куддылэн, пе, ужды? Ми ӧм вералэ, конечно. Эшъёсмы но валаса ӧз вуттылэ кадь тазьы дауртэммес.

Е. Тронина:

— Мон та учыр сярысь вунэтӥ ни вал, Таня алигес вераз. Нош со водитель — мынам кузпалылэн бубиз (серекъя).

Т. Кайсина:

— Милям классмы бадӟым вал. Немец кыллы но ӟуч кыллы ми, 2 группалы люкиськыса, дышетскимы. Ми Ленаен ӵош шедимы, фамилиосмы Широбоковаос вал — люкизы алфавитъя.

Е. Тронина:

— Уг тодӥськы ни, кудмы ӵектӥм, ӟуч кылъя урок азьын ваньмы партаос улэ ватскимы  — партаосмы пулъёсын ворсамын вал. Дышетӥсьмы Иван Васильевич Белых кунулаз журналэн дыртыса пыриз но, классын нокин ӧвӧл. Ӝогак потӥз, кӧня ке улыса, выльысь вуиз. Нош ми ваньмы чал-чал парта сьӧрын пукиськом ини. Кытын, пе, тӥ вал. Классын, шуиськомы.

 Т. Кайсина:

— Яблоканы но, огречаны но пыраськом вал мурт бакчае. Ишкаса, тӥяса ӧм кельтылэ. Интересно вал. Одӥг пол кин ке доры пыриськом но, пумитамы потӥсьёс вань. Кышкатскимы, кузёосыз шуыса, нош соос ми кадьёс ик вылӥллям. Тихо, тихо, шуо. Соос потӥзы, ми пыримы.

Сцена вылын.

— Асьтэлэн нылпиостылы тазьы ветлыны лэзьысалды-а?

Т. Кайсина:

— Ӧй, конечно! Мар карод, шузиесь вылӥськеммы бере.

— Нош сцена вылын шузияськемъёсты шоры пиналъёсты кызьы учко?

Т. Кайсина:

Артём пие алигес вераз: нырысь, кутскеммы берегес, керпотӥсько, пе, вал, нош али котькытчы но концертъёсын ветлэмдылы шумпотӥсько. Пиелы 16 арес ни, искусствоосъя элькун школа-интернат бере Ижысь культурая колледжын виолончелен шудыны дышетске. Маскаръяськон сямыз но вань, эшъёсыз клоун, пе, шуо. Нош Злата нылылы 5 арес ай.

— Кытысь сыӵе чебер ним шедьтӥды?

Т. Кайсина:

— Егит дыръям горд йырсиенъёс шоры уг ик учкиськы вал. Инмар монэ дотово наказать кариз: кыкез ик пиналъёсы гордэсь (серекъя). Пие вордскиз но, мӧля вылам понӥзы. Горд шуыса адӟи но, вӧсь луэмме ик вунэтӥ, зар-зар бӧрдӥсько. Нылы вордӥськиз но, Злата ним понӥ. Зарни кадь ик пото пиналъёсы.

Е. Тронина:

— Туж интересной нылыз, Таня сое ӵем дыръя сьӧраз клубе вайылэ. Концертъёсы потакумы, Злата бабаеныз Капитолина Степановнаен пукылэ. Кылыз лэчыт, мӧйыос сямен ик, лад-лад вераське. Висемысьтым одӥг пол, йыры борды кутскыса, пукисько, Таня сцена вылын. Злата мыным шуэ: мар вуть-вуть пукиськод, мын, ужа!

Аслам пиналъёсы сярысь ке верано, Мынам Полинаелы 16 арес, дышетске Мукши шор ёзо школаын 11-тӥ классын. Со спортэн тросгес эшъяське, концертъёсы уггес ветлы. Но мон солы юморескаосмес мачкылӥсько. Солэн но юморной сямыз эшъёсыз пӧлын поталля, лэся. Мынам мамае Галина Яковлевна но серекъяны яратӥсь вылэм, частушкаос, пе, туж кырӟа вал — улонысь вазь кошкиз. Нош Филипп пимы 1-тӥ классын дышетске ай. Кузпалы Валерий пумит ӧвӧл ури-бери выремелы. Отчы-татчы ветлыкумы, пумита но, келя но.

— Нош культура удысэ кызьы вуиды?

Е. Тронина:

— Дышетскемын мон Ижысь педучилищеын. Нырысь ужай Мукшиысь нылпи садын. Но ӝытъёсы весь клубе поталляй, керттӥськеме, вуриськеме ӧз потылы. Таня соку кивалтӥз. Шуэ, мар-о, пе, дырдэ озьы быдтыса улод? Нырысь ӝыны ставкаен ужай, собере воксё клубе кошки.

Т. Кайсина:

— Мон Ижысь гурт хозяйствоя институтысь бухгалтеръёсты-экономистъёсты дасянъя курсъёсын 3 ар ӵоже дышетски. Ас удысэя уж ӧй шедьты но воспитательын 2 арзэ ужай Дэри ёросысь Хохряки гуртын. Собере гуртэ бертӥ, клубын ужаны кутски.

Быгатонлыкъёсмес волятон понна пӧртэм курсъёсы ветлӥськом. Ужмы борды но, ог-огмы борды но гогыосынымы бурмемын ни. Нылы юа, мама, туннэ тон кин луод, Зина-Лиза-а, кырӟась-а? Мон ветлӥсько на кырӟанъя «Зарни дыръёс» ансамбле. Нош «Ури-бери» дуэтмылы вуоно арын октябре 10 ар тырмоз. Адямиос дышемын ни, ми котьку ӵош шуыса. Огнам мыныны шедьтӥсько ке Якшур-Бӧдьяе я кытчы, юало: кытын Лизаед?

— Малпам образъёсты сямъёстэс ӧз воштэ-а?

Т. Кайсина:

— Мон кыӵе пробивной вал, сыӵе ик кыли кадь. Мар ке кулэ луиз, лэсьто. Нош  образъёсмес куддыръя пайдаен кутылӥськом но. Психологъёс верало: кыӵе ке ужпумез быдэстон понна юморез но кутоно. Учкиськом, кинэн но кыӵе югдуре  интыяз луоз серекъян.

Е. Тронина:

— Мон сямыя возьдаськисьгес. Клубын ужаны кутскеме бере но, юморескаос борды басьтӥськеммы бере но керпотысагес ужалляй. Сцена дӥсьтӥсьгес кариз монэ. Собере сомында удмурт кизилиосын тодматскимы ни, соос но туж огшорыесь шуыса адӟиськомы. Со но юрттэ астэ чупресгес возьыны. Парикез, кышетэз куштӥськод ке, милемды уг тодмало ни. Лизае сярысь шуо, сыӵе-таӵе гинэ вал, нош шонерскиз но адями луиз.

— Шуом, сцена вылысен шуак кылъёстэс вунэтӥды?

Е. Тронина:

— Калыкысь кылэм вань: малы, пе, Лиза ялан шуэ, вера, Зина, вера, опеть-а, пе, кылъёссэ вунэтӥз? Милям со озьы малпамын.

Ми кылъёс борды думиськемын ӧвӧл. Импровизация выллем луэ.

Т. Кайсина:

— Одӥг люкетсэ пумаз но пуктыны быгатӥськом, веранъёсамы со уг ик шӧдӥськы.  Калык озьы ик серекъя, чабке. Нош ми понна со тужгес но бадӟым вормон.

Е. Тронина:

— Серекъян куректонэз ворме, тазалыкез юнматэ. Шумпотӥськом, врачъёс ке но ӧвӧл, ми но калыклэсь тазалыксэ умоятыны юрттӥськом шуыса.

Ӟучъёс юало, малы удмурт сямен гинэ вераськиськоды, милям но серекъяммы потэ ук. Ваньмыз серекъяло но, ми но соос сьӧры серекъяськом, нош асьмеос ум валаське, пе. Шуиськомы, берыктыса пуштросэз мукет луэ. Но веранамы њуч кылъёс, фразаос пыртылћськом ик.

Т. Кайсина:

— Асьме кылмы сыӵе чебер! Кызьы ми удмурт сямен тяп-тяп вераськом, ӟуч сямен озьы вераны уг луы. Дышетэ удмурт кылэз!

Лия Малых

Удмурт Дунне
By Удмурт Дунне Январь 23, 2017 13:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<