Пеймытысь югытэ

Удмурт Дунне
By Удмурт Дунне 24 января, 2017 17:08
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Удмуртиысь дано журналист, кылысь кылэ берыктӥсь, удмурт критиклэн но литературоведлэн Алексей Ермолаевлэн кузпалыз но юрттӥсез Нина Ермолаева 3 бадӟым книга поттӥз.

Кыкез потӥзы Алексей Ермолаевлэн нимтулыныз. Но дасяз, люказ соосты Нина Георгиевна. 500-лэсь уно бамъем «Удмурт литература но сое кылдытӥсьёс» книгае пыремын А. Ермолаевлэн трос аръёс ӵоже гожтэм статьяосыз. Соос усьто 1956-тӥ-2006-тӥ аръёсысь удмурт литературалэсь сюрессэ.

— Татын 20-лэсь уно удмурт писательёслэн творчествозы эскеремын, уно произведениослы рецензиос гожтэмын. Книга усьтэ удмурт гожъясьёслэсь портретъёссэс, шуысал мон. Алексей Афанасьевич быгатэ вал писателез, кылбурчиез вӧсь карытэк дунъяны, солэн критикаез уг ултӥя вал адямиез, — шуэ Нина Ермолаева.

Нина Георгиевна верамъя, солы сюлмызлы тужгес но матын кыкетӥ ужез — «Кузебай Герд. Посмертная маска» книга. (12+)

Удмурт югдытӥсьлэн К. Гердлэн чылкыт нимыз берыктэмын вал 1958-тӥ арын. Со дырысен А. Ермолаев ялан гожъяз, утчаськиз, эскериз писательлэсь улон но ужан сюрессэ.

«Кузебай Герд. Посмертная маска» книгае пыремын Гердлэн кылбуръёсыз, веросъёсыз, удмурт калык кырӟанъёс, мадёсъёс но выжыкылъёс. Бичетын К. Гердлэн кибервылыз но адӟиське, солэсь рукописьёссэ А. Ермолаев туспуктыса кельтэм.

Аслаз Нина Ермолаевалэн «К свету вдали» книгаяз (12+) пыремын автобиографической повестез но Удмуртиысь культура но  искусство удысысь тодмо адямиос сярысь веросъёсыз, статьяосыз. Авторез пальпотыса шуэ:

— Гажано лыдӟисьёс, та книгаелэн нырысетӥ бамъёсыныз тодматскыса, мынам гожъяме  кыӵе ке абракадабра потӥз ке, йылпумъянъёс лэсьтыны эн дыртэ, нырысь лыдӟе сое пумозяз.

«К свету вдали» книга зэмзэ но огшоры ӧвӧл. Сое лыдӟиськод кыӵе ке паймымон но осконтэм произведениез сямен. Татын асьме дунне но  мукетыз (валантэмез, кудзэ огшоры адями уг адӟы, уг шӧды) артэ мыно, куддыр полэстӥсько но лыдӟисез мур малпаськонэ уськыто.  Улонысь ӝожез но шумпоттӥсез, югытэз но пеймытэз ватытэк возьматэмын «Два окна», «Простые радости», «Ненужные встречи», «Зеркало прошлого» но мукет главаосын. Усьтӥське Нина Ермолаевалэн зэмос журналист луэмез но. Книга гожтэмын узыр ӟуч кылын. Котькуд чурын шӧдӥське  Нина Георгиевналэн зэмлыкез гажамез, Алексей Ермолаевез яратэмез но удмурт музъемез аслаз каремез.

Галина Семёнова

Удмурт Дунне
By Удмурт Дунне 24 января, 2017 17:08 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<