Николай Кузнецов: «Мон ке ӧй, кин?»

Удмурт Дунне
By Удмурт Дунне Январь 17, 2017 10:32
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Н. Кузнецов юбилей сярысь уг малпаськы.

15-тӥ толшоре 70 арес тырмиз Удмуртиысь кун премилэн лауреатэзлы, Россиысь Писательёслэн огазеяськонзылэн ёзчиезлы Николай Кузнецовлы.

Николай Спиридонович вордскиз Алнаш ёросысь Актэмыр гуртын. Можга педучилищеын дышетскиз, тодон-валанзэ будэтӥз КГБ-я Ф. Дзержинский нимо вылӥ школаын, йылпумъяз на Удмурт кун университетысь кунгожсьӧр кылъёсъя ёзэз. Историк но публицист Н. Кузнецов удмурт, ӟуч, англи но немец кылъёсын вольыт вераське. Со 20 ар ужаз Удмуртиысь  КГБ-ын, удыссэ рос-прос нуиз, подполковник луиз. Но ас калыкезлы Николай Спиридонович трос ӟечсэ лэсьтӥз, удмурт интеллигенцилэсь чылкыт нимзэ но данзэ берыктыса. Репрессия улэ шедем но юнме шорысь янгыше уськытэм ас пал эшъёсмы, Быдӟым оже пыриськем удмурт батыръёсмы сярысь уно документъёсты, наградной листъёсты утчаса-эскерыса, 7 книга поттӥз, тужгес тодмоосыз — «Шимес пеймытысь», «Славы воинской творцы», «Спасители Отечества». Ачиз гинэ тодэ, дыр, кӧня кужымзэ та бадӟым но секыт ужлы сётэ, кӧняетӥ арзэ пуке ини, Москваысь но Подольскысь архивъёсын бугыръяськыса.  Али но Николай Кузнецов уж пӧлын, вордскем нуналзэ паськыт пусъён сярысь уг малпаськы.

— Юбилее сярысь уг малпаськиськы, уже — пумтэм-йылтэм. Озьы ик ортчоз, дыр, вордскем нунал но, — шуэ со. — Кин ке шуоз: 70 арес — со пересьмон ини. Ачим сярысь верано ке, кылем арын тазалыке арлыды сярысь тодам вайытыны выриз ик, но сямыя, шӧдэмея аслым 50 арес кадь йӧтэ. Собере арлыд сярысь малпаськыны дыр ик ӧвӧл. Туэ 9-тӥ Майлы одно ик поттоно выль книга — «Дауръёслы улэпесь удмуртъёс» нимай сое. Та нырысетӥез удмурт кылын сыӵе бичет луоз. Отчы пырозы 1 сюрс 330 удмурт командиръёс но солдатъёс, 1 сюрс 100 фото. 650 бамъем книга 1 сюрс 500 экземплярлэсь ичи медаз луы вал. Сюрсэз мынысал шаерысьтымы библиотекаосы, кылемзэ басьтыны мылкыд карисьёс али ик вань ини. Выль ар азьын гинэ  мон туж тунсыко материалъёс шедьтӥ, Обороная министерстволэн Подольскысь Шор архиваз дас нунал утчаськыса, эшшо 30 удмурт ожгарчиосмы сярысь тодӥ на. Та книгае пырозы 1-тӥ дунневыл, Граждан но Быдӟым оже пыриськем удмурт батыръёс, агай-вынъёс,  соослэн туспуктэмъёссы, подвигъёссы. Удмурт анайёслэсь туспуктэмъёссэс но бичасько, уго соос вордӥзы Быдӟым Вормонэз ваем рядовойёсты но командиръёсты. Туж потэ, удмурт калыке понна лэсьтэм ужелэн емышез мед пӧрмоз шуыса. Кутскем ужез куспетӥ карыны уг яра, собере, мон ке ӧй лэсьты, кин-о сое быдэстоз?

Книга дасян бордын тыршем сяна, публицист но писатель шаермылэн пӧртэм сэрегъёсаз вуэ, патриотизмлы сӥзем урокъёс ортчытъя. Ӟеч сямлы пӧрмиз ини февраль толэзе Атыкай музъемез утисьёслы сӥзем месячник ортчытъяны. Сыӵе пумиськонъёсты Н. Кузнецов  туэ но радъялоз Можга но Алнаш ёросъёсын. Со гинэ мар, 2017-тӥ ар али кутскиз ай, нош юбиляр вуоно арлы планъёс дасяз ини.

— 2018-тӥ ар узыр пӧртэм лыдпусъёсын, кылсярысь, 100 ар тырмоз Горд Армия кылдэм, Удмуртъёслэн нырысетӥ съездзы ортчем но Можга педучилище усьтӥськем дырысен. Соин ик ужъёсы но малпанъёсы лачак. Ачим Можга педучилищеез йылпумъяй бере, отын ужасьёслы ӵектӥ татын дышетскем но ужам адямиослы сӥзем  книга поттыны, — мылкыдзэ усьтэ Николай Спиридонович.

Галина Семёнова

Ми соин данъяськиськом

Милям, Алнаш ёросысь Байтэрек школаысь дышетскисьёслэн  но дышетӥсьёслэн, сюлмысь ӟечкыламмы потэ татын дышетскем эшмес, писателез Николай Кузнецовез.

Трос ужрадъёс ортчытэмын Байтэрек школаын Николай Спиридоновичен ӵош.  Котькуд пумиськон бадӟым пытьы  кельтӥз пиналъёслэн  сюлмазы. Н. Кузнецов паймытэ удмурт кылын вольыт вераськеменыз но туж трос тодэменыз.

Соин пумиськем бере мылкыд бурдъяське, лӧптэ, удмурт калык понна сюлэм шумпотэ. Оскон кылдэ: таӵе визьмо  адямиос удмурт  калыкын  вань бере, анай кыл улоз, пушъёз, шаермы уката данъяськоз.

Нылпиослэн визьмазы кылизы «Шимес пеймытысь» но «Спасители Отечества» книгаосызъя ортчытэм урокъёс.

Николай Спиридонович, ми тӥледын данъяськиськом, ми тӥледыз ӟечкыласьком. Улонды мед луоз майбыр, мылкыдды  — котьку но шулдыр.

Гажаса Байтэрек

школаын ужасьёс.

Утчаськемез юнме ӧвӧл

Удмурт калык данъяськыны быгатэ, солэн сыӵе юн, ас калыкез понна тыршись Николай Кузнецов кадь батыр пиез  вань шуыса!

Берло 10 ар ӵоже гинэ Николай Кузнецов Обороная министерстволэн Подольскысь Шор архивысьтыз ожгарчиосмылэсь ог 10 сюрс наградной листъёссэс ӝутӥз но  подвигъёссэс калыке вуттӥз.

Басьтом одӥг гинэ учырез. Вавож ёрослэн йырызлэн Николай Чайниковлэн анаезлэн Ефим Федотович Коныгин агаез — А. Невский, Горд Кизили но уно ожгар наградаосын пусъем герой. Но нокытын но солэн туспуктэмез ӧвӧл! Ми Николай Чайниковен вань ӵыжы-выжыоссылэсь архив-альбомъёссэс бугыртӥм ке но, Коныгин комбатлэсь туспуктэмзэ нокытысь но ӧм шедьтэ. Нош Николай Спиридонович миым Москваысь Шор партархивысь сое шедьтӥз! Та сяна, эшшо кӧня ке удмурт ожгарчиосмылэн  туспуктэмъёссы сюризы на.

Сюлмысь ӟечкыласько Николай Спиридоновичез юбилееныз! Сӥзисько ӟеч тазалык, шудбур но уно шудо аръёс!

Ува ёросысь шаерчи

Евгений Эжбаев.  

 

 

Удмурт Дунне
By Удмурт Дунне Январь 17, 2017 10:32 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<