Лӧпшо Педунь, Боко но Моко «Эгра» этно-паркын

Удмурт Дунне
By Удмурт Дунне 13 января, 2017 15:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Кылем арня пумын тол паркез сӥё-дано усьтӥзы.

Эгра каргуртын Выль ар азьын «Эгра» этно-парк усьтӥськиз. Отчы ёросысь вань муниципал кылдытэтъёс асьсэ лымы мунёоссэс лэсьтыса кельтӥзы.

Эграысь парк кылдытэмын кылем арын, каргуртлы 400 ар тырмонлы сӥзьыса. Гужем нуналъёсы отын ваньмон дырез шулдыр ортчытыны луэ ке, толалтэзэ мӧзмытгес вал. Туэ шутэтскон интызэс дэмен шулдыртыны малпазы, лымы мунёос питыръяса но вож кыз пуктыса. Ужрадэ пыриськизы ёросысь вань муниципал кылдытэтъёс. Кылсярысь, мужберъёс лэсьтӥзы вуоно арлэсь пуссэ Атасэз, сундуръёс — Лӧпшо Педунез, кабачигуртъёс — лымы погъёсты, сэпъёс — Лымы нылэз но Тол бубаез но мукет.

Кылем арня пумын тол паркез сӥё-дано усьтӥзы. Муниципал кылдытэтъёс асьсэ дорын поттэм вузъёссэс, киын лэсьтэм арбериоссэс вузазы, Сэп но Бачкей гуртъёсысь лыктэмъёс, гуръёссэс вайыса, калыкез пӧсь табанен шумпоттӥзы. Та нуналэ ик Тол бабайёслэн парадзы ортчиз, соос пӧлын вал на Лӧпшо Педунь, Боко но Моко. Та нуналэ ваче пумиськизы туэ но вуоно аръёслэн пусъёссы: Маймыл но Атас. Ужрад йылпумъяськиз фейерверкен.

Кызьы вераз шаертодонъя музейын ужась методист Елена Чиркова, тол шулдыръяськонъёс 7-тӥ январёзь кыстӥськозы. Соку ик шараямын луозы лымы мунё лэсьтӥсьёс пӧлын вормисе потэмъёс.

Валентина Емельянова

Удмурт Дунне
By Удмурт Дунне 13 января, 2017 15:30 Updated