Кызьы теремоке покчиосты тэрытоно?

Удмурт Дунне
By Удмурт Дунне 16 января, 2017 12:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пичи Пурга ёросысь Улӥ Посьтол гуртысь нылпи сад 1966-тӥ арын пуктэмын. Гурт бадӟыма, нылпиос вордӥсько, интылы ёрмон  будэ но будэ, нош сад ялан вужме.

Пичи Пурга ёросысь Улӥ Посьтол гуртысь нылпи сад туала куронъёслы уг тупа ни.

Вуж коръёслэсь пуктэм сад кык группалы чакламын, — вера нылпи садэн кивалтӥсь Александра Чернова. — Куронъёсъя отын али 25 нылпилы инты, нош ми доры ветло 28 нылъёс-пиос. Дорамы дыраз шедьыны быгатӥсьтэмъёсыз но вань — песянайёсынызы 2-3 арен пуконо луо. Малы ке шуоно пинал вайись анайёс гуртын трос, нош сад — резина ӧвӧл, ваньзэсты уд тэрыты.

Зэм, кин ке югдурез вала, кин ке кылэм-адӟем уг кары.  Куд-огез шуэ: бадӟымез пиналы школае выжиз ни бере, садын бушам интые соку ик пичизэ вайыны быгатӥсько.   Вань сыӵеосыз но: пиналзэс садэ ваё но кельто. Черод сярысь тросэзлэн кылэмзы уг поты. Нош татын сое кылдытон понна но кӧня сюлмаськоно луэ на. Дышетонъя но наукая министерство куремъя, Интернетын садлэсь бамзэ  усьтыны кулэ, сое ялан выльдоно. Нош компьютеръёс со понна садлы сётэмын ӧвӧл. Соин ик воспитательёс асьсэ компьютерзэс ваёно луо яке доразы ӝытъёсы ужало.

— Изён интыосмы туж пичиесь, — азьланьтэ веранзэ Александра Чернова. — Валесъёсмы спальняосамы уг тэро, соос но уг тырмо. Таин сэрен нылпиосты ӵем дыръя шудон залын  раскладушкаосын изьтоно луиськомы. Та куронъёсты тӥян луэ бере, тупатӥськыны курыса, предписание но вуиз ни. Но ми мар каром? Группаосмес тӧлатыны ум быгатӥське, малы ке шуоно толалтэлы шуныт медло шуыса, кыкетӥ рама пуктэмен, форточкаосты усьтыны уг луы. Вентиляционной системамы ӧвӧл. Юртмы  пал пыд йылаз кадь сылэ: пристроймылэн фундаментэз одӥг палтӥз воксё куашка ни, пырдыса усе.

Садын тупатъян ужъёс 2004-тӥ арын ортчытэмын. Но югдурез со ӧз умояты. Нылпиослы бызьылон-шудон интызы озьы ик ӧз кылды. Мар веранэз ни спорт площадка сярысь: татын со сярысь уйбырто гинэ. Ярано коть, анай-атайёс, депутатъёс юрттэмен, выльдӥсько азбарысь пулэсь лэсьтэм шудонъёс. Соосын валче ик  туэ гужем пуктӥзы кыкетӥ веранда. Озьы урамын ке но капчиен шокчо нылпиос. Но кырын, уката ик толалтэ, пиналъёсты весь уд возьы!

— Мынам бадӟымез пие, садикысь бертыса, коркатӥмы бызьылэ вал, малы ке шуоно садын трос уд бызьылы, — шуэ 2 нылпиослэн анайзы Мария Соловьёва. — Садын уго отын ик сисько, отын ик шудо, отын ик изё. Эшшо ке пӧртэм аресъем нылпиос одӥг группае ветло.

— Ми асьмеос но лэсь-тӥськисьёслы юрттӥськыны дасесь — буяськыны ке но быгатӥськомы, — шуэ садэн кивалтӥсь. — Ог 40 нылпилы чакласа выль юрт ӝутысалзы ке, соку ваньмы одӥг липет улэ тэрысалмы. Сиён пӧран сэреглы но инты сюрысал.

Нош туннэ сиён но нимаз ӝутэм блокын пӧрало. Со но туж ёркыт, куронъёслы уг тупа. Зэм, Пичи Пурга ёросысь дышетонъя управлениен кивалтӥсь Галина Кириллова верамъя, ӝоген сиён пӧралозы школаын — отын тупатъян ужъёс ортчытэмын. Но школаысен нылпи садозь ог 50 метр люкаськоз. Озьыен, сиёнэз нимысьтыз термосъёсын нуллоно. Таосыз басьтымтэ на. Но соосты но ки вылын уд вормы — дӧдьы утчано.

Галина Кириллова верамъя, Улӥ Посьтол гуртэ выль сад ӝутыны матысь дыре чакламын ӧвӧл. Туннэ черодын пукись нылпиос вань ке но, кин тодэ, кыӵе югдур  азьланяз луоз, пе. Калык гуртысь кошке. Отысь школае дышетӥсе гинэ но лыктӥсь уг сюры. Зэм, школаын али 93 пинал дышетске, чакламын 90-лы.

— Туэ садысь вентиляцизэ умоятыны тыршомы. Трансформер койкаос басьтӥмы, табере раскладушкаосын нылпиос уз изе ни. Югдурзэс ялан син азямы возиськомы, маин быгатӥськомы, юрттӥськомы, — шуэ Галина Кириллова.

Нялтас вераса, нылпи садэ интыослы ёрмо на ёросысь Пичи Пургалан но Миндэр гуртын.

Анна Чернова  

Удмурт Дунне
By Удмурт Дунне 16 января, 2017 12:10