Кужмысь вунэтытон… Калык кылызлэсь ачиз уг куштӥськы

Удмурт Дунне
By Удмурт Дунне 31 января, 2017 10:54
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Пумиськон бере њуч пиналъёс но удмурт кыл но культура сярысь юалляськыны кутскизы.

Удмурт кылосбуръя, финно-угроведениея но журналистикая институтысь дышетӥсьёс потазы Дэбес ёросысь пиналъёс доры. Вераськон мынӥз калык культуралэн туала улонын интыез сярысь.

Дуннеын

Дэбесысь школае люкаськизы ёрос центрысь, Сюрногуртысь, Тыловайысь, Зар-Медлоысь 10-тӥ-11-тӥ классъёсын дышетскись пиналъёс но соослэн дышетӥсьёссы. Соос азьын вераськизы удмурт тодосчиос: кылосбур наукаосъя кандидатъёс Галина Николаевна Шушакова, Александр Григорьевич Шкляев, кылосбур наукаосъя доктор Татьяна Ивановна Зайцева. Удмурт кыл, культура сярысь вераськон сямен Удмурт кун университетысь дышетӥсьёс пиналъёсты матысьгес тодматӥзы Удмурт кылосбуръя, финноугроведениея, журналистикая институтэн, фин-угор дуннеен, нош студентъёс — институтын  тунсыко улонэнызы.

Глобализация, калыкъёслэн сураськемзы, кылъёслэн ышемзы… Туала улонэз та тодметъёстэк син азе пуктыны ик уг луы ни. Но со вакытэ ик, кызьы шуо тодосчиос, туала улон ӧвӧл вашкала калык культуратэк но. Историлэн сюресысьтыз но адӟиськом: одӥг кивалтӥсез воштэ мукетыз, одӥг система интые вуэ мукетыз. Но чутрак воштӥськон вакытъёсы калык тодаз вае аслэсьтыз выжыоссэ. Кызьы вера Татьяна Зайцева, та вакытэ литература но берытске калык мадёсъёс, фольклор пала. Этнофутуризм юнме шорысь ӧз кылды ук.

Озьыен, котькӧня мудронъяськы, но улон возьматэ: туала вакыт калык культуратэк шоканы уг быгаты. Азьвыл сям-йылолъёсты утизы ке быдэс гуртын, али соос золгес возисько семьяын. Со сяна, маин ми тунсыко луиськом быдэс дуннелы? Валамон, удмурт луэменымы.

Школаын

Таӵе семинаръёсын ӝутӥсько дышетӥсьёсты висьытӥсь юанъёс но: удмурт кылъя программаос ӧвӧл, пичи удмурт школаос ворсасько, учебникъёс уг тырмо.

— Совето Союзын социализм луоз, ваньзы одӥг кылын вераськозы шуыса, 60-тӥ-70-тӥ аръёсы кутскизы национальной школаосты ворсалляны. Али оптимизация мынэ вузъёсын но. Валамон, нырысь ик, со зол шӧдӥське выжы калыкъёслэн факультетъёссы вылын. Таӵе вакытэ милемлы кызьы ке но улоно-вылоно, азинсконо, — вера Т. Зайцева.

Али ёросын оглом 9 школа, 4-яз гинэ пиналъёс 11-тӥ классозь дышетско. Озьы одӥг классэ сюро удмурт кылын умой вераськисьёсыз но, пичияк валасьёсыз но, чылкак тодӥсьтэмъёсыз но. Нош дышетӥсьёслы выль йыр висён: кыӵе программая со сураськем классъёсты дышетоно.

— Классъёсын вань пиналъёс ӟучомемын ӧвӧл ук. Озьы ке но, роно косэмъя 5-тӥ, 6-тӥ, 7-тӥ классъёсты «Ӟеч-а, бур-а, удмурт кыл» учебникъя дышетӥськом. Со удмурт кылэн тодматэ гинэ, — вера Сюрногурт школаысь удмурт кылъя но литературая дышетӥсь Елена Вениаминовна Юферева. — Нош макем умой результатъёс пиналъёс возьматъязы «Анай кыл» программая, отын текстъёс но умоесь, кылэз сяна, культура, шаертодон пумысен тодон-валанъёс сётэ, но со учебник 8-тӥ классозь сяна вуттэмын ӧвӧл! Соя дышетыны но уг лэзё ни. Али 8-тӥ, 9-тӥ классъёсын удмурт кылын вераськись нылпиослы кадь урокъёсты нуиськом, отын результатэз но вань на, олимпиадаосы но ветлӥськом. Нош отӥяз ӧвӧл ни. Котьмар мед шуозы, али 5-тӥ классэз басьтӥ ке, урокъёсты традиционной амалэн нуо.

Кызьы вера Дэбес школаысь удмурт кылъя дышетӥсь Галина Азарьевна Образцова, пиналъёсты кужмысь ӟучомытӥськом. Удмурт кылын умой вераськись пиналъёс интыязы сыло, нош тодӥсьтэмъёсыз кылэн тодматско гинэ. Тае валаса, дышетӥсьёс ас сяменызы программа лэсьто ни.

— Мордваос, комиос, бигеръёс, кинлэн шаеразы кык кун кылзы, ваньзы дышето выжы калыксылэсь кылзэ, Удмуртиын гинэ уг. Но мон малпасько: ми но со сюрес вылэ каллен потом. Калык кылызлэсь ачиз уг куштӥськы, — вера Александр Шкляев.

Вотэсын

Школаысь зымем потэ зэмос улонэ. Зэмзэ ке, пыроно вотэсэ, уго егитъёс али  отын «уло», соос гожъясько уно янгышъёсын, ӟучо-удмурто. Валамон, таӵе югдур удмуртаз гинэ ӧвӧл, ӟуч культураын но шӧдӥське. Кылем дауре ни тодмо ӟуч тодосчи Дмитрий Лихачёв юнме шорысь кыллэн чылкытлыкез сярысь вераськон ӧз ӝутылы ук. Кыл, инкуазь кадь ик, кырсёме, сое утёно, шуиз со.

— 1930-тӥ арын удмурт писательёслэн нырысетӥ съездазы вуылӥз Венгриысь тодмо писатель Мате Залка, — вера Александр Шкляев. — Ӧтчам пумын со удмурт писательёс азе потэ но шуэ: «Гажано удмурт писательёс, мон вераськи тӥледын, кылзӥськи тӥледыз. Но валай, асьтэ удмурт кылдэс урод тодӥськоды шуыса».

Тодэ лыкто кылосбур наукаосъя докторлэн Василий Ванюшевлэн кылъёсыз. Егит кылбурчилэн Богдан Анфиногеновлэн «Айшет будущего» кылбур бичетэныз тодматскон ӝытын со вераз: «Сураса-пожаса гожъяськон, удмурт кылын вераськон куспы ӟуч, англи кылъёс пыртон маскаръяськонлы пӧрме». Богдан Анфиногенов таӵе амалэн юромо, кылъёсын шудон понна, гожъяське ке, тросэз егитъёс — юромо уг, мукет сямен соослэн уг пӧрмы ни. Тае ӟеч шӧдыны луэ блогъёсысь гожъямъёсъя. Кылсярысь, лыдӟиськод: «Тани, улӥськод, эшъёс, ваньмыз до омерзения укыр правильно но кыӵе ке идеализированно» яке «поэт вала обречённой улонзэ».

— Студентъёслэсь юаськод ке, кыӵе калыкъёс уло Россиын, троссэ уг быгато вераны, — азинтэ Александр Григорьевич. — Соку тодэ вайиськод Дагестанысь калык кылбурчилэсь Расул Гамзатовлэсь кылъёссэ: «Мон яратӥсько инбамысь шундыез — со ӟуч культура, но мыным луысал мӧзмыт, инбамын ӧй луысалзы ке кизилиос — со Россиысь выжы калыкъёс».

Мария Векшина

Удмурт Дунне
By Удмурт Дунне 31 января, 2017 10:54 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<