Крестьянлы кулэ эрик. Мултан восстанилы — 110 ар

Удмурт Дунне
By Удмурт Дунне Январь 30, 2017 11:16

Ува ёросысь Мултан черкогуртын  ортчиз бадӟым ужрад. Со сӥземын вал Мултанысь крестьянъёслэн восстанизы ортчем дырысен 110 ар тырмонлы.

Та лыдпуслы сӥзем ёрос конференциез усьтӥз Новомултанское гурт поселенилэн кивалтӥсез Л. Бушкова. Людмила Аркадьевна люкаськемъёсты вакчияк тодматӥз черкогуртлэн ортчем сюресэныз, та музъем вылысь потэм дано адямиосын.

Ува ёросысь Мултан черкогуртын утиськемын волостной правленилэн юртэз. Али отчы интыяськемын эштослэн контораез.

Мултан школаын дыше-тӥсь Олег Евгеньевич Дмитриев тупен-тупен мадиз, кызьы 1906-тӥ арын волостной правление азьын бугыръяськизы крестьянъёс. Удмурт кылъя дышетӥсь Людмила Александровна Агаева вераз, кыӵе инты басьтэ Мултан восстание удмурт литератураын. Вавожысь дун-чылкыт Николайлы сӥзем храмысь Александр баӵко Михаил Елабужский протоиерейлэсь улон-вылонзэ эскериз. Баӵко верамъя, уноез черкын ужасьёс соку дурбасьтӥзы крестьянъёслы.

Архивъёсын бугыръяськыса, Мултан восстание но Михаил Елабужский протоиерей сярысь уно материал люкам история наукаосъя кандидат Николай Пислегин. Солэсь выступленизэ конференцие лыктэмъёс туж сак кылзћзы.

Озьы ми 110 ар талэсь азьло Мултанын ортчем вакытъёсы берытскимы кадь.

1905-тӥ-1907-тӥ аръёсы Нырысетӥ ӟуч революцилэн тулкымъёсыз ортчизы быдэс Россиетӥ, палэнэ ӧз кыле пыдлось гуртъёс но. Вятской губерниысь Малмыж уездысь полицие иворъёс вуылыны ӧдъязы, Выль Мултан, Узи, Сьќлта волостьёсы пырись гуртъёстӥ тодмотэм егит мурт ветлэ но властьёслы пумит вераське, калыкез выт тыронлы, армие мынонлы пумитъяськыны ӧте шуыса. Агитатор вылэм 17 аресъем Давид Рапопорт (зэмос нимтулыз — Василий Иванович Иванов). Со вакытэ  ик калыкез бугыръяллям П. Кондорский, А. Шубина, З. Бабушкина (Капачинских), Е. Боброва, С. Данилов дышетӥсьёс но мукетъёсыз. Соослэн квартираосазы возиське вылэм властьлы пумит литература но.

Крестьянъёс туж гажаллям Д. Рапопортэз. Чумой гуртын сходка ортчыку, стражникъёс сое кутыны выро вылэм, но калык агитаторез ватыны быгатэм. Лушкем люкаськонъёс ортчыло вылэм Итчигуртысь К. Повышев вуриськись дорын но.

1906-тӥ арын чиновникъёс но полицейскойёс укыргес сьӧраз ортчыны ӧдъяллям. Гуртысь воргоронэз виемзы но Д. Рапопортэз арестовать каремзы бере калыклэн чиданэз пӧсьтэм. Куарусён толэзе волостной правление котыре уно адямиос люкаськиллям. Крестьянъёслэн киязы изъёс, зыръёс, мукет кивалтос. Дӥсьтӥсьёсызгес пыриллям правление, исправниклэн (уездысь полициен кивалтӥсь) юрттӥсез Ярмолович доры. Солы таӵе курон пуктӥллям: Рапопортэз мозмытыны но 1905-тӥ арын 17-тӥ октябре гожтэм манифестэз шара лыдӟыны. Писарьлэн юрттӥсез документэз лыдӟем. Калык эшшо но бугырскем: малы, пе, полиция та документэз санэ уг басьты, малы соос, мар мылзы потэ, сое лэсьто. Манифестын «свобода слова», «свобода собраний» гожтэмын ук. Со куспын правленилэн укноосаз изъёс лобӟизы. Уно аръёсын зӥбем калык вань йыркурзэ исправник, полиция вылэ лэзиз. Уката ик крестьянъёс вожомизы, куке Ярмолович ыбиз Чумой гуртысь удмурт воргоронэз Пётр Агеевез. Ярмоловичез пыд йылысьтыз погыртӥзы но ӵыжазы. Мукетъёсызлы но калыкез сантэмаса возисьёслы  пегӟыны ӧз кылды.

Кӧня ке нунал ӵоже кыстӥськиз на та бугыръяськон. Кыкнапаласен ик вал уно сӧсырмемъёс но быремъёс. Мултанысь бунт сярысь ивор вуиз Петербурге. Сое пачкатон понна черкогуртэ лэземын вал карательной отряд. Киосазы пыӵалъёсын, сабляосын Мултанэ вуиллям 50 стражникъёс. Со сяна, ӝутскем калыкез зӥбыны Вяткаысь но Казаньысь полицейскойёсты но солдатъёсты ӧтиллям на. 11-тӥ куарусёнэ вань калык гурт кенеше люкаськемын вылэм. Сьӧрлось вуэм полицейскойёс, трос вераськытэк, люкаськем калык вылэ омырскиллям. Троссэ жугиллям, 280 муртэ ӝегатӥллям, кылемъёсыз нюлэскы ватскиллям, мукет гуртъёсы пегӟиллям. Коркась корка ветлыса, полицейскойёс унозэ арестовать кариллям на.

Мултан восстаниея следствие кык ар пала кыстӥсь-киз. Суд бере 10 арлы каторгае келямын вал П. Капачинских, П. Трефилов, И. Пермяков, С. Красильников, А. Повышев. Дор палазы берытскизы ваньзы, Андрей Повышев сянаез. Мукетъёсыз но потӥзы пытсэт пыр. Та учыр ортчем дырысен 110 ар луиз ни, но Мултан котырын улӥсьёс уг вунэто бугырес аръёсты.

Конференциез радъясьёс куноослы бадӟым экскурсия ортчытӥзы. Ёрослэн дано адямиез В. Ситников мадиз «Выль Мултанлы 300 ар» памятник кылдытэмез сярысь.

Ужрадэ пыриськемъёс волостной правленилэн юртэз азе но дугдылӥзы, Мултан восстаниын быремъёсты-сӧсырмемъёсты буре вайыса, огшап шып сылӥзы. Озьы ик Мултанысь школае кожазы, отысь шаертодонъя музеен тодматскизы.

Сергей Антонов

Туспуктӥз Сергей Антонов

Удмурт Дунне
By Удмурт Дунне Январь 30, 2017 11:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<