Кӧня тӥ, Атасъёс, Петухъёс?

Удмурт Дунне
By Удмурт Дунне 12 января, 2017 16:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

 

Можга ёросысь Атасгуртэ сюрес.

Китай гороскопъя 2017-тӥ ар — Атаслэн арез. «Удмурт дуннеос» котькуд Выль ар азьын вуылыны тыршо пӧйшурлэсь нимзэ нуллӥсь гуртъёсы. Та рад сюресъёсмы — атасгуртъёсы.

2008-тӥ арын потэм «Удмурт-ӟуч кыллюкаме» шедемын Атас, Петух нимъёсын 5 гуртъёс: Балезино, Шаркан, Можга, Дэри ёросъёсын. Кыӵеесь соос?

Тае тодон вылысь журналистъёсмы дышем сямзыя потазы сюрес вылэ. Пумиськылӥзы калыкен, тодӥзы, кыӵе мылкыдын уло-выло соос. Жаляса верано, огаз но Атасгуртын туннэ ӧвӧл школа, нылпи сад, клуб, фельдшер-акушер пункт… Пӧлысьтызы тужгес бадӟымез — Можга ёросын. Отын 150 пала улӥсез лыдъяське. Ог 100 пала адямиез Дэри ёросысь Петухын. Оскон туж бадӟым, кыкез но та гуртъёс азинскозы шуыса. Кылсярысь, Дэри ёросысяз егитъёс мыло-кыдо кыльыны кутскемын. Отын вань нылпи садэ но школае ветлӥсь пиналъёс — соосты Выль Казмаскае нуэ-вае школа автобус. Матысь аръёсы гуртоос жин-жин выль юртъёс пуктыны кулэ, юртъеръёс улэ музъем люкылыны чакламын.

Балезино ёросысь Атасгуртын ас вакытаз 4 кузь ульчазы, школазы, магазинзы, фермаоссы вылэм. Гуртоос ваньзы сямен ужаллям колхозын. Нош туннэ отын кылемын на «Правда» хозяйстволэн пудо возён лагерез гинэ. Ваньмыз куашканы кутскем кылем дауре выльдӥськон вакытэ. 1976-тӥ арын та гуртысь школа юртэз Киршонкие выжтӥллям но колхоз правленилы сётӥллям. Отӥяз гуртоос но сьӧрло кошкыны кутскиллям. Та вакытэ гуртын 1 кузь ульчаез, 13 коркан 30 пала улӥсез кылемын. Колхозын тыршисьёссы 4 кузя, нош кылемез вахта амалэн палэнэ ужаны ветло.

Шаркан ёросын Петух но Атас нимо гуртъёс вылӥллям. Но нырысетӥяз 1 гинэ улӥсез на, кыкетӥез бырем.

Гуртъёсты котыръякумы, калык тодаз вае, отын но, татын но вуоно арлэн кузёезлэсь — Атаслэсь — нимзэ нуллӥсь гуртъёс вал шуыса. Но туннэ соос быремын. Оло, лыдӟисьёсмы пӧлын вань со гуртъёсын вордскемъёс, быдэ вуэмъёс — тодэ ваёнъёссэс шумпотыса кылзысалмы-гожтысалмы. Оло, огъя кужымен чотаны быгатом, кӧня вылэм соос, угось та лыдпусэз туннэ карта вылысь но, словарьёсысь но шедьтыны уг луы ни. Ма, «улэп» Атасгуртъёсын улӥсьёс но гуртсылэн улон-вылонэныз герӟаськем тунсыко учыръёссэс мед гожтозы! Атаслэн арез быдэс ар кыстӥськоз на!

Элина Васильева

Удмурт Дунне
By Удмурт Дунне 12 января, 2017 16:20 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<