Инкуазез утён арлы сӥзем конкурсэ вуэм ужъёс

Удмурт Дунне
By Удмурт Дунне Январь 18, 2017 15:00

Инкуазез утён арлы сӥзем конкурсын вормиз Пичи Пурга ёросысь Настя Городилова («Бумагаме гуртам вайисько»). Со гужем шутэтскоз «Шундыкар» лагерьын.

Ваньмыз ик нылпиос, кинъёслэн ужъёссы печатласькизы газет бамъёсын, пусъемын луозы таукаронъёсын но синпель кузьымъёсын. Ужъёс пырозы «Удмурт дунне» газетлэн электрон книгаяз. Юанъёсын вазиськоно 8-951-195-37-65 телефонъя. Нош татын сётӥськом конкурсэ вуэм ужъёсты.

Адями уз быгат инкуазьтэк!

Мыным туж кельшо удмурт поэтлэн Ф. Васильевлэн кылбурысьтыз таӵе чуръёс: «Инкуазь улоз адямитэк, нош адями уз быгат инкуазьтэк». Быдэсак соин соглаш. Ми, адямиос, ӵемысь ум эскериське асьмемыз, маке шедем кариськом инкуазен.

Выль ар азьын макем жаль пото пинал вож кызъёс. Тросэз адямиос одно ик ваёзы соосты гуртазы. Кораны лэзись бумагаостэк! Луэ ук магазинысь искусственной кыз басьтыны, со трос аръёслы тырмоз. Нош коркан ческыт зын мед луоз шуыса, 1-2 вай пыртыны луысал. Ми озьы ик кариськомы дорамы.

Туэ милям Люм черкогуртамы пиналъёслы шутэтскон лагерь ужаз. Одӥгаз нуналэ ёросысьтымы ик Симашур гуртэ  интыяськем лесничествое ӧтьылӥзы векчи кызъёс котыртӥ уриськыны. Берло со кызъёсты мукет интыосы мерттыны, пе, нуозы. Куазь сайкыт вал. Трос чидан кулэ вылэм таӵе ужен вырыны. Али мон валасько, кыӵе секыт та уж, кӧня мурт тырше,  писпуос зӧкесь (бадӟымесь) мед луозы шуыса. Нош кораны, быдтыны соосты кема ӧвӧл. Школаысьтымы кыкез нылъёсмы быдэс гужем Симашурысь лесничествое уриськыны ветлӥзы. Ужам коньдонэнызы школае мынон котыр асьсэлы басьтыны быгатӥзы. Асьсэлы но юрттӥзы, инкуазьлы но пайда вайизы.

Озьы ик арлы быдэ классэнымы ветлӥськом походэ. Тодӥськом, ас котырмес ми дун (чылкыт) кельтыны кулэ шуыса. Котьку но бӧрсямы калскыса кошкиськомы. Ваньмыз жуг-жагзэс кытчы шедем куязы ке, музъеммы бадӟым свалкалы  пӧрмоз ук!

Арлы быдэ тыршиськом корка котырамы писпуос мерттыны. Шулдыр мед луоз!

Валерия Перевощикова,       

Глазов ёросысь Дондыкар школаысь

8-тӥ классын дышетскись

Пичи йыртэмась

Митя но Ваня туж ярато чорыганы. Тани туннэ  но соос шур дуре вамыштӥзы.

— Кыӵе чебер татын, о-о, Ваня! — шуэ Митя. — Яратӥсько мон бакча берысьтымы бадьпуос шоры учкыны.

— Шонер, асьмелэн кадь шулдыр инты нокытын но ӧвӧл, дыр, — вазиз Ваня.

Шуак тарс! карем кылӥсь-киз куакъёс пӧлысь. Пиос кӧня ке куалектӥзы ке но,  каллен гинэ вамыштӥзы куара пала. Нош отын вить аресъем Геня бадьпу вайёсты тӥя.

— Тон мар дауртӥськод, Гени? — юаз Митя.

— Шудӥсько, — йӧн-йӧн вазиз пичильток.

— Нош марлы вайёсты тӥяськод? Киыд лыдэ-а, мар-а? — юаз Ваня.

— Нош маин мон собере шудом? Мынам шудонъёсы ӧвӧл, — вазиз пияш.

— Гени, тон тодӥськод-а, бадьпулы вӧсь кариськод шуыса? Бадьпуос но асьмеос кадь ик улэпесь ук, — валэктоно кариськиз Митя.

— Эн пӧяськы. Улэпесь ке луысалзы, соос ветлысалзы, вераськысалзы, сиемзы но потысал.

Ӵапак со вакыт бадьпу вылысь Генилэн ки вылаз ву шапык усиз.

— Тӥни адӟиськод-а, бадьпу бӧрдэ, — шуиз Митя.

— Мон уг тодӥськы вал. Вӧсь луыкум, мынам но синкылие потэ. Вождэ эн потты, бадьпу, мон ноку но тонэ вӧсь уг кары, мукет писпуосты но, — Гени бадьпуэз киыныз маялтӥз.

Ӵапак соку тӧл пельтӥз но, бадьпуос вайёсынызы каллен гинэ ӵашетыны кутскизы. Гени шумпотыса вазиз:

— Соос монэным озьы верасько, вожзы уг поты! О-о ведь?

Митяен Ваня ог-огзы шоры учкизы но «о-о» шуизы.

— Ойдо ми сьӧры чорыганы мыном, — ӧтизы сое пиос.

— Чорыгъёс но улэпесь ук!

— Ми соосты берен шуре лэзиськом, эн сюлмаськы, — вазиз Митя.

— Милемлы но соос жаль пото, нош чорыгаммы потэ, — валэктӥз Ваня.

Куинь пиос капчи мылкыдын вамыштӥзы азьлань.

Юлия Петрова,

Пичи Пурга ёросысь  Баграш-Бигра школаысь

 5-тӥ классын дышетскись

Пичи Пурга ёросысь Баграш-Бигра школаысь «Пурга кизилиос» центрысь
«Зарни шыкыс» факультативе ветлӥсь нылпиослэн ужъёссы,
кивалтӥсьсы Надежда Городилова

Йыртэмасьёс

 

Одӥг гужем нуналэ Витя эшъёсыныз но дышетӥсенызы ӵош, шулдыр кырӟаса но маскаръяськыса, нюлэскы мынӥзы. Тани вуизы соос нюлэс дурысь возь вылэ. Отчы ик интыяськоно кариськизы. Дышетӥсьсы Ирина Ивановна пиналъёсты возь вылын будӥсь сяськаосын, турын-куаръёсын тодматон куспын шаян пиоссы, Витя но Никита, эшъёссылэсь палэнскыса, тылскизы. Йыртэмамзэс адӟиз Яна. Соос доры матэктыса, юаз:

— Кызьы табере сое кысом? Асьмелэн вумы но трос ӧвӧл.

Никита паймиз:

— Марлы сое кысыны кулэ? Тӧласькыны кутскоз но, тӧл ик сое кысоз.

Витя но, ас палазы дурбасьтыса, шуиз:

— Уд тодӥськы шат, тӧл тылэз отчы-татчы выретоз но кысоз.

— Юнме тӥ озьы малпаськоды. Тӧл потоз но тылэз турын но писпуос вылэ вӧлмытоз. Ваньмыз ӝуалоз, сяськаё возь но, шулдыр нюлэс но! Тӥ соосты уд яратӥське-а?

Пиос серекъямысь дуг-дӥзы.

— Яратӥськом.  Милям тылскем вамен тэтчаммы потэ вал, кызьы киноосын возьмато, — янгышсэ валаса выллем шуиз Витя.

— Татын ошмес бызе. Ойдолэ отысь ву басьтом но тылскемез кысом, — вазиз нылаш.

Пиос пумит ӧз луэ, зунь гинэ Яна сьӧры мынӥзы.

— Дугдэ ай, — шуак берытскиз Яна, — Ирина Ивановнаез ӧтёно, мед тылскемез эскероз.

—  Мон татын, Яна. Ваньзэ адӟи но кылӥ. Кыӵе тон ӟечок. Зэмзэ но, пиос, тыл  — со шудон ӧвӧл. Я, мынэ бызе ошмес дуре, ву ваелэ, — шуиз Ирина Ивановна.

Катя Иванова,  5-тӥ классын дышетскись

Зарнипог но Кырсёкарын улӥсьёс

 

Улӥллям-вылӥллям одӥг пичи Кырсёкарын чылкытлыкез валасьтэм адямиос. Кырсёкар пичи гинэ, но жуг-жагез отын туж трос вылэм. Отысь кемалась кошкиллям пудо-животъёс, лобӟиллям тылобурдоос. Комакъёс ги-нэ но пегӟиллям. Кырсёкар сярысь ивор быдэс дуннее вӧлмем. Зарнипог нимо пияш огпол малпам та каре вуылыны. Солэн туж тодэмез потэм, кызьы меда уло отын. Кырсёкаре вуыса, Зарнипог копак паймиз.

— Кызьы улӥськоды тӥ та кырсьын?! Кельше-а, мар-а тӥледлы?

— Уг, но кин ваньзэ татысь утялтоз? — вазиллям пияшлы карын улӥсьёс.

— Асьтэос. Тӥ ук татын улӥськоды, тӥ ик кулэ котырдэс чылкыт возьыны. Возьмаса улоно ӧвӧл, дорады нокин но уз лыкты утялскыны.

— Нош мар кулэ милемлы карыны?

— Нырысь ик асьтэос мисьтӥське, чылкыт дӥсь дӥсялэ, корка котырдэс утялтэ, собере — ульчаостэс. Вань жуг-жагез одӥг интые люкаса, ӧтёно жаг нуллӥсь машинаез.  Бадӟым уж нуоно луоз висись писпуосты эмъян понна. Соос та кырсеныды сэрен туж зол висьыны кутскиллям. Нюлэсъёстэс, возьёстэс чылкытатӥды, улӟытӥды ке, пӧйшуръёс, нымы-кибыос, тылобурдоос выльысь берытскозы. Адӟиськоды, кӧня тӥляд ужды!

Кырсёкарын улӥсьёс кыл-зӥськизы пияшлэсь. Ӟеч уж лэсьтэмзы понна Зарнипог соослы тау шуиз но лобӟыса кошкиз. Берло гинэ адямиос валазы: соос доры ветлӥз инкуазьлэн пиез.

 Аня Баграшова, 7-тӥ классын дышетскись

Бумагаме гуртам вайисько

Пичи дырысеным мон туж яратӥсько пыласькыны.

Тыметамы вуэз азьло чылкыт вал, ярдураз шутэтскыны кельшылӥз. Нош али котырак буш пияла но пластик бутылкаос костасько, вуын оломар но уя. Ми жомбылляськиськом, вӧзтӥмы бутылка яке полиэтилен пакет уяса кошко. Ву пыдсысь пилиськем бутылкаос но консерва банкаос борды ми, пиналъёс, пыдъёсмес вандӥськом. Пыласькыны мынӥськом ке, мынам атае ву пыдсысь  со арбериосты потта но, пуйые тырыса, машинаяз понэ, озьы ик ярдурез утялтӥськом интыяськеммылэсь азьло. Гуртысьтымы жуг-жаген ӵош ваньзэ сое пуйые понӥськом. Толэзьлы одӥг пол гуртэтӥмы ортче ЖКХ-ысь утялтӥськисьёслэн машиназы, жаген тырмытэм пакетъёсты ми отчы поттӥськомы.

Монэ но сузэрме пичи дырысенымы ик анаен-атай дышето чылкытлыклы, канфет бумагамес гинэ но ми котьку, кисыямы поныса, гуртэ вайиськом. Азьло бумагаосты гурын сутӥськом вал, али со кесямын, соин ваньзэ нап-ӵуж пакетэ тыриськом. Одӥг пол юай, дуно-а усе со пуйыосты басьян? Толэзьлы, пе, 4-5 шоро-куспо пуйы кошке, нош бадӟымез — 2-3. Шоро-куспо пуйы сылэ 25 манет, озьыен, 100-125 манет тыр усе, нош бадӟымез — 50 манетэн, 100-150 манет тыр луэ.  Дуно уг усьы ке но, адямиос коньдонзэс жаляло улон котырзэс чылкыт возён понна.

Милям школа котырмы котьку чылкыт улэ. Дышетскон ар куспын 2 пол утялскиськом: сӥзьыл но тулыс. Трос ӧвӧл ке но, жуг-жаг люкаське ик вылэм. Малпаськомы, школа котырмы чылкыт мед луоз, дышетӥсьёсмы но талы дышето.

Мынам туж потэ: будӥ ке, нылпиосы чылкыт омырен мед шокалозы, кышкатэк тыметэ уяны мед ветлозы. Ваньмы огинэ кариськыса гинэ, инкуазьмы, улон котырмы чылкыт луозы.

 

Настя Городилова, 7-тӥ классын дышетскись

Кытын ву — отын улон

Кызьы дунне колёса берга, озьы ик ву но одӥг интыяз уг сылы. Тани мон, Варӟи шур, вордски туж шыпыт, ышыг интыын, нюлэсъёс сьӧрын. Пичи гинэ ошмес синмысь пӧзьыса потӥсько но каллен гинэ визыласько нюкъёстӥ, ӝужыт шашы турын пӧлтӥ. Мон борды итӥсько мукет пичи ошмесъёс. Соос мыным юртто кужмогес но паськытгес луыны. Трос кузя котькыӵе шуг-секытъёсты капчиен вормоно. Нош соос милям визылан сюрес выламы ой, ой, кӧня!

Тани азям потэ Кузьымгурт. Вашкала удмуртъёс, туж малпаськыса, татчы интыяськиллям. Огпал ярдурам ӝужыт гурезьёслэн бамалъёссы, сикъёс борддор кадь сыло. Мукет палаз писпуосын но сяськаосын пушйись гурт. Кузьымгурт пичи ик ӧвӧл, калыкез но трос. Гужем куазен мон гуртлэн сюлэмыз кадь луисько. Ӵукна ик, га-гак! кря! карыса, монэн ӟечъясько бурдоос. Собере бызё нылпиос. Кӧня шумпотон кузьмасько мон ерпечкаослы! Отӥяз калленэн кыстӥсько егитъёс но мӧйыос. Ужаса жадем но пӧсям мугорзэс юзмато вуосам. Но таин гинэ уже уг быры. Кӧня дӥськут миськыны юрттӥсько. Мон чик уг жадиськы, шумпотӥсько гинэ, огнын мӧзмыт луысалыз, дыр.

Ӝытъёсы но ярдуръёсам чалмыт уг луылы. Кузь визнанъёссэс кутыса, та вакытэ ял карыны пото пиосъёс, мон адямиослэн сюдӥсьсы но луисько уго. Чорыгъёсы  оломар быдӟаесь, дуноесь  ӧвӧл ке но, чорыген лым кылдэ ньылымон пӧрме, шур кузя лӧсъяське ческыт зын.

Но чебере, узырлыке бӧрдонозь но вуттэ. Ярдур котырам шутэтскись калык бӧрсяз жуг-жаг кельтэ. Ваньмыз со ваське юзмыт вуосам. Шур пыдсын костасько пияла пырыос, консерва банкаос, ву вылын уяло пластик посудаос. Котырысьтым писпуосты но кораса быдто ини. Кызьы адямиослы валэктоно, озьы соос асьсэлы алама лэсьто шуыса? Оло, куасьми ке, соку валалозы?

Настя Титова,  

Алнаш ёросысь  Чем-Куюк школаысь

5-тӥ классын дышетскись

Удмурт Дунне
By Удмурт Дунне Январь 18, 2017 15:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<