Гурт адями-2017: Сьӧлта ёросысь Зямай гуртысь ужбергатӥсь Эдуард Крестьянинов

Удмурт Дунне
By Удмурт Дунне Январь 29, 2017 14:40

Лякыт сямыз, зарни киосыз понна гуртоосыз тау каро Сьӧлта ёросысь Зямай гуртысь адӟем карымон воргоронлы Эдуард Крестьяниновлы. Мар пумысен гинэ солы эн вазиськы, котьку юрттоз.

Сьӧлта ёросысь Зямай гуртысь Э. Крестьянинов.

Крестьяниновъёслэн семьязы, кӧня асме тодӥсько, туж ужась вал. Татчы соос артысь гуртысь — Квашурысь — лыктӥзы, котьку азбар тыр пудозы вал, кыштыр гинэ ужазы. Эдуардлэн песятаез, Пётр Сергеевич, Быдӟым ожез сапёр луыса ортчиз, ожысь ветеран вал. Оже ветлэменыз дан ӧз поттылы, секыт улон-вылонэзлы ӧз ӝожтӥськылы, каллен ас ужзэ лэсьтылӥз. Эдуардлэн атаез Николай Петрович но анаез Антонида Фроловна гурт удысын адӟем карымон ужасьёс вал, тыршемзы трос данъян грамотаосын пусъемын.

Ачиз Эдуард Николаевич Ижысь гурт удысъя академиез йылпумъяз, шудзэ палэнын утчаса ӧз ветлы — анай-атаезлэн юртазы берыктӥськиз. Нырысь Выль Мӧнья гуртысь йӧл поттон цехе ужаны кутскиз вал. Берло сое Сьӧлталась нюлэс хозяйстволы кивалтӥсе пуктӥзы. Но Эдуардлы кивалтон мылкыдызъя ӧз луы — аслэсьтыз ужзэ мытоно кариськиз. Озьы Зямай гуртаз пилорама усьтӥз.

Ужез пӧрмыны кутскиз, нялтас Сьӧлталан семьяезлы (соку кышнояськиз вал ини) корка ӝутыны ӧдъяз. Ми, зямайёс, пулы со дырысен ӧм ёрмылэ. Гуртамы газ ӧвӧл бере, путэк улэммы уг луы угось. Эдуард милемлы пичиятэм дунын, куд-ог дыръя воксё но дунтэк горбыль висъялляз. Но жаляса верано, ужъёсыз берло дыре гуньдӥзы — тэль висъямысь дугдӥзы. Но воргорон ӧз ыштӥськы. Анай-атаезлэсь музъем пайёссэс басьтыса, ю-нянь будэтон борды басьтӥськиз. Колхозмы бырем бере гурт котырысь музъемъёс пашмыны кутскизы вал ини.

Али Эдуард Николаевич Сьӧлталан улэ ке но, нуналмысь Зямайын — мумы-бубыосызлы пудо котырын юрттэ. Угось атаезлэн берло дыре тазалыкез  зол лябӟиз. Гуртоослы но юрттӥськыны вуттэ. Кӧня ке ар талэсь азьло Зямайын Гуртмылэсь нуналзэ пусйимы. Ас кужмынымы лэсьтӥмы шутэтскон сэрег, талы пулъёс сётӥз Эдуард Крестьянинов. Зэм, мар гинэ карыны уд куры, ноку «уг» шуэмзэ кылэме ӧвӧл. Бакчаез гыроно, усыяно, пулъёс вандоно шу гинэ, трос пол куремез уз возьма — лэсьтоз. Нош туэ солы луыса тылобурдо кырӟанэн тырмиз быдэс гуртмы. Со анай-атай юртаз шырчик уморто лэсьтӥз. Ужезлы вань гуртоос синмаськизы, асьсэлы но лэсьтыны куризы. Озьы табере котькуд юртын — ог 14 семьяын — бурдоослы коркаос шуккемын. Шырчик чипсэм улсын сайкаськом. Сюлэм шумпотэ.

Эдуард — трос нылпиё атай, Ирина кузпалыныз 3 пиоссэс будэто. Бадӟымез 6-тӥ классын дышетске, атаезлы юрттӥське ни. Шоретӥез пиналзы 4-тӥ классын, крезьгуръя школае ветлэ. Эктэмзэ ёрос сцена вылысен адӟыны луэ ни. 2 арес гинэ ай покчиезлы пизылы.

Гуртоос понна сюлмаськемзэ адӟыса, дэмламмы потэ Эдуард Крестьяниновез «Гурт адями» конкурслэн «Ӟеч сюлэм» номинацияз.

Людмила Столбова

Удмурт Дунне
By Удмурт Дунне Январь 29, 2017 14:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<