Азинлык ачиз уг лыкты

Удмурт Дунне
By Удмурт Дунне Январь 30, 2017 14:43

Кун Думаысь депутат Валерий Бузилов.

Выль  ар азьын, кысык дыр шоры учкытэк, редакциямы коллективен пумиськыны вуылӥз Кун Думаысь депутат Валерий Бузилов. Дэмен вераськонмы чай юон сямен ӧръяськиз.

Валерий Викторович БУЗИЛОВ. Вордӥськемын 1953-тӥ арын 26-тӥ сентябре Камбаркаын. Дышетскиз Ижысь механикая институтын. Ужаз Ижысь механикая заводын, Ульяновскысь авиакомплексын — мастер, инженер, прораб, участоклэн начальникез вал. 1980-тӥ аръёсы пыриськиз Ливиын газопровод лэсьтонэ, 1991-тӥ арысен выжиз ужбергатонэ,  кивалтӥз пичи предприятиен, собере  «АСПЭК» огазеяськонлэн вице-президентэз луиз, со бӧрсьы кӧня ке пол валтылӥз та огазеяськонлэн директоръёсызлэсь кенешсэс,  2010-тӥ-2013-тӥ аръёсы «Башнефть-Регион» огазеяськонлэн генеральной директорез (Ижевск), 2013-тӥ арысен Кун Кенешысь Экономикаын политикая, промышленностья но инвестициосъя ялан ужась комиссилэн кивалтӥсез вал.

Бырйиськылӥз Кун Кенешлэн кыкетӥ, куинетӥ, ньылетӥ, витетӥ ӧтчамъёсаз депутатэ. 2016-тӥ арын  18-тӥ сентябре 34 номеро Ижевск округъя Россиысь Кун Думае депутатэ быръемын.

Пусъемын Россия Федерациысь Федерал Собранилэн Федерация Кенешезлэн Данъян грамотаеныз, Удмурт Элькунлэн Данъян грамотаеныз, Кун Кенешлэн Данъян грамотаеныз, Россиысь Энергетикая министерстволэн Данъян грамотаеныз, «Россилэн парламентэз» гадьпусэн, «Удмурт Элькунысь дано нефтяник» нимын.

Редакциын пумиськон.

— Валерий Викторович, кытысь тӥляд ужбергатӥсь сямды? Тодӥськоды на-а, кызьы поттӥды нырысетӥ манеттэс?

— Мынам сыӵе сямы али но ӧвӧл кадь потэ. Ноку но ӧй уйиськылы уксё сьӧры. Тыршылӥ тросгес ужаны — соиз зэм. Али, валамон, мон шоры учко бизнесмен-политик шоры сямен, но вал вакытъёс, куке огшоры инженерын заводын тырши, 4 ар Ливиын ужай. Малы отчы кошки? Малпай вал, уксё поттыса, квартира басьтыны, угось со вакытлы мон кышнояськемын ни вал. Отын кузпалэным огъяулонниын улӥм, ваньмыз вылын шыръям, уксёмес  вкладэ тырим. Нош бертэммы бӧрсьы со тырмиз кышноелы ӟичы изьылы гинэ! Заводысь квартира мыным озьы ик ӧз сётэ, кӧня ке арзэ анай-атаеным ӵош улӥм. Соку ӵап укшаз перестройка, со мынэсьтым улонме чутрак воштӥз. Шонергес ке, мыным улонам ӟеч эшъёсын удалтӥз.

Тросэз азинлыко предпринимательёс шуо, бизнесэз эшъёсын лэсьтыны уг яра, вазь-а, бер-а, сыӵе кусыпъёс, пе, одно эчешонозь вутто, тушмон каро. Но мыным удалтӥз студент дырысь  эшеным Виктор Хорошавцевен. Со ик валтӥз монэ бизнесэ.

Мон ӧй шуысал, бизнесэз кыӵе ке одӥг гинэ сям (шуом, коньдон лыдъяны яке кинэ ке оскытыны, пӧяны быгатон) валтэ шуыса, мон понна нырысь интыын — ӵош ужась эшъёсыдлы оскиськон но соослэсь осконзэс быдэстон — астэ жалятэк суткаен ужаны дась луон. Собере — ас кужымдэ шонер мертаны быгатон — реалист луон. Кулэ ӧвӧл гогыедлэсь вылэ тэтчаны. Мон, кылсярысь, кыӵе ке проектэз кутскон азьын ноку но кӧня пайда поттонзэ уг тодӥськы, кызьы пӧрме — пӧрме. Ыштонъёс ке уд адӟиськы, ярам ни, нош табыш ке потэ — умой, но сое кужмысь пызьыртыны уг выриськы. Мыным, меӵак вераса, коньдон поттэмлэсь золгес яра сое сётъяны. Тодӥсько на, 1990-тӥ аръёсы, бизнес ӝужаны ӧдъяку, туж вӧлмемын вал тренингъёс. Эшъёс ӵектэмъя мон но отчы мынӥ. Лекция бере бизнес-тренер уж сётэ: та интыысь потатэк ик, вакчи дыр ӵоже эшъёстылэсь коньдонзэс портэ, собере лыдъялом, кин кӧня люкалоз. Мон одӥг манет но ӧй люка… Со понна кыкетӥ заданиез ваньмызлэсь ӝог быдэстӥ — та рад аслэсьтыд коньдондэ люкылоно вал, тазэ ужез мон котькинлэсь ӝог быдэстӥ, кӧня кисыям вал, ваньзэ  сётъяй. Но тужгес тунсыко вал куинетӥ уж — ваньмызлэсь  люкам коньдонэз (кин  сю манет сётӥз, дыр, кин  сюрс) кыӵе ке уже пононо. Котькудӥзлэн аслаз малпанэз: кин ке ваньзэ берыктыны куре, кин ке  ӝӧк пуктыны, кин ке кыӵе ке школаын ремонт лэсьтыны…

Куасчи

— Нош тӥ?

— Мон кемалась малпаськисько ни вал одӥг ӧлексы нылашлы юрттӥськон сярысь — солы кулэ вал дуно операция. Уг валаськы, кызьы мон соку люкаськемъёсты оскытыны быгатӥ, но мынам ӵектонэлы данакез дурбасьтӥзы — кенешемын вал люкам коньдонэз висись нылмуртлы сётыны. Со бурмиз, иське, ми шонер лэсьтӥм.

—  Со дырысен кутске, озьыен, тӥляд благотворительностен выронды?

— Мынам со сярысь вераськеме уг поты. Лэсьтэм ужен ушъяськоно ке, со благотворительность ӧвӧл ни. Ӟеч уж шыпыт лэсьтӥськыны кулэ.

— Но тӥ зэмзэ но юрттӥськоды — «АСПЭК» черкъёс пуктэ, нылпи юртъёслы юрттэ.

— Озьы луыны кулэ — быгатӥсез мед сётоз. Мон — Инмарлы оскись адями. Тунсыкъяськисько православилэн историеныз, культураеныз. Туж яратӥсько монастырьёсты учкыны, кунгож сьӧрысь но, Россиысь но троссэ котыръяй ни. Ӵем вуылӥсько Афонэ. Алигес ас поннам усьтӥ  Свердловск улосысь Верхнетурьеез… Сылӥськод отын но  куэныд шӧдӥськод, кызьы мугорад, сюлмад кужым пыӵа. Нялтас вераса, 18-тӥ сентябре тросэз юазы: кытын ортчытӥды Кун Думае быръён уез? Черкын. Отын мон аслым валэктон утчасько — шонер-а  вамыш лэсьтӥсько, тырмоз-а кужыме осконэз быдэстыны. Удалтӥз бере, озьыен, бадӟым быръёнъёсы пыриськыса, шонер лэсьтӥ. Мыным кемалась ӵектылӥзы Кун Дума сярысь малпаськыны, но ялан киыным шонтылӥ — малы со мыным кулэ, мынам сотэк но ваньмыз умой, но  бадӟым кивалтӥсьёсын вераськеме бере валай: быгатӥськод ке, аслыд сяна, мукетъёслы но пайда вайыны, иське, тыршоно соос понна но.

Ужбергатӥсь.

— Кызьы интыяськиды выль ужады, дышиды ни-а Москвалы? Нялтас вераса, тросэзлэн собере отысь берытскемзы уг поты ни, тћляд та  пумысен кыӵе  малпанъёсты?

— Ой, таиз мон сярысь ӧвӧл — мон бурмемын Удмуртия  борды. Москва — со огдырлы, мон понна со ужан инты гинэ. Думаысь депутатъёс толэзяз  3 арня Москваын ужало, 1 арня — Удмуртиын, бырйисьёссы пӧлын. Трос аръёс ӵоже элькунысьтымы Кун Кенешлэн депутатэз вал бере, Дума монэ уг  кышкаты — оглом ужан укыр уг висъяськы: законопроектъёсын но мукет документъёсын тодматскон, соосты эскеронэ пыриськон, дурбасьтон яке палэнтон, бырйисьёслэн наказъёсынызы ужан. Но Кун Думаысь депутат понна тужгес валтӥсез — аслад улосад тросгес коньдон кыскыны тыршон, Правительствоын кусыпъёс тупатон. Монэ юнматӥзы  бюджетъя комитетэ, та удыс мыным озьы ик  туж матын, но валамон, отын мон али вужерын ай. Адӟиськоды ук телевизор пыр, макем куд-огез выро асьсэды возьматон понна: кулэ-а, ӧвӧл-а, котькытчы вутскыны, эфире сюрыны тыршо. Ӵошатоно ке, Ижын, конечно, мыным лякыт вал — ваньмыз аслад,  ваньмыз тодмо, нош отын микрофон дорозь вуон но — аспӧртэм вормон ни.

Служебной квартира  ӧз на сётэ (вуж депутатъёслэн шуныт карзэс нокызьы кельтэмзы уг поты), соин ик мукетыныз депутатэн Алексей Загребинэн гостиницаын улӥськом на. Со Кун Думалэсь кыдёке интыяськемын ӧвӧл, соин уже но пыдын ветлӥськом, туж кельше озьы юмшаны, мынон сямен оломар сярысь но вераськыны. Алексей Егорович мон понна — чылкак выль адями, но берло аръёс ӵоже — зэмос  шедьтос. Мон сое дугдылытэк кылзысал, дыр, малы ке шуоно со аспӧртэм ошмес кадь: котькуд нунал кыӵе ке выль тодон-валан сётэ.

Велосипедист.

— Тӥ  бадӟым политикаын трос аръёс ни, мар шуысалды Алексей Егоровичлэн кылем сӥзьыл быръёнъёсын вормемез пумысен? Угось со узыр ужбергатӥсез но, солэсь визьмо  политтехнологъёссэ но  шудыса кадь ортчиз…

— Асьме калык ноку ӧз яратылы  узыръёсты. Озьы ке но выльдӥськыны турттон вакытъёсы власте  соос тросэн шедизы, яке, отчы шедьыса, узырмизы, шуод-а, угось чик ӧвӧлтэмлэсь таосыз коть маке сётозы, малпаз огшоры калык. Но со оскон ӧз быдэсмы — одӥг киын сётыса, кык киын кыскизы.  Берло быръёнъёсын но Москваысь дуно политтехнологъёс малпазы, вылды, провинциын улӥсьёс али но номыре уг валало — кӧня ке манет понна  куаразэс вузалозы. Но асьме калык  визьтэм ӧвӧл, коньдон, оло, басьтӥзы но (зэм, мон созэ ас синмыным ӧй адӟы бере, меӵак озьы шуыны уг дӥсьтӥськы), нош куаразэс зэмлыкен дунъязы — сое визьмо адями понна сётӥзы.

— Кызьы лыдъяськоды, кыӵе  законъёс асьмелы уг тырмо на?

— Оглом учконо ке — ваньмыз вань кадь. Монэ сюлмаськытэ выт бичан. Со ужпумен ик быръёнъёсы но мынӥ вал. Улосъёсысь данакез вытъёс кошко Москвае, собере ми ик кураськыса улоно луиськом. Валамон,  асьмеос — одӥг кун, маин ке возёно армиез, мукетсэ — государстволэн трос расходъёсыз, но  вытъёслэсь  табышсэс шори ке но карысалзы ке, Удмуртия  ёрмонысь потысал. Кун Думаысь, Федерация Кенешысь вань депутатъёс талы дурбасьто, нош Россиысь Правительство — уг. Но созыв ӵоже ми та юанэз ялан ӝутъялом, оло, маке пӧрмоз.

Чорыгась.

— Политикае сюро шаплы, асьсэды возьматыны яратӥсь адямиос, нош тӥ воксё сыӵелы уд кельшиське, трос вераськыны уд яратӥське… Тросэз визьмо кивалтӥсьёс но шуо: сыӵе ужын тужгес секытэз — трос калыко интыосын вераськон.  Дышето-а  депутатъёсты талы?

— Бен, вань пӧртэм курсъёс. Куд-огез ноку политикаен выремын ӧвӧл, кызьы соос валалозы, кызьы закон кылдытъяно, бырйисьёсын ужано. Вераськыны быгатонлык сярысь ке, шонер — со зэмзэ но капчи ӧвӧл, ай, вылаз ик, куддыр верамез мыдланьтӥсьёс шедё. Тужгес но — журналистъёс. Верамысьтыд ӝынызэ кушто, ӝынызэ асьсэлэсь ватсало но, мын но валэкты на, тон озьы ӧд шуы вал шуыса. Оратор луон — со сыџе ик талант, Инмарен сётэм быгатонлык. Ваньмыз Жириновскийёс луыса уг вордӥсько. Но мон лыдъясько, ӟеч ужаны, пайда лэсьтыны луэ, трос вераськытэк но.

— Валерий Викторович, телевизор пыр берло дыре ӵем возьматъяло мажоръёсты — узыр анай-атайёслэсь голям нылпиоссэс. Кызьы учкиськоды тӥ  соос шоры, кызьы будэтӥды асьтэлэсь нылдэс?

— Ноку ӧй валалля гольтыръяськонэз, коньдонэн дан поттонэз, вылаз ик, со узырлык аслад киосыныд, визьмыныд дуремын ӧвӧл ке. Мон сютэм ӧй буды, но тодӥсько, анаелэн-атаелэн вал луонлыксы одӥг пизэс нуныяны, но та ласянь соос чурытэсь вал. Шонер, лыдъясько. Али мыным тросэз уг оско, но мон нырысетӥ машинаме — «Запорожецез» — ачим уксё люкаса, басьтӥ. Собере вал «Москвич», озьы пумен-пумен ӟечез вылэ выжи. Мон солэсь уг возьдаськиськы, шумпотӥсько, анае-атае тыршыны дышетӥзы шуыса.

Аслам нылы вордӥськы-ку, улон-вылон шӧдскымон майбыргес вал, мон ӟеч уксё поттылӥ ни, со вожъяськыса ӧз буды, конечно, но ми сое ноку ӧм эркиялэ. Аслаз визьмыныз дышетскиз, вань мукет егит специалистъёс музэн, нырысь пичи уждунэн пичи должностьын ужаз — Росреестрын регистратор вал. Али нотариусын ужа — йӧно инты, но уж нокытын но ас кожаз уг лэсьтӥськы.  Чик ӧй юртты шуэме уг луы, но нылмы аслэсьтыз улонзэ ачиз лэсьтэ. Кузпалы но ужа. Ужатэк но ӧй ёрмысал, дыр, но мон лыдъямъя, котькуд адямилэн аслаз ужез, аслаз тунсыкъёсыз луыны кулэ, сотэк со ассэ пумен ыштоз.

— Валерий Викторович, тодӥськом, тӥляд улонады  бадӟым инты басьтэ спорт.

— Шонергес, дыр, физкультура шуыны. Но спортэн вырыны пичи дырысен кельшылӥз. Туж потэ вал футболист луэме, командае но ӧтчазы, но атае чурыт кылзэ вераз, инженере дышетскыны косӥз. Кылзӥськытэк ӧйлась. Но спортлэсь ӧй палэнскы, институтын дышетскыкум, 6 ар велосипедэн ворттылӥ,  спортъя мастере кандидатозь будӥ. Со дырысен велосипед вылысь уг васькаськы, шуыны луоз — кык питран вылын дуннеез но котыръясько, нуналаз 100 иськемозь ортчыны быгатӥсько. Толалтэ гурезь куасъёсын нискыласько. Мугорез нуналмысь кыдатытэк уг луы — улонын сомында  тунсыкоез,  ку  ваньзэ адӟыса-лэсьтыса вуттод.

— Верало, «Нечкино»  спорт базаез лэсьтыны  малпанды кылдэм ГАИ-ын ужасьлы луыса…

— Озьы шуыны луоз. Куддыр уд тоды, кытысь  тунсыко малпан чилектоз. Эшъёсыным куасэн нискыланы весь сьӧрло ветлӥськом вал. Одӥг пол бертӥськом Татарстанысь  бадӟым джипен, машинаямы — куасъёс. Постын дугдытӥзы. Кытчы-мар ветлӥды, юалляське инспектор. Озьы но озьы, горнолыжной курортысь бертћськом. Таӵе дуно машинаен ветлӥськоды, пе, нош ас дорады  база пуктэмды уг луы-а яке Удмуртиын гурезьёс ӧвӧл-а? Тӥни соку ик шуи: одно лэсьтоно!

— Тӥ котыр ласянь  сыӵе удалтэм адями — улонады котьмар пӧрме, котьмарды  вань. Кыӵе ке быдэсмымтэ малпанъёсты вань на-а?

— Вань. Дорам туж узыр библиотекае — ӟуч но кунгожсьӧр классика. Весь лыдӟиськеме потыса улӥсько, но ноку дыр уг тырмы. Собере, песятай луэме потэ. Тазалык ке луиз, мон шедьто, мар ужаны, дасо аръёс ортчыса но.

Зинаида Рябинина

Удмурт Дунне
By Удмурт Дунне Январь 30, 2017 14:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<