Адӟом на-а пичи Удмуртиез бадӟым киноысь?

Удмурт Дунне
By Удмурт Дунне Январь 17, 2017 12:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Йӧскалык библиотека, Кинолэн арезлы йылпумъян лэсьтыса, ортчытӥз «Киноосты удмурт кылэ берыктон: ортчем но азьлань сюрес» котырес ӝӧк.

Котырес ӝӧк сьӧры люкаськизы пӧртэм вакытъёсысь адямиос. Со ӟуч киноосты удмурт кылэ дублировать карон бордын ужамъёс: режиссёр В. Ушаков, звукорежиссёр В. Михайлов, Удмурт театрысь артистъёс П. Романов, Г. Бекманов, писатель С. Карпов, Удмурт кун университетысь «Берыктон луд» клубысь егит берыктӥсьёс, егит сценарист Дарали Лели.

Кызьы шаерамы азинскыны кутскиз но бырон калэ вуиз кино удыс? Ку вал Ижын нырысетӥ кино возьматон? Кытысь шедьтыны луоз кылем даурысь 80-тӥ-90-тӥ аръёсы удмурт кылэ берыктылэм тодмо киноосты? Ортчем ар Россиын кинолы сӥземын вал бере, Йӧскалык библиотекае, пе, та юанъёсын вазиськылэмысь ӧз дугдылэ. Кызьы вера библиотекалэн кивалтӥсезлэн воштӥсез А. Семёнова, тросэзлы юанъёслы соос пыр-поч валэктон сётыны ӧз быгатэ. Уго кинолэн азинскемез историе кылемын ӧвӧл. Кылсярысь, газет-журналъёсысь бугыръяськыса, тодмо луиз, нырысетӥ кино возьматонъёс Ижын 1910-тӥ аръёсы вал шуыса. Но кин тодэ, оло, азьвылгес но возьматъязы? Соин ик киноисториез библиотекалы выльысен гожтоно луиз. Кылем ар ӵоже Йӧскалык библиотека нуиз «Пичи Удмуртия бадӟым киноын» блогзэ. Отын гожъяз тодмо киноос, актёръёс сярысь, кудъёсыз герӟаськемын асьме шаерен. Та проектэныз со Россиысь библиотекаос куспын 3-тӥ инты басьтӥз.

Даур воштӥське, но темаос кылё. Нырысетӥ «Соперницы» но берпуметӥ «Пузкар» киноосты огазея яратон.

Котырес ӝӧк сьӧры люкаськизы пӧртэм вакытъёсысь адямиос. Со ӟуч киноосты удмурт кылэ дублировать карон бордын ужамъёс: режиссёр В. Ушаков, звукорежиссёр В. Михайлов, Удмурт театрысь артистъёс П. Романов, Г. Бекманов, писатель С. Карпов, Удмурт кун университетысь «Берыктон луд» клубысь егит берыктӥсьёс, егит сценарист Дарали Лели. Валаськиз: макем трос удмурт киноос лэсьтэмын, макем трос ӟуч киноос удмурт кылэ берыктылэмын вылэм кылем даурысь 80-тӥ-90-тӥ аръёсы.

— Огыр-бугыр вакыт вал, — вераз П. Романов. — Нуназе репетициос вискын мынӥськод студие дублировать карон бордын ужаны, ӝытазе — спектакль возьматыны, 10 часын ӝыт — нош ик студие. Араз 15-20 киноосты берыктылӥськом вал, 25 ар куспын та лыдпус ог 350 пала вуэ, дыр.

— Нош кытын али со дублировать карем фильмъёс? — кылӥськиз залысь юан.

— Жаг куянын, дыр! — вера киномеханик В. Михайлов. — Плёнкаосты гурт клубъёстӥ возьматъяса нулло вал ук, нош сое уно пол бергаткод ке, плёнка ярантэм луэ.

«Соперницы» (1929-тӥ ар) киноысь суред.

Азьветлӥсь А. Шкляев шуиз: плёнкаос луизы ке, луысалзы Казаньын, уго шаерысьтымы дублировать каронъя студия со борды юнматэмын вал. Но мон жингыръяй отчы 2-3 ар талэсь азьло, шуизы: вань архивъёсты Удмуртие келямы, утчалэ дорысьтыды. Кызьы оскытӥзы Йӧскалык библиотекаын ужасьёс, со кинофильмъёсты утчан борды соос пыр-поч басьтӥськозы.

— Жаляса верано, 1990-тӥ аръёсы Госкино куашканы кутскиз, удмуртъёс, башкиръёс кадь, валаса но ӧз вуттэ,  асьсэлэсь телестудизэс кылдытоно шуыса. Али, кылсярысь, Башкириысь телестудия анай кылын лэсьтэм сериалъёсыныз паймытъя, — азинтэ В. Ушаков.

Татарстанын но сериалъёсты, киноосты дублировать карон студия ужа ни 1998-тӥ арысен. Кызьы вера «Дубль видео» студилэн кивалтӥсез А. Яраш, бигер кылын мынӥсь дуннелы тодмо сериалъёсты  телевизор пыр адӟыса, тросэз адямиос бигер кылэз дышетыны кутско, калык культура борды кыстӥсько.

Дублировать карем киноос сяна, шаерамы сериалъёс но, чеберлыко киноос но уно лэсьтылэмын вал. 1990-тӥ аръёсы, «Удмуртия»  ГТРК кылдэм бере, телевизор пыр возьматъяны кутскизы телеспектакльёс, писательёслэн юбилейзылы быдэ кылдылӥзы документальной киноос, удмурт произведениосъя художественной киноос. Озьыен, «Соперницы» (1929-тӥ ар), «Тень Алангасара» (1995-тӥ ар) но «Инвис» кинопоттоннилэн туала киноосыз («Узы-боры» но «Пузкар») сяна, вал на «Италмас»,  «Сюреслэн пумыз ӧвӧл», «Дышетӥсь», «Гын сапегъёс», «Сэрег» но мукет киноос. Жаляса верано, соосты али калыке поттыны уг луы, «Удмуртия» ГТРК-лэн архивез коньдонтэк, пе, уг усьтӥськы.

Туала вакытэ удмурт кылэ дублировать карон бордын ужа Удмурт кун университетысь студентъёслэн «Берыктон луд» студизы — берло 10 ар ӵоже удмурт учкись доры вуизы швед, фин, эстон, немец киноос. Туэ вакчи кино, крезьгуро видеосуредъёс сниматьтон бордын ужазы «Шунды» огазеяськонысь егитъёс, «Инвис» кинопоттонниысь егитъёс ветлӥзы Эстониысь Циистре гуртын радъяськем лагере — отын вакчи кино лэсьтӥзы. Кызьы вераз егит сценарист Дарали Лели, асьмелэн ӧвӧл сценаристъёсмы, операторъёсмы, режиссёръёсмы, куараен ужасьёсмы, нош специалистъёсты палэнысь кутӥськод ке, соослэн уксётэк ужамзы уг поты.

Мария Векшина

Удмурт Дунне
By Удмурт Дунне Январь 17, 2017 12:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<