60 арлы — 60 концерт

Удмурт Дунне
By Удмурт Дунне 31 января, 2017 14:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«П. Чайковскийлэн дор палъёсаз»  60-тӥез фестиваль улсын шаерамы ортчоз 60 ужрад. Концертъёс сётозы тодмо артистъёс Денис Мацуев, Мария Пахарь, Игорь Бутманлэн оркестрез но трос мукетъёсыз.

«П. Чайковскийлэн дор палъёсаз» фестивале Россиысь тодмо артистъёс шумпотыса пырисько. Соосты кыске тодмо композиторлэн нимыз.

Кыӵе гинэ дыръёс ӧй вал, «П. Чайковскийлэн дор палъёсаз» фестиваль одӥг аре но ортчытэк ӧз кыльы. Искусствотэк калык улыны уг быгаты. 60-тӥ араз фестиваль паськыта — туэ со крезьгур дуннеез гинэ уз ӟыгырты, операез, кинопоэзиез, литератураез но. Со сяна, музейёсын ортчозы П. Чайковскийлы но оглом фестивальлы сӥзем адӟытонъёс.

Фестиваль усьтӥськоз Воткинскын 11-тӥ южтолэзе Д. Мацуевлэн концертэныз. Йылпумъяськоз П. Чайковскийлэн вордӥськем нуналаз — 7-тӥ куартолэзе. Кызьы вера Удмурт филармонилэн кивалтӥсез Алексей Фомин, фестивалез йылпумъяны луонлык сётӥське Россиысь Е. Светланов нимо симфонической оркестрлы но Дмитрий Хворостовский кырӟасьлы.

— Туэ фестивале тросгес егитъёсты кыскыны турттӥськом,  — вера Алексей Фомин. — Концертлы быдэ 100-120 дунтэк билет сётэмын луоз ёросъёсысь но городъёсысь крезьгуро школаослы, усто дышетскисьёс ас синмынызы адӟозы Россиысь тодмо артистъёсты. Со сяна, Россиысь но дуннеысь консерваториосын, театръёсын, оркестръёсын туж трос тодмо артистъёс ужало, кудъёсыз вордӥськизы но будӥзы шаерамы. Фестиваль дыръя соос ас дӥнязы концерт сётозы.

«П. Чайковскийлэн дор палъёсаз» фестивале Россиысь тодмо артистъёс шумпотыса пырисько. Соосты кыске тодмо композиторлэн нимыз. Кызьы вера Воткинскысь П. Чайковскийлэн музеезлэн директорез Татьяна Неганова, соосты дугдытэ одӥгез: уг тодо, кытын интыяськемын Воткинск но кызьы отчы вуоно. Шумпотымон, туэ фестиваль улсын Воткинске люкаське крезьгурез дышетон удысын шуг-секытъёсты эскеронъя 6-тӥез калыккуспо научной сессия. Нырысетӥосыз радъяськизы Москваын, Пермьын, Нижний Новгородын, Екатеринбургын но Курскын.

— Сессия нуналъёсы ортчоз Филипп Копачевскийлэн но Удмуртиысь хор капеллалэн концертсы, — вера Татьяна Неганова. — Дано тодосчиос, профессоръёс, крезьгурчиос шумпото, шаерысьтымы капеллаез кылозы шуыса. Озьы ик ми соос понна лэсьтом удмурт нунал, мед тодматскозы удмурт культураен но шаеренымы. Сессилэн темаез — крезьгурчиослэн пичи дырзы. Ӵапак интыяз — уго азьланяз Воткинскын П. Чайковскийлэн егит дырезлы сӥзем тросгес ужрадъёс ортчытъяны малпаськом.

Воткинскын но Ижын сяна, концертъёс луозы Сарапулын, Ярын но мукет ёрос центръёсын. Та дырлы билетъёс вузаны кутскемын ни. Дунзыя, валамон, соос пӧртэмесь. Д. Мацуевез кылзӥськон понна, кылсярысь, кисыысь поттыны кулэ луоз 1 сюрсысен 5 сюрс манетозь, нош Филипп Копачевскийлэн но Удмуртиысь хор капеллалэн концертазы — 250-ысен 1 сюрс 500 манетозь.

Вераны кулэ, Игорь Бутманлэн оркестрезлэсь шудэмзэ адӟыны луоз Ижысь шор площадьысь экранъёс вылысь но, нош фестивальлэсь берпуметӥ концертсэ — Воткинскын экранъёс вылын.

Мария Векшина

Удмурт Дунне
By Удмурт Дунне 31 января, 2017 14:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<