Ӝутскозы выль клубъёс

Удмурт Дунне
By Удмурт Дунне Январь 31, 2017 12:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Таяз арняе Удмуртилэн Тӧроез Александр Соловьев но шаерысьтымы лулчеберетъя но туризмъя министр Владимир Соловьёв пумиськылӥзы Россиысь культурая министрен Владимир Мединскиен.

Владимир Соловьёв оскытӥз, туэ клубъёсты тупатъяны-выльдыны федерал бюджетысь 31 миллион манет висъямын. Таӵеез, пе, ӧй вал на.

Ужпумъёс трос, валтӥсьёсыз пӧлын: Егит учкисьлы театр пуктон, гуртъёсысь культурая юртъёсты но «Ижмаш» заводлэсь башнязэ тупатъян-выльдон.

Культура удысын ужасьёс сюлэм висёнзэс кемалась верало ни: клубъёсмы вужмо, микрофонъёс, динамикъёс тӥясько, нош коньдон со понна бюджетысь уг висъяськы. Концертъёс возьматъяса, трос уксё уд потты. Куд-ог гуртъёсын, кылсярысь, Дэри ёросысь Юськиын, клубзы ик ӧвӧл, школаысь спортзалын ӟеч концерт пуктод-а?

Владимир Соловьёв оскытӥз, югдур умойлы воштӥськоз шуыса. Туэ клубъёсты тупатъяны-выльдыны федерал бюджетысь 31 миллион манет висъямын. Таӵеез, пе, ӧй вал на.

— Программа 3 арлы чакламын, — вера Владимир Соловьёв. — Та дыр куспын ми тыршом вань ёросъёсысь клубъёсты тупатъяны-выльдыны, отчы выль аппаратура басьтыны. Со сяна, вуоно арын (туэ берегес кылим) ми уже кутом гуртъёсы клубъёс пуктонъя кун программаез. Та ар куспын учком-чаклалом, кыӵе гуртъёсын клуб пуктоно — валамон, со понна ми ёросъёслэсь ужамзэс лыдэ басьтом. Озьы ик кулэ на вуоно арлы шаерлэн бюджетаз воштонъёс пыртыны, уго федерал коньдон вӧзы одно  асьмелэсьсэ но ватсано на.

Культурая юртъёс сяна, шаерамы трос мукет юртъёс но тупатъямез возьмаса сыло. Кылсярысь, Йӧскалык библиотека но «Ижмаш» заводлэн башняез. Вуоно арын Йӧскалык библиотека кылдэм дырысен 100 ар тырме. Та лыдпусэз библиотекарьёс выль юртын пусйыны дасясько вал ни, но, жаляса верано, уз пӧрмы. Кылдӥз ке, лыдӟисьёс библиотекалэсь ӧсъёссэ усьтозы 2020-тӥ арын гинэ. «Ижмаш» заводлэсь башнязэ тупатыны бюджетын коньдон ӧвӧл, вераз Россиысь культурая министр Владимир Мединский, утчалэ, пе, инвесторъёсты. Озьы ке но асьме кивалтӥсьёс оско на, оло, М. Калашниковлэн вордскем дырысеныз 100 ар тырмонлы сӥзем программа бордын ужаку, та малпан палэнэ уз кыльы.

Со сяна, тунсыко проектэн лыдъямын шаерамы егит учкисьлэсь театрзэ усьтон. Но Владимир Мединский куриз сое кӧня ке воштыны, кылсярысь, зал мед ярасалыз, пе, кино но, концертъёс но возьматъяны. Озьыен, матысь дыре Егит учкисьлэсь театрзэ пуктонъя проектэ воштонъёс пыртэмын луозы.

Мария Векшина

Удмурт Дунне
By Удмурт Дунне Январь 31, 2017 12:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<