Выль арлы кырӟанъёс

Related Articles

• Пиосмылы — ӟечкылан кылъёс! 0 24.Фев
• Сьӧлта ёросысь Куашур: Йыбыртты музъемлы. Удмурт классикае сюрем колхоз оске выльысь улӟонлы 0 19.Янв
• Гурт шудонъёс-2017: Инты но дыр 0 01.Мар

Кылъёсыз но крезьгурез Юлия Кузьминалэн

Эктыса музъем вылэ
Выль лымы усе.
Пумиталом ӝытазе
Выль арез туннэ.

Припев:

Лыкты, лыкты ми доры,
Тӧдьы тушо Тол бабай.
Кырӟа, экты милемын,
Лымылэсь чебер апай.

Чеберъям кыз котырын
Котькинлы шулдыр.
Уг ни кышкаты гондыр —
Эшъяськем татын.

Припев.

Анайёс но атайёс,
Султэ вӧзамы.
Кырӟаломе кырӟанъёс —
Вуиз Выль армы!

Припев.

Кылъёсыз Фёдор Суворовлэн

Крезьгурез Римма Шкляевалэн

Мед ортчозы уно аръёс,
Ӧвӧл мӧзмыт дунне вылын.
Пиштэ толэзь, кизилиос
Паймытыса дауръёсын.

Припев:

Нош Выль арен, Выль, Выль арен
Ӟечкыласьком огмес огмы.
Шудэн-бурен, ванен-бурен
Мед уломы, сӥзиськомы.

Кызьы малпам, озьы ик медло…
Быдэсмозы ӟеч малпанъёс.
Соин туннэ ворекъяло
Тыр ӝӧк вылын но сюсьтылъёс.

Припев:

Нош Выль арен, Выль, Выль арен!
Шампанской тыл кадь мед шудоз!
Сюлэмъёсты сюлэмъёсын
Эшшо ӟырдыт мед герӟалоз.

Вунэтомы вань ӝожмытсэ,
Ӟечез нош котьку мед улоз.
Кисьтэ тол куазь но мылкыдзэ,
Гӧрен пурӟо арамаос.

Припев:

Нош Выль арен, Выль, Выль арен
Ӟечкыласьком огмес огмы.
Вань ӝожмытэз кылёз, вуноз…
Ӟечез нош котьку мед улоз.