Россиын кузьмаськонэн нюръясько

Удмурт Дунне
By Удмурт Дунне Декабрь 5, 2016 09:43

Кызьы Россия но дуннеысь мукет кунъёс нюръясько коррупцилы пумит?

Туннэ кунмы кузьмаськонэн нюръяськонлы бадӟым саклык висъя. Угось кивалтӥсьёс — пичиез но, бадӟымез но — мурт ваньбурез кышкатэк капыръяны ӧдъязы. Берло вакытэ гинэ следовательёслэн син шоразы йӧтӥзы ини трос чиновникъёс: Санкт-Петербурглэн азьвыл вице-губернаторез Марат Оганесян, Переславль-Залесск городлэн мэрез Денис Кошурников, Кемеров улослэн вице-губернаторез Александра Данильченко…

Малы соос уг кышкало лушкаськыны? Оло, ужпум Уголовной кодексмы бордын? Кылсярысь, Россиын кузьым басьтӥсьёсты-сётӥсьёсты вите 8 арозь пытсэт. Нош Америкаын сыӵеосты 15 арлы кечат-вамат укно сьӧры келяло. Та сяна, котькуд кивалтӥсьсы арлы быдэ полиграф пыр потэ.

Асьме дорын эскерон ужъёс, шӧдске, куддыр вылтӥз ортчо. Ма, кыӵе эскерон луоз, асьсэос югдурез утисьёс, следовательёс, улосъёсын кивалтӥсьёс законъёсты тӥяны уг кышкало ке? Кемалась ӧвӧл кырмемын Россиысь Югдурез утёнъя министерствоысь полковник Дмитрий Захарченко. Солэн улон интыысьтыз шедьтэмын 120 миллион доллар. Коми улослэн азьвыл йыръёссы Владимир Торлопов но Вячеслав Гайзер кунлэсь лушкаськон вылысь… уллё кылдытӥллям!

Россилы, оло, адӟем кароно Нидерландылэсь? Отын кивалтӥсьёс ужаны кутскемзылэсь азьвыл одно ик… школае ветло. Дышетӥсьёс соосты лушкаськытэк, пӧяськытэк ужаны дышето. Соин но, оло, Европаысь кунъёс пӧлын Нидерландыын та йыружъёс тужгес ӧжыт пумиськыло.

Кунамы улӥсьёслы но шаплыгес кариськоно. Кылсярысь, Лымшор Кореяын коррупциен нюръясько быдэс калыкен ӵош. Кин мае кылэ, адӟе, соку ик кулэ интые жингыртэ. Котькуд иворез со нуналэ ик тыпыр-тапыр эскеро.

Быдэс дуннелы абдрамон югдур Китайын. Бюджет коньдонэз тус-тас карись, укыр бадӟым кузьым басьяны яратӥсь кивалтӥсьёссэс отын ыбыло. Адямилэсь улонзэ лушкем уг талало — тае возьмато чагыр экран пыр быдэс кунлы. Сюрсъёсын-сюрсъёсын кивалтӥсьёссы пуко тюрьмаын. Таӵе учыръёсты алон вылысь Китайын пиналъёсты пичиысен ик дышето. Шуо: эшедлэсь лушкаськон — со урод сям, нош кунлэсь ваньбурзэ капыртон — йыруж. Озьы ке но китайёс пӧлын коррупционеръёс малы ке уг кулэсмо.

Удмурт Дунне
By Удмурт Дунне Декабрь 5, 2016 09:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<