Россия кужмогес! Президент калыклы оскон пыӵатэ

Удмурт Дунне
By Удмурт Дунне 29 декабря, 2016 15:46
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

23-тӥ декабре Россилэн Президентэз В. Путин ортчытӥз бадӟым пресс-конференция. 3 но ӝыны час пала со кыстӥськиз, 47 юан сётэмын вал.

В. Путин: берло толэзьёссэ уждун тыронэн югдур умой пала берыктӥськыны кутскиз ни, оскон вань, со умойгес но умойгес луоз шуыса.

Калыклэсь мылкыдзэ юанъя центр ивортӥз: Россиын улӥсьёс пӧлысь 51 процентэз кылзӥзы Президентлэсь вераськемзэ. Таос пӧлысь 88 процентэз сое туж умоен лыдъязы — таӵеез ӧй вал на, азьвыл тэргаськисьёс тросгес шедьылӥзы. Калыклэн йыраз уката кылиллям пенсиен, странамылэн мукет кунъёсын кусыпъёсыныз, оборонаез юнматонэн герӟаськем юанъёс. Москваысь журналистъёслэн юанъёссы тросгес бергазы экономика, политика котырын, нош улосъёсысь вуэмъёс, котьку сямен, Президентлэн тодаз вайытыны выризы пыдлось сэрегъёсысь югдурез. Кылсярысь, екатеринбургъёс куро сюрес лэсьтыны, крымъёс — выль лэсьтӥськись выжлы ним малпаны, кировъёс — улосазы поттэм вузъёсты рыноке поттыны юрттыны. Владимир Путин котькудӥзлы ӝот-ӝот валэктонъёс сётъяз. Кытӥ-отӥ серекъятӥз но. Но тросгес — странамы азинскоз шуыса, оскон пыӵатӥз.

Кылсярысь, нырысетӥ юан ик герӟаськемын вал ортчись арлы йылпумъянъёс лэсьтонэн, Россилэн экономикаеныз. В. Путин ӧз ваты, таӵе юанэз возьма вал шуыса, соин ик журналистъёсын пумиськон азьын лыдпусъёсты эшшо огпол юромо учкем-ӵошатэм на.

— Кылем арын чакламлэсь 3,7 процентлы ӧжытгес вуз поттӥм вал, — шуиз со. — Туэ но чакламлэсь ичигес, но ог 0,6-0,7 процентлы гинэ. Экономика юнма, тросэз удысъёс азинсконъёс басьто. Шуом, машина лэсьтон, капчи промышленность, переработкаен вырисьёс шумпотто. Нимысьтыз пусъёно гурт удысэз. Кылем арын гуртоос чакламлэсь 2,6 процентлы тросгес сиён-юон поттӥзы ке вал, туэ — ог 4 процентлы луоз. Берло аръёсы нянь будэтӥсьёс 117 миллион тонна пала урожай басьтыны кутскизы, таӵеез ноку ӧй вал. Но туэ та лыдпус 119 миллионозь вуиз ни. Бадӟым тау гуртоослы!

В. Путин верамъя, экономикаын югдурез возьматэ инфляцилэн кулэсмемез но:

— 2015-тӥ арын инфляция укыр бадӟым луиз. Со герӟаськемын вал гурт удысын импортозамещениез пыӵатыны кутскемен. Но та ужпумез быдэстӥм! Туэ дунъёс ог 5,5 процентлы будозы. Таӵеез ӧй вал на — тужгес пичиез инфляция пусъемын 2011-тӥ арын — 6,1 процент. Малпасько, матысь дыре сое 4 процентозь но вуттыны пӧрмытом.

Куд-ог журналистъёс пышкылыны выризы ик: 5-тӥ ар ӵоже ни, пе, май указъёсты быдэсъяны выриськом-выриськом… Нош уксё ӧвӧл. В. Путин но шып ӧз кылзы. Май указъёсты быдэстонлы, пе, бюджетын уксё быдэсак  чакламын. Со сяна, 2017-тӥ но матэктӥсь 2018-тӥ, 2019-тӥ аръёслы бюджетын мувӧйлы дун баррелезлы 40 доллар чакламын. Тырмыт коньдон вуоз промышленностез азинтонлы. Уката тросгес — обороналы. Бен, вань, пе, сюлмаськытӥсь ужпумъёс. Кылсярысь, калыклэн доходъёсыз ичиёмизы, озьыен, вузъёс ӧжытгес басьто, со шӧдӥське инвестициос вылын но. Но берло толэзьёссэ уждун тыронэн югдур умой пала берыктӥськыны кутскиз ни, оскон вань, со умойгес но умойгес луоз шуыса.

Россиын бадӟым саклык висъяськыны кутскиз коррупциен нюръяськонлы. Таин валче но журналистъёслэн юанъёссы кылдӥзы, Алексей Улюкаев пумысен мылкыдзэ тодэмзы потӥз. Президент ӝот-ӝот вераз: чиновникъёслы зӥбытгес асьсэдыз возёно. Нош экономикая азьвыл министрен В. Путин вераськымтэ, лыдъя: оперативной службаослэсь материалъёссэс адӟиз, со тырмыт А. Улюкаевез интыысьтыз мозмытон понна. Суд ваньзэ чаклалоз, нош дырызлэсь вазь йылпумъянъёс лэсьтонлэн кулэлыкез ӧвӧл.

Владимир Путин паймемзэ вераз США-ысь кивалтӥсьёслэн вераськемзылы: Америкалэн армиез туннэ дуннеын тужгес кужмоез луэ, пе.

— Таин нокин уз споръяськы, — вераз Президент. — Но мон шуисько: Россия Федерация туннэ кужмогес котькуд агрессорлэсь. Кин со агрессор? Со — Россия Федерация вылэ урдскыны быгатӥсь. Эшшо одӥг пол верасько: ми соослэсь кужмогес!

УД

Удмурт Дунне
By Удмурт Дунне 29 декабря, 2016 15:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<