Пичи кышномуртлэн бадӟым сюлмыз

Удмурт Дунне
By Удмурт Дунне Декабрь 3, 2016 12:05
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Мария Никитина — Удмуртиысь дышетон удысысь дано ужась,  Г. Ходырев нимо премилэн лауреатэз, Пичи Пурга ёрослэн дано нылыз.

Мария Захаровна Пичи Пурга ёросысь Вуж Мӧнья школаын пиналъёсты удмурт но ӟуч кылъёслы визьнода. Вуттӥське шаертодонлы сӥзем музейзэс узырмытыны, «Вордскем кыл» журналын методикая ужъёссэ печатланы, удмурт газет-журналъёслы гожтӥськонэз радъяны, шаерысьтымы дано адямиосын пумиськонъёс ортчытъяны, литературая кружок нуыны. Россиысь «Дышетон» нацпроектын 2 пол вормисе потылӥз.

Ужез яратон

— Вордӥськи Пичи Пурга ёросысь Итэшпочинка (Быстрово) гуртын. Пичи дыръям анае но тятяе малы дышетӥзы — ваньмыз улонам кулэ луиз, — веранзэ мытӥз Мария Захаровна. — Семьяямы мон бадӟымез вал. Бӧрсям вордӥськизы Гафи сузэре, Женя но Ваня вынъёсы. Соосты будэтон вылам усиз, анае но тятяе угось уен-нуналэн колхозын ужазы. Милемыз но сьӧразы ӵемысь кутылӥзы. Ӵукна 5 часын ыж ӵышкыны потӥськомы, собере — жадимы-а, ӧм-а — книга-тетрадьёсмес кутыса, Итэшпочинкаысь Вуж Мӧнья школае пыдын вамыштӥськомы. Нош отчыозь ог 5 иськем. Сюресъёс но, автобусъёс но ӧй вал на соку.

Анае-атае туж ужасесь вал. Соин ик ми но — нылпиоссы — соос кадь луыны тыршылӥмы. Гурт котырысь ужез сузэр-вынъёсыным тыпыр-тапыр быдэстылӥмы. Огпол паймытыны малпамы: азбарез чылк-чылк ӵужимы но, кусо кутыса, сузэреным бакчае потӥмы. Анаен тятя угось куспазы вераськизы вал, турынэз турнано шуыса. Но соосты шумпоттыны ӧм быгатэ. Шоналски гинэ… кусое сузэрелэн пыдаз шальк! мертчиськиз. Кӧня вирыз вияз! Но паймымон — мон но, Гафие но ӧм кышкатске. Корка пырыса, пыдзэ таӵ-таӵ бинялтӥмы. Кенешимы: анай-атаез пӧяломы — азбар џужонъямы пыд вылаз пуклё вылысь тӥр усиз шуомы. Соос оло оскизы, оло ӧз, но милемлы кыл ӧз сюры соку. Атаймы чурыт, ӝот-ӝот сямо вал ке но.

Пичи дыръяз анаеныз, атаеныз (паллянысез) но сузэр-вынъёсыныз.

Мукетыз учыр но син азям. Ульчаын — тулыс. Бакча вӧзысьтымы шурысь тудву ӵаш поттыса кошке. Меми но тятя колхозысь амбар котырын утялско. Малпай: таос отысь жадьыса вуозы, озьыен, скалэз аслым сюдоно-люктано! Пыри коргидэ. Саникен турын куштыса вуттӥ-а, ӧй-а — скал монэ лопырак ӝутӥз ук! Сюрыз кунулам мертчиськиз. Сокугес гинэ вордћськем кунянзэ лушкало кожаз-а, мар-а. Кызьы коргидысь потӥ — уг тодӥськы ини. Но визьмы тырмем кесиськем киме анаелэн чылкыт кышетэныз керттылыны. Гусеничной тракторе пуксьытыса, монэ келязы Вуж Мӧньяла, отысен — Пичи Пурга больницае. Ку вылын гинэ ошиськыса кыллись киям 16 вурыс лэсьтӥзы. Берло ини эмъясьёс мемиелы вераллям, бадӟым вирсэрыз, пе, вандӥськымтэ, соин кизэ быдэс кельтыны быгатӥмы.

Мар эшшо тодам на? Анае туж кибашлы вал. љытъёсы чильпаське-керттћське, нош мон солы шара книга лыдњисько. Синкылиез потыса ик, «Катя» повестез кылзћськылћз. Мынам но улонэ сыџе ик вал, шуылћз. Егит вакытаз Итэшпочинка гуртысь вань кышномуртъёслы удмурт дэремъёс вурылэм. Мон но солэсь адӟем карыны малпай. Мырдэм шедьтэм 5 метр басмазэ, аслым удмурт дэрем вуро ай шуыса, куаӵ-куаӵ вандылӥ. Отысь, оло, 4-5 но дэрем потысал. Но мыным одӥгезлы но со ӧз тырмы… Озьы ке но вуриськыны дыши. Удмурт кун университетэ дышетскыны аслам вурем дэременым мынћ.

Туннэ валасько ини: анае но тятяе милемлы — нылпиоссылы — ужез яратон мылкыд пыӵатӥзы лӧпкытъян пыр. Тодӥськомы вал: бадӟым уж лэсьтӥмы ке, милемыз одно ик  шумпотон возьма. Тятя быдэс коробка вафли басьтыса вае вал ини. Солэн ческыт шӧмыз туннэ но тодам. Ма, колхоз но мылкыдмес ӝуткалляз. Кин гужем каникулъёсы отын тыршиз, 1-тӥ куарусёнэ кузьымен бертылӥз. Мыным ачим быдӟа ик мунё сётӥзы вал. Ой, кыӵе соку аслым шудо потылӥ. Анайме-тятяме но колхоз лӧпкытӥз — трос аръёс ӵоже ӟеч ужамзы понна «Запорожец» машинаен тау каризы.

Дышетсконэз гажан

— Школаын котьку ӟеч дышетски. Одӥг ужрадъёслэсь но ӧй кыльылы. Я эктон, я кылбур малпаса, Света эшеным Итэшпочинка гуртозямы 4-5 час но бертылэммы вань. Пыдын, куасэн бызьылонъя, гимнастикая ӵошатсконъёсты но ӧй палэнтылы. Толыке вал яке ӧй — али уг валаськы ни. Но тодӥсько на: физкультурая дышетӥсьмы Виктор Николаевич Семёнов удысэз сярысь сыӵе тунсыко маде вал, пыдъёс асьсэос тапыр бызьылыны-тэтчаны кутско.

Зэм, дышетӥсьёсын та улонын мыным туж удалтӥз. Анна Фадеевна Петрова, Мария Михайловна Кузьмина, Нина Семёновна Имполитова покчи классъёсысен ик мыным кылэз но литератураез гажан мылкыд пыӵатӥзы. 6-тӥ классысен ветлыны кутски удмурт писательлэн Владимир Самсоновлэн литературая кружоказ. Школаямы со, кружок сяна, крезьгуръя урокъёс но нуылӥз. Киысьтыз баянэз ноку но ӧз усьылы. Озьы солэн жингрес гуръёсыз улсын вордӥськизы нырысетӥ гожъямъёсы. Итэшпочинка гуртэ сярысь зарисовка гожтӥ но «Дась лу!» газетэ ыстӥ. Газетлэн соку редакторез, нылпи кылбурчи Герман Ходырев гожтэт ыстэм. Ужед умой пӧрмем, пе, азьланяз но гожъяськы. Та кылъёс мынэсьтым мылкыдме эшшо но зол ӝутӥзы!

Егит семья.

Владимир Александрович но быгатэ вал пиналъёсын одӥг кыл шедьтыны. Гуртъёсы автобусъёс азьвыл уг ветло вал. Озьы ке но, кытысь ке машина шедьтыса, Самсонов милемды ӵемысь Иже потталляз. Удмурт газет-журналъёслэн редакциосазы, телевидение, радиое пырталляз.

Одӥг пол уж сётӥз. Кисыысьтыз вуюись кадь чебер ручказэ поттӥз но шуиз: гожтэ, пе, та сярысь. Ручка зэмзэ но выжыкылысь кадь вал. Таӵезэ ми ӧм ик адӟылэ. Соин ик, сое ушъяса, кин кылбур пӧраз, кин зарисовка гожтӥз. Мон но кылбур дасяй. Аслым со туж ӟеч потӥз. Нош Самсонов ваньмылэсь ужъёсмес учкиз но бакомытӥз: огеныды но, пе, соглаш ӧвӧл. Ручказэ выльысь кияз кутӥз но пушкысьтыз пастазэ поттыны кутскиз. Нош отын пастаез чик но вылымтэ. Озьы со ручка пыр милемлы визь-нод сётӥз: чакласьконо, пе, нырысь ик адямилэсь сюлэм чеберзэ учконо.

Классэн кивалтӥсьмы Лидия Васильевна Абрамова милемыз выльзэ, тунсыкозэ утчаны дышетћз. Сое ёртытэк, ужрадъёслы дӥсь но, кырӟан но, эктон но — ваньзэ асьмеос дасяса пукылӥмы. Ноку вунонтэм кылизы Ленинской зачётъёс, экскурсиос. Дышетћсьёс, пиналъёс, анай-атайёс — одћг семья кадь.

Азьло аръёсы школаын нылпиослы ог-огдэ гажан, юрттыны тыршон сямъёсты пионер, комсомол огазеяськонъёс пыр зол пыӵатыны быгато вал. Производственной бригадаос пиналлы азьтэмъяськыны маза ик ӧз сётылэ. Устооссэ ӟеч кузьымен пусйылӥзы. Сыӵеос пӧлы мон но сюрылӥ. 8-тӥ классын дышетскыкум, Москвае путёвка кузьмазы. Кунмылэсь шоркарзэ адӟыса, мыным вань инвисъёс усьтӥськизы кадь.

Гожъяськонэн висён

— Школаез йылпумъяса кытчы дышетскыны пырон сярысь юанъёсын йырме ӧй тӥялля. Малпанэ угось одӥг вал — Удмурт кун университетысь филология факультет. Отчы капчиен дышетскыны пыри. Группаям трос тунсыко адямиос, вуоно гожъяськисьёс, журналистъёс шедизы: Рашид Хайдаров, Михаил Федотов, Анна  Федотова, Валентина Гребина, Николай Танаев, Пётр Сергеев но мукет.

Школаын сямен ик, университетлэн но улоназ быдэсак зыми. Соку ик преподавательлэн, кылбурчилэн Даниил Яшинлэн «Пинал куараос» кружоказ ветлыны кутски. Дышетскон вискамы ветлылӥмы «Советской Удмуртия» газетлэн литобъединенияз. Сое писатель Семён Самсонов нуэ вал. Трос удмурт азьветлӥсьёсын милемыз тодматӥз.

Практикаосы ортчылӥзы «Дась лу!» газетын. Герман Ходыревен ӵош пӧртэм ёросъёсысь нылпиос доры поталлямы. Пинал усточиослы гожтэтъёс ысъяллямы. Паймисько вал: арнялы быдэ редакцие быдэс песьтэр гожтэтъёс, ужъёс вуыло, ява.

Но гожъяськон гинэ мыным тунсыко ӧй вал. Гимнастика мылкыдме бичатыса улӥз. УдГУ-ысь гимнастикая секцие нырысьсэ лыктӥ но тренерлы быгатэмме возьматӥ. Сюлэмы дырекъя: кутоз яке уз меда? Угось гимнастика секцие огшоры студентъёс уг сюро. Быгытъёс юнэсь луыны кулэ. Монэ учкемез бере дышетӥсьмы юа: спортъя кыӵе школаез йылпумъяды? Паймиз, огшоры школаын физкультураез сыӵе ӟеч дышето шуыса.

Озьы валаса но ӧй вуы, кызьы университетын 5 ар ортчиз. Кыӵе удысэн азьлань улонме герӟано? Школае яке газет-журналэ ужаны интыяськоно? Та юанъёсын йырме тӥяно ӧз луы. Лёня туганэ — вуоно кузпалы — ӝот-ӝот вераз: уломы, ужаломы Вуж Мӧньялан!

Саклыкез кырмон

Нылпиосын.

— Вуж Мӧнья школаын мыным инты ӧз сюры. Со понна шумпотыса кутӥзы нылпи садэ. Покчиосын ужаны капчи ӧй вал — группаям 43 нылэз-пиез вайизы. Та тэшкылиосты мон ноку но уг вунэты. Нырысь садын соосты 5 ар визьмай. Собере, школае ужаны выжыса, 11-тӥ классозь дышетӥ на. 30 ар ужатозям, 5 выпуске вал.

Азьло аръёсы дышетӥсьёс усьтэм урокъёс туж ӵем ортчытъяллязы. Нырысетӥ урокам Калыкез дышетонъя министерствоысь, роноысь ужасьёс, Герман Ходырев пыризы. Мынам пыдъёсы шальтразы. Дыр соку туж кема кыстӥськиз кадь. Нылпиосын «Бубылиос» кылбурез озьы но, тазьы но сэрттӥмы-пертчимы, суред но лэсьтӥмы, кырӟан но кырӟамы. Но час шоры учкисько но — урок бырытозь, 10 минут кылемын. Мар кароно? Паймыса, укно шоры жӧлмаса, сылӥсько. Нош урамын лымы пырыос лэй-лэй васько. Соку ик йырам малпан чилектӥз: нылпиосын школа азбаре потоно, пырыос — со сыӵе ик бубылиос ук! Озьы ваньмы потӥмы, инкуазь чеберез учкыса, сылӥмы. Пиналъёслы гинэ ӧвӧл, куноослы но уроке кельшиз. Тау шуыны кулэ Нина Фоминична Михайловалы. Та дышетӥсь мыным, али гинэ та удыс борды кутскисьлы, керӟегъяськытэк валэктылӥз школа улонлэсь радлыксэ.

Мукетаз урокам нош ик куноос вуизы. Вань пиналъёсы лад-лад пуко, косэм ужез быдэсто. Огез пияше гинэ йырзэ ялан берыкъя. Туж адӟемез потэ, кыӵе дышетӥсьёс тыбыр сьӧраз пуко. Эн берыкъяськы шуыса, огпол, кык пол, куинь пол верай. Уг кылзӥськы. Ньылетӥзэ вераны умой ӧвӧл ини кадь. Дораз матэктӥ но макессэ пичияк чепыльтӥ. Урок йылпумъяськем бере ини огез дышетћсь  та пияш доры лыктэм но юам: кыӵе дышетскиськод? Умой, вазем таиз. Нош дышетӥсед кельше-а? Кельше, пе, но только ӧжыт чепылляське вылэм…

«Пичи Пурга ёрослэн дано нылыз» ним сётыку

Школаын кӧня ужасько ини, литературая кружок ялан нуисько. Пиналъёслэн гожъямъёссы сомында люкаськемын — коть али ик 10 книга потты. Бадӟым юрттэт сётӥзы «Пурга кизилиос» литобъединение, сое радъясьёс Никвлад Самсонов, Зинаида Титова. 19 ар пала пиналъёсты арнялы быдэ Пичи Пурга черкогуртэ нуллылӥ. Нылпиос отысь котьку ӝутскем мылкыдын бертылӥзы. Гожъямъёссы муресь но муресь луылӥзы.

Туннэ шумпотӥсько, ас вакытаз монэ гожъяськыны дышетӥзы шуыса. Школаын та быгатонлыктэк номыр карыны кадь потэ. Угось нылпиослэсь саклыксэс ялан бордад возьыны туж секыт. Соосты нуналысь нуналэ выленыз паймытоно.

Удмурт литература уроклы методикая ужъёсы трос люкаськизы. Маргарита Долганова дышетӥсен кужыммес огазе карыса, 5-тӥ-9-тӥ классъёслы чаклам «Дышетонъя юрттэт» бичет поттӥмы. Таӵе книгазы удмурт кыллы но литературалы визьнодасьёслэн ӧй вал на.

Школаысьтымы музеямы но нылпиослэн куараоссы уг чалмыло. Отын трос ужрадъёс ортчытъяськом. Вуж Мӧнья котырысь вань гуртъёслэсь кылдэмзэс, инты нимъёсты, Быдӟым ожын быремъёслэсь, отчы пыриськемъёслэсь нимтулъёссэс, улэм-вылэмзэс гожъяса кельтӥмы. Пересьёслэсь юалляськон вискамы ик музеямы трос вашкала арбериос шедьтӥмы.

Шонер визьман

— Туннэ валасько ини: мурт пиналъёсты визьмаса, асламъёсызлы — Лена но Оля нылъёсылы, Женя пиелы — саклыкме туж ичи висъяськем. Соос монтэк будӥзы шуи ке, уг янгыша. Умой-а, урод-а — тросэзлэн дышетӥсьёслэн адӟонзы сыӵе.

Лена но Оля ялан ӵошен шудылӥзы, ужазы, дышетскизы. Женя вынзэс но соос ик будэтӥзы. Соин ик мыным паймымон: кыкназы но бырйизы гожъяськонэз. Йылпумъязы Удмурт кун университетысь журналистикая факультетэз, «Удмурт дунне» газетын ужало. Женяе атаезлэсь адӟем кариз, техникаез яратон мылкыдыз вормиз.

Туннэ, ортчем аръёсме, дышетэм пиналъёсме малпаса, аслэсьтым юасько: шонер-а меда визьнодалляй? Совето Союзысь тодмо педагог, писатель Антон Макаренко  шуылоз вал: «Самой умой визьнодан — со куке дышетћсь ялан пиналъёс пќлын, соослэн улонэнызы улэ». Озьы ке, соку шонер, дыр, ужай но ужасько. Туннэ но пиналъёсты школаын шумпотыса пумитасько, лумбыт соос котырын бергасько.

Валентина ЕМЕЛЬЯНОВА

 

Удмурт Дунне
By Удмурт Дунне Декабрь 3, 2016 12:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<