Оптимизация вуиз парламентэ

Удмурт Дунне
By Удмурт Дунне 8 декабря, 2016 14:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Кун кенешлэн сессияз

Депутатъёс соглаш кариськизы лыдзэс кулэстыны

29-тӥ ноябре ортчиз Кун Кенешлэн сессиез. Ужрадэ пыриськиз Удмуртилэн Тӧроез Александр Соловьев.

Уксё люкылыны
капчи ӧвӧл
Кун Кенешысь сессиос ортчытъян залын буш интыос ӧй вал, депутатъёс сяна, отчы люкаськемын министерствоосысь но ведомствоосысь кивалтӥсьёс, город Думаослэн но ёрос Кенешъёслэн йыръёссы но мукетъёсыз. Угось сессиын эскерем ужпумъёс пӧлын вал туж бичатӥсьёсыз но. Кылсярысь, бюджетэн герӟаськемъёсыз. Озьы 1-тӥ лыдӟемен воштонъёс пыртэмын 2016-тӥ арлы бюджетэ: солэн доход люкетэз ог 350 миллион манетлы, расход люкетэз ог 771 миллион манетлы йылтэмын. Казнае ватсаса коньдон вуиз ваньбурлы выт но федерал казнаысь вуэм субсидиос, субвенциос чотын.
— Ватсаса коньдон висъяны дэмлаське Транспортъя но сюрес хозяйствоя министерстволы калыкез нуэм-ваем понна субсидиос чотын, — вераз коньдон ужпумъёсъя министр Станислав Евдокимов. — Мугорез кыдатонъя, спортъя но егитъёсын ужан политикая министерстволы — Россиын но калыккуспо ӵошатсконъёсын вормисе потэм спортсменъёслы но тренеръёссылы коньдон кузьым сётон, спортклубъёсты возён понна но мукет. Печатья но ивор вӧлмытонъя агентстволы — газетъёс кун заданиез быдэсъяны мед пӧрмытозы шуыса но мукет.
Нырысетӥ лыдӟемен эскеремын 2017-тӥ арлы но 2018-тӥ-2019-тӥ аръёслы бюджетлэн проектэз но.
— Инфляция 5,5 процент котыр луоз, мувӧйлэн дуныз — 40 манет, 1 доллар 61 манет дунъяськоз, — пусйиз экономикая министр М. Зайцев. — Уждун ог 4-5 процентлы йылоз, калыклэн доходъёсыз — 0,2 процентлы. Улон-вылон огсыр луоз 2018-тӥ арысен, нош ӟечгес луыны кутскоз 2019-тӥысен.
— Бюджетысь 64 процентэз, яке 37 миллиард манет, социальной удыслы чакламын, — итӥськиз коньдон ужпумъёсъя министр С. Евдокимов. — Уждун, пособиос, пенсиос дыраз тыриськозы. Коньдон вань удысъёслы кылем арын мындагес ик чакламын. Азьланьтӥськоз оптимизация, кылем арын со чотын казнае ватсаса 534 миллион манет пыртыны луиз вал, туэ 9 толэзь ӵоже — 403 миллион манет.
Нырысетӥ лыдӟемен кутон азьын бюджетлэн проектаз 233 ӵектонъёс-ватсанъёс вуэмын, соослэн дунзы — 7,5 миллиард манет. Та пӧлысь 4,4 миллиард манетэзъя огкылэ вуэмын ни. Тужгес сюлмаськытӥз лэсьтӥськон удыс — солы 975 миллион манет гинэ учкемын вал. Но Правительствоын, Удмуртилэн Тӧроез дорын кенешонъёс бере эшшо 2 миллиард манет ватсаськоз.
Озьы туннэ нуналлы 2017-тӥ арлы бюджетлэн проектэзлэн доход люкетэз — 57 миллиард 83 миллион манет пала, расход люкетэз — 58 миллиард 875 миллион манет, дефицитэз — 1 миллиард 800 миллион манет котыр.
Кӧня коньдон вуоз Россиысь — умой-умой тодмо ӧвӧл. Но бюджетэз кыкетӥ лыдӟемен юнматытозь, 13-тӥ декабрёзь, лыдпус шараяськыны кулэ.

Кылёзы кужмоосыз гинэ
Кӧня депутат луыны кулэ Кун Кенешын пайдаё ужан понна: 90 яке 60? Сессиын та ужпумез эскерыку, мылкыдзэс вераны куриськисьёслэсь черод кылдӥз.
Депутатъёсты кулэстон сярысь кичӧлтонэн ог 2 ар талэсь азьло нырысь ик потӥз вал депутат Андрей Осколков. Та рад но солы нырысь ик кыл сётӥзы.
Со тодэ вайытӥз: УАССР-ысь Верховной Советын 200 депутат лыдъяськиз, Кун Кенешын нырысь 100-зэ кельтӥзы, собере — 90-зэ. Калыкен быръемъёслэсь лыдзэс кулэстон чик ӧз шӧдӥськы, пе, парламентлэн ужамез вылын. Али вакыт сыӵе — котькытын оптимизация ортче, кун служащийёслэсь но лыдзэс кулэсто. Малы депутатъёсты ӧжытгес кельтонтэм?
— Куд-огез вера: ӧжытгес кылизы ке, депутатъёсты калык шергес адӟылоз, — вераз А. Осколков. — Но али но куд-ог депутатъёс бырйисьёсынызы уг пумиськыло!
— Мон Кун Кенешын 18 ар ни, — итӥськиз депутат Э. Касимов. — Уг ваты, нырысетӥ аръёсаз ужан радлыкез уггес валаськы вал. уно коньдон быдтылӥ бырйисьёслэсь куронъёссэс быдэсъянлы. Но валэктӥсь сюриз: депутат коньдон люкылонэн вырыны кулэ ӧвӧл, со калыклэсь улон-вылонзэ умоятыны юрттӥсь законъёс кылдытъяны кулэ. Соку элькунын вань улӥсьёслы умой луоз. Соин ик малпасько: депутат зэмос профессионал луыны кулэ, Кун Кенешын со уен-нуналэн мед ужалоз.
Депутатъёслэсь лыдзэс кулэстонлы дурбасьтыса, озьы ик вераськизы Ф. Юнусов, Н. Кузнецова, А. Прасолов но мукетъёсыз. Соослэн мылкыдэнызы соглаш ќз кариське Ю. Бычков, В. Чепкасов депутатъёс: малы, пе, али быдтоно сое, мар пайдаё ужа?
Федерация Кенешлэн ёзчиез, Удмуртилэн азьвыл президентэз Александр Волков ӧз ваты:
— Мон но, Бычков, Чепкасов депутатъёс пала дурбасьтыса, керӟегъяськонозь, оло, вуысал. Но уйбыт ӧй кӧлы, ялан малпаськи, кызьы умойгес луоз. Депутатъёслэсь лыдзэс кулэстон пала дурбасьто бере Удмуртилэн Тӧроез А. Соловьев но, Кун Кенешлэн Тӧроез В. Невоструев но — соослэсь мылкыдзэс лыдэ басьтоно.
Удмуртилэн Тӧроез Александр Соловьев, вераськонъёсты йылпумъяса, шуиз:
— Мон уг малпаськы, депутатъёс ӧжытгес кылизы ке, уродгес ужалозы шуыса. Оскисько: тужгес кужмоосыз, ужез валасьёсыз одно кылёзы. Юалляськонъёс возьматӥзы: бырйисьёс озьы ик дурбасьто депутатъёслэсь лыдзэс кулэстон понна. Общественной палата но таӵе малпанэз умоен лыдъя.
А. Соловьев ватсаз, депутатъёслэсь лыдзэс кулэстӥм ке но, бырйисьёслэсь куронъёссэс быдэстонлы али мында ик уксё луоз.
— Депутатъёслы али араз быдэн 1 миллион манетэн висъяське, — шуиз со. — Ваньзэ тае кельтом. Но округъёс йылӥзы ке, иське, коньдон но тросгес висъяськоз — кинлы ке 2 миллион, кинлы ке 2 но ӝыны миллион манет — округлэн быдӟалаезъя.
Куара сётон радъяськиз шара: депутатъёслэсь лыдзэс кулэстон понна дурбасьтӥз 65 депутат, пумит луиз 12-ез но мылкыдзэ веранлэсь возиськиз 11-ез.
Сессия бере журналистъёслы малпанзэ вераз Кун Кенешлэн Тӧроез Владимир Невоструев но:
— Берло дыре элькунамы тросэз воштӥськиз, кылсярысь, ужа Контрольной комитет, ёросъёсын но кылдытэмын коньдон кутонэз эскерись отделъёс. Ужа адямилэсь правооссэ утёнъя оскем мурт. Кылдытӥм Егитъёслэсь парламентсэс — вуоно кивоштӥсьёсты дасянъя туж ӟеч школа. Азинтӥськом уртче ужанмес муниципалитетъёсысь депутатъёсын. Озьы Кун Кенешысь депутатъёс соос пыр но калыклы мытынгес луо.
Ватсаз на: депутатъёс кулэсмизы ке но, Кун Кенешысь вань удысъёс азинскозы. Озьы 2017-тӥ арын сентябре быръём на 60 депутат гинэ. Нош быръёнъя округъёс тодмо луыны кулэ 2017-тӥ арын феврале.

Кин пенсие потоз бергес
Мукетыз ужпум — чиновникъёслэсь пенсие потон дырзэс воштон.
— Асьмеос ум быгатӥське таӵе законопроектэз кутытэк кельтыны, — вераз Кунэз радъянъя но интыысь аскивалтонъя ялан ужась комиссилэн кивалтӥсез Наталья Кузнецова. — Угось сое тупатӥськом Россиысь законъя.
Выль куронъёс тупа-тӥсько кун, улосвыл но муниципал кивалтэт ёзъёсын ужасьёслы, озьы ик политикаен герӟаськем должностьёсын ужасьёслы — депутатъёслы, сенаторъёслы но мукетъёсызлы. 2017-тӥ арын 1-тӥ январьысен нылкышноослы пенсие потон дыр тупатӥськоз 55 арес но 6 толэзь, воргоронъёслы — 60 арес но 6 толэзь. Нош 2032-тӥ арысен — 63 арес нылкышноослы но 65 арес воргоронъёслы.
Эшшо одӥг воштӥськон герӟаськемын ужан стажен. 2026-тћ арысен пенсие потћсь чиновникъёс понна со 20 ар луыны кулэ, татчыозь 15 ар вал. Воштћськон улонэ пичиен-пичиен пыџалоз.
Пенсие потон дырен герӟаськем законлы проект учкемын ке нырысетӥ лыдӟемен, «Удмурт Элькунысь Правительство сярысь» законлы проект кыкетӥ лыдӟемен юнматэмын ни. Отын гожтэмын, маин вырыны кулэ Правительство, кыӵе куронъёс со азе пуктӥсько. Табере тупен-тупен пусъемын, мар понна Кивалтэтэз кыл кутон улэ но кыскыны луэ. Выль законъя Кун Кенешысь депутатъёс Правительстволэн Тӧроезлы, озьы ик министерствоослэн но ведомствоослэн кивалтӥсьёссылы оскымтэзэс вераны быгатозы.
— Бен, ужысь соосты мозмытыны быгатоз Удмуртилэн Тӧроез гинэ, — веразы депутатъёс. — Но Кун Кенешлэн мылкыдыз шара верамын луоз.

Элина Кумачёва

Удмурт Дунне
By Удмурт Дунне 8 декабря, 2016 14:45 Updated